Etop eke First Presidency, Ofiong Ita eke isua 2017
Ndiyoho ye Edinen-ido
Otode President Henry B. Eyring
Akpa Ono-item ke First Presidency
President Thomas S. Monson, emi edide prophet Abasi mi ke isong, okofiori ete, “Mfin emi, ke nnyin inwana ye ata akamba udim eke idioknkpo, idiok-ido ye ekim emi akananam nnyin mikwe ke enyin nnyin.”1
Nte mbufo emedu ke mkpaidem ete ke President Monson eketing mme iko oro ke isua Aba-ye-duop emi ekebede? Edieke udim idioknkpo emi nnyin mikekereke ekekande nnyin okuk ke ini oro, didie ke idiok awak ndinwana ye nnyin mfin emi? Jehovah ama ofiori abanga eyo nnyin emi ke eti ntak ete, “Sese, mme asua ke edomo-idem (D&C 38:12).
Ekong emi “kpukpru nnyin inwanade mi”2 okotongo mbemiso nnyin ikedima-mana ke isong. Ekong oro okotongo mbemiso ekedibot isong. Ekong oro okotongo ke ata ediwak isua tosin ko ke ererimbot nkang spirit, emi Satan akanwanade onyung “oyom ndibiat unen ke owo ndimek.” (Moses 4:3).
Ema ekan Satan ke enwan oro ndien “esio enye eduok ke isong” (Eriyarare 12:9) ke ebiet emi enye akade-iso anwana ekong esie mfin emi. Mi ke isong, “enye ke anwana-ekong ye ikot Abasi, onyung ofuk mmo” (D&C 76:29) ye nsu, abianga, ye idomo.
Enye ke anwana-ekong ye mme prophet ye apostles. Enye ke anwana-ekong ye mbet ndifara-ke-idem ye edisana-ndaha eke ndo Enye ke anwana-ekong ye ufokemana ye temple. Enye ke anwana-ekong ye nkpo se idi eti, nsana-mma, ye edisana.
Didie ke nnyin idinwana ye oruk asua emi? Didie ke nnyin idinwana ye idiok emi ebietde nte ke eyekan ererimbot nnyin? Mkpo-ekong nnyin edi nso? “Oro edi ubiong nnyin. Mme anie owo edibere ye nnyin?
Odudu eke Eyenerong
Prophet Joseph Smith ekekpeb ete ke Satan enyene odudu ke idem nnyin ekesim ke ndaha emi nnyin inyimede ino enye.3
Nte okutde ini nnyin emi, Nephi “ama okut odudu eke Eyenerong Abasi, nte enye osuhore edidoro ndisana-owo eke ufok Abasi Eyenerong ke idem, onyung odoro mbon emi ekenmde ediomo ye Jehovah, emi ekesuande mmo ke ofuri iso isong; ndien mmo ekeyoho ye edinen-ido ye odudu Abasi ke akwa ubong” (1 Nephi 14:14; efiak eting-eyiri).
Didie ke nnyin idiyoho idem nnyin ye edinen-ido ye odudu? Ke nnyin ndinim usen Sabbath ke edisana inyung ikpono itie-oku. Ke nnyin ndinam nnying nnim ndisana ediomo, inam utom mbuk ufokemana nnyin, inyung ika temple. Ke nnyin ndika-iso ndomo ndikabare-esit nnyung mkpe Abasi ubok ete yak “anam iyip erisio-isop Christ man nnyin ikpebo erifen-nno ke mme idioknkpo nnyin” (Mosiah 4:2). Ke nnyin ndibong-akam nnyung nno-unwam nnyung nting-iko ntiense nnyung nnyene mbuotidem ke Jesus Christ.
Nnyin nko idibobo idem nnyin ye edinen-ido ye odudu ke nte nnyin “ikade-iso ikere-ke-esit [nnyin] ibanga mme iko uwem” (D&C 84:85). Nnyin idikere-ibanga mme iko oro ke ndisin idem-nnyin nkot ndisana nwed Abasi ye ke iko eke mme isungutom Abasi emi emekde, eke edibuanade uduak, ekikere, ye uyo Esie (se ke D&C 68:4) ke akwa mbono eke ofiong efen.
Ke ekong emi nnyin inwanade ye idioknkpo, kpukpru ini nnyin inyene nditi ete ke nnyin imenyene unwam oto ke ikpehe nkang mbiba. Mbon iberedem nnyin edi Nsinsi Abasi Ete, Obong Jesus Christ, ye Edisana Sprit.
Mbon iberedem nnyin nko edi udim-ekong emi enyin mikwe. Elisha okodoho okop-ndik akparawa kiet ke nte mmo esobode ye udim-ekong idioknkpo kiet ete, “Kufehe ndik, koro mmo emi edude ye nnyin ewakde ekan mmo eke edude ye mmo” (se ke 2 Kings 6:15–16).
Inaha nte nnyin ifehe ndik. Abasi amama Ndisana-ikot Esie. Enye idikpongke nnyin ke nsinsi.
Ami mmediongo nte ke Abasi, ke ndino iboro akam, ama okop mkpeubok mi man anyanga mi osio ke idioknkpo. Ami nting-iko ntiense nte dian ye unwam eke Abasi Ete, Andinyanga ererimbot, ye Edisana Spirit nnyin imebo osongo ete ke eyeno nnyin odudu awak ekem ke ndida nwana ye suto idiok odudu emi nnyin idisobode.
Yak nnyin ke kpukpru ini iyoho ye edinen-ido man nnyin ikeme ndinyene uko ndikan ke akpatre.
© 2017 eketode Intellectual Reserve Inc. Ekpan kpukpru unen ndiming nwed emi. Ekeming ke USA. Enyime edikabare ke Iko Mbakara: 6/16. Enyimme Ndikabare: 6/16. Edikabare Etop eke First Presidency Message, March 2017. Efik. 97923 553