Klumech ra Oldingel e Olisechakl, Ongeteruich ma tal buil 2015
A Chedaol Reng Bol Kldemem
Ng sebeched, alsekum e kede olngesenges el kirel, e kede nguu a klengeltengat e ra Reng el mo obengked, ra diak el dil chelechang ma klukuk, ng di mo blechoel.
Betik e ra renguk el rudam ma rodos, Ak dmeu a renguk el obengkemiu er tial Chedaol sils ra klou longdibel ra Ikelesia ra Rubak. Ak mla melchesuar, eldi uai kemiu, sel Reng, el Chedaol Reng, lolecholt a ikel tekingel a klemerang el bla derenges el mla medung e mechitakl.
A moktek er chelechal sils a mo lekiis a ikel soal a rengmiu ma blakereng elmo ngmai a ikel sengk el blel yaksok el merkid ra uriul ra de metecholb. Sera de moterkokl e kede rirenges a ikakid el tekoi: “Mnguu a Chedaol Reng.”1 Seikid el taem, ea klengar er kid a milngodech elmo cherechar.
Ng sebeched, alsekum e kede olngesenges er ngii, el nguu sel klengeltengat e ra Reng meng di obengked, ra diak el dil chelechang ma klukuk, el di ua ikal mengasireng el blekeradel el bla dolchesiu er chelchal sils, engdi ngmo blechoel. Ko medengei ra ikel tekoi ra nglunguuch ra sakrament el kirel sel telbiil sel mecherungel: “Dios el Diak a Ulebengelel Edam, aki olengit er kau loba ngklel a Ngelekem el Jesus Kristo, me momekngeltengat e mchedolii tial el blauang elmo ra rengrir tirkel mo melai er ngii, me bol sebecherir el kolii e lomeltkir e ra bedengel a Ngelekem, e le kengei leko er kau e Dios el Diak a Ulebengelel Edam el kmo, tir a sorir elmo oungakl e ra ngklel a Ngelekem, e bo le blechoel melatk er ngii, me temo oltirakl a llechul e le bla le besterir, meng mo sebechel blechoel ngarngii a Reng er ngii el lobengterir.”
E ngii a mermang sel klebokel el telbiil: “Me bol sebecherir el blechoel loba Reng er ngii lobengterir” (D&C 20:77; smisiich a belkul).
Sel de blechoel e loba Reng el lobengked e kede mucholt e mukrael e ra Chedaol Reng ra chelsel a klengar er kid ra bek el sils. Ng sebeched, el ua tiakid, kede muklatk e ra Reng el loluut ongitikaik elmo meruul a mekngit.
Ng di okiu seikid el imol tekoi, eng beot el desang el kmo ngera uchul ea remesiungel a Rubak a melasem el menglou a soal a rengud el mo mengull e ra Dios er sel temel a sakrament. Alsekum meke de melai ra sakrament e lokiu a klaumerang, ea Chedaol Reng a mo sebechel el sobecheklid me tirkel betik a rengud er tir ra ongitikaik el ikel meringel a blekerdelel e mekdekudem.
Sel doukledem e ra Chedaol Reng eng meob a ikel lungil meng soad ea ongitikaik a diak bode ngibes er ngii. Ngdi seikid el imol tekoi a medeel el rulid elmo blak a rengud me kede blechoel loba Reng el lobengked e ra bek el taem.
Mesel sekum ea Chedaol Reng a smisichid el omtok a tekingel a mekngit, e Ngii a direk el meskid a klisiich el mes a klemerang ma kelsuul el tekoi. E sel di ta el klemerang el klou a belkul a moterkokl e lokiu chocholt el mlara Dios. A lemsed ma dolchesuar a tekoi a di molngesonges. Kede kiei ra taem el molmuut el tirkel kmal mellomes a rengrir a mo meringel a bterrir el lomiich ra klemerang ra belsiochel el cheleblad.
