Pweng ke Forfor Luti, Nohfuhmpuh 2015
Nguhn Muhtahl in Ahtol Kowos
Kuht kuh, fin kuht moul suwohswohs kac, in eis mwe insewowo luhn Nguhn in wi kuht, tiac kais kuhtuh na pacl tuhsruhk pengana lwen.
Tamuhlwel ac tahmtahel sacohk wiyuck, nga arulacna srui in wi kowos ke lwen Sahpuht se inge ke toeni luhlahp ke Alu luhn Leum. Nga puhla, oacna kowos puhla, Nguhn, Nguhn Muhtahl ma fahkwack ma pwacye ke kahs ma kuht lohng ac yuckkihn tari.
Srihpac luhk mihsenge pa in ahkyohkye kena lowos ac oaru lowos in eis mwe sang ma olweyucklac nuh sin kais sie sesr tukun kuht pacptaislac. Ke ahkkweyeyucklac lasr kuht lohng kahs inge: “Eis Nguhn Muhtahl.”1 Ke pacl sacn, moul lasr uh eklac ma pahtpaht.
Kuht kuh na, kuht fin moul fal kac, in eis mwe insewowo luhn Nguhn in oasr yohrohsr, tiac ke kais kuhtuh pacl na oacna ma kuht puhla mihsenge uh, tuhsruhk pacl nuh kwewa. Kowos etuh ke kahs ke pruhe ke kuhfa luhn Leum ohiyac ma olwelah se inge ahkfalyeyucklac: “O God, Pahpah Ma Pahtpaht, kuht siyuck Sum ke inen Wen nuhtum, Jisus Kraist, in ahkinsewowoye ac ahkmuhtahlye puhret se inge nuh sin mwet nuhkwewa suc ipeis kac; tuh elos in kuh in mongo in esam monun Wen nuhtum, ac ahkkahlwemye nuh Sum, O God, Pahpah Ma Pahtpaht, tuh elos insese in eis nuh faclos inen Wen nuhtum, ac esamuhl pacl nuhkwewa, ac liyacacng masap Lal ma El tuh sang nuh selos.”
Na tuhkuh olwelah wolacna se: “Tuh Nguhn Lal in kuh in weluhlos pacl nuhkwewa” (D&C 20:77; ahkuhtweyac wo ituckyang).
Nguhn in wi kuht pacl nuh kwewa kalmac pa kuht in eis kahsruh ac kolyuck sin Nguhn Muhtahl ke moul lasr lwen nuh kwewa. Kuht kuh, ke sie srihkasrak, in eis kaiyuck sin Nguhn in kuhtanglah mwe sruhf in oruh ma koluk.
Ke srihpac sacn muhkwena, fihsracsr in liye lah efuh mwet kuhlwacnsap luhn Leum srihke na in ahkyohkye kena lasr in alu nuh sin God ke toeni ke kuhfa luhn Leum lasr. Kuht fin ipeis kuhfa luhn Leum ke luhlahlfongi, na Nguhn Muhtahl fah kuh in kahsrwe kuht ac elos suc kuht luhngse ke mwe sruhf ma tuhkuh yohkyohkelihk ac fususeni uh.
Ahtolyuck luhn Nguhn Muhtahl oruh ma wo uh in ohi sesr ac mwe sruhf uh in tiac arlac pihrihk kuht. Ma sacn na sahp fal in oruh kuht in kena eis Nguhn nuh yohrohsr pacl nuh kwewa.
Oacna ke Nguhn Muhtahl ahkkweye kuht liki ma koluk, El oacyacpac use kuh nuh sesr in akihlen ma pwacye liki ma stuhuh. Ma pwacye yohk srihpac uh ahkkweyeyuck muhkwena ke fwackyuck sin God. Etwacack lasr mwet uh ac orekmakihnyacn nuhnak lasr ac suhfallac na. Kuht moul ke sie pacl ma mwet finne lahlmwetmwet emet uh fah upac in akihlen ma pwacye liki ma kikiacp.
Leum El luti Mwet Sap Lal Thomas, suc kena mwe loh ma el kuh in liye ke Sifilpac Moulyak ke kahlyac kihnet luhn Mwet Lahngo, tuh fwackyuck pa mwe loh sef liki na: “Jesus el fahk nu sel, Thomas, ‘Ya kom lulalfongi mweyen na kom liyeyu? Insewowo elos su tiana liyeyu a elos lulalfongi!’” (John 20:29).
