Poraus seni ewe Aewin Presetensi, March 2016
“Kaeo Ussi”
Seni Preseten Thomas S. Monson
Non Ewe Mwichefenin Jises Kraist ren Aramas mi Pin non Fansoun Soponon, kich meinisin sense me kich meinisin chon kaeo. Ngeni meinisin a feito ei kinamwein kokko seni ach ewe Samon: “Kaeo ussi … iwe oupwe kuna ami ngaseno”1
Uwa tingor ren meinisin Aramas mi Pin Non Fansoun Soponon repwe ekiekin aea ar pochokun ne osukuna me kaeo me nenengeni ewe Chon Amanau pwe ach chon emwen non ach fori. Sia sinei pwe ei “sense a feitto seni Kot”2 a nap seni emon chok sense. I ewe a aiti kich ach sipwe tongei ewe Samon ach Kot ren unusen netipach, unusen ngunuch, unusen ach pochokun, me unusen ekiekich, me tongei chon oruch ussun sia pusin tongekich, I ewe Asanapen Sense me ewe Pisekin appiru ren manau mi unusoch.
I inai ewe a afata: “Feitto, tapweto mwiri.”3 “Uwa fen awora ew minen appiru fan itemi.”4
Ika Ousap Siwin
Jises a afanafana ew mecheres nge anononun ennet a mak non puken Matthew. Mwirin I me noun kewe chon kaeo ra feitiw seni ewe Chukuchukuta, ra kouno Galilee iwe mwirin ra feino ngeni Capernaum. Ikewe ekkewe chon kaeo ra feito ren Jises, ra eis:
“Io a nap seni meinisin non ewe muun nang?
“Iwe Jises a korato emon semirit, pwe epwe uta me mwer,
“Iwe a apasa, upwe apasa ngeni kemi, Pwe ika ousap siwin, o ussun chok ekkewe semirit, iwe ousap tonong non ewe muun nang.”5
Non ewe Mwichefen, ewe auchean popun afanafanen ewe kapas allim esap ren an epwe wanong porous non ekiekin noun Kot kewe, ika non imw, non ewe nenien sukun, ika non ewe nenien misin. Esap ren an epwe pwano ifa ukukun an kewe sam me in, sense, ika misineri sinei. Ika esap ren an epwe anapano ach weweiti ussun ewe Chon Amanau me an Mwichefen.
Ewe auchean popun osukun an epwe anisi noun Samach non Nang at me nengin ar repwe niwinsefanino ren me fiti I ne pwapwa non ewe manau ese much. Ren ach sipwe fori ei, osukunen kapas allim epwe peser non aanen ar winiti chon kuno me fori pwon mi pin. Auchean popun an epwe amwasanga aramas ar repwe ekieki ussun, mefi ussun, me fori och mettoch ussun ar repwe aponueta nongonongun ewe kapas allim. Auchean popun pwe sipwe awatteno nuku non ewe Samon Jises Kraist me siwin ngeni An ewe kapas allim.
Osukun minne a efeiochu me siwini me amanaua ina osukun minne a anapanapa an ewe Chon Amanau nenien appiru. Sense ekkewe ra anapanapa an ewe Chon Amanau minen apirun tong me aninis ngeni ekkewe ra osukuner. Ra amwasanga nour kewe chon ausening fiti nesenin ewe ennet ese much. Ra manaueni manau mi namot ar repwe achocho ar repwe appiru.
Tong me Angang
Unusen an ewe Chon Amanau ewe angangen afanafan a pwarano tongen chon oruch. Ewer, An tong me angang ikana an nesen. Non nikinikin, kewe sense uwa kon chemenir ir ekkewe sense ra sinei, tong, me tumunuochu nour kewe chon sukun. Ra kutta ewe siip mi monuchono. Ra osukuna nesenin manau minne upwe chok chechemeni fansoun meinisin
Emon murinon sense itan Lucy Gertsch. A sinei emon me emon noun kewe chon sukun. Esap mo fan ew an esap kori ekkewe ra chok etiwano ew Raninfen rese fan are ekkewe rese faffan. Aua sinei pwe a fokkun ekieki kem. Ese wor emon me neim a monuki I me kewe nesen a kan aiti kem.
Chommong ier mwirin, nupwen Lucy a kan ngeni nesoponon manauan, uwa feino churi I. Am ouwa achemasefani ekkewe ran me nom mwen nupwen am ouwa nouni sense. Aua kan porous ussun emon me emon chon am ewe sukun me porous usun met emon me emon am aua fori iei. An tong me umoumoch a pwan non fansoun nakatam.