A Rubak a ulsisechakl e ra Apostol Thomas, el ngii a mle soal a lesa olechotel a Okisel Osobel mel rrutech a ikel telemellel imal, e seikid el locholt a bleketakl el olechotel: “A Jesus a dilu er ngii el kmo, Thomas, le kau el mla mesekak, me kou merang: te ngeltengat tirkel dirkak el lesekak, e ngdi toumerang” (Johanes 20:29).
A ikel klemerang el tometemii a roled elmo remei el mora Dios a moterkokl el lokiu a Chedaol Reng. Ng diak el sebeched el mora oreomel e mesa Demad ma Ngelekel el mengedecheduch el mora ngeasek el Joseph Smith. Ng diak a ungil lochotel malechub eng ngidil lultebechel el mondai el lolterkokl ra kmo a Elijah a mlei ra le metib elmo olterkokl e ra kiis ra priesthood er chelechang e lobang el ousbech er ngii a ngar el profet, el Thomas S. Monson.
A klemerang a mucholt el mortirkel ngelekel a Dios el sechal malechub e te redil el mla nguu sel lemeltir el loba Chedaol Reng. Sel klsuul ma telingaol a di obengked ra bek el taem, e kede ousbech ra mekedekudem el longitikaik ra Reng e ra Klemerang el sobecheklid ra taem el de kora ngara rauereng.
Sera le chedal a Cheldebechel ra Teruich ma Terung el Apostol, ea George Q. Cannon a ulerrimel mede bode blechoel el louedikel el kirel a Reng me lobengked. Ng mle yaksok, e ngak a yaksok er ngii el tekoi el dirrek, el ulekum e kede melemolem er seikid el rael, eng “diak el sebeched el mol ngesonges e ra klemedengei” el kirel a klemrang, “diak de ngara rauereng malechub e kede ngara ilkolk,” ea “klaumerang er kid a mo mesisiich, ea duil a rengud … a mui.”2
Kede ousbech ersel mekedekudem el ngeseu ra Chedaol Reng mel keldemed el kuk telkib el taem. A kodellel a betik e ra rengud a duubech el bkaischemrenguul. Ng seikid el sioning el mlara Chedaol Reng e lolecholt e ra beltikelreng ra Demad ra Babeluades ma milkiis e ra kodall el Osobel el meskid a urrunguled ma ongelaod el kirel a mlo dibus el betik e ra rengud. Seikid el klaumerang a kirel mekerker sel dubech a kodall.
Meng uaisei, leng betok el uchul, e kede ousbech e ra Chedaol Reng el blechoel lobengked. Kede oureng er ngii, engdi kede medengei leng ngokiu a klemedengei eng diak el beot el de omtebechel er ngii. Kede rokui el lomdasu, melekoi, e meruul a tekoi ra klengar rekid ra bek el sils el sebechel el tordii a Reng. A Rubak a ulsisecheklid el kmo a Chedaol Reng a mo blechoel el keldemed sel sekum a rengud a mui ra tmolech el beltikelreng mesel lungil luldasu a omsiich a uldesued ra bek el taem (mesa D&C 121:45).
Me tirkel tir a cheuarm el oba sel ngarbab el llach el ousbech er ngii mel sebecherir el nguu seikid el sengk e ra ongedolel a Reng, bok smisiich a rengmiu. Kemiu a ngarngii a taem el bla molchesuar sel longitikaik a Chedaol Reng. Ng sebechel el dilubech el ekor kau er chelechal sils.
Ng sebechem el mekedelad a ikeikid el taem ra ulekrael eldi ua tane ra klaumerang el Alma a ulecholt (mesa Alma 32:28). Molalem a derta er ngii. Ng sebechem el rulii tiaikid sel moltirakl ersel blo molchesuar ra rengum. Sel kot el klou a belkul el lodubech sel kau a kirem elmo medengei el kmo ngera soal a Dios a bom relii. Alsekum meng kirem elmo omelecha ongeltacher malechub e ke momes ra sechelim el mengkit a rengul, eng kirem elmo rulii. Ngidil ngera el tekoi, e mrelii. Sel kau a ochotii el soam e loltirakl, ea Reng a mo durokl lekor kau a llmuut el betok el luldasu el kmo a Dios ngera soal a mruul el kirel.