Ma pwacye ma ahkkahlwemye ohiyacn fohlohk nuh sin God fah ahkkweyeyuck sin Nguhn Muhtahl. Kuht tiac kuh in som nuh ke imac ac liye Pahpah ac Wen sramsram nuh sin mwet fuhsr Joseph Smith. Wacngihn mwe loh facluh kuh sramsram in amaci fal kuh in oakiyac lah Elijah el tuhkuh oacna olweyucklac in ahkkweye ki luhn pristut ingena ma sruokyuck ac okekmakihnyuck sin sie mwet pahluh moul, Thomas S. Monson.
Ahkkweyeyuck luhn ma pwacye tuhkuh nuh sin mukul se kuh muhtwacn se nuhtin God suc eis suwohs in eis Nguhn Muhtahl. Mweyen ma stuhuh ac kikiacp kuh in fihliyucki ye muhtahsr oacna sie pacl, kuht enenuh pihrihkyuck luhn Nguhn Pwacye in kahsruh ke pacl in ahlohlohl.
Ke mempucr ke U luhn Mwet Sap Singucul Luo, George Q Cannon el kwacfe muh kuht enenuh in suk pacl nuh kwewa tuh Nguhn in wi kuht. El olwelah, ac nga wi pac olwelah se, kuht fin suk inkacnek sacn, “wacngihn pacl [kuht] ac eis etuh suhfal” ke ma pwacye, “wacngihn pacl in tahfuhluo kuh oasr ke lohsr,” ac “luhlahlfongi [lasr] ac fokoko, ac engan [lasr] … sesseslah.”2
Kuht enenuh kahsruh sacn pacl nuh kwewa ke ahtolyuck luhn Nguhn Muhtahl in wi kuht ke kuhtwe pac srihpac sahyac. Misac luhn mwet luhngseyuck ac kuh in sikyak tiac sulkackihnyuck. Mwe loh sin Nguhn Muhtahl uh pa tuhkahkihn lah pwacye oasr sie Pahpah Lucng luhngkuhlwacng ac sie Mwet Lahngo sifil moulyak ma use nuh sesr finsrak ac ahkkweyeyuck ke sie misac luhn mwet luhngseyuck. Fahkwack luhlahlfongi sacn enenweyuck in sasuc ke misac sikyak an.
Na, ke srihpac pucspucs, kuht enenuh Nguhn Muhtahl in wi kuht pengana pacl. Kuht kena kac, tuhsruhk kuht etuh ke mukwikwi uh lah ma se inge tiac fihsracsr. Kais sie sesr nuhnkuh, fahk, ac oruh ma ke moul lasr ma kuh na in ahktoasrye Nguhn. Leum El luti kuht lah Nguhn Muhtahl fah wi kuht pacl nuh kwewa ke insiyacsr sesseslah ke “luhngse muhtahl” ac ke ma wo oasr ke nuhnak lasr tiac tui (liye D&C 121:45).
Nuh selos suc muhnahs ke ohiyac wo fuhlwact enenweyuck in ahkfalyeyuck nuh ke mwe sang luhn Nguhn in wi, nga sang mwe kahsruh inge. Kowos tuh puhlakihn pacl puhs pihrihkyuck luhn Nguhn Muhtahl uh. Sahp sikyak nuh suwos mihsenge.
Kowos kuh in liye pacl ingacn ke moklweyuck oacna fihtac luhn luhlahlfongi oacna Alma el luti (liyeAlma 32:28). Yukiyac sie fihtac. Kowos kuh in oruh ke kowos ukwe moklweyuck ma kowos puhla. Pihrihkyuck se ma ohi emet uh pa in etuh lah meac God El ke kowos in oruh. Fin pa in moli sie tahfuh singucul kuh in som muhtwacta yurun mwet kawuck ahsor, kom in oruh kac. Ma na oasr uh, orwaclah. Ke kom ahkkahlwemye luhpan insacnweacng lom in ahksol, Nguhn fah suhpuh pac pihrihkyuck luhn ma God El ke tuh kom in sapkihn Sel.
