Mensahe ti Umuna a Panguluen, Mayo 2016
Dagiti Pili
Pilientayo koma ti narigrigat nga umno imbes a ti nalaklaka a biddut.
Kakabsat, sakbay a rugiak ti pormal a mensahek ita nga aldaw, kayatko nga ipadamag ti uppat a baro a templo, a kadagiti sumuno a bulan ken tawen, maipatakderdanto kadagiti sumaganad a lokasion: Quito, Ecuador; Harare, Zimbabwe; Belém, Brazil; ken ti maikadua a templo iti Lima, Peru.
Idi nagbalinak a miembro ti Korum dagiti Sangapulo-ket-dua nga Apostol idi 1963, adda 12 a maus-usar a templo iti intero a Simbaan. Iti dedikasion ti Templo ti Provo City Center dua a lawasen ti napalabas, adda itan 150 a templo a maus-usar iti sangalubongan. Nalaus a panagyamantayo kadagiti bendision nga aw-awatentayo kadagitoy a nasantuan a templo.
Ita, kakabsat, kayatko a yebkas ti panagyamanko para iti gundaway a mangiburay kadakayo iti sumagmamano a kapanunotan iti daytoy a bigat.
Pampanunotek itay kallabes maipapan kadagiti pili. Nakuna a naggapu iti babassit dagiti dadakkel a pasamak iti pakasaritaan, ket kasta met ti maaramid iti biag dagiti tao. Dagiti pili nga aramidentayo ti mangikeddeng iti pagtungpalantayo.
Idi pinanawantayo ti biagtayo sakbay daytoy a biag ket simrektayo iti mortalidad, inkuyogtayo ti sagut ti kinawaya a panagpili. Panggeptayo a tun-oyen ti celestial a gloria, ket dagiti pili nga aramidentayo, iti dakkel a paset, ket mangikeddengto no maragpattayo wenno saan ti panggep a tun-oyentayo.
Kaaduanna kadakayo ti pamiliar ken ni Alice iti Lewis Carroll’s classic novel Alice’s Adventures in Wonderland. Malagipyo a napan isuna iti pagkrusan a kalsada nga adda dua a dalan iti sangona, tunggal maysa ket agtultuloy ngem agsupadi ti pagturonganda. Kabayatan ti panangpampanunotna no ania a dalan ti pagligkuanna, nakasangona ti Pusa a Cheshire, a nagsaludsodan ni Alice, “Ania a dana ti surotek?”
Insungbat ti pusa, “Depende dayta no sadino ti kayatmo a papanan. No dimo ammo no sadino ti kayatmo a papanan, saan a napateg no ania a dana ti surotem.”1
Saan a kas ken ni Alice, ammotayo no sadino ti kayattayo a papanan, ken napateg nga ammuen ti dalan a papanantayo, gapu ta ti dana a surotentayo iti daytoy a biag ket agturong iti pagtungpalantayo iti sumaruno a biag.
Pilientayo koma nga ipasdek iti kaunggantayo ti natibker ken nabileg a pammati nga agbalinto a kasamayan a depensa a panglaban kadagiti dakes a gandat ti kabusor—pudno a pammati, ti kita ti pammati a mangtulong kadatayo ken mangpatibker iti tarigagaytayo nga agpili iti umno. No awan ti kasta a pammati, awan ti pagturongantayo. Addaan iti daytoy, maipatungpaltayo dagiti panggeptayo a tun-oyen.
Nupay masansan a nainsiriban ti intay panagpili, adda dagiti gundaway nga agbidduttayo kadagiti pilitayo. Ti sagut ti panagbabawi, nga impaay ti Mangisalakantayo ti mangpabael kadatayo a mangatur kadagiti turongentayo iti biag, tapno makasublitayo iti dana a mangiturongto kadatayo iti celestial a gloria a kalkalikagumantayo.
Mapagtalinaedtayo koma ti tured a mangsuppiat iti paggustuan ti kaaduan. Mapilitayo koma ti narigrigat nga umno imbes a ti nalaklaka a biddut.
Bayat ti panangpampanunottayo kadagiti pangngeddeng nga intay aramiden iti inaldaw iti biagtayo—aramidentayo man daytoy a pili wenno dayta a pili—no pilientayo ni Cristo, maaramidtayo ti umisu a pili.
Sapay koma ta agbalin a kastoy ti naimpapusuan ken napakumbaba a kararagko iti nagan ni Jesucristo, ti Apo ken Mangisalakantayo, amen.
© 2016 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/15. Pannakaanamongna a maipatarus: 6/15. Pannakaipatarus ti First Presidency Message, May 2016. Ilokano. 12865 864