Mesel moltirakl, ea ikel mutab el mlara Reng a mo mekedekudem el morngii, el cherngel a taem eng merael mekmeed meng mocha blechoel el keldemem. Ea klisichem el melilt e ra melmalt a di melketek.
Kemo medengei alsekum ea ikal momtab elmo uedikel el kirel a mlara Reng ra bai le dil bla ra rengum. Sel sekum ma ikal momtab a ultab e ra ikel Osobel me ngikel ngar el profet er Ngii ma re apostol a melekoi, eng sebechem el moltirakl e lungil medengei. E seikid ea Rubak a mo odureklii a Reng er Ngii meng mo mengeluoleu er kau.
E tiakid okesiu, sel sekum e ke metebengii a reng elmo mengull e ra Chedaol sils, el sel kmal kora metacherbesul taem, ea Dios a mo odureklii a Reng er Ngii el leko el olngeseu.
Seikid el ngeseu a mlora demak ra mla memong el rrak leng ngurellel meng mlora Australia. Ngdi mle ngiltang ra le Sunday, e mle soal elmo melai e ra sakrament. Ng dimlak el betik a tekoi el kirel a miting e ra re Uriul-klebesei el Santo. Meng mlo locha ochil e mo merael. Meng miluluuch ra bek el techukiil me lodengei el kmong ngera el rael a bo loltirakl er ngii. Uriul ra lorael el metetuchakl el ta el zikang, eng mle stob e llmuut el meluluuch. Ng mlo melchesuar elmo merael loldengelengel ra imol rael. Ng di mle telkib eng mocha renges a chelitakl el kirel a kot el chellibel ra lengiil el blai el di kmeed. Ng ulemes ra mado el mora chelsel e mesterir a re mekesai el chad el dengchokl el kmeed e ra tebel el delkedek e ra becheleleu el mamed ma blil a blauang ma ralm ra sakrament.
Ng locha kekerei a belkul lekor kau, engdi ng kmal mle ungil tekoi el morngii. Ng mle medengelii sel yaksok er sel nglunguuch ra sakrament el mla meketmokl: “Blechoel el melatek er ngii e moltirakl a llechul el bla lengai el meskemiu; me bol blechoel el loba Reng er ngii lobengterir” (D&C 20:77).
Sei a di mle imol okesiu ra taem ra loluluuch el ultireklii a le dilung a Reng el morngii el Dios a mle soal ngii a bol relii. Ngdi miruul er ngii elmo melai a rrak, eldi uai kau me ngak. Ngdi mlak a ta el losoad el kirel a sel reng el lobang. Ng di millemolem el meruul a mekekerei el tekoi el mora Rubak el ngii a milchesuar elmo meruul.
Sel blol ngarngii a cheldebechel e ra re Uriul-klebesei el Santo e lolengit er ngii elmo mengedecheduch, eng kutmeklii. Ng dimlak el mondai a le blel teruich el chad malechub eng okeim malechub el blel mesaul a bedengelk. Ng ulecholt e ra klaumerang er ngii ra Edam, ma Ngelekel, ma Chedaol Reng ma re profet sel sekum a Reng a urremelii elmo meruul er ngii.
A mle kot el ngarbab el ngerchelel ra Ikelesia a mlara Bonneville Utah Stake ra high council, e mla rengii el melaml ra sers, e ulsisechakl e ra class ra Sunday School. Omerolel a taem el mong, e sel lousbech er ngii, ea Chedaol Reng a ngar risei el keldemel.
Ak mle dechor er bita ra demak e ra chelsel a delmerab ra ospitar. Ea delak, el bechil el lokeua ma ta el rrak, a mechiuaiu ra bet. Aki ulemes er ngii el kemanget el sikang. Aki mocha mes ai kel lultil a ringel el dikea ra medal. A ikel chekngelel imal, el mle chelimetemet, a becha el longoit. A ikal imal a olengellang er bita er ngii.
