Pratham Adhyakshta ka Sandesh, May 2017
Sampurn Prem Dar ko Door Karta Hai
Pradhaan Dieter F. Uchtdorf dwara
Pratham Adhyakshta ke Dusre Salaahkaar
Aao hum hamare dar ko door kare aur anand, vinamrata, aasha, aur ek nidar saahas se jiye yeh jaante huwe ki Prabhu hamare saath hai.
Mere priye bhaaiyo aur bahano, priye doston, kya saobhaagye aur anand milta hai vishwabhar ke Girjaghar ki tarah apne vishwaas aur Parmeshwar aur Unke bachchon liye prem mein ek hoke milne mein.
Mai khaaskar abhaari hoon hamare priye bhavishyevakta, Thomas S. Monson, ki upasthiti ke liye. Pradhaan, hum hamesha aapke nirdeshan, salaah, aur gyaan ke shabdon ko swikaarenge. Pradhaan Monson, hum aapse prem karte hai aur hamesha aapke liye prarthna karte rahenge.
Saalon pehle, jab mai Frankfurt, Germany mein ek stake adhyaksh tha, hamare ek stake sabha ke ant mein ek priye aur dukhit bahan mere paas aayi.
“Kya yeh bura nahin?” usne kaha. “Aap ke bhaashan ke samay lagbhag chaar ya paanch log ekdam neend mein the!”
Maine kuch der socha aur jawaab diya, “Mujhe yakeen hai ki girja mein sona sabse achcha hai swaasth ke liye.”
Meri pyaari patni, Harriet, ne yeh suna tha aur baad mein mujhe bataya ki yeh jawaab mere sab jawaabon mein se sabse shareef tha.
The Great Awakening (Woh Mahaan Jaagran)
North America mein kuch sao saal pehle, “Great Awakening(Mahaan Jaagran)” naamak ek aandolan countryside mein shuru hua. Unka ek mukhye lakshye tha un logon ko jo dhaarmik baaton mein soye huwe the ko jaagana.
Jawaan Joseph Smith un prachaarakon, jo is dhaarmik jaangan mein the, se sune huwe baaton se prabhawit hota tha. Yahi ek vajah hai ki usne niji prarthna se Prabhu ki ichcha janne ki koshish ki thi.
In prachaarakon ka ek naatakiye, jasbaati tarika tha prachaar ka, jinke updesh narak ke daraone stithi par gaor karte hai jiska saamna paapi ko karna padega.1 In updeshon se log sote nahin the—magar inse unhe daraone sapne to zaroor aate honge. Unka lakshye aur tarika shaayad logon ko dara ke girja mein laana tha.
Dar Chaalaanki ke Liye
Itihaasik rup se, dar aksar logon se kuch karwaane ke aozaar ke liye istemaal kiya gaya hai. Maata-pita ne apne bachchon ke saath istemaal kiya hai, maalik ne karamchariyon, aur raajnetaaon ne matt dene waalon ke saath.
Marketing ke visheshagyon ne dar ke shakti ko samjha hai aur aksar uska istemaal kiya hai. Isiliye kuch vigyapanon mein yeh ankahi sandesh hota hai ki agar hum unka breakfast cereal na lenge ya sabse naye video game ya cell phone ko na le paaye, hum jiwan mein musibaton ka saamna karenge, akele aur udaas mar jaaenge.
Hum ispar haste hai aur sochte hai ki hum kabhi ayse chaalaanki ke prabhaao mein na aayenge, par hum kabhi kabhi aa jaate hai. Aur bhi bura, hum kabhi kabhi isi tarah ke tarikon ka istemaal karte hai kisi se apni ichcha karwaane ke liye.
Mere sandesh ka aaj do maksad hai: Pehla hai ki hum sochein ki hum kis had tak dar ka istemaal karte hai auron—tatha khud ko prerit karne ke liye. Dusra hai ek behtar tarika ka sujhao dena.
Dar Ki Samasya Kya Hai
Pehle, aao hum dar ki samasya kya hai jaane. Akhirkar, hum mein kaun hai jisne kabhi dar ke maare sahi bhojan na kiya ho, ek seat belt na bhaanda ho, zyaada kasrat na ki ho, paese na bachaya ho, ya paap se pashchataap na kiya ho?
Yeh sach hai ki dar ke kaaran hamare kriya aur chaal chalan par shaktishaali prabhaao padh sakta hai. Par yeh prabhaao thode samay ke liye aur utna gambhir nahin hota. Dar bahut logon par hamare hridayon mein pariwartan laata hai, aur woh kabhi hamein wayse log nahin banayega jo sahi karna aur Swarg ke Pita ka aagya maanna pasand karte hai.
Jo log darte hai shaayad sahi cheezein kahenge aur karenge, magar woh sahi cheez mehsoos nahin karenge. Woh aksar lachaar aur chidchida mehsoos karenge, kordhit bhi. Samay beetne par yeh ehsaas avishwaas, anaadar, vidroh tak bhi pahunch jaata hai.
Durbhaagye se, jiwan aur netagiri ke prati aysa galat soch sirf naastik duniya tak hi nahin hota. Mujhe dukh hota Girjaghar sadasyon ke baare mein sunkar jo galat prabhaao daalte hai—chaahe apne gharon mein, Girjaghar niyuktiyon mein, kaam par, ya auron ke saath apne daenik vaartalaabh mein.
Aksar, log dusron ka darana-dhamkaana mein dosh nikaalte hai, phirbhi woh khud mein us baat ko nahin dekh sakte. Woh apne hi banaye kaanoon mein wafa chahate hai, par jab koi aur use nahin paalan karta, to unhe shabdon, maansik rup se, aur kabhi kabhi shaaririk rup se bhi daatte hai.
