Vrouebesoek Bboodskap, Maart 2017
Die Bemagtigende Krag van Jesus Christus en Sy Versoening
Bestudeer hierdie materiaal biddend, en soek inspirasie om te weet wat om te deel. Hoe sal begrip van die doel van die Verligtingsvereniging dogters van God help om voor te berei vir die seëninge van die ewige lewe?
Geloof, Familie, Verligting
“Ek is tot alles in staat deur Christus wat my krag gee” (Filippense 4:13). “Alhoewel ons almal swakhede het, kan ons hulle oorkom,” sê President Dieter F. Uchtdorf, Tweede raadgewer in die Eerste Presidensie. “Dit is inderdaad deur die genade van God, indien ons onsself verootmoedig en geloof het, dat ons swakhede ons sterk punte kan word.”1
Ons Saligmaker sê in die Leer en Verbonde, “Ek sal voor julle aangesig uitgaan. Ek sal aan julle regter- en aan julle linkerhand wees, en my Gees sal in julle harte wees, en my engele rondom julle, om julle te versterk” (L&V 84:88).
“Nefi is ʼn voorbeeld van iemand wat geweet het, verstaan het, en vertrou het op die bemagtigende krag van die Saligmaker,” sê Ouderling David A. Bednar van die Kworum van die Twaalf Apostels. Nefi se broers het hom met toue vasgebind en sy vernietiging beplan. Let op Nefi se gebed: ‘O Here, volgens my geloof wat in U is, sal U my verlos uit die hande van my broers; ja, gee my wel die krag dat ek hierdie toue kan losbreek waarmee ek gebind is’ (1 Nefi 7:17; klem bygevoeg).
“… Nefi het nie gebid om sy omstandighede te verander nie. Hy het eerder gebid vir die krag om sy omstandighede te verander. En ek glo hy het op hierdie wyse gebid want hy het geweet, verstaan en het die bemagtigende krag van die Versoening ondervind.
“Ek dink nie dat die toue waarmee Nefi vasgebind was net wonderbaarlik van sy hande en gewrigte afgeval het nie. Ek glo eerder dat hy geseënd was met beide uithouvermoë en persoonlike krag ver bo sy natuurlike vermoë, sodat hy dan ‘in die krag van die Here’ (Mosia 9:17) aan die toue gewerk, gedraai en gepluk het, en uiteindelik en letterlik in staat was om die toue te breek.”2
Addisionele Skrifgedeeltes en Inligting
© 2017 deur Intellectual Reserve, Inc. Alle regte voorbehou. Gepubliseer in die VSA. Engelse goedkeuring: 6/16. Vertalingsgoedkeuring: 6/16. Vertaling van Visiting Teaching Message, March 2017. Afrikaans. 97923 501