Naan in Katak an Kōrā ro, Nobōm̧ba 2015
Jetōb Kwojarjar eo āinwōt Eo M̧ōttam̧
Jemaron̄, eļan̄n̄e jej mour erreeo, naaj bōk kōjeram̧m̧an eo an Jetōb ilo kōj, ejjab wōt kiiō ak aolep iien.
Ij m̧ōņōņō in pād ippāmi ilo Jabōt in ilo kweilo̧k in eļap an Kabun̄ in an Irooj. Iaar en̄jake, āinwōt kar kwe, Jetōb in kam̧ool kōn m̧ool eo an naan ko jaar ron̄jaki im kar al kaki.
Jibadbad eo aō rainin ej n̄an kōļapļo̧k ikdelel im bōklekōt eo am̧ n̄an bōk menin letok eo kar kallim̧ur kake n̄an kōj kajjojo ālkin ad peptaij. Ilo tōre eo rekar kapene kōj jaar ron̄ naan kein: “Bōk Jetōb Kwojarjar.”1 Jān tōre in, mour ko ad rekar oktak n̄an indeeo.
Jemaron̄, eļan̄n̄e jej mour erreeo, naaj bōk kōjeram̧m̧an eo an Jetōb eo ippād, ejjab wōt kiiō ak innām, āinwōt ilo baj en̄jake ko rekabwilōn̄lōn̄ āinwōt ewōr ippād rainin, ak aolep iien. Kom̧ jeļā naan ko jān jar in kwojkwoj eo im wāween an kallim̧ur eo kar kūrm̧ool: “O Anij, Jemām Indeeo, kōmij kajjitōk Ippam̧ ilo etan Nejūm̧, Jisōs Kraist, n̄an kōjeraam̧m̧an im kokwōjarjar pilawā in n̄an jetōb ko an ro otemjej rej bōk m̧ōttan, bwe ren maron̄ m̧ōn̄ā ilo aer ememej ānbwinnin Nejūm̧, im kam̧ool n̄an Kwe, O Anij, Jemām Indeeo, bwe rem̧ōņōņō in bōk ioer etan Nejūm̧, im keememej E iien otemjej, im kōjparok kien ko An ko Eaar liļo̧k n̄an er; bwe Jetōb eo An en maron̄ pād ippāer iien otemjej.”
Innām kallim̧ur in aiboojoj ej waļo̧k: “Bwe ren maron̄ iien otemjej bwe Jetōb eo An en maron̄ pād ippāer” (K&B 20:77; eoon eo eaorōk kar kobaiktok).
Bwe Jetōb eo en pād ippād iien otemjej ej n̄an bōk tōl im jipan̄ eo an Jetōb Kwojarjar ilo mour eo ad kajjojo raan. Jemaron̄, n̄an waanjon̄ok, kakkōļ jān Jetōb eo n̄an jum̧ae kapo eo n̄an kōm̧m̧ane men eo enana.
Kōn jibadbad in ejenolo̧k, epidodo n̄an lo ta eo ro rikarejeran Irooj rekar kajjieon̄ n̄an kōļapļo̧k ikdelel eo ad n̄an kabun̄jar n̄an Anij ilo kweilo̧k in kwojkwoj ko ad. Eļan̄n̄e jej bōk m̧ōttan kwojkwoj eo ilo tōmak, Jetōb Kwojarjar eo enaaj maron̄ in kōjparok kōj im ro jej iakwe er jān kapo ko me rej itok eļap jen jon̄eer im remakijkij.
Jem̧jerā eo an Jetōb Kwojarjar ej kōm̧m̧ane ta eo eļapļo̧k an em̧m̧an im kadikļo̧k kapo. Menin eaikuj kōm̧m̧an bwe jen kile karbab eo an Jetōb bwe en pād ippād iien otemjeļo̧k.
Ilo an Jetōb kōkajoor kōj ņae men eo nana, Ej barāinwōt letok n̄an kōj kajoor n̄an jeļā em̧m̧an jān nana. M̧ool eo ej make wōt aorōk ej kam̧ool wōt jān revelesōn jān Anij. Ad armej maron̄ kōlmenļo̧kjeņ kōn jokālet ko im kōm̧m̧an jokālet im ad kōjerbal jeļā an kanniōk ejjab bwe. Jej mour ilo juon tōre me meļetļet enaaj bōk jikin m̧ool kōn m̧oņ.