Ke kowos ahkos, moklweyuck sin Nguhn fah tuhkuh fususeni, fototoi na ac in wi kuht pacl nuhkwewa. Kuh lowos in sulwaclah ma pwacye fah ahkyohkyeyucklac.
Kowos kuh in etuh ke moklweyuck in mukwikwi inge nuh Sel tuhkuh sin Nguhn lain na ke kena lowos sifacna. Ke moklweyuck uh ukwe ma Mwet Lahngo ac mwet pahluh moul ac mwet sap Lal fahklah tari, kowos kuh in sulwaclah in ahkos ke luhlahlfongi. Na Leum El ac suhpwaclah Nguhn Lal in wi kowos.
Nuh ke srihkasrak, kowos fin eis moklweyuck in ahkfuhlwactye lwen Sahpuht, fweyac na ke pacl luhman upac, God El fah suhpwaclah Nguhn Lal in kahsruh.
Kahsruh se ingacn tuhkuh nuh sin pahpah tuhmuhk ah yac somlah ah ke orekma lal uh usacllah ne Australia. El muhkwena ke sie Sacnri, ac el kena in eis kuhfa luhn Leum. El koflah konwacack kuhtwena innek in etuh ke toeni luhn Mwet Luhlahlfongi ke Lwen-sahflah uh. Na el muhtwacwacack fahsr. El pruhe ke kais sie inkacnek in etuh yen elac for nuh kac uh. Tukun el fahsr ac pihn innek uh ke lusen ao se, el tui in sifil pruhe. El puhlakihn pihrihkyuck in forwacng nuh ke soko suhngan inkacnek an. Tiac paht el muhtwacwacack lohng on ma tuhkuh ke falfucl ten ke iwen apartment fototo we ah. El ngwet nuh lun winto sac ac liye mwet ekahsr suc muhta sisken tepuh se afyucflac ke sie nuknuk fasrfasr ac wi tray ke kuhfa luhn Leum uh.
Ingena, sahp ma se inge tiac luhman yohk nuh suwos, tuhsruhktuh ma na wolacna se nuh sel. El etuh ke olwelah ke pruhe in kuhfa luhn Leum ahkfalyeyuck: “Esamuhl pacl nuhkwewa, ac liyacacng masap Lal ma El tuh sang nuh selos, tuh Nguhn Lal in kuh in weluhlos pacl nuhkwewa” (D&C 20:77).
Pa inge srihkasrak sefanna ke pacl se el pruhe na oruh ma Nguhn El fahk nuh sel ke ma God El kena elan oruh. El kalweni oruh ke yac somlah ah, oacna kowos ac nga ac fah oruh. Wacngihn pacl el sramsram ke ohiyacn nguhn lal. El kalweni na in oruh ma nuh sin Leum ma el pihrihkyuck in oruh uh.
Kuhtwena pacl kuhtuh u luhn Mwet Luhlahlfongi ke Lwen-sahflah uh siyuck sel in sramsram nuh selos uh, el oruh. Finne mwet 10 kuh 50 kuh el fin ullac. El fahkwack luhlahlfongi lal ke Pahpah, Wen, Nguhn Muhtahl, ac ke mwet pahluh uh pacl nuh kwewa Nguhn siyuck sel in oruh.
Pahng lal ma fuhlwact emet ke Alu uh oasr ke kahsruh fuhlwact luhn Stek Bonneville, ke el imoni imac luhn stek, ac el luti kuhlahs se ke Sacnri Skul. Ke yac somlah ah, ke el enenuh uh, Nguhn Muhtahl oasr yohrohl in weluhl.
Nga tu sisken pahpah tuhmuhk ke infuckihl luhn sie lohm ono. Ninac kiyuck, muhtwacn kiyacl ke yac 41, oan fin pet an. Kuht liyacl ke ao ekahsr. Kuht muhtwacwacack in liye wacngihnlac luhn kweok som liki muhtahl uh. Kufun paho ke pahol uh, ma orekweni oacna fihsihk uh, ikacklah. Pahol puhtati monglac siskacl.