Uwa sani an ewe Samon ewe annuk a pwa non ewe Doctrine and Covenants:
“Ewe Samon a ngenikich eu annuk pwe sipwe aiti fengenikich usun ekkewe annukun ewe muu.
“Achocho ne aitir iwe ai chen epwe nonnom remw.”6
Lucy Gertsch a achocho ne osukun pun a fokkun pochokun an tong
Awora Apinukunuk me Ennet
Ewe Aposel Peter a awora an kapasen aurour, “Oupwe amonnata fansoun meinisin pwe oupwe tongeni ponuweni emon nupwen epwe eisini kemi ussun minne oua epinukunuku.”7
Meni ewe wachimuken apinukunuk emon sense a tongeni awora ewe apinukunuk a pwa non ewe ennet ren ewe kapas allimen Jises Kraist.
“Iwe met ami oupwe apinukunuku?” Mormon a eis. “Nengeni ua apasa ngenikemi pwe epwe ami apinukunuk non ewe achasefanin Kraist me ewe manamanen an manausefan, pwe oupwe manaueta ngeni manau esemuch, iwe ei pokiten ami nuku non I.”8
Sense, etekiaeta neuemi me pwarata ewe ennet ussun Unumon non Kot. Affata om pwarata ussun ewe Puken Mormon. Aporousa ewe amwararen me ningeochun ennet a nom non ewe kokkotun manau esemuch. Nounou puken ei Mwichefen mi kapunguno, akkaewin ekkewe pukefel, ne afanafana ewe ennet ussun ewe niwinsefaniton ewe kapas allimen Jises Kraist non unusochun me mecheresin namoten ach weweiti. Chechemeni ewe annuk an ewe Chon Amanau sipwe “kutta ekkewe pukefel; pwe non ir epwe wor ami manau ese much: me ir minne ra pwarata ussun ngang.” 9
Anisi noun Kot kewe repwe weweiti wesewesan me auchean non ei manau. Anisir ar repwe forata ewe pochokunen finata ekkewe aan repwe tumunur won ewe an ngeni manau esemuch.
Osukuna ussun ennet, iwe ewe Ngun mi Fel epwe anisi om achocho.
“Kaeo Ussi”
Pokiten Jises Kraist a unusoch ne anneasochis me fangafangoch ngeni Saman we, I a napanap non mirit me asufonoch, me a ketiwoch meren Kot me aramas.”10 Mi wor ach tufichin sopweno ne fori pwan ussun chok? Ussun chok Jises “a angei chen ren chen,”11 sipwe nikitu me sopweno ne kutta ewe saram me tipachem seni Kot non ach tongeni ne kaeo ewe kapas allim.
Rongorong ew auchean kinikinin kaeo. Nupwen sia moneta ach sipwe kaeo, sia iotek ne kutta eingeingen me pungunon seni ewe Ngun mi Fel. Sia ekieki, sia iotek, sia aea nesenin ewe kapas allim, me sia kutta netipen samach ngenikich.12
Jises a “osukuna … chommong mettoch non kapas monomon,”13 minne a murinno sening ne rongorong, mas ne kuna, me netip ne weweiti. Nupwen sia unusoch, sia tongeni rongorongoch mwongunungunun ewe Ngun mi Fel, minne a tongeni “aiti ngeni [kich] mettoch meinisin, o epwe achchema ngeni [kich] mettoch meinisin.”14
Nupwen sia ponueni an ewe Samon pweteten tingor, “Kaeo ussi,” sia winiti chon angei an ewe manaman. Ina minne, sipwene feinno mwach non ewe ngunun anneasochis, tapweno mwirin ach ewe minen appiru ren osukun nupwen I epwe mochen sipwe osukun me kaeo ussun a mochen sipwe kaeo.
© 2016 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/15. Kapungunon awewen: 6/15. Awewen First Presidency Message, March 2016. Chuukese (Trukese). 12863 901
Afanafan seni ei Poraus
Presiten Monson a tingor ngeni kich sipwe “ekieki [ach] tongeni ne osukuna me kaeo me nengeni ewe Chon Amanau pwe ach Minen Emwen non ach fori.” Kopwe pwan ekiek ika epwe och pwe kopwe annea pukefel ren ir ekkewe ka kan churri pwe oupwe kuna ekkewe sokkun napanap Jises Kraist a ait me kaeo ren. Ka tongeni poputa ren ekkoch ekkewe Uwokisin Preseten Monson a nounou, ren Matthew 11:29, John 5:30, me Mark 4:2. Ka tongeni porous won ifa ussun met ka fen kaeo ussun Kraist a tongeni anisuk om kopwe “winiti chon angei an ewe manaman.”