Irooj eaar katakin Rijilōk eo An Tomas, eo eaar lukkuun kōņaan kam̧ool kōn Jerkakpeje eo an Rilo̧mo̧o̧r ilo an un̄ūr kinej ko An, revelesōn in ej m̧ool: “Jisōs e ba n̄an e, Tomas, bwe kwaar lo Eō, kwaar tōmak: E m̧ōņōņō ro raar jab lo, im rej tōmak”(Jon 20:29).
M̧ool ko rej kwaļo̧k iaļ eo ad ļo̧k n̄an kapijuknen ippān Anij jān Jetōb Kwojarjar. Jejjab maron̄ ilo̧k n̄an bulōn wōjke ko im lo Jemed im Nejin kōnono n̄an Josep Smith. Ejjeļo̧k menin kam̧ool ak jabdewōt n̄ūrbōktak maron̄ kwaļo̧k bwe Elijah kar kallim̧ur kake n̄an itok im leļo̧k kii ko an priesthood eo kabwijere im kōjerbale kiiō ippān juon rikanaan emour, Thomas S. Monson.
Kapen m̧ool eo ej itok n̄an juon ļaddik ak leddik nejin Anij eo emōj an bōk mālim eo n̄an bōk Jetōb Kwojarjar. Kōnke m̧oņ im riab ko remaron̄ itok n̄an kōj ilo jabdewōt iien, jej aikuji juon kapen jān Jetōb in M̧ool eo n̄an kōjparok kōj ilo iien pere kein.
Ke eaar juon uwaan Doulul eo an Jon̄oulruo Rijilōk ro, George Q. Cannon kar rōjan̄ bwe jen kajjieon̄ bwe Jetōb eo en pād ippād. Eaar kallim̧ur, im ij kallim̧ur barāinwōt, bwe eļan̄n̄e jej kōm̧m̧ane, “eban jabwe meļetļet” an m̧ool in, “eban ilo pere ak marok,” im ad “tōmak enaaj kajoor, [ad] lan̄lōn̄ … eobrak.”2
Jej aikuji jipan̄ eo jān jem̧jerā eo an Jetōb Kwojarjar aaet n̄an bar juon un. Mej an eo ejitōn bōro emaron̄ jidimkij an waļo̧k. Ej juon kam̧ool jān Jetōb Kwojarjar kōn m̧ool eo kōn Jemedwōj Ilan̄ eo ej iakwe im Rilo̧mo̧o̧r eo ekar jerkakpeje eo ekar letok n̄an kōj kōjatdikdik im kaenōm̧m̧an ilo an juon eo ejitōn bōro jako. Naan in kam̧ool in eaikuj pād ippād n̄e mej ej bōk jikin.
Kōn menin, kōn elōn̄ un ko, jej aikuji jem̧jerā eo an Jetōb Kwojarjar. Ewōr ad kōņaan bōke, ak aaet jej jeļā jān en̄jake bwe ejjab pidodo kōjparoke. Kōj kajjojo jej kōļmenļo̧kjeņ, kōnono, im kōm̧m̧ani men ko kajjojo raan in ad mour me remaron̄ in kainepataik Jetōb eo. Irooj eaar katakin kōj bwe Jetōb Kwojarjar eo enaaj m̧ōttad n̄e būruwōd enaaj obrak kōn iakwe-em̧ool im n̄e erreo en kainōknōk ļōmņak ko [ad] ilo ejjeļo̧k m̧wijkōk (lale K&B 121:45).
N̄an ro rej lokjak kōn jon̄ak in im emen in aikuj n̄an maron̄ bōk menin letok eo an Jetōb eo, ij lewaj kōkapilōklōk in. Ekar wōr iien ko kwar en̄jake im̧we eo an Jetōb Kwojarjar. Emaron̄ kar waļo̧k n̄an kwe rainin.
Komaron̄ likūti ilo kōlmenļo̧kjeņ iien kein reim̧we āinwōt ine in tōmak eo Alma ekar kōnono kake (lale Alma 32:28). Katōk kajjojo iaer. Komaron̄ kōm̧m̧an menin jān am̧ ļoor en̄jake eo kwaar en̄jake. Im̧ōk eo elukkuun aorōk enaaj bwe kwōn jeļā ta eo Anij ekōņaan bwe kwōn kōm̧m̧ane. Eļan̄n̄e ej n̄an kōļļā juon m̧ōttan jon̄oul ak n̄an loļo̧k juon m̧ōttam̧ eo ebūrom̧ōj, kwoj aikuj kōm̧m̧ane. Jekdo̧o̧n ta eo, kwon kōm̧m̧ane. N̄e kwoj kwaļo̧k am̧ m̧ōņōņō in pokake, innām Jetōb enaaj jilkinwaj eļap ļo̧k im̧we ko kōn ta eo Anij ekōņaan bwe kwōn kōm̧m̧ane.
