Mensahe sa Visiting Teaching, Mayo 2016

Ipahamtang ka Niya sa Iya mga Abaga kag Dalhon Ka Pauli

Ni Pangulong Dieter F. Uchtdorf

Ikaduhang Manuglaygay sa Unang Pangulohan

Kasubong nga ginapangita sang Maayong Manugpahalab ang Iya nadula nga carnero, kon inyo lamang ibayaw ang inyo tagipusuon sa Manluluwas sang kalibutan, pangitaon Niya kamo.

Isa sang nagabalik-balik nga memorya sang akon pagkabata nagasugod sa gahod sang malayo nga mga sirena sa kahanginan nga nagapukaw sa akon gikan sa katulugon. Indi madugayan, may isa pa gid ka huni, ang tagaltal kag bagrong sang mga alisi, nga amat-amat nagatodo tubtob nga ginauyog na sini ang kahanginan. Nga nahanas na sing maayo sang amon iloy, kami nga kabataan magsigsabnit sang amon bag kag magdalagan pasaka sa bungyod pakadto sa palasilungan sa bomba (bomb shelter). Sa amon pagdali-dali sa tama kadulom nga kagab-ihon, may berde kag puti nga mga igpat (flares) nga nagakahulog halin sa kahawaan agud tandaan ang mga target para sa mga manugbomba. Katingalahan nga ginatawag nila ining mga igpat nga Christmas trees.

Apat ka tuig ang akon edad kag isa ako ka saksi sa isa ka kalibutan nga nagagiyera.

Dresden

Indi malayo sa kon diin ang akon pamilya nagaistar amo ang siyudad sang Dresden. Ang mga nagaistar didto nakasaksi ayhan sang linibo pa gid ka beses sang akon nakit-an. Makahalawhaw nga kalayo nga tuga sang linibo ka tonelada sang mga bomba ang naglikop sang Dresden kag nagguba sang kapin sa 90 porsiyento sang siyudad kag ang nabilin na lamang pagkatapos sini amo ang narumpag nga mga bilding kag abo.

Sa tuman ka lip-ot nga tion, ang siyudad nga sadto ginbansagan nga “Jewel Box” wala na. Si Erich Kästner, isa ka Aleman nga tagsulat, nagsulat parte sa kahalitan, “Sa isa ka libo ka tuig ang iya sini katahum ginpasad, sa isa ka gab-i ini lubos nga nawasak.”¹ Sa akon pagkabata indi ko mahunahuna kon paano ang kahalitan sang isa ka giyera nga ginsugdan sang amon kaugalingon nga katawhan ang malampuwasan pa. Ang kalibutan sa amon palibot daw lubos nga wala’y paglaum kag wala’y buas damlag.

Sang nagligad nga tuig nakaangkon ako sang oportunidad nga makabalik sa Dresden. Sitenta ka tuig pagkatapos sang giyera, ini, sa liwat, isa ka “Jewel Box” sang pagkasiyudad. Ang narumpag nga mga bilding nahawanan na, kag ang siyudad napanumbalik kag mas napanami pa.

Sa akon pagbisita nakita ko ang matahum nga Lutheran church Frauenkirche, the Church of Our Lady. Orihinal nga ginpasad sang 1700s, ini nangin isa sang nagabadlak nga hiyas sang Dresden, apang ang giyera nagtapyas sini sa isa ka tangkas sang wasak nga mga bato. Sa madamo nga tinuig ini nagpabilin nga amo sina, tubtob nga sa ulihi gindesisyonan nga ang Frauenkirche pagatukoron liwat.

Ang mga bato halin sa naguba nga simbahan gintago kag gin-imbentaryo kag, sa nagakabagay, gingamit sa pagtukod liwat. Karon makita ninyo ining mga bato nga ginpaitom sang kalayo nga nagapugtak-pugtak sa gwa nga mga pader. Ining mga “pinalian” indi lamang isa ka pahanumdom sang inagihan sa giyera sang sining bilding kundi isa man ka monumento sa paglaum—isa ka halangdon nga simbolo sang ikasarang sang tawo nga magtuga sang bag-o nga kabuhi halin sa mga abo.

Sa akon pagbinagbinag sang kasaysayan sang Dresden kag pagdayaw sa kaalam kag determinasyon sang sadtong mga nagpanumbalik sang sinang lubos nga nawasak, nabatyagan ko ang manami nga impluwensia sang Balaan nga Espiritu. Wala’y duda, akon ginhunahuna, kon ang tawo sarang magkuha sang guba nga mga istruktura kag mga bilin sang isa ka guba nga siyudad kag magpasad liwat sang isa ka makahalawhaw nga istruktura nga nagatindog palangit, ano pa gid ayhan ang ikasarang sang aton Amay nga Makagagahum nga ipanumbalik ang Iya mga anak nga nalaglag, nagahimud-os ukon nadula?