A ringel el mlamo melai a kemanget el rrak a merma ra ulebongel. Ak milsa ra medal el mle budech a osengel. Ng uleltuu a telil, e ta el lulchiseb, e mlo chelellakl. Aki mle dechor el mengiil e lomes alsekum eng lemuut el loltuu a telil.
Meng dikeang, ea Demak a mekekokil melekoi el kmo, “A ngeasek el dil a mlamo remei ra blil.”
Ng dimlak a ta el langel. Ng uaisei le Chedaol Reng el di mla medal e mla chotii er ngii a bleketakl el siasing ra kmo ngkal redil eng techang, ng mla reker el mei, ngmo ua techang, e merael morker. A Reng a mla isechii el morngii el betok el taem ra ou beltikelreng el Edam ra Bableuades, ma Osobel, el mla ngubetii a klisichel a kodall, mesel lotutel a blo lolterkokl er ngii ma bechil ma telungalk er tir ra templo.
A Reng a meketeketang el taem ra le semecheklii el kirel a bechil ra klungiolel ma klaumerang er ngii a mla oterkeklii elmo remei el mora blil ra babeluades el ngarngii e te medengelii el klebokel el ngalk e ra telbiil el bo loutkeu er ngii loba odanges.
Sel denguu ra demak, e sei ea lmuut el lungil ra urengulel. A Chedaol Reng a rirelii meng mlo tmaut el kirel.
Chelechang, ea rebebil a locha melekoi el kmo a ikal tekingel ma ikel lomes el tekoi ra uldesuel el kirel a blil ra babeluades a di mesumech a reng, el kora mengesengsang el chad el direk mlad a bechil. Engdi ng medengelii sel diak a ulebengelel klemerang eldi sel ta el rael el modengelii.
Ng mle hakase el lulsiik e ra klemerang el kirel a omesubel a blebelel a beluulechad ra klengar er ngii el rokir. Ng ulusbech a dongu ra re hakase el mle meduch meng mle chetengakl el chad ra re dilak ra beluulechad el rokir. Ng betok el riruul ra chemistry a ulekiu osengel ra mekekerei el klalo el lobengkel a yolt ea uriul eng ngulterkeklii el lulekiu ra betok el loureor ra le kengkiu ra tekoi el lilsang.
Engdi ng ultirakl ra kuk ngodech el rael el mlo metik e ra klemerang el liluut el kmal ngarngii a belkul el morngii e merkid el rokui. Ngdi okiu a Chedaol Reng eng sebeched el mesterir a rechad ma omeruul el di Dios a mesterir.
Seikid el sengk a milemolem ra elsel a ospitar ruriul ra le mad a bechil. Maki ngilai a kloklel a delak el lolab elmo remei. A demak a mlo stob eoureng a sulir a re bek el nurse ma re toktang el ki blom kaisiuekl ra omerolam el mora mlai. Ak mle medengei lek milchesuar, el checherd a renguk, eldi kiram el merael eldi mo kemam el tang el mo oumekikngit el reng.
Ak kol mocha medengei er chelechang el kmong ngulemes a tekoi eldi Chedaol Reng a sebechel lulecholt er ngii. Ng ulemes er tirkel chad el ua re anghel el mlo durokl e ra Dios elmo mes e ra betik e ra rengul. Te ulemes er tir el lulsemuch el chad e ra ukeruul, engdi Demak a ulureng a sulir ra losiou el lomtechei e ra Osobel.
A klisichel a Chedaol Reng a millemolem el lobengkel ra ki bom rei ra blirir a rechad e ra blik. Aki mle chadecheduch el telkib el taem ra chelsel a klou el blai. A demak a ulengit me le bora delmerab er ngii.
Uriul ra kesai el bung, eng luetang el mera klou blai. Ng mle ungil a klikm er ngii. Ng mirael el bedul kemam e melekoi el mekekokil, “Ak mle bekikl ra Mildred a lebora belurir a re deleb eldi ngiltang. Ak di omdasu e kelel riid ra delongelrir a re betok el chad.”
