Fas Presidensi Mesej, Novemba 2016
Talem Tangkyu long Sabat Dei
I Kam long Presiden Henry B. Eyring
Fas Kaonsela long Fas Presidensi
Long ol Lata-dei Sent, Sabat i wan dei blong talem tangkyu mo lav.
Ol dia brata mo sista, we yufala i stap raon long wol long Jos blong Jisas Kraes blong Ol Lata-dei Sent. Mi glad we Presiden Thomas S. Monson i bin askem mi blong toktok long konfrens long Sabat dei ia. Mi prea se bae Tabu Spirit i tekem ol toktok blong mi i go insaed long hat blong yu.
Tedei mi wantem tokbaot ol filing blong hat. Hemia we bae mi tokbaot i fasin blong talem tangkyu—speseli long Sabat dei.
Yumi talem tangkyu from plante samting: kaen fasin blong wan strenja, wan kaekae taem yumi hanggri, wan drae ruf antap long hed blong yumi taem strong win i kam, wan bun we i brok we i stap hil, mo naes krae blong wan niubon bebi. Plante long yumi bae i tingbaot ol filing blong talem tangkyu long ol taem olsem.
Long ol Lata-dei Sent, Sabat i wan spesel taem, yes i wan dei blong talem tangkyu mo givim lav. Lod i bin tijim ol Sent long Jakson Kaonti, Misuri, long 1831, se ol prea mo tangkyu blong olgeta bae oli mas givim i go long heven. Ol fas Sent oli bin kasem wan revelesen long wei blong kipim Sabat dei, mo olsem wanem blong livim kakae mo prea.1
Long olgeta, mo yumi, Lod i bin talem olsem wanem blong wosip mo talem tangkyu long Sabat. Olsem we yufala i save talem, wanem i moa impoten, i lav we yumi gat long olgeta we oli stap givim ol presen. Hemia ol toktok blong Lod long wei blong talem tangkyu mo givim lav long Sabat:
“Mi givim wan komanmen long olgeta we i talem olsem: “Yu mas lavem Lod God blong yu wetem ful hat blong yu, wetem ful paoa blong tingting, ful maen mo ful paoa blong yu; mo long nem blong Jisas Kraes, bae yu mas wok blong hem. …
Yumi mas talem tangkyu long Lod, God blong Yu long evri samting.
“Yu mas givim wan sakrifaes long Lod, God blong yu, long stret mo gud fasin, we i wan hat we i fulap wetem sore mo wan spirit we i wantem blong sakem sin.”2
Mo afta, Lod i gohed blong givim woning long ol denja blong no stap talem tangkyu long Papa long Heven mo Jisas Kraes, olsem Ol Man blong givim presen: “Mo man i no save mekem God i kros long wan samting, o God i no save mekem kros blong hem i girap agensem wan man, be nomo, olgeta we oli no luksave han blong God long evri samting, mo oli no obei long ol komanmen blong hem.”3
Plante long yufala we i stap lisin, i faenem finis glad long Sabat, olsem wan dei blong tingbaot mo talem tangkyu long God from ol blesing. Yufala i save tingbaot gud singsing ia:
Spos ol trabol i stap sakem yu olbaot;
Bae mi lus nomo, i stap long tingting nao,
Yu mas tingbaot blesing we God i givim,
Bae yu sapraes taem yu kaontem evriwan.
Yu gat blesing
Kaontem evriwan,
Yu gat blesing
Luk God i givim …
Spos yu harem se yu wari oltaem
Olsem kros i hevi yu no naf long hem,
Yu mas tingbaot blesing bae yu nomo fraet
Spos yu tingbaot blesing bae hem i oraet.4
Mi stap kasem ol leta mo ol visit blong ol fetful Lata-dei Sent we oli hevi wetem ol trabol. Sam oli stap filim, se long olgeta, evri samting i lus. Mi hop mo stap prea se wanem bae mi talem abaot fasin blong talem tangkyu long Sabat, bae i save help blong mekem ol tu tingting oli go lus mo singsing i stat insaed long hat blong yufala.
