Iren Mahsen en Padahk en Pas, Tihsempe 2015
Wiewia mwahu kan en Sises Krais: Limpoak oh Kadek
Onopki ni kapakap padahk wet oh nantiheng ken ese dahme ke anahne padahngki. Ia duwen omw wehwehwehki pwukoah sarawi kan en Soundoro eh pahn kalaudehla omw pwoson Ih oh kapaiada irail kan me ke kin tehk ni omw kin wia amw padahk en pas? Pwehn alehdi iren kapehse kapatapat, tehk reliefsociety.lds.org.
Pwoson, Peneinei, Sawas
“Nan Pwuhk sarawihkan, limpoak wehwehki ‘iang lokolongki.’ E pil wehwehki pokepokehla, kesemwpwaliki, oh mahkehng mehteikan.”1
“Sises kasalehiong kitail soangen karasaras tohto me pidada duwen limpoak mehlel,” President Thomas S. Monson mahsanih “Ohl me sohte kak alu ni pihl en Bethesda; lih me wiadahr nsenen pwopwoud ni mwekid sapwung; lih me mihmi ni en Jacob ah pwarero; nein Jairus serepeino; Lazarus, rien Mary oh Martha pwutak—emen emente wia mehn sawas ni ahl en Jericho. Emen emen anahne sawas.
“Ohng me sohte kak aluo nan Bethesda, Sises mahsanih, ‘Kesihnenda, ale dewemwen, oh alu.’ Ohng lih me dipano iren sawaso mahsanih, ‘Kohwei, oh dehr pwurehng wiahda dihp.’ Pwe en sewese serepeino pwe en kak ale pihl, E ketikihda pwarer en pihl ‘me wie kusukusda oh e pahn mihmi kohkohlahte.’ Mahsen me kohieng nein Jairus serepein me mehlau, ‘Serepein, I ndahiong uhk, pwourda.’ Ohng Lazarus me melahro, ‘Pidohi do.’
“Soundoro kin kalap kasalehda mwekid en limpoak me sohte imwi. … Kitail ritingada atail mohngiong kan, pwe Ih—me wia mehn karasaras en limpoak mehlel ieiaso—en kak ketlong loalatail.”2
Pwuhk Sarawi Kapatapat kan
Melkahka kan 145:8; Sekeraia 7:9; 1 Piter 3:8; Mosiah 15:1, 9; 3 Nephi 17:5–7
Sang Pwuhk Sarawi Kan
“Ahi pwoud oh ngehi ahpw kelepwikidi limwahn nait serepein me sounpar 17 oh peki ah mour,” Linda S. Reeves nda, sounsawas keriau nan presidensi lap en Pwihn en Sawas en Lih “Pasapengo nda soh, ahpw . … kitail esehier … me … [Soundoro] kin ahniki limpoak ohng kitail nan atail kapahtou kan.”3
“Ehu soai me I kin pwungki duwen en Soundoro ah mour iei duwen soaipen Lazarus. Pwuhk Sarawi kasalehiong kitail me ‘Sises ketin poakoahng Martha … , oh rie serepein [Mary], oh [riara pwutak] Lazarus.’”4 Ni ansou me Lazarus soumwahula, pakair lelahng Sises, ahpw ni ansou me E ketla Lazarus kapelsalehdalahr. Mary tangala rehn Sises, kilipwidi ni Alualiweko, oh sengiseng. Ni ansou me Sises mahsaniada en Mary ah wie sengiseng, “e ahpw kupwurohla, oh … pahtoula” (Sohn 11:33, 35).
“Met wia atail pwukoa. Kitail anahne pehm oh kilangki pein mesatail oh sewesehki sapwelimen Sahm Nanleng serihkan irail en iang pehm oh kilang oh ese me atail Soundor mehkihla kaidehnte dipatailkan ahpw pil iangahki atail nsensuwed kan oh atail kalokolokan oh atail toutou kan pwe En kak mwahngi dahme kitail pehm oh iamwomwen ah pahn kin kansenamwahuwih kitail.”5
© 2015 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/15. Kamanaman ong kawehwe: 6/15. Kawehwehpen Visiting Teaching Message, December 2015. Pohnpeian. 12592 885
Medewe Met
Ihs me pahn kapaida sang ni ahmw limpoak?