E ungil a rengul el melekoi el kmo, “Ak dirk miluluuch. Ak medengei el kmo Mildred a keltmokl. A delak a mla rsei el molsiuekl er ngii.”
Ak medengei el mle klikmechur ra ledul uaisei, el kora omes ra delak el mechas, a ikel mekekerei lochil el mesisiich el remurt el soiiseb ra delongelir a rechad me lultebechel el ngar sei el mesang el bechulii a bechil a ngelekel sel le mermang.
Chelechang, ea tara uchul a demak a ulengit el kirel e ngiluu sel longelaod leng ngii eldi mle blechoel el meluluuch e lokiu a klaumerang sera le dirk le kekerei. Ng blechoel el melai a nger el lolchesuar ra rengul elmo mengelaod e omekrael. E uldimukl ra di blechoel el meluluuch, eng mle medengelii a chedaol llechukl ma tekingir a re ngar el profet. Meng mle sebechel el dongchii sel lodengelii el mengululau el Reng, el kemiu a locha milchesuar er chelechal sils.
Sel longedolel a Reng a llmuut el klou a blal relii ra di longelaod e lomekrael er ngii. Ng ngildechii e lokiu sel Tngakireng e ra Jesus Kristo. Sel de kengei er sel telbiil el moba sel Reng el lobengked ra bek el taem, ea Osobel a sebechel meskid sel lomengikiid el lusbechal el kirel a diak a ulebengelel el klengar, el ngii sel kot el ngarbab ra ikel rokui el sengk e ra Dios (mesa { D&C 14:7).
Ke medengei a ikel tekingel Osobel: “Chelechang, e tiakid a llach: Mouchel a rengmiu, kemiu el ngara merkelel a beluulechad, e me rengak e bom metecholb lobang ngklek, me bo longikiid er kemiu a Chedaol Reng, me bom klikiid er medak er sel uriul sils” (3 Nephi 27:20).
A ikeikid el llach a mei e lokiu tiakid el telbiil el mlara Rubak:
“E chelechang, eak meral kmu re kemiu, bo moumerang e ra Reng, el lomekrael elmo meruul a ungil— nguaisei, elmo meruul a llemalt, el merael loba klengariou el reng, lomes a tekoi el ngara llemalt; e tia ea Reng er ngak.
“Me chelechang, e chelechang, ea kmung er kemiu, Ak mo meskemiu a Reng er ngak, el mo omekellomes a uldesuiu, e mekeek a rengmiu er a deureng” (D&C 11:12–13).
A kuchais er kemiu ra klaumerang er ngak el kmo a Dios el Chedam a ngar, ma milkiis ra kodall el Jesus Kristo a btelul a Ikelesia er Ngii, ea Thomas S. Monson a olab a rokui el kiis e ra priesthood, ea chocholt e lokiu a Chedaol Reng a omekrael e mengeluoleu ra Ikelesia ra Jesus Kristo ra Uriul-klebesei el Santo ma re bekongesenges el chedal.
Ak melmolem el louchais er kemiu el kirir tirkal klebokel el chad el lobengked er chelechal sils a milngedecheduch el me rekid el sioning e ra Rubak el Jesus Kristo, el re chedal a Cheldebechel er a re Teruich ma Terung el Apostol, a mlo kedong e ra Dios. Ak medengei el kmo a Reng a milkrolii a President Monson elmo mekedong er tir. Me sera morrenges er tir ma ikel klaumerang er tir, ea Chedaol Reng a ulterkeklii lekor kemiu a ikal tekoi el kulekoi lekor kemiu. Te mlo kedong e ra Dios. A kulngeseu er tir e betik a renguk er tir e medengei el Rubak a betik a rengul er tir e mo olngeseu er tir ra urellir. Ea ikang a kulekoi loba ngklel a Rubak el Jesus Kristo, amen.
© 2015 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/15. Kengei er a oidel: 6/15. Oidel a Visiting Teaching Message, November 2015. Palauan. 12591 881