Wan blesing we yumi save talem tangkyu from, i we yumi stap long sakramen miting ia, we yumi kam tugeta wetem moa long wan o tu disaepol blong Hem long nem blong Hem. I gat sam, long hom, we oli no save girap long bed blong olgeta. I gat sam we oli wantem stap long ples we yumi stap long hem, be, oli stap wok long ol hospital, mo stap givim pablik sefti, o stap difendem yumi wetem laef blong olgeta long sam draeples o dakbus. Samting ia nomo, we yumi save kam tugeta, iven wetem wan nara Sent nomo mo kakae sakramen, bae i helpem yumi blong stat blong talem tangkyu mo gat lav from kaen fasin blong God.
From Profet Josef Smit mo gospel we i kambak, wan nara blesing we yumi save kaontem, i we yumi gat janis blong kakae sakramen evri wik—we ol wokman blong God we oli gat raet oli rere, oli blesem, mo oli pasem. Yumi save talem tangkyu taem Tabu Spirit i konfemem long yumi se ol toktok blong prea blong sakramen, we ol prishud man ia we oli gat raet oli talem, Papa long Heven i stap ona long olgeta prea ia.
Aot long evri blesing we yumi save kaontem, hemia we i moa bigwan long olgeta evriwan i filing ia blong fogivnes we i kam taem yumi tekem sakramen. Bae yumi filim moa lav mo tangkyu long Sevya, we bigfala sakrifaes blong Hem i mekem se i posibol blong yumi kam klin long sin. Taem yumi kakae bred mo wota, yumi rimemba se Hem i bin safa from yumi. Mo taem yumi filim tangkyu from wanem Hem i bin mekem long yumi, bae yumi filim lav blong Hem long yumi, mo lav blong yumi long Hem.
Blesing ia blong lav we yumi kasem, bae i mekem i isi moa blong yumi obei komanmen ia blong “tingbaot hem oltaem.”5 Bae yu save, olsem mi, filim lav mo tangkyu long Tabu Spirit, we Papa long Heven i promesem se bae oltaem Hem i stap wetem yumi sapos yumi gohed blong stap fetful long ol kavenan we yumi bin mekem. Yumi save kaontem olgeta blesing ia evri Sandei mo filim blong talem tangkyu from.
Sabat i wan stret taem tu, blong tingbaot kavenan we yumi bin mekem long wota blong baptaes blong lavem mo wok blong ol pikinini blong Papa long Heven. Blong mekem folem promes ia long Sabat, bae yumi tekpat long wan klas, o kworom wetem ful tingting long hat, blong save bildimap fet mo lav long medel blong ol brata mo sista we oli stap wetem yumi. Promes ia hem i blong wok tu, wetem glad tingting long ol koling blong yumi.
Mi talem tangkyu from ol fulap Sandei we mi bin tijim kworom blong ol dikon long Baontiful, Yuta, mo tu, wan Sandei Skul klas long Aedaho. Mo mi tingbaot tu ol taem we mi stap olsem wan asisten long waef blong mi long neseri klas, we wok blong mi i blong givim ol pleiplei mo pikimap olgeta.
Hem i plante yia afta nomo we mi bin luksave, tru long Spirit, se simpol seves blong mi i go long Lod, i bin impoten long laef blong ol pikinini blong Papa long Heven. Long sapraes blong mi, sam long olgeta oli stap tingbaot yet, mo talem tangkyu long mi from ol traehad blong mi blong givim seves long olgeta long bihaf blong Masta long ol Sabat dei ia.