Indi importante kon daw ano ka lubos ang pagkaguba sang aton kabuhi. Indi importante kon daw ano ka bug-at sang aton mga sala, ano ka dalom sang aton kaakig, ano ka masinulub-on, napabayaan ukon napaslawan ang aton mga tagipusuon. Bisan inang wala na sing paglaum, ang nagapuyo sa kalisud, ang nagluib sang pagsalig, ang nagbuya sa ila integridad, ukon ang nagtalikod sa Dios sarang mapabangon liwat. Luwas sinang tumalagsahon nga mga anak sang kalaglagan, wala sing kabuhi nga tuman ka wasak nga indi ini sarang mapanumbalik.

Ang makalilipay nga balita sang ebanghelyo amo ini: bangod sang wala’y katapusan nga plano sang kalipayan nga ginhatag sang aton mapinalanggaon nga Amay nga Langitnon kag paagi sa wala’y dulunan nga sakripisyo ni Jesus nga Cristo, indi lamang kita matubos gikan sa aton pagkalaglag kag mapanumbalik sa kawala’y dagta, kundi sarang man kita maglabaw sa mortal nga imahinasyon kag mangin mga manunubli sang wala’y katapusan nga kabuhi kag mga manug-ambit sang di-masaysay nga himaya sang Dios.

Ang Paanggid sang Nadulang Carnero

Sa tion sang pag-alagad sang Manluluwas, ang mga lider sang mga relihiyon sang Iya panahon nagpakamalaut sang paghinguyang ni Jesus sang tion sa mga tawo nga ila ginbansagan nga “mga makasasala.”

Ayhan para sa ila daw Iya ginatolerar ukon ginapabulag-bulagan ang makasasala nga pangginawi. Ayhan nagapati sila nga ang pinakamaayo nga paagi agud buligan ang mga makasasala sa paghinulsol amo ang paagi sa pagkondenar, paghikay, kag pagpakahuya sa ila.

Sang nakita sang Manluluwas kon ano ang ginahunahuna sang mga Fariseo kag mga escriba, nagsaysay Sia sang isa ka istorya:

“Sin-o bala sa inyo ang tawo, nga may isa ka gatus ka carnero, kon madula ang isa sa ila, nga indi magbiya sang kasiaman kag siam sa kamingawan, kag magpangita sang nadula, tubtob nga makita niya ini?

“Kag sang nakita niya ini, ginapahamtang niya ini sa iya mga abaga, nga nagakalipay.”²

Sa madamo na nga mga siglo, ining paanggid kinaandan nga ginahangop bilang isa ka panawagan nga aksyunan naton nga ibalik ang nadulang carnero kag magdab-ot sa sinang mga nadula. Ini sia pat-od nga nagakaangay kag maayo pero nagahunahuna ako kon may dugang pa gid sini.

Posible ayhan nga ang katuyuan ni Jesus, una sa tanan, amo ang magtudlo parte sa buluhaton sang Maayong Manugpahalab?

Posible ayhan nga nagapamatuod Sia sang gugma sang Dios para sa Iya sutil nga mga anak?

Posible ayhan nga ang mensahe sang Manluluwas amo nga ang Dios lubos nga nagapanumdum sinang mga nadula—kag nga pangitaon Niya sila, nga magadab-ot Sia sa ila, kag nga salbaron Niya sila?

Kon amo sina, ano ang dapat himuon sang carnero agud mangin kaangay para sining diosnon nga bulig?

Ang carnero kinahanglan bala makahibalo kon paano gamiton ang isa ka komplikado nga sekstant (instrumento sa nabigasyon) agud mabanta ang iya sini nahamtangan? Kinahanglan bala ini nga makahibalo maggamit sang GPS agud maestablisar ang iya sini posisyon? Kinahanglan bala ini nga may kasampaton sa paghimo sang isa ka app nga makatawag para mangayo sang bulig? Ang carnero kinahanglan bala sang mga pag-endorso sang isa ka isponsor antes magsalbar ang Maayong Manugpahalab?

Indi. Siyempre indi! Ang carnero nagakaangay sang diosnon nga pagsalbar bangod ini ginapalangga sang Maayong Manugpahalab.

Para sa akon, ang paanggid sang nadulang carnero isa sa mga dinalan sa tanan sang balaan nga kasulatan nga nagahatag sing labi nga paglaum.

Ang aton Manluluwas, ang Maayong Manugpahalab, nakakilala kag nagapalangga sa aton. Kilala kag palangga Niya kamo.

