Me Pwulopwul kan

Ehukihong mehteikan Peren Soutuk

Ehu soahng kan me keieu mwahu me pid rongamwahuo iei wehwehkihla koasoandien komouro. Kitail ahneki ansou mwahu douluhl en kin patehng atail peneinei kohkohlahte. Kamaraino kin seweseikitail en ahniki kopworopwor nan ansou kan me kitail kin pehm kansensuwed en sampah. Presiden Eyring padahngki, “Samatail Nanleng me limpoako mwahngih mohngiongtail kan. Sapwellime pwukoah iei ketikiheng kitail peren (tehk 2 Nephi 2:25). Oh E ahpw ketkihdo kisakis en Sapwellime Iehroso pwe en ketin kamangaiala katengtengpene en peneinei kan ni popohl kohkohlahte. … E wia kisakis ehu me Sapwellimen Koht seri koaros me kohdo sampah kak paieki.”

Kapaio kin doadoahk ong kitail koaros me wie momour ansouet oh ong irail ko me melahr—ahpw ihte sang ni atail sawas. Atail pahpa oh nohno en keilahn aio ko mihmi nan sahpwen ngehn ansouet, awiawih kitail en kaunopada adarail kan ong tiahk sarawi kan nan tehnpas sarawio en wiawihong irail. Ahpw ekei pak e kak apwal wia doadoahk wet ong irail. Kitail kakete inenen kediropw, de kitail kin kouson wasa me dohsang mehlel ehu tehnpas sarawi me kitail, kak kalap kohkohlaie.

Paiamwahu, mie soahngen ahl ekei me kitail kak sewesehki kadaudoketail kan, duwehte wia doadoahk en poadepen peneinei, kairakidi ahd akan ni duwen irekidi en mesen nting kan de apwalih seri ansou me pahpa/nohno kan kohla nan tehnpas sarawi. Sang ni sawas, kitail kin papah Kaunooh wahdo kowpworopwor en peneinei soutuk ong irail me melahr akan.