Semmak olsem we, samtaem, yumi no save luksave ol risal blong seves blong yumiwan bakegen we yumi stap givim long Sabat, bae yumi no save luk ol smolsmol risal blong seves blong ol nara wokman blong Lod. Be Lod i stap bildimap kingdom blong Hem long kwaet wei tru long wokman blong Hem we oli fetful mo gat tingting i stap daon; Hem i no mekem tumas noes mo Hem i wok from taosen yia blong glori blong Hem we i stap kam. Bae yumi nidim Tabu Spirit nao blong luk se i stap gro i bigwan olsem wanem.
Mi groap we mi stap go long sakramen miting long smol Niu Jesi branj wetem smol namba nomo blong ol memba mo wan famli, famli blong mi. Seventifaef yia i pas, mi bin baptaes long Filadelfia, long wan japel ia nomo blong Jos, long Pensilvania mo Niu Jesi. Long ples we i bin gat wan smol branj long Prinston, Niu Jesi long tetaem ia, naoia i gat tufala bigfala wod. Mo sam dei i jes pas, ol taosen blong ol yang pipol oli mekem wan selebresen bifo oli dediketem Filadelfia Pensilvania Tempol.
Olsem wan yang man, oli singaotem mi olsem distrik misinari long ples we mifala i stap wosip long hem long ol Sandei insaed long wan japel ia nomo long Albukeki, Niu Meksiko. Tedei i gat wan tempol mo fo stek.
Mi aot long Albukeki blong go long skul long Kambrij, Masajusets. I bin gat wan japel mo wan distrik nomo we i kavremap plante pat blong Masajusets mo Rodi Aelan. Mi draev tru long ol hil blong naes kantri ia i go long ol sakramen miting long ol smol branj, plante long ol ples we oli rentem mo ol smol haos. Naoia i gat wan tabu tempol blong God long Belmon, Masajusets, mo ol stek we oli stap olbaot long rural eria.
Wanem we mi no bin luk klia long tetaem ia, i we Lod i bin stap kapsaetem Spirit blong Hem long ol pipol long ol smol sakramen miting ia. Mi bin save filim, be mi no bin save luk se i bigwan olsem wanem mo taem blong tingting blong Lod blong bildimap mo kasem glori long kingdom blong Hem. Wan profet, tru long revelesen, i bin luk mo i bin raetemdaon wanem yumi bakegen, yumi save lukluk naoia. Nifae i bin talem se totol namba blong yumi bae i no bigwan, be laet we bae i hipap, bae i wan naes samting blong luk:
“Mo i bin hapen se mi luk Jos blong Smol Sipsip blong God, mo ol namba blong hem oli smol nomo. …
Mo i bin hapen se mi, Nifae, mi bin luk paoa blong Smol Sipsip blong God, we i bin kamdaon long ol sent blong Jos blong Smol Sipsip, mo long ol kavenan pipol blong Lod, we i bin seraot olbaot long ful fes blong wol; mo oli blokem olgeta wetem stret fasin mo paoa blong God long bigfala glori.”6
Long dispensesen ia, wan profet i tokbaot semfala situesen mo ol janis we oli stap, we oli raetem long Doktrin mo Ol Kavenan:
“Yufala i no andastanem yet se ol blesing blong Papa, we hem i gat long han blong hem mo i rere long hem from yufala, oli bigwan olsem wanem;
“Mo yufala i no save tekem evri samting naoia; be, yufala i stap glad, from we bambae mi lidim yufala i go. Kingdom i blong yufala mo ol blesing blong hem, oli blong yufala, mo ol rij samting blong taem we i no save finis, oli blong yufala.
“Mo hem we i akseptem evri samting wetem fasin blong talem tangkyu, bambae mi mekem hem i gat glori; mo ol samting blong wol ia, bambae mi ademap long hem, we i wan handred taem, yes, wan handred taem moa.”7
Mi bin filim jenis ia blong fasin blong talem tangkyu from ol blesing i stap gro, mo blong fasin blong gat lav long God i kam antap raon long Jos. I luk olsem se i stap spid long medel blong ol memba blong Jos long ol taem mo ol ples we i gat ol tes blong fet blong olgeta, long ples we oli mas plis long God blong kasem help blong stap gogohed.
