Rongorongo man te Moan Beretitentii, Ritembwa 2015
Karaoa te Tai ibukin te Tia Kamaiu
Ai manga tain naba te Kiritimati ao e nang roko te ririki ae boou. E namakinaki bwa kanga ai tibwa ngkoananoa te tai ae nako are ti bukamarua iai bungiakin te Tia Kamaiu ao ni katei kouru ni kakoroi nanoia n te ririki ae boou.
Ibuakon katean ara kouru ibukin te ririki aei, ti a tia ni katea ara kouru ni karekea ara tai inanon maiura ibukin te Tia Kamaiu ao ni karikirakei namakin aika tamaroa Nakoina? E aki kakawaki bwa nakoraoira arora ae ti mena iai ni karokoa te tai aei ni karaoan ara kouru, I kakoaua bwa ti bane ni kakororaoa nanona n ae tamaroa riki. Tain te Kiritimati aei bon te tai ae tamaroa n tuoi ao ni kabooui ara beku.
Ni maiura aika katabetabe, a mwaiti bwaika e riai bwa ti na karaoia, ma nanora ni koaua n uota Kristo nako nanon maiura ao inanon mweengara. Ao e kakawaki bwa ngaira, n aroia Taan Rabakau mai Mainiku, a teimatoa ni kaea Itoina ao “n roko n taromauria.”1
Rikaki nakon rooro ma rooro , te rongorongo mai iroun te Tia Kamaiu bon ti te arona. Nakon Betero ao Anterea n naman Kariraia, E taku, “Irirai.”2 E roko te wewete nakon Biribi, “Irirai.”3 Nakoia tibun Rewi ake a tekateka ni nen te tia ikoikoti ana mwane te Uea e roko te kaetieti, “Irirai.”4 Ao nakoim ao nakoiu, ngkana ti kakauongo, e na roko naba te aekaki ni kakao ni wewete anne: “Irirai.”5
Ngkana ti ira Ana katoto n te bong aei, e na reke ara tai ni kakabwaiai maiuia tabeman. E kaoira Iesu bwa ti na beku ibukiia tabeman ibukina bwa e tangirii nanora ma ara iango n tatauraoi.6
Iai mairoumi ae kona ni karaoa te ibuobuoki nakon temanna n te Kiritimati aei? Iai temanna ae kantaningaiko bwa ko na kawaria?
Tabeua te ririki n nako I kawara mweengan te unaine ae e a tia nii mate buuna n tain te Kiritimati. Ngke I kawaria, iai temanna ae katanga beeron te mataroa. Imatan te mataroa e tei te tia korokoro ae rangin tatabetabe man kinaaki. E aki weteaki; irarikina, e namakina te wirikiriki bwa e na kawara te aoraki are e bon maeka n ti ngaia.
N tain te Kiritimati aei, te koraki ake aki kona ni kitan mweengaia (ibukin aki taun marurungia) a tangira kawaraia n tain te Kiritimati. Te Kiritimati teuana ni kawaran te tienta n tararua, I tekateka ao ni maroro ma niman aine aika a unaine, te kabanea n ikawai mairouia bon 101 ana ririki. E mataki, irarikina e bon kinaa bwanaau.
“Bitiobi, ko rimwi teutana n te ririki aei!” e taku neiei. “I taku bwa ko nang aki roko.”
E rangin nakoraoi au tai ma ngaia. Temanna te aoraki, e ngae n anne, e taraa tinaniku man te wintoo ma nanona ae korakora ao e kaokioka “I ataia bwa e na bon roko n noorai n te bong aio natiu te mwaane.” I miimi ngkana e na bon roko, bwa iai tabeua taai ni Kiritimati ngke e bon tuai man roko.
Irarikina iai te tai n te ririki aei n anga baaira n ibuobuoki, n te tangira, ao te akoi—n taekana teuana, n irira ana katoto ara Tia Kamaiu ao ni beku n aron are E na karaoira bwa ti na beku. Ngkana ti beku Ibukina, ti na aki kabwara nanora n ara tai, n aron ae e karaoia te tia tararua te auti n iruwa are ngkoe,7 ni karaoa te tai Ibukina inanon maiura ao ni karekea n Nena inanora.
Ti kona n ota ni kamiimin te berita ae e mena inanon ana rongorongo te anera are e angania taan kawakin tiibu ake a maeka n te tawana: “I tuangkami te rongorongo ae raoiroi, ae kakimwareirei. … Ba e bungiaki n ana kawa Tawita n te bong aei … Tia Kamaiu, are te Mesia are te Uea”?8
Ngkai ti kaai n angabatia n te Kiritimati, ti bia uringnga, ni kakaitau, ao ni butimwaea te kabanea ni bwaintangira—ara tia Kamaiu ao ara tia Kaboira, n te aro bwa ti aonga ni karekea te maiu ae akea tokina.
“E aki kabwaia te aomata ngkana e anganaki te bwaintangira, ao e aki karekea? Nooria, e aki kimwareirei te aomata n te bwaintangira are e anganaki, ke e aki kimwareirei iroun are e anga te bwaintangira.”9
Au kantaninga bwa ti na Iriria, ni beku Ibukina, ni Karinea, ao ni karekei inanon maiura Ana bwaintangira nakoira, n ana taeka te Karo Riaai ti aonga ni, “katobibiaki n ana tangira n aki toki.”10
© 2015 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/15. Kariaiakaki rairana: 6/15. Rairan te First Presidency Message, December 2015. Kiribati.12592 859
Reirei man te Rongorongo Aei
E kaoira Beretitenti Monson bwa ti na “karaoa raoi ara beku mai inanora, n uota Kristo nako nanon maiura ao inanon mweengara.” Iangoia ao ni maroroakinna ma naake ko reireiniia bwa a na kanga ni karaoa raoi te mwakuri ma nanoia n tatabemaniia nako ao n aia utu. Ko bae n iangoia n titirakinia bwa a na iangoa te aomata ae riai ke te utu ake a kona ni kawariia ke ni beku ibukiia n te Kriritimati aei. “Irarikina iai te tai n te ririki aei n anga baaim n ibuobuoki, n te tangira, ao te akoi.”