Kweok ke yac pucspucs luhn cancer uh sahflah. Nga liye ke muhtahl sie ngwetngwet ke mihs. El momong kuhtuh, na sie mongi, na oan tiac mukwikwi. Kuht tu we sano in liye lah fin mohngohl e sifilpac tuhkuh.
Sahflahiyac, Pahpah el kahkahsrihk fahk, “Tuhlihk muhtwacn srihsrihk sac fohlohk nuh lohm ah.”
El tiac tuhng. Pa ke srihpen Nguhn Muhtahl El tuh sang petsaciyac kahlwem nuh sel emet lah suc el uh, yen el tuhkuh we uh, mwet el eklac oacna uh, ac yen elac som nuh we uh. Nguhn El ahkkweye nuh sel pacl pucspucs ke sie Pahpah Lucng luhngse, sie Mwet Lahngo suc kuhtanglah kuh luhn misac, ac ma pwacye ke sili lun tempuhl el akacsruhi yurin muhtwacn kiyacl ac sucu lal
Nguhn El ahkkweyacl ke pacl loes ke ohiyac wo ac luhlahlfongi lal ma ahkfalye ma lal in fohlohk nuh ke lohm inkuhsrao ma el ac esamyuck muh el ekihn olwelah luhn sie tuhlihk wolacna ac painyuck nuh iwacl wi ohi ke pihngwac.
Nuh sin pahpah tuhmuhk uh, ma ingacn tiac som ekihn finsrak muhkwena. Nguhn Muhtahl El ahkpwacyei ma inge nuh sel.
Ingena, sahp kuhtuh ac fahk lah kahs lal ac petsac ke nuhnak lal ke lohm inkuhsrao se pa finsrak wo muhkwena, nuhnuhnkuh sesuwohs sin mukul tuhma ke pacl luhn misac an. Tuhsruhk el etuh ma pahtpaht pwacye ke ohiyac sefanna kowos kuh in etuh.
El mwet kuhtaklah ke science se suc suk ke ma pwacye ke facluh ke moul mahtuh lal nohfohn. El orekmakihn kuhfa luhn science fal in ahkfuhlwactyeyucklac sin mwet weluhl fin facluh nohfohn. Yohklac ma el oruh ke chemistry tuhkuh ke el petsaclah ke nuhnak molecules mukwikwi an na ahkkweye liye lal ke experiment lun sie laboratory.
Tuhsruhktuh el ukwe inkacnek siena ke ma pwacye yohk srihpac emet nuh sel ac nuh sin kais sie sesr. Sin Nguhn Muhtahl muhkwena kuht kuh in liye mwet ac ma sikyak oacna God El liyaclos.
Mwe sang se ingacn kalweni ke lohm ono uh tukun muhtwacn kiyacl ah misac. Kuht oracni ma luhn ninac kiyuck ah ac som nuh lohm ah. Pahpah el tui in fahk kuloh nuh sin nurse ac taktuh nuh kwewa kuht ohsun nuh se ke kuht fahsr nuh ke stosah an. Nga esam lah nga puhla, ke ahngyahng kuhtuh, lah kuht enenuh in som muhkwelac ke ahsor lasr uh.
Nga akihlen ingena lah el liye ma Nguhn Muhtahl muhkwena kuh in ahkkahlwemye nuh sel. El liye mwet oacna lihpufacn uh suhpweyuckme sin God in karihngihn muhtwacn kiyacl. Sahp elos liyaclos sifacna ke health-care professionals, tuhsruhktuh Pahpah el fahk kuloh nuh selos ke kuhlwacnsap lalos ahol Mwet Lahngo.
Moklweyuck luhn Nguhn Muhtahl kalweni yohrohl ke kuht ohsun ke lohm sin pahpah ac ninac kiyuck ah. Kuht sramsram ke mihnit ekahsr lun lohm ah. Pahpah el siyuck in som sifacna nuh ke infuckihl lal ah.
Tukun mihnit ekahsr, el fohlohkoh nuh lun lohm ah. Isracsr se lal ah kuhlwacng. El fahsr nuh yohrohsr ac kahkahsrihk fahk, “Nga elyah lah Mildred el ac muhkwena sun facluh luhn nguhn. Nga muh el ac puhla tuhlac yurin un mwet pucspucs.”