Ilo am̧ pokake, im̧we ko jān jetōb renaaj emakijkij aer itok, naaj epaake eok im naaj m̧ōttam̧ aolep iien. Kajoor eo am̧ n̄an kālet jim̧we naaj ļapļo̧k.
Komaron̄ jeļā n̄e imwe kein n̄an kōm̧m̧ani n̄an E rej jān Jetōb eo im jān ikdeleel ko am̧ make. N̄e im̧we ko rej jokkon wōt juon ippān ta eo Rilo̧mo̧o̧r im rikanaan ro An remour im rijilōk ro rekar ba, komaron pokake ilo lōke. Innām Irooj enaaj jilkintok An Jetōb n̄an ippam̧.
N̄an waanjon̄ok, eļan̄n̄e kwoj bōk juon im̧we n̄an kōjparok raan in Jabōt, men̄e emaron̄ pen, Anij enaaj jilkintok An Jetōb n̄an jipan̄.
Jipan̄ in eaar itok n̄an jema iiō ko ļo̧k ke ekar etal n̄an Australia ikkijen jerbal eo an. Eaar make iaan ilo juon Jabōt, im eaar kōņaan bōk kwojkwoj eo. Eaar jab maron̄ lo jabdewōt meļeļe ko kōn iien jar ko an Armej ro Rekwojarjar. Kōn menin eaar jino etetal laļ ļo̧k. Eaar jar ilo kajjojo iaļ n̄an jeļā ia eo en etal ie ļo̧k. Ālkin an etetal im etal ilo iaļ ko jet ium̧win juon awa, eaar bōjrak im bar jar. Eaar en̄jake juon im̧we bwe en wanlaļļo̧k wōt n̄an street eo. Innām eaar jino ron̄ beļļo̧k in al itok jān tulaļ in juon apartmen epaake. Eaar reilo̧k ilo wintō eo im eaar lo jet rej jijet epaake juon tabōļ kar kalbubu kōn m̧ōttan mouj im tōōre in kwojkwoj ko.
Kiiō, emaron̄ in jab lukkuun wōr tokjen n̄an kom̧, ak eaar juon men eo eļap tokjeņ n̄an e. Eaar jeļā bwe kallim̧ur eo ilo jar in kwojkwoj eo eaar kūrm̧ool: “Keememej E iien otemjej, im kōjparok kien ko An ko Eaar liļo̧k n̄an er; bwe Jetōb eo An en maron̄ pād ippāer iien otemjej” (K&B 20:77).
En̄in kar juon waanjon̄ok in juon iien ke eaar jar innām ekar kōm̧m̧ane ta eo Jetōb eaar jiron̄ e kōn ta eo Anij ekōņaan bwe en kōm̧m̧ane. Eaar kōjparoke ilo aolepān iiō ko, āinwōt kwe im n̄a naaj maron̄ kōm̧m̧ane. Eaar jab kōnono kōn im̧we eo an. Eaar wōnm̧aanļo̧k wōt im kōm̧m̧ani mendikdik ko n̄an Irooj ko ekar im̧we n̄an kōm̧m̧ani.
N̄e jet kurup in Armej ro Rekwojarjar rej kajjitōk ippān n̄an kōnono n̄an er, ej kōm̧m̧ane. Jekdo̧o̧n n̄e 10 ak 50 armej ak ewi jon̄an an m̧ōk. Eaar kwaļo̧k naan in kam̧ool eo an kōn Jemed, im Nejin, im Jetōb Kwojarjar, im rikanaan ro n̄e Jetōb ej im̧we n̄an kwaļo̧k.
Kūr ko an ilo Kabun̄ in kar ilo Bonneville Stake high council, kar ribōk wūt ilo jikin kallib ilo stake eo, im kar katakin ilo kūlaaj in Jabōt Jikuul eo. Ilo aolepān iiō ko, n̄e ej aikuji, Jetōb Kwojarjar ej pād ijeņ āinwōt juon m̧ōttan.
Iaar jutak iturin jema ilo ruum̧ in aujpitōļ eo. Jinō, kōrā eo ippān 41 iiō rūttoon, kar babu ilo peet eo. Kōm̧ kar mije ium̧win elōn̄ awa ko. Kōm̧ ar jino loe metak ko ippān me rej waļo̧k iturin mejān. Addi ko ilo pein, raar jino nokjōk, kar m̧ōjņo̧ļo̧k. Pein rekar jino erļo̧kļo̧k.
