Iren Mahsen en Presidensi Keieu, Pepweri 2016
Sokedi Mwahu nan Ahng Suwed
Me keren ansou me ahi pwoudo, Harriet, oh ngehi aht mihmi wasahn sompihro oh kilekilang lingan en sokedien sompihr ko. Rahno me inenen kisinieng, oh keper en angin kisiniengo ipir sompihro, kahrehieng emen emen eh raukala apali oh dikoula mwowe ni ansoun sokedio.
Ni aht kilkilang peiiaidahn sampah oh mesihn, nan ahi lamalam pwuralahng ni pein ahi kaskuhl en sompihro oh kosondi pwung oh mehlel ko me I alehdi ansou—oh mwuri uhd sukuhlieki soun pihrki sompihr teiko.
“Dehr pelian kahpwal akan ansoun ahng keper kan,” I kin ndahieng irail. “Ahneki meleilei; dehpa karuaru. Kilekilenglahngete lainen me tang nan werengen wasahn sokedio. Ma ke pireksang ahl me ke men sokedieo, ke mwadangete kapwungala. Kopworopworki dahme weremw sompihro kak wia. Pihrweisang nan ahng kepero.”
Soun katanga sompihr kohiek kan wehwehki me irail sohte kak ansou koaros apwaliala soahng kan me kin wiewiawi rehrail. Re sohte kak oudahte kauhdi ahng kepero. Irail sohte kak kasohrehla kotou de sinoh. Re sohte kak kauhdi kisinieng de kawetasang wasa e ipihplaie.
Ahpw re pil wehwehki me sapwung ieu masakada ahng keper de kisinieng laud kan—oh mehlel ma re pahn pwonla pwehki soahng wet. Wiepen sokedi mwahu ni ansou me iren nan wehweh kan sakanakan iei mihimihte nan ahl me pwung oh ahlen sokedi ni uwen mwahu oh kak koaros.
Ni ahi tetehk ehu ehu sompihr eh kin sokedi oh katamando kosondi pwung oh mwahu ko me I koledihsang sounpar kei me wiahkiher emen soun katanga sompihr, I men wehwehki ma sohte ehu kaweid me pid met ongatail mouren ehu ehu rahn akan.
Kitail sohte kak ansou koaros ireire kahpwal kan me mour kin wiahieng kitail. Ekei pak soahng kan sohte kin sohrasang nan eletail. Kitail kak masakada oh rerada sang ni ahng keper en peikasal, soh-kopworopwor, masepwehk, pahtou, de pwunod.
Ni ansou pwuko, e mengei toutoukihla nan soahng kan me kin wiewiawi ahpw sohte mwahu oh kiheng atail kahpwal akan mwohn mehkoaros. Kasongosong en iei medemedewehte apwal akan me kitail kilikilang a kitail sohte tehk Sounkomouro oh kadehde duwen mehlelo.
Ahpw mwo kaidehn iei me keieu mwahu en powehdi atail kahpwal akan nan mour.
E duwehte soun katanga sompihr koahiok men me sohte kin tetehkete nan wehwe sakanakan ahpw ihte nan werengen wasan sokedio oh wasa pwung en sokedio, eri kitail pil uhdahn anahne dokehkihte atail pwoson—Sounkomouro, Sapwellime rongamwahuo, oh Sapwellimen Samatailo Nanleng kosondio—oh dahme keieu kesempwal me kitail kin koadoakoadoahkeo—me iei pwurala ni meleilei nanleng wasa kitail songsong en lellaieo. Kitail uhdahn pahn kopworopworki Koht oh nantieng weweid nan ahlen tohnpadahk me wia poahsoan en atail kak koaros. Kitail uhdahn pahn dokehki mesetail kan, mohngiongitail, oh atail lamalam momourki dahme kitail ese me kitail uhdahn pahn wia.
Kasalehda atail pwoson oh likih Samatail Nanleng sang ni pereperenki atail kolokol Sapwellime kosonned akan pahn wadohng kitail popohl oh lingan. Oh ma kitail mihmihte nan ahlo, kitail pahn powehdi ahng suwed akan—sohte katepen ia uwen eh keper—oh pwurala ni meleilei nan atail wasao nanleng.
Ma nan wehwe marain de rotehkihdi depwek keper, ni atail wia tohnpadahk kei en Sises Krais, kitail kin rapahki mahs wehin Koht oh Sapwellime mehlelo, koapworoapworki ma kitail wia, soahng teikan me kitail kin anahne pahn mwadangete epwella. (tehk Madiu 6:33).
Songen kesemwpwal en kaweidpen mour!
Ma kitail kalap medmedewe duwen atail apwal akan, atail luwet, atail peikasal, oh atail per kan, ehu te atail apwal akan eh pahn laudla. Ahpw ma kitail kalap loaloapwoatieng wasa kitail uhdahn dokedokeo oh kaperen en ideidawehn ahn tohnpadahk ko ahlo—poakohng Koht, sewsewese mehn mpatail — ehute atail pahn kakala katangaikitail sang ansou apwal akan oh ahng keper kan.
Kempokepahi kesempwal oko, e sohte wiahda mehkot ia uwen keper en ahng kan me kitail kin momouriki eh kin pidepidakih kitail, rongamwahu en Sises Kraiso pahn ansou koaros kiheng kitail ahl keieu kaselel me kitail sokedi nsenamwahuie nan wehin Samatailo Nanleng.
© 2016 sang Intellectual Reserve, Inc. Kolokol pwuhng koaros. Ntingdahr nan USA. Kamanaman ong lokaiahn wai: 6/15. Kamanaman ong kawehwe: 6/15. Kawehwehpen First Presidency Message, February 2016. Pohnpeian. 12862 885
Padahk sang Iren Mahsen Wet
Presiden Uchtdorf kaweidekinkitail en “kopworopworki Kauno oh nantieng mihmite nan ahlen ideidawehn mour en tohnpadahk ni uwen atail kak koaros. Song idek rehn irail kan me ke kin padahkohng duwen arail kin loaloapwoatieng “wasa kitail songosong lella ieo nanleng oh kapohl kan en ideidaawehn ahn tohnpadahk kan ahlo” ni ansou kan me re kin lelohng kahpwal akan. Ke kak pil lukeirail ren medewehda wiepe kan me re kak loaloapwoatkiheng arail kadehde oh Krais nan ansou apwal akan oh medewehda ni kapakap duwen wiepen kapwilewei ehu de tohtohsang madamadau pwuko nan arail mour kan.