Nakahibalo sia kon nadula kamo, kag nakahibalo sia kon diin kamo. Nakahibalo sia sang inyo mga kasakit. Inyo mahipos nga mga pag-ampo. Inyo mga kahadlok. Inyo mga luha.

Indi importante kon paano kamo nadula—ini man tungod sang inyo kaugalingon nga di-maayo nga mga pagpili ukon bangod sang mga sirkumstansya nga indi ninyo makontrolar.

Ang importante amo nga kamo Iya anak. Kag palangga Niya kamo. Palangga niya ang iya kabataan.

Bangod palangga Niya kamo, pangitaon Niya kamo. Ipahamtang Niya kamo sa Iya mga abaga nga nagakalipay. Kag kon dalhon Niya kamo pauli, magahambal Sia sa isa kag sa tanan, “Kalipay kamo upod sa akon; kay nakita ko ang akon carnero nga nadula.”³

Ano ang Aton Dapat Himuon?

Apang, ayhan, kamo nagahunahuna, ano ang kabaylo sini? Siyempre kinahanglan ko maghimo sing sobra sangsa maghulat lang nga salbaron.

Samtang ang aton mapinalanggaon nga Amay nagahandum nga ang tanan sang Iya mga anak magbalik sa Iya, wala Sia sang piliton nga mapalangit.⁴ Ang Dios indi magsalbar sa aton batok sa aton kagustuhan.

Gani ano ang aton dapat himuon?

Simple lang ang iya pangagda:

“Balik … sa akon.”⁵

“Kari sa akon”⁶

“Magpalapit sa akon kag Ako magapalapit sa imo.”⁷

Amo ini kon paano naton ipakita sa Iya nga gusto kita nga salbaron

Nagakinahanglan ini sing diutay nga pagtuo. Pero indi magkasubo. Kon indi pa kamo makatipon sang pagtuo subong, magsugod sa paglaum.

Kon indi kamo makasiling nga nakahibalo kamo nga ang Dios yara dira, mahimo kamo maglaum nga ara Sia. Makahandum kamo nga magpati;⁸ Hustohan na ina agud makasugod.

Dayon, sa pag-akto sa sinang paglaum, magdab-ot sa Amay nga Langitnon. Ang Dios magapabutyag sang Iya pagpalangga sa inyo, kag ang Iya buluhaton sang pagsalbar kag pagliwat magasugod.

Sing amat-amat, inyo makita ang Iya kamot sa inyo kabuhi. Inyo mabatyagan ang Iya pagpalangga. Kag ang handum nga maglakat sa Iya kasanag kag magsunod sa Iya banas magatubo sa tagsa ka tikang sang pagtuo nga inyo himuon.

Ginatawag naton ining mga tikang sang pagtuo “pagtuman.”

Indi na ina kilala nga tinaga sa karon nga panahon. Apang ang pagtuman isa ka ginahalungan nga konsepto sa ebanghelyo ni Jesucristo bangod nakahibalo kita nga “paagi sa Pagpasag-uli ni Cristo, ang tanan nga katawhan sarang maluwas paagi sa pagtuman sang mga kasuguan kag mga ordinansa sang Ebanghelyo.”⁹

Sa pagtubo sang aton pagtuo, kinahanglan man naton magtubo sa pagkatampad. Kagina ginsambit ko ang isa ka tagsulat nga Aleman nga nagkalisud sa pagkaguba sang Dresden. Ginsulat niya man ang mga pulong nga “Es gibt nichts Gutes, ausser: Man tut es.” Sa sinang wala nagahambal sang selestiyal nga lengguahe, ini ginalubad bilang “Wala sing maayo luwas kon himuon mo ini.”¹⁰

Mahimo nga kamo kag ako sagad maghambal parte sa espiritual nga mga butang. Mahimo nga mapahanga naton ang mga tawo sa aton madalom nga paghangop sang pang-relihiyon nga mga topiko. Mahimo kita maghambal sing bug-os-tagipusuon parte sa relihiyon kag “magdamgo sang [aton] mansyon sa ibabaw.”¹¹ Apang kon ang aton pagtuo wala nagaliwat sang aton pagpangabuhi—kon ang aton mga pagpati wala nagaimpluwensia sang aton adlaw-adlaw nga mga desisyon—ang aton relihiyon wala’y pulos, kag ang aton pagtuo, kon indi patay, pat-od nga indi maayo kag peligroso nga sa ulihi mapatay.¹²

Ang pagtuman amo ang kabuhi sang pagtuo. Paagi sa pagtuman kita nagatipon sang kasanag sa aton mga kalag.