Metak in kāānjōr kein rekar pād ippān ium̧win jon̄oul iiō ko raar jem̧ļo̧k. Iaar lo aenōm̧m̧an ilo mejān. Eaar bōk jidik kūtwōn, innām kōtļo̧k, innām babu wōt. Kōm̧ ar jutak wōt im kōttar n̄an lale eļan̄n̄e enaaj bar bōk kitwōn.
Āliktata, Jema eaar ba, “Jiron̄ in emōj an jepļaakļo̧k n̄an kapijuknen.”
Eaar jab jan̄. Bwe kōnke Jetōb Kwojarjar eo eaar leļo̧k n̄an e juon pija ealikar kōn kar wōn e, ia eo ej itok jān e, ta eo eaar erom̧, im ia eo ej ilo̧k n̄an e. Jetōb eo eaar kam̧ool n̄an e elōn̄ alen kōn Jemedwōj Ilan̄ eo elap iakwe ippān, ak Rilo̧mo̧o̧r eo eaar rube kajoor eo an mej, im kōn m̧ool in liāp an tam̧peļ eaar kōm̧m̧ane ippān kōrā eo ippān im baam̧le eo an.
Jetōb eaar kwaļo̧k n̄an e m̧okta ļo̧k bwe em̧m̧an eo an im tiljek kar kōkarbab e n̄an maron̄ jepļaak n̄an kapijuknen eo ilan̄ ijo naaj kar keememej e āinwōt juon ajri in kallim̧ur eaiboojoj im kar karuwainneik n̄an kapijuknen kōn utiej.
N̄an jema, menin ekar ļap jān juon kōjatdikdik. Jetōb Kwojarjar eaar kam̧ool n̄an e.
Kiiō, jet remaron̄ ba bwe naan ko an im men ko ilo kōļmenļo̧kjeņ eo an kōn kapijuknen eo ad ilan̄ raar jet ļōmņak bajōk, ilo tarpok in ļōmņak an juon em̧m̧aan eo ejako ļio pālele. Ak eaar jeļā kōn m̧ool eo indeeo, wāween eo wōt komaron̄ jeļā kake.
Eaar juon rimāletle eo ekar pukot m̧ool eo kōn laļ in ilo aolepān mour eo an. Ebwe an kar jeļā kilen kōjerbal kein jerbal ko an rimāletlet bwe ro jet ren kile e ipeļaakin laļ in. Men eo eļap an kar kōm̧m̧ane ej chemistry kar itok ilo kōļmenļo̧kjeņ eo an n̄an kōtm̧akū innām kapen loļo̧kjeņ eo ilo juon lāāp.
Ak eaar ļoor juon oktak n̄an lo m̧ool ko me eļapļo̧k aer aorōk n̄an e im n̄an kōj kajjojo. Kōn Jetōb Kwojarjar jemaron̄ lo armej ro im men ko āinwōt an Anij lo er.
Menin letok in eaar wōnm̧aanļo̧k wōt ilo aujpitōl ālkin mej eo an kōrā eo ippān. Kōm̧ kar aeni aolep men ko an jinō im būki n̄an m̧weo. Jema eaar bōjrak im kam̧m̧oolol nōōj im taktō ro ilo iaļ eo am̧ ļo̧k n̄an wa eo. Ij keememej iaar en̄jake bwe kōm̧ij aikuj makeļo̧k iaam̧ ilo būrōm̧ōj eo am̧.
Kiiō iaar jeļā bwe eaar lo men ko me Jetōb Kwojarjar wōt emaron̄ kar kwaļo̧k n̄an e. Eaar lo armej ro āinwōt enjeļ ro kar jilkintok jān Anij n̄an lale kōrā eo ejitōn bōro ippān. Raar maron̄ lo er make āinwōt rikōjparok ro retijem̧ļo̧k, ak jema eaar kam̧m̧oolol er ilo etan Rilo̧mo̧o̧r eo.
Im̧we eo an Jetōb Kwojarjar eo eaar wōnm̧aanļo̧k wōt ippān ke kōm̧ij tōparļo̧k m̧weo im̧ōn jinō im jema. Kōm̧ ar kōnono jidik ilo ettōņaak eo. Jema eaar ilo̧k n̄an ruum̧ eo an.
Ālkin jejjo minit, eaar bar itok n̄an ettōņaak eo. Eaar ettōn̄ dikdik. Eaar jibadōk tok kōm̧ im ba, “Iaar inepata n̄e Mildred emake iaan ļo̧k n̄an laļ eo an jetōb. Ij ļōmņak emaron̄ kar jebwābwe ibuļōn jarlepju eo.”