Na muh el enganwack fahk, “Nga tuhfahna pruhe ingena. Nga etuh lah Mildred el wona. Ninac kiyuck ah oasr we in sonuhl.”
Nga esam lah nga isracsr ke el fahk ma ingacn, in petsacelah ke nuhnak uh ninac mahtuh kiyuck, niyac fototo lal in fahsr, kahsruhsr nuh ke un mwet uh in oruh lah el oasr in ohsun nuh sel ac sruokyac tuhlihk muhtwacn ac nahtuhl se ke el tuhkuh.
Ingena, sie srihpac pahpah tuhmuhk el siyuck kac ac eis ahkkweyeyuck se inge pa ke srihpen el pruhe ke luhlahlfongi pacl nuh kwewa e ke pacl se el tuhlihk ah. El etuh tari ohiyac ma top uh tuhkuh nuh ke insiyacl in sang karihngihnyuck ac kolyuck. Wi pac na pahlah ke pruhe, el etuh ma suhmuhslah ac kahs luhn mwet pahluh moul uh. Na el akihlen puhsrwen mahmah luhn Nguhn uh, suc ma kowos sahp puhlakihn mihsenge.
Wi luhn Nguhn oruh yohk likina in ahkkweyacl ac koluhl. Iwaclah luhn Jisus Kraist ekuhluhllah. Ke kuht insese nuh ke olwelah se ingacn in lwelah Nguhn in oasr yohrohsr pacl nuh kwewa, Mwet Lahngo El kuh in sang ahknwacsnwacsyeyuck enenweyuck in eis moul ma pahtpaht, mwe sang wo emet ke mwe sang luhn God uh (liye D&C 14:7).
Kowos esam kahs luhn Mwet Lahngo: “Na pa inge masap: Auliyak, kowos nuhkwewa fin facluh, ac tuhkuh nuh Yuruk ac pacptaislac ke Inek, tuh kowos in kuh in ahknwacsnwacsyeyucklac ke eisyacn Nguhn Muhtahl, tuh kowos in kuh in tulac nwacsnwacs ye muhtuhk ke lwen sahflah.” (3 Nephi 27:20).
Masap ingacn tuhkuh ke olwelah se inge sin Leum:
Ac ingena, pwacyena, pwacyena, nga fahk nuh suwos, sang luhlahlfongi lasr nuh sin Nguhn suc kol kuht in oruh ma wo,—ahok, in oruh ma pwacye, in fahsr ke inse puhsisacl, in nuhnuhnkuh suwohs; ac pa inge Nguhn luhk.
Pwacyena, pwacyena, El fahk nuh sesr, El ac use nuh sesr Nguhn Lal, ma ac kuh in ikacslah nuhnak lasr ac nwacklah nguhnasr ke engan liye (liye D&C 11:12–13).
Nga fahkwack luhlahlfongi ke mwe loh luhk lah Pahpah God El moul, ac Jisus Kraist sifilpac moulyak sac El kol Alu Lal, tuh Prestuhn Thomas S. Monson el sruok ki nuh kwewa luhn pristut, ac fwackyuck sin Nguhn Muhtahl uh kol ac ahkkweye mempucr puhsisacl ke Alu luhn Jisus Kraist luhn Mwet Luhlahlfongi Lal ke Lwen-sahflah.
Nga tahfuh in fahkwack luhlahlfongi nuh suwos lah mwet wolacna suc sramsram nuh sesr mihsenge uh ekihn mwet loh luhn Leum Jisus Kraist, oacna mempucr ke U luhn mwet Sap Singucul Luo an, pahngonyuck sin God Nga etuh lah Nguhn pa pwacnuhl Prestuhn Monson elan pahngonuhlos uh. Ac ke kowos porongwelos ac fahkwack luhlahlfongi lalos uh, Nguhn Muhtahl El ahkkweye ma nga fahk inge nuh suwos. Elos pahngonyuck sin God. Nga tahpuhkuhlos ac luhngse elos ac etuh tuh Leum El luhngse elos ac fah kahsrwelos ke kunohkohn lalos uh. Ac nga fahk ke inen Leum Jisus Kraist, amen.
© 2015 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/15. Ahkkweyeyucklac ke lweng: 6/15. Lwenglah luhn Visiting Teaching Message, November 2015. Kosraean. 12591 868