Iren Mahsen en Presidensi Keieu, Mahs 2016
“Padahngki sang Ie”
Sang President Thomas S. Monson
Nan Mwomwohdiso en Sises Krais en Souleng en Imwin Rahn-akan, kitail koaruhsie wia sounpadahk kei oh kitail koaruhsie wia tohn sukuhl kei. Luhk meleilei wet kodohng koaruhsie sang atail Kauno: “Padahngki sang ie … oh kumwail ahpw pahn diar kommolpen ngenimwail kan.”1
I luke Souleng koaros en Imwin Rahn-akan en medewe mwahu arail kak padahk oh sukuhl oh kilenglahng Sounkomouro en wia atail Sounkaweid ni atail wia. Kitail ese me “sounpadahk menet me patohdo sang Koht”2 wia sounpadahk semen men. Ih me ketin padahkihong kitailehr en poakohng Kauno atail Koht ni mohngiongitail unsek, atail mour unsek, atail kehl unsek, oh atail lamalam unsek, oh poakohng mehn mpatail kan duwehte peinkitail, ketin wia Kaunen Sounpadahk oh mehn Kahlamangih mour me unsek.
Ih me ketin mahsani: “Kohdo, idawehniehdo.”3 “I wiadahr ehu mehn kahlamangih ong kumwail.”4
Ma Kumwail Sohte Wekila
Sises ketin padahki ehu ire mengei oh inenen mehlel me ntingdier nan Madiu. Mwurin Ih oh Sapwellime tohnpadahk ko arail ketidihsang pohn Nahna en Kiewekilahu, irail uhdi Kalili oh uhd douluhllahng Kapernaum. Wasao tohnpadahk ko kohdo rehn Sises, kalelapak:
“Ihs me keieu lapalap nan wehin nanleng?
“Oh Sises eri malipehla kisin seri kis reh, oh kosonedieng serio nan pwungarail,
“Oh mahsanih, Mehlel I ndahiong kumwail, Kumwail pahn lao wekila, oh rasehngala kisin seri kei, kumwail sohte pahn pidolong nan wehin nanleng.”5
Nan Mwomwohdiso, kahrepen padahngki rongamwahuo, kaidehn audehki iren kepehse nan mwahliel en Sapwellimen Koht seri kan, nan imwarail, nan perehn kasukuhl, de nan wasahn kalohk kan. Kaidehn mehn kasalehda ia uwen me pahpa/nohno, sounpadahk, de misineri ese. De en kaitaralahte dahme kitail ese me pid Sounkomouro oh Sapwellime Mwomwohdiso.
Keieun kahrepen kasukuhlo iei en sewese Sapwellimen Sahm Nanleng seri kan ren pwurala Reh oh iang Ih perepereniki mour soutuk. Pwehn wia met, kasukuhl en rongamwahuo anahne en kin kangoangeirail ren keid nan ahlen mour mwakelekel oh inou sarawi kan rahn koaros. Dahme kesikipe mieo iei kamarainih emen emen en medewe, pehm, oh eri wia mehkot me pid momourki kosondi mehlel kan en rongamwahuo. Inonden kahrepeo iei en kalaudehla pwoson rehn Kaun Sises Krais oh weliakapwala ong Sapwellime rongamwahuo.
Padahk me kin kapaiada oh wekidala oh kamaurala iei padahk me kin kahlamangih Sapwellimen Sounkomouro karasaras. Sounpadahk kan me kin kahlamangih Sapwellimen Sounkomouro karasaras kin poakohng oh papah irail me re kin padahkehng. Re kin kangongehki neirail kan me kin rongorong iren padahk soutuk me pid mehlel me sarawio Re kin momourki mour kan me katapan ong alasang.
Limpoak oh Papah
Sapwellimen Sounkomouro kalohk unseko poahsoanki limpoak ong mehn mpe. Mehlel, Sapwellime limpoak oh papah kin kalapw wia Sapwellime iren kaskuhl. Met me duwehte, sounpadahk kan me I keieu tamataman iei sounpadahk ko me kin ese, poakohng, oh kesempwaliki neirail tohnsukuhl kan. Irail kin rapahki sihpw me salongalao. Re kin kasukuhlki padahk kan en mour me I pahn ansou koaros tamataman.
Emen soangen sounpadahko iei Lucy Gertsch. Liho ese emen emen nah tohnsukuhl ko. Liho kin ansou koaros pwarek irail ko me sohte pwarodo ehu rahn Sarawi de me sohte kohdo. Se ese me liho kin katapankinkiht. Sohte emen kiht manokehla liho de iren kaskuhl ko me e kin padahngki.
Sounpar tohto mwuri, ansou me Lucy kerenlahngehr imwin ah mour, I pwarala reh. Se katamando duwen rahn oko mahso mwohn ansou me e wia aht sounpadahko. Se koasoaiahda emen emen tohn aht pwihno oh dahme emen emen kiht kin wiewia ansouo. Ah limpoak oh epwel doadoahk erein mour.
I pwungki Sapwellimen Kauno kehkehlik me dierek nan Doctrine and Covenants:
“I kihieng kumwail kosonned ehu me kumwail pahn kasukuhlieki emen emen padahk en wehio (tehk DC 88:77).
