Mulwol ko Bin Somm’on e Presidency, January 2017
Pulweg nga Lukngun
Yib rok President Dieter F. Uchtdorf
Bin L’agruw e Counselor u lane Bin Somm’on e Presidency
Dawori n’uw napan, ni gube yaliy ulung i gidii’ ni yaed be fil rogon e gat’ing. Kemus ni gube yaliy, me tamilang ngog ni fa’anra ri gubadag ni ngarin salap ko gat’ing, ma ngarim fil rogon nib n’uw napan.
Ngarim fil rogon i pir’eg lukngun mag yup nge kaen.
Achay Lulukngun
Ran nip ko somm’on ma yibe gay rogon ni nge kan lukngun e boed nib momaw’ ko somm’on, machane boech ngiyal’ ma gadaed ma guy e binem ko boech ban’en nima buch rodaed u lane yafas.
Gadaed chonggin e galasia, e rayog rodaed ni ngad pired u fithik e pi n’en ni yibe rrin’ ko gospel, duwer riy, nge pi machib ni boed nib falel’, ma baga’ fan, fa gadaed ba adag. Ran towasar nag daed ni ngad lulbuy niged, ni gadaed be leam nag ni gadaed be pulweg daed nga lukngun fare gospel.
Biney e ba moem ni ngan rrin’.
Bukun e duw ma gadaed ma thapeg e pi mulwol rok e pi profet rok Got. Ka gadaed ma thapeg e kanawo’ nge tin mangil ban’en ko pi babyor ni kan yoloey, babyor nib achig, nge babyoren e Galasia. Rayog ni ngad mel’eged e bin ni gadaed badag ni mornga’agen fare gospel, ma gadaed lulbuy niged, ma gadaed tay ni kad poyed e bin lukngun fare gospel.
Fare Tathapeg e ke Weliy
Biney e gathi ma magawon nib thil ko rran rodaed. Kakrom, ma pi toygang’ e kur pired nib n’uw napan ni yaed be mel’eg, ma yaed be thilthilyed, ma yaed be tugthin nag ko bin ngan e pi motochiyel nib bukun mira’ay e bin tha’abi ga’fan.
Reb e rran ma ulungi gidii’ nib skuul e ri gayed rogon ni ngar uneged fare Tathapeg nga fithik fare togpluw. Ri fithed Ngak ni nge leam nag e n’en ni ri’in e gidii’ e rayog ni ngar adaged.
“Tamachib,” ni yaed be fith Ngak, “bin ngan e motochiyel e ir e th’abi ga’ u fithik e motochiyel?”
Gadaed gubin ma gadaed manang rogon nike fulweg Yesus: “Thangri t’uf rom Somol ni ir e Got rom ni polo’ u gumircha’em, ngu polo’ i lanin’um, ngu polo’ i leam rom.
“Iraray e bin somm’on nge bin falel’ e motochiyel.
“Ma bin migid ngay e motochiyel ni ku ba ga’fan e bod e biney ni ga’ar, gin’en ni ga bay riy ma thangri t’uf rom e en ni bugul I yoror rom ni gow e guy.
“Urngin e motochiyel rok Moses nge tin i fil e pi profet ko girdi’ e be gif nga daken e gali motochiyel ney.”1
Wenig mu tafneyem ko bin tomur e thin: “be gif nga daken e gali motochiyel ney urngin motochiyel rok Moses nge tin i fil e pi profet ko girdi’.”
Gathi kemus nike dag fare Tathapeg lukngun ngodaed, machane ke yoeg e bin ni bay u lukngun.
Nup’ Lukngun
Gadaed chonggin e Galasia e kad ngongliyed e m’ag ni ngad feked fithngan Yesus Kristus nga dakean daed. Re m’ag nem ni gadaed be nang fan e gadaed ra athamgil ni ngad filed mornga’agen Got, me tu’uf rodaed, ma gadaed gel nag e mich rodaed Ngak, man tay Fan, man yan ko kanawo’ Rok, man sak’iy ni dabin mithmith ni yib ta micheg Rok.
Gelngin ni gadaed ra fil mornga’agen Got nge tu’ufeg Rok ngodaed, e gelngin ni gadaed ra nang ni fare miligach rok Yesus Kristus e ba tawa’ath rok Got nib thothup. Ma tu’ufeg rok Got e ma pi’ e athamgil ngodaed ni ngad fol gaed ko kanawo’ ko kalngan’ nib mangil rogon, ni ra gagyeg nigey ni ngan n’ag fan e kireb rodaed. Biney e kanawo’ e ma n’anggin daed ngeyag e tu’ufeg rodaed ngak e picha’an nib liyeg daed. Gadaed ra fil rogon i sap ko gidii’ nib fal’ rogon. Gadaed ra puloe’ ko lumel ni dabin noen’ e kireb nga dakean bee’ fa ni pufthin nag raed ko denen rodaed, kireb, mo’owaer, nge pin’en ni yibe fil, pi motochiyel u galasia ni kar tha’abed, gin ni yaed bay riy, fa ram’en dowey.
Gadaed ra guy gubin e gidii’ ni faak e Chitamangdaed nu Tharmiy—ni walagdaed ni pumo’on fa ppin.
Gadaed ra ayuweg boech e gidii’ u fithik munguy nge tu’ufeg—nib mu’un e pi’in nib momaw’ ni ngan tu’ufeg. Gadaed ra un ngak e picha’an nibe yoer man pi’ e gapas nga lanyan’ e picha’an ni tu’uf roraed.2
Ma gadaed ra nang ni dani tu’uf rodaed ni ngad magar niged mornga’agen lukngun fare gospel nib mangil.
L’agruw motochiyel e lukngun. Urngin e motochiyel rok Moses nge tin i fil e pi profet ko girdi’ e be gif nga daken e gali motochiyel ney.3 Napan ni gadaed ra adag e biney, ma ra mangil boech ban’en.
Fa’an ra gadaed be tiyan’ daed ngay, tafney, nge murwel e bay u lukngun ni yibe gel nag e tu’ufeg rodaed ngak Got ni Gubinfen ma gadaed be tu’ufeg boech e gidii’, ma rayog ni ngad nanged i kad pir’eged e bin mangil e bin lukngun ma ba pluw—ngay ni ngan mang bin riyul’ e pi gachalpen Yesus Kristus.
© 2017 by Intellectual Reserve, Inc. Gubin mabay matwon Kan yoloey u Merika. Kan micheg nag ko thin nu Ngalis: 6/16. Micheg nag i pilyeg: 6/16. Pilyeg e thin ko First Presidency Message, January 2017. Yapese 97921 905