Ol taem we bae yumi stap pas tru long olgeta, oli gat ol had tes semmak olsem i bin hapen long ol pipol blong Alma anda long rul blong Amulon, we i bin putum hevi wok long bak blong olgeta, we i hevi tumas blong oli tekem:
“Mo i bin hapen se voes blong Lod i bin kam long olgeta long ol hadtaem blong olgeta, i talem se: Leftemap ol hed blong yufala mo yufala i glad, from mi save kavenan we yufala i bin mekem wetem mi; mo bae mi mekem kavenan wetem ol pipol blong mi mo mekem olgeta i go fri long slef.
“Mo tu bae mi mekem ol hevi samting long solda blong yufala i nomo hevi, mekem se bae yufala i no save filim long ol bak blong yufala, taem we yufala i stap tu olsem slef; mo hemia bae mi mekem, blong mekem se yufala i save stanap olsem ol witnes blong mi long fiuja, mo blong mekem se yufala i save gud se mi, Lod God, mi visitim ol pipol blong mi long ol hadtaem blong olgeta.
Mo nao i bin hapen se ol hevi samting we oli bin putum long Alma mo ol brata blong hem i nomo hevi; yes, Lod i bin mekem olgeta i kam strong blong mekem se oli save karem ol hevi samting blong olgeta isi nomo, mo oli bin stap andanit wetem bigfala glad mo fasin blong save wet longtaem long evri wok blong Lod.”8
Yu mo mi oli ol witnes se, long eni taem we yumi bin kipim kavenan blong yumi wetem God, speseli taem i bin had, Hem i bin harem prea blong tangkyu blong yumi from ol samting we Hem i bin mekem finis from yumi, mo i bin ansarem prea blong yumi blong kasem paoa blong stap fetful blong stap strong. Mo moa long wan taem Hem i bin mekem yumi glad, mo tu, i bin mekem yumi strong.
Maet yu stap askem yuwan wanem yu save mekem blong laef mo wosip long Sabat dei tedei, blong soem tangkyu blong yu mo blong mekem yuwan mo ol narawan oli kam strong moa blong fesem ol tes we oli stap kam.
Yu save stat tedei wetem wan praevet mo wan famli prea blong talem tangkyu from evri samting we God i bin mekem blong yu. Yu save prea blong save wanem Lod i wantem yu wok long hem blong givim seves long Hem mo ol narawan. Speseli, yu save prea blong Tabu Spirit i talem long yu abaot wan we i stap hemwan, o i stap long nid we Lod i wantem yu go long hem
Mi promesem yufala se prea blong yufala bae i gat ansa, mo taem yufala i stap tekem aksen folem ol ansa ia, bae yufala i kasem, mo bae yufala i faenem glad long Sabat, mo hat blong yufala bae i fulap tumas wetem fasin blong talem tangkyu.
Mi testifae se God Papa i save mo i lavem yu. Sevya, we i Masta Jisas Kraes, i bin pem praes from yu from lav we Hem i gat long yu. Tufala, Papa mo Pikinini, Tufala i save nem blong yu semmak olsem we Tufala i bin save nem blong Profet Josef Smit taem Tufala i kamkamaot long hem. Mi testifae se hemia i Jos blong Jisas Kraes, mo bae Hem i ona long ol kavenan we yu bin mekem mo stap riniu wetem God. Bae stret fasin blong yu i jenis blong kam moa olsem Sevya. Bae yu kam strong agensem temtesen mo agensem filing blong gat tu tingting abaot trutok. Bae yu faenem glad long Sabat. Mi promesem yu olsem, long nem blong Jisas Kraes, amen.
© 2016 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/16. Oli letem translesen: 6/16. Translesen blong First Presidency Message, November 2016. Bislama. 12871 852