Etop eke First Presidency, Ofiong Iba eke isua 2017
“Kpa Nte Ami Nkamade Mbufo”
Emi otode President Thomas S. Monson
Ke mme isua emi ekebede ufan mi kiet emi ekerede Louis ama eting inem mbuk kiet ono mi abanga eka esie, emi ekesitingde-iko sung-sung. Ke ini enye akpade, enye ikayakke inyene-okuk inim ino ndito esie irenowo ye iban edi akayak inyene udeme eke uwutnkpo, nwaidem ye nkopitem onim ono mmo.
Ke ema eketing ese ke itie mkpa ekure enyung eda enye ekebuk ke itie udi, ufokemana enam ndungore ke inyene se eka mmo akakpade okpong. Ke otu inyene oro, Louis ama edikut ekpri-nwed kiet ye ukpohore kiet. Ekpri-nwed oro eteme ete: “Ke mben ubetufok, odu ata nsip-nsip ekebe, emi odude ke etak drawer ke nkpo-ofong mi.” Ekebe oro esine mkpouto eke esit mi. Ukpohore emi eyetat ekebe oro.”
Kpukpru owo ekedu ke mkpaidem se eka mmo ekpenyene awak man enyene ufon ke ndida ukpohore nyit nnim.
Ema emen ekebe emi ke ebiet emi ekenimde edi ndien ekpeme eda ukpohore etat ekebe emi. Ke nte Louis ye mbon eken esede mme nkpo se ikodu ke esit ekebe oro, mmo ekut ndise ndito kiet-kiet, ye enying ye isua emana ndito. Ekem Louis ama omum valantine kiet emi enamde ke ufok osio edi. Ke ubok-nwed eyenowong emi enye okofiokde nte ubok-nwed esie, enye okot mme iko emi enye ekewetde ke isua Ata emi ekebede ntem ete: “Edima eka mi, ami mmema fi.”
Esit mmo ama obungore, uyo osuhore, ndien enyin ama ebit. Mkpouto eka mmo ekedi nsinsi ufokemana esie. Odudu esie okokongo ke itiat nsongo-nda eke “ami mmema fi.”
Ke ererimbot mfin emi, iduhe ebiet emi eyomde itiat nsongo-nda oro ekan ke ufok. Ndien inyung iduhe ebiet eke ererimbot ekpekutde eti uwutnkpo nsongo-nda oro ekan ke mme ufok mbon Latter-day Saints emi enamde ima edi akpan-nkpo ke uwem ufokemana mmo.
Ke eke nnyin emi itingde ete ke nnyin idi mme mbet eke Andinyanga Jesus Christ, Enye ama ono nnyin akakan item emi ete:
“Mmono mbufo obufa ibet nte, Mbufo ema kiet eken nte, mbufo nde ema kiet eken kpa nte nkamade mbufo.”
“Mbufo ema ema kiet eken, kpukpru owo eyeda oro efiok ete mbufo edi mbet Mi.”1
Edieke nnyin inimde mbet ndima kiet eken, nnyin inyene ndida kiet eken ke mfonido ye ukpono, ndiwut ima nnyin oto ke ebuana nnyin k’usen-k’usen. Ima onono inem iko, uyuho iboro, edinam nwaidem, utong eke enyenede-esit okop, ye esit eke efende ono. Ke ofuri ebuana nnyin, emi ye oruk edu eken eyenwam mbio efen edikut ima oro ke esit nnyin.
President Gordon B. Hinckley (1910–2008) eketing ete ke: “Ima … edi esio eke gold ke utit rainbow. Edi ima okpon akan utit eke rainbow. Ima nko odu ke ntongo, ndien oto ke ima ke uyai ranibow atara akanare ikpa-enyong ke usen oyobio edim. Ima edi ukpeme emi ndito etuade eyom, emi iwaad eyomde, ubop-nkpo emi adiande ndo, ye aran emi akpande ufip ke ufok; ima edi emem ke ini-usong, unwana idorenyin emi ayamade ke ini mkpa. Otim ofon ye mbon emi ekopde inem ima ke ebuana mmo ye ufokemana, ye ufan, ye ufok Abasi, ye mboho-idung.”2
Ima edi ata ntongo iko Abasi, mfon-nkan edu emi owo ekpenyenede. Ima edi usobo ono mme ufokemana eke oduode, ono obio eke owurede, ye idut eke edongode. Ima edi inua-imam, ndifung-ufok nno ekom, eti iko, ye iko-itoro. Ima edi nwaidem, utom-unwam, ye ndinam-nkpo nno owo ke muyomke –udori.
Mme ebe, ema iban mbufo. Ekama mmo ke uku ye esit-ekom. Ndito-eka iban, ema mme ebe mbufo. Ekama mmo ke ukpono ye osongo-uko.
Mme ete ye eka, ema ndito mbufo. Ebong akam eno mmo, eno mmo ukpeb, enyung eting iko-ntiense eno mmo. Ndito, ema mme ete ye eka mbufo. Ekpono, ekom enyung ekop-item eno mmo.
Mormon eketeme ete ke: “Ata edisana ima Christ miduhe, ke [nnyin] idige nkpo ndomokiet.”3 Ebenge mi edi yak nnyin ikpetiene item Mormon ke “ndibong akam nno Ete ke ofuri odudu, man [nnyin] iyuho ye ima emi Enye okonode kpukpru mbio eke enyimede Eyen Esie, Jesus Christ ke akpaniko; man [nnyin] ikabare idi mme ndito Abasi; man ke edidi Esie nnyin itie nte Enye.”4
© 2016 eketode Intellectual Reserve Inc. Ekpan kpukpru unen ndiming nwed emi. Ekeming ke USA. Enyime edikabare ke Iko Mbakara: 6/16. Enyimme Ndikabare: 6/16. Edikabare Etop eke First Presidency Message, February 2017. Efik. 97922 553
Ukpebnkpo eketode Etop Emi
President Monson ekekpeb nnyin ufon ndinyene ata mbiet-ima eke Christ, akpan-akpan ke ufok. Kere-banga ndibup mbon-owo emi mbufo ekesede ete eboho nte ufokemana enyung eneme ebanga mme usung nte mmo ekpewutde akamba ima eno kiet eken. Mbufo emekeme ndidoho mmo ete emek kiet kotu ekikere oro enyung enam uduak ndinam oro nte ufokemana. Nte uwutnkpo, mbon ufokemana ekeme ndiyom ufang ndidedebe nnam utom-unwam nno owo ufokemana efen kwa udua. Mbufo emekeme ndibup mmo ete ama ekem yak mmo ekere ebanga danga ndinwana nnam uduak oro akanam ima okori ke ufok mmo.