Porausen An Fefin Chon Amwa, November 2016
Ewe Aan mi Unusoch ngeni Pwapwa
Seni Preseten Thomas S. Monson
Ua pwarata usun ewe niffang mi nap ina an Semach kokkot fan itach. Ina ewe chok ew ann mi unusoch ngeni kinamwe me pwapwa.
Pwi me fefinei mi achengicheng ekkewe oua nom ikkei non ewe Conference Center me won unusan fonufan, ua fokkun kinisou ren ei tufich ai upwe aporausa ekieki ngenikemi.
Nime me ruu ier a no non July 1964, a wor ai angang non New York City otun ewe World Fair a fis non ena neni. Ew nesessor ua nongeni ewe imwen Mormon ren ewe nenien ochufengen. Ua war me mwen chok ra fichi ewe kachito Man’s Search for Happiness, porausen ewe kokkotun manau ese much minne sia kan sani me non ach Mwichefen. Ua mommot unukun emon anuon ai nuku epwe 35 ierin. Am aua ekkis fos fengen. Esap i emon chon ach mwichefen. Iwe ekkewe tengki ra kununo me a poputa ewe kachito.
Am aua ausening ngeni ewe chon fos ren an ani ekkewe kapas eis mi kan auchea: Ia ua feito mei ia? Pwata ua nom ikei? Ia upwe no ia nupwen ua no seni ei manau? Sening meinisin ra fokkun achocho ne rongorong penuan ekkewe kapas eis, me meinisin maas ra chok nefotofot ngeni ewe kachito. A pwari ew awewen manauch mwen uputiw, fiti ew awewen popun ach manau won fonufan. Am aua katon ewe porausen emon sam chinap a sopweno ngeni ewe nenien ngun me an chusefan ngeni aramasan kewe ra akkom ngeni ewe nenien ngun.
Nesoponon ei awewe mi ningoch usun an Semach won Nang kokkot fan itach, ekkewe chon katon ra feiniu non mosonoson, ra fokkun mefi ewe porausen ewe kachito. Ewe emon nepeki ese uta. Ua kapas eis ika a sani ewe kachito. A pwapwa ne apasa: “Iei ewe ennet!”
An Semach won Nang kokkotun ach pwapwa me ach manau mi choufetan me ren nouch kewe misineri won unusan fonufan. Nge esap meinisin ekkewe ra rongorong ewe poraus ra pwan etiwa. Nge mwan me fefin ekkis meinisin usun chienei we non ewe World Fair non New York City, ra esiina ennetin, me ra ipwetiw won ewe aan minne epwe emwenir ngeni nenier non kinamwe. Manauer a siwin fochofoch.
Jises Kraist ach Chon Amanau mi unusan auchea ngeni ewe kokkot. Ika esap fan itan an Achasefan, sipwe poutmwanino. Ese naf ach sipwe chok nuku non I me non an misin. Sipwe pwan angang, me kaeo, kutta me iotek, aier me echuno. Mi namwot sipwe sinei an Kot kewe annuk me aneasosichir. Mi namwot sipwe angei an angangepin mi amanau. Iei chok usun sipwe angei pwapwa ese much.
Sia feioch pwe a nom rech ewe ennet. Mi wor wisach sipwe aporausa ewe ennet. Amo sipwe manaueni ewe ennet pwe sipwe fich ngeni mettoch meinisin Semach a ammonata fan itach. Ese fori och mettoch ika esap fan itan ach feioch. A ereni kich iei an angang me an ning—pwe epwe esenipato ewe manau ese much me manau fochofoch an aramas.1
Seni anonnonun nguni, fiti unusan tekison, ua pwarata usun ewe niffang mi nap ina an Semach kokkot fan itach. Ina ewe chok ew ann mi unusoch ngeni kinamwe me pwapwa non ei manau me ewe manau epwe feito.
Pwi me fefinei, ua anomu remi ai tong me ai feioch ren ai ua osupwano, ua fori non itan ach Chon Amanau me Chon Angaseno, minne Jises Kraist, amen.
© 2016 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/16. Kapungunon awewen: 6/16. Chiakun Visiting Teaching Message, November 2016. Chuukese. 12871 901