Visiting Teaching Amandzɛɛbɔ, Ebɔbira 2016
Hɛn Onnyiewiei Egya Ne Mbabaa
Mpaabɔ mu ara sũa adzesũadze yi na hwehwɛ dɛ ibohu dza ibɛkyɛ. Eretse “Ebusua No: Dawurbɔ a wɔdze ma Wiadze” ase no besi dɛn bɛma wo gyedzi wɔ Nyankopɔn mu enyin na woehyira hɔn a idua visiting teaching do ehwɛ hɔn do no? Ho nsɛm mbordo no, kɔ reliefsociety.lds.org.
Gyedzi, Ebusua, Mboa
Kyerɛwsɛm no kyerɛkyerɛ hɛn dɛ “yɛyɛ Nyankopɔn mbanana” (Ndwuma 17:29). Nyankopɔn frɛɛ Emma Smith, Nkɔnhyɛnyi Joseph Smith ne yer no dɛ “me babaa” (N&A 25:1). Ebusua dawurbɔ no kyerɛkyerɛ hɛn dɛ yɛyɛ “sor awofo … dɔba ɔbaa.”1
Carole M. Stephens, ɔpamfo a odzi kan wɔ wiadze mfɛndzanan Relief Society presidency mu no kãa dɛ, “[Abrabɔ ansaana yɛreba asaase yi do gyinabew] mu no, yesũae faa hɛn onnyiewiei bɔbea su dɛ mbaa.”
“Hɛn abrabɔ akwantu ba asaase do no annsesã dɛm nokwar no.”2
Elder Jeffrey R. Holland a ɔkã Asomafo Duebien no hɔn Quorum ho no kãa dɛ, “Hom Ɔsor Egya nyim hom edzin na hom gyinabew.” Ɔtse hom mpaabɔ. Onyim hom enyidado nye hom adaasõ, a hom suro nye abagura kã ho.”3
Akyerɛbaa Stephens kãa dɛ, “Hɛn mu kor biara kã Nyankopɔn N’ebusua ho na wohia hɛn wɔ mu.” “Asaase do ebusua ebusua biara nnsɛ. Na ber a yɛbɔ hɛn mbɔdzen biara dɛ yɛbɛkyekyer ebusua ebusua pa a ɔyɛ dzen no, yennhia gyinabew biara dze abɛyɛ Nyame ebusua mu ba—onngyina awar do, eyɛ ɔwofo, w’ahodze, man mu gyinabew, anaa gyinabew biara mpo a yɛdze to gua wɔ abaefo nkitahodzi do.”4
Kyerɛwsɛm a Ɔkã ho
Jeremiah 1:5; Romefo 8:16; Nkyerɛkyerɛ na Ahyɛmudzi 76:23–24
Fi Hɛn Abakɔsɛm mu
Fi ne Enyido-adzehu a Odzi Kan mu nsɛm no,5 Nkɔnhyɛnyi Joseph Smith dzii nokwar pii ho dase—a dɛ hɛn Ɔsor Egya nyim hɛn edzin kã ho.
Akokoaba Joseph peer dɛ obohu asɔr a ɔbɔdom na ohun akwankyerɛ wɔ James 1:5 mu. Joseph sii n’adwen pi dɛ obebisa Nyame.
Fefɛwber anapa bi wɔ afe 1820 mu no, ɔkɔr ndua kwã mu dɛ ɔrokɔbɔ mpaa naaso ntsɛmara sum mu tum bi bɛhyɛɛ no do. Oyi ho no, ɔkyerɛɛw dɛ:
“Aber yi ara mu a nna suro kɛse ekitsa me no, muhun kan fadum bi a ɔhyerɛn sen ewia, wɔ m’etsifi papaapa, a osiaan berɛww kɛpeem dɛ ɔtɔɔ mo do.
“Opuei no annkyɛr koraa nna ɔgyee me fii ɔtamfo no a ɔakyekyer me no nsamu. Ber a kan no tɔr mo do no muhun Nyimpa-su beenu bi a hɔn hyerɛn na hɔn enyimnyam no murunntum nnkã ho asɛm, dɛ wɔsensɛn mo sor wɔ wimu. Hɔn mu kor bɔɔ me dzin na ɔkasaa kyerɛɛ me, ɔtseen ne nsa wɔ kor no do—Oyi nye mo Dɔba no. Tsie No!” Hwɛ Joseph Smith—Abakɔsɛm 1:16–17.
© 2016 Intellectual Reserve, Inc. Wɔakora do tumdzi nyina. USA na wotsintsimii. English approval 6/15. Translation approval 6/15. Visiting Teaching Message, April 2016 ne Nkyerɛasee. Fante 12864 502
Susu Iyi Ho
Inyim dɛ eyɛ Nyame Ne babaa si dɛ fa w’adwenpɔw bɔ ho.