Jodikdik ro
Juon Pedped n̄an Naan in Kam̧ool eo Aō
Rijeje eo ej jokwe ilo Idaho, USA.
Ke ekar 16 aō iiō, juon m̧ōtta ekar itok n̄an m̧weo imōm̧ ippān mijenede ro. Ilowaan wōt juon allōn̄ in ekkatak ko im̧aantata, aolep kajjitōk ko aō rekar uwaak im alikkar. Ikar en̄jake Jetōb Kwojarjar eo ej kam̧ool kōn m̧ool eo an ennaan eo kōn Jepļaaktok eo. Ekar jab āinwōt en̄jake ko ikar en̄jaki, im ikar jeļā bwe aolepān katak ko rekar m̧ool.
Kōn menin, ikar iooni an armej m̧akoko im jumaeik eō eļapļo̧k jān kar m̧okta. Ikar en̄jake aō ajimakeke, mōk, im tarpok. Eļan̄n̄e ikar kōm̧m̧ane men eo ejim̧we, etke ij ioon eļap apan̄? Ikar jab maron̄ meļeļe etke mālijjon̄ ko aō rej n̄an em̧m̧anļo̧k eo aō. Mijenede ro rekar katakin eō n̄an jitlo̧k im jar, aaet men̄e ebolukwōn jikuuļ. N̄e men otemjej rej oktak im pen, ij kōm̧aatļo̧k būruwō im en̄jake kaenōm̧m̧an eo an Jetōb.
Wiik in kar peptaij eo aō ekar obrak kōn mālijjon̄ ko. Booj eo aō ekar kaam̧ijak eō bwe enaaj joļo̧k aō jerbal eļan̄n̄e inej jako jān raan in peptaij eo aō bwe in bōk jikin juon rijerbal, ikar jujen wōt deļo̧n̄ ilo aujpitōļ kōn nan̄inmej in dōkā in jibukwe, im jinō im jema rekar kajjitōk ippa bwe in etal jān m̧weo imōm̧. Kōn wōt an lōn̄ men ko retar jān jon̄an jān maron̄ eo aō, men eo de eo imaron̄ kar kōm̧m̧ane ikar reilo̧k n̄an Irooj.
Kajjojo iaan mālijjon̄ kein rekar oktak im erom kōjeraam̧m̧an ko aō. Rekar jipan̄ eō katak kōn katak ko an gospel in, eo ekar letok n̄an n̄a juon pedped epen n̄an naan in kam̧ool eo aō.