“Loaloapwoatieng kasukuhlih kumwail oh kumwail pahn alehdi ahi kapai.”6
Lucy Gertsch pwerisekieng kasukuhl pwehki e me limpoak mwuledek.
Mwowe Kopworopwor oh Mehlel
Wahnparon Piter kaweid, “Onopada ansou koaros pwe kumwail en sapeng mehmen me peki rehmwail ehu kahrepen kopworopwor me mie rehmwail.”7
Ele kopworopwor keieu laud me emen sounpadahk kak ehukihda iei koapworopwor me mie nan mehlel kan en rongamwahu en Sises Krais.
“Oh dahme kumwail en kin koapworopworiki?” Mormon kalelapak. “Kilang I ndahiong kumwail me kumwail pahn ahniki koapworopwor sang ni tomwen Christ oh manaman en sapwellime iasadao, pwe kumwail en iasada ong mour soutuk, oh met pwehki amwail pwoson ih.”8
Sounpadahk kan, kumwail ngihl laudla oh kadehde me mehlelo me pid Koht Sahm, oh Koht Nah, oh Ngehn Sarawi. Kalohkihda amwail kadehde me pid Pwuhken Mormon. Kasalehda duwen kaperen oh lingan mehlel kan me audehda kosondien komouro. Doadoahngki dipwisou kan me Mwomwohdiso kamanalahr, mehlel iren pwuhk sarawi kan, mehn wia kaskuhlpen mehlel kan en rongamwahu en Sises Krais me kapwurpwurdohro ni mengei oh mwakelekel. Tamataman Sapwellimen Sounkomouro kehkehlik en “sukuhlki iren pwuhk sarawi kan; pwe iei mwo me kumwail pahn diar mour soutuk: oh iei mwo kan me kin kadehde duwen ngehi.”9
Sewese Sapwellimen Koht seri kan en wehwehki dahme mehlel oh kesempwal nan mour wet. Seweseirail ren kakairda kehlail en pilada ahl akan me pahn kahluwairail ni meleilei nan ahl ong mour soutuk.
Padahki mehlelo, a Ngehn Sarawio pahn ieiang amwail doadoahk kan.
“Padahngki sang Ie”
Pwehki Sises Krais ketin peik ni unsek oh karakarahk mwohn Semeo, E “ketin keirda ni erepit oh kupwurekeng, oh ketin masamasala mwohn Koht oh aramas.”10 Kitail ahniki ineng en alasang met? Duwehte Sises “eh ketin sapwellimankihda kalahngan pwehki kalahngano,”11 kitail anahne kanengamah oh nantiheng rapahki marain oh erepit sang Koht ni atail kin songosong wehwehkihla rongamwahuo.
Rongorong wia ehu wiepen kasukuhl kesempwal. Ni ansoun kaunop ong ale padahk, kitail kin rapahki kamarain ni kapakap oh sawas sang Ngehn Sarawio. Kitail kin medewe, kitail kin kapakap, kitail kin doadoahngki padahk kan en rongamwahuo, oh kitail kin rapahki kupwur en Sahmo ong kitail.12
Sises ketin “padahki … soahng tohto sang ni karasaras kei,”13 me anahne salenge kan en rong, mahs akan en kilang, oh mohngiong kan en wehwehki. Ma kitail momourki atail warohng, kitail kak rong mwahu mwenginingin kan en Ngehn Sarawio, me kak padahkihong [kitail] mehkoaros, oh kataman ong [kitail] mehkoaros.14
Ni atail kin peikiong Sapwellimen Kauno luhk meleileio, “Padahki sang ie,” kitail pahn alehdi Sapwellime manaman sarawio. Na, kitail wenla mwowe nan ngehn en peik, ideidawehn atail mehn Kahlamangio sang ni kaskuhl duwehte me E ketin kupwurki kitail en padahki oh esehla ni duwen me E ketin kupwurki kitail en esehla.
© 2016 sang Intellectual Reserve, Inc. Kolokol pwuhng koaros. Ntingdahr nan USA. Kamanaman ong lokaiahn wai: 6/15. Kamanaman ong kawehwe: 6/15. Kawehwehpen First Presidency Message, March 2016. Pohnpeian. 12863 885
Padapadahk sang ni padahk wet
Presiden Monson lukeikitail en “medewe [atail] kak en padahk kan oh wehwehkihla oh kilenglahng Sounkomouro ni eh ketin wia atail Sounkaweid ni atail wia. Kumwail oh irail kan me kumwail kin pwarek kak euhpene oh rapahki kaweid kan nan pwuhk sarawi kan oh ropada duwen Sises Krais eh kin ketin padahk oh wehwehkihla. Kumwail kak tepkihda ekei iren pwuhk sarawi kan me Presiden Monson doadoahngkiher, me rasehng Madiu 11:29, Sohn 5:30, oh Mahk 4:2. Kumwail kak koasoaia duwen dahme kumwail kasukuhlkiher me pid Krais me kak seweseikumwail “en iang ale Sapwellime manaman sarawio.”