Innām eaar ba, “Ej kab mōj aō jar kiiō. Ijeļā em̧m̧an an Mildred pād. Jinō eaar pād ijeņ n̄an wōnm̧ae.”
Ij keememej an ettōn̄ dikdik ke ej ba bwe, ij antooneļo̧k an jibu, ne ko neen rekadu, m̧ōkaj ļo̧k ibwiljin jarlepju eo n̄an lukkuun lale n̄e epād n̄an wōnm̧ae e im atbokwij nejin ilo an tōkeekļo̧k.
Kiiō, juon iaan un ko jema ekar kajjitōk kake im ekar būke im ekar kaenōm̧m̧ane ej kōnke aolep iien ej jar ilo tōmak jen ke eaar ajri jidikdik. Ekkā an bōk uwaak ko me ej en̄jake ilo būruwōn n̄an leļo̧k aenōm̧m̧an im tōl. Bar juon n̄an bōk imminene an jar, eaar jeļā jeje ko rekwojarjar im naan ko an rikanaan ro remour. Kōn menin eaar maron̄ kile unoojdikdik ko an Jetōb eo, eo me komaron̄ kar en̄jake rainin.
Jem̧jerā eo an Jetōb eo eaar ļaplok an kaenōm̧m̧an im tōl e. Ekar ukōt e kōn Pinmuur eo an Jisōs Kraist. Eļan̄n̄e jej errā kōn kallim̧ur eo n̄an bōk Jetōb eo ippād iien otemjej, Rilo̧mo̧o̧r eo enaaj letok n̄an kōj kokwojarjar eo emenin aikuj n̄an ad mour indeeo, mennin letok eo eļaptata ian mennin letok ko an Anij (lale K&B 14:7).
Kwoj ke keememej naan ko an Rilo̧mo̧o̧r eo: “Kiiō en̄in ej kien eo: Kom̧in ukeļo̧k, kom̧ aolep jeban ko an laļ, im itok n̄an Eō im peptaij ilo Eta, bwe kom̧in maron̄ kokwōjarjar jān bōke Jetōb Kwōjarjar, bwe kom̧in maron̄ jutak ilo ejjeļo̧k libbijinjin im̧aō ilo raan eo āliktata” (3 Nipai 27:20).
Kien kein rej waļo̧k ilo kallim̧ur in jān Irooj:
“Im kiiō, em̧ool, em̧ool, Ij ba n̄an eok, likūt am lōke ilo Jetōb eo ej tōlļo̧k n̄an kōm̧m̧an em̧m̧an—aaet, n̄an kōm̧m̧an jim̧we, n̄an etetal ettā, n̄an ekajet jim̧we; im en̄in ej Aō Jetōb.
“Em̧ool, em̧ool, Ij ba n̄an eok, Inaaj ajejewaj n̄an eok Jetōb eo Aō, eo enaaj kōmeram am ļōmņak, eo enaaj koobrak am kōn m̧ōņōņō” (K&B 11:12–13).
Ij kwaļo̧k aō kam̧ool bwe Anij Jemed ej mour, bwe Jisōs Kraist eo eaar jerkakpeje ej tōl Kabun̄ in An, bwe Thomas S. Monson ej kabwijer kii ko an priesthood, im bwe revelesōn ej itok kōn tōl an Jetōb Kwojarjar im rie Kabun̄ eo an Jisōs Kraist im Armej ro Rekwojarjar ilo Raan-ko Āliktata im membōr ro ie me rettā.
Ij kam̧ool n̄an kom̧ bwe em̧m̧aan rein rem̧m̧an ro raar kōnono n̄an kōj rainin rej rikam̧ool ro an Irooj Jisōs Kraist, āinwōt membōr ro an Doulul eo an Jon̄oulruo Rijilōk ro, rej kūr jān Anij. Ijeļā bwe Jetōb eo ekar tōl Būreejtōn Monson bwe en kūr er. Im ilo ami ron̄jake er im naan in kam̧ool ko aer, Jetōb Kwojarjar eo ekar kapen n̄an kom̧ ta ko kiiō ij ba n̄an kom̧. Er rej kūr jān Anij. Ij rejtake er im iakwe er im jeļā bwe Irooj ej iakwe er im rejtake er ilo jerbal kein aer. Im ij kōm̧m̧ane menin ilo etan ad Irooj Jisōs Kraist, amen.
© 2015 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo kajin English: 6/15. Kōmālim an ukook: 6/15. Ukook eo an Visiting Teaching Message, November 2015. Marshallese. 12591 874