Apang kon kaisa nagapati ako nga sala ang aton paghangop sa pagtuman. Mahimo nga lantawon naton ang pagtuman bilang ang katuyuan sa iya kaugalingon sangsa isa ka pamaagi padulong sa isa ka katuyuan Ukon mahimo naton mapulpog ang simboliko nga martilyo sang pagtuman sa salsalon nga tapalan sang mga kasuguan sa pagtinguha nga pormahon inang aton ginapalangga, paagi sa dalayon nga pag-init kag sulit-sulit nga pagbunal, sa pagmangin mas balaan, langitnon nga bagay.

Wala’y duda, may mga tinion nga kinahanglan naton sang seryoso nga panawagan sa paghinulsol. Sa pagkamatuod, may ara iban nga malab-ot sa sini lamang nga paagi.

Apang ayhan may yara sang lain nga paanggid nga sarang makapaathag kon ngaa ginatuman naton ang mga kasuguan sang Dios. Siguro ang pagtuman indi masyado ang proseso sang pagpatiko, paglubag, kag pagpulpog sang aton mga kalag sa isa ka butang nga indi kita amo. Kundi, ini ang proseso sa diin aton madiskubre kon himo kita sa ano.

Kita gintuga sang Dios nga Makagagahum. Sia ang Aton Amay nga Langitnon Kita literal nga Iya mga anak sa espiritu. Himo kita sa langitnon nga materyal nga labing bilidhon kag tuman ka pino, kag gani ginadala naton sa aton mga kaugalingon ang elemento sang pagkadiosnon.

Apang, diri sa duta, ang aton mga panghunahuna kag mga buhat napabug-at sang sinang imoral, di-balaan, kag di-puraw. Ang yab-ok kag higko sang kalibutan nagamantsa sang aton mga kalag, nga nagapabudlay sa pagkilala kag pagdumdom sang aton panublion kag katuyuan.

Apang ini tanan indi makaliwat kon sin-o gid kita. Ang duna nga pagkadiosnon sang aton kinaiya nagapabilin. Kag sa tion nga pilion naton nga isandig ang aton mga tagipusuon sa aton hinigugma nga Manluluwas kag magsulod sa banas sang pagkadisipulo, may milagro nga nagakatabo. Ang gugma sang Dios nagapuno sang aton mga tagipusuon, ang kasanag sang kamatuoran nagapuno sang aton mga kaisipan, nagasugod kita sa pagdula sang handum sa pagpakasala, kag indi kita luyag nga maglakat pa sa kadudulman.¹³

Mahangpan naton nga ang pagtuman indi isa ka silot kundi isa ka hilway nga alagyan padulong sa aton diosnon nga kapalaran. Kag sing amat-amat, ang korupsyon, yab-ok kag mga limitasyon sining duta magasugod nga madula. Sa ulihi, ang bilidhon, wala’y katapusan nga espiritu sang langitnon nga tinuga nga yara sa sulod naton magagwa, kag ang silak sang kaayo mangin aton duna.

Nagakaangay Ka nga Salbaron

Pinalangga kong mga kauturan, pinalangga kong mga abyan, nagasaksi ako nga makita kita sang Dios kon sin-o gid kita—kag makita Niya kita nga nagakaangay nga salbaron.

Ayhan nabatyagan ninyo nga ang inyo kabuhi nawasak. Ayhan nakasala kamo. Ayhan kamo nahadlok, naakig, nagakasakit, ukon nagaantus sang pagduda. Apang kasubong nga ang Maayong Manugpahalab nakakita sang Iya nadula nga carnero, kon inyo lamang ibayaw ang inyo tagipusuon sa Manluluwas sang kalibutan, pangitaon Niya kamo.

Salbaron Niya kamo.

Alsahon Niya kamo kag ipahamtang kamo sa Iya mga abaga.

Dalhon Niya kamo pauli.

Kon ang tawhanon nga mga kamot sarang magkambiyo sang guba nga mga istruktura sa isa ka matahum nga simbahan, nian sarang kita makasalig nga ang aton mapinalanggaon nga Amay nga Langitnon magapatindog liwat sa aton. Ang Iya plano amo ang ipasad kita sa isa ka butang nga mas dako sangsa kon ano kita sadto—tuman kadako sangsa kon ano ang aton mahunahuna. Sa tagsa ka tikang sang pagtuo sa banas sang pagkadisipulo, nagatubo kita sa pagmangin mga tinuga sang wala’y katapusan nga himaya kag wala’y dulonan nga kalipay nga amo ang aton disenyo.

Ini ang akon panaksihon, akon pagpakamaayo, kag akon mapinaubuson nga pangamuyo sa sagrado nga ngalan sang aton Manunudlo, sa ngalan ni Jesucristo, amen.

© 2016 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/15. Petsa sang pagtugot sa paglubad: 6/15. Paglubad sang Visiting Teaching Message, May 2016. Hiligaynon. 12865 861