Prabhu ne kaha hai ki “jab hum … saashan ya dabaao daalte ya majboor karte hai manushye ke bachchon ko, kisi bhi had ke galat vyavahaar se,… swarg unse hat jaaega [aur] Prabhu ki Aatma dukhi ho jaaegi.”2
Kuch samay ayse honge jab hum bahek jaaenge apne harkat ko sahi kehne mein yeh sochte hue ki ant mein vajah samjha jaaega. Hum shaayad yeh bhi sochenge ki saashan karna, chaalanki se kaam nikaalna, aur kathor hona auron ke achchaai ke liye hoga. Aysa nahin hai, kyunki Prabhu ne yeh saaf tay kiya hai ki “Aatma ka fal prem, anand, mel, dheeraj, kripa, bhalaai, vishwaas, namrata, [aur] sanyam hai.”3
Ek Behtar Tarika
Mai jitna apne Swarg ke Pita ko jaanta hoon, utna hi mai dekh paata hoon ki Woh kaise Apne bachchon ko prerit aur aguwaai karta hai. Woh krodhit, badla lenewaala, ya muhtodh nahin hai.4 Unka hi lakshye—Unka kaarye aur Unka mahima—hai hamein salaah dena, unnat karna, aur Unki puri bharpuri mein le jaana.5
Parmeshwar ne Moses se kaha ki Woh Khud “dayalu aur kripalu, lambe samay tak dukh jhelne waala, aur atyant achcha aur satya.”6
Hamare Swarg ke Pita ka prem hamare liye, Unke bachche, hamare gyaan ki chamta se pare hai.7
Kya iska matlab hai ki Parmeshwar un vyavahaar ki ninda ya nazarandaaz kar deta hai jo Unki aagyaaon ke anusaar nahin hai? Nahin, bilkul nahin!
Par Woh chahata hai sirf hamare vyavahaar mein hi nahin parivartan aaye. Woh hamare prakriti mein parivartan chahata hai. Woh hamare hridayon mein parivartan chahata hai.
Woh chahata hai ki hum aage badhe aur lohe ke chadi ko kas ke pakad lein, apne dar ka saamna kare, aur nidarta se aage badhe aur upar jaaye sidhe aur sakre maarg par. Woh hamare liye aysa chahata hai kyunki Woh humse prem karta hai aur kyunki yahi khushiyaali ka maarg hai.
Tab, kaise Parmeshwar Apne bachchon ko prerit karta hai hamare dinon mein Unki ichcha karne mein?
Usne Apna Putra bheja!
Parmeshwar ne Apne Iklaute Putra, Ishu Masih ko bheja, hamein sahi maarg dikhaane ke liye.
Parmeshwar hamein protsaahan, lambe samay tak kasht jhelne, komalta, namrata, aur sachcha prem ke zariye prerit karta hai.8 Parmeshwar hamare paksh mein hai. Woh humse prem karta hai, aur jab hum ladkhadaate hai, Woh chahata hai ki hum uthe, aur phir koshish karein, aur mazboot banein.
Woh hamara salaahkaar hai.
Woh hamara mahaan aur pasandida aasha hai.
Woh chahata hai ki humare andar vishwaas ubhre.
Woh hum par bharosa rakhta hai ki hum apne thokron se seekhein aur sahi chunaoo banaein.
Yeh hai behtar tarika!9
Duniya ke Buraaiyon ka Kya?
Ek tarika jisse Shaetaan chahata hai ki hum dusron ka istemaal karein, woh hai duniya mein buraai sochna aur use badhawa dena.
Waakai mein hamari duniya hamesha se, aur lagataar, asampurn rahega. Kayi naadaan log kasht jhelte hai prakritik paristhitiyon se tatha manushye ke nirdayta se bhi. Hamare samay ki dushtta aur paap anokha aur khaufnaak hai.
Par in sab cheezon ke bawajood, mai is samay mein jeena duniya ke itihaas mein kisi bhi anye samay mein jeene se nahin badlunga. Hamein bahut ashish mila hai ayse samay mein jeene ka jahan bejod safalta, shiksha, aur laabh hai. Sabse zyaada, hum dhanye hai Ishu Masih ka sampurn susamachaar paakar, jo hamein ek anokha nazariya deta hai duniya ke khatron par aur dikhlata hai kaise in khatron se bacha jaa sakta ya unka saamna kar sakte hai.
Jab mai in ashirvaadon ke baare mein sochta hoon, mai apne ghutnon pe girke aur hamare Swarg ke Pita ki jayjaykaar karna hai Unke na-khatm hone waali prem ke liye Apne bachchon ke liye.
Mai nahin vishwaas kar sakta Parmeshwar chahata hai Unke bachche dare ya duniya ke buraaiyon par dhyaan tikaae. “Kyunki Parmeshwar ne hamein dar ki aatma nahin diya; parantu shakti, aur prem, aur ek shaant mann ki.”10
Usne hamein kayi vajah diye hai khush hone ke. Hamein sirf unhe paana aur pehchaanna hai. Prabhu hamein aksar yaad dilata hai “daro mat,” “khushaal raho,”11 aur “daro mat, chote bhed.”12
Prabhu Hamare Ladaaiyaan Ladega
Bhaaiyon aur bahanon, hum Prabhu ke “chote bhed” hai. Hum antim dinon ke Sant hain. Hamare naam anusaar hamein Uddhaarkarta ke lautne ka intazaar karna hai aur apne aap aur duniya ko tayyaar karna hai. Isliye, aao hum Parmeshwar ki sewa karein aur bhaai bandhuwon se prem karein. Aao hum yeh sab ek aam saahas, vinamrata se karein, kabhi bhi kisi anye dharm ya kisi dal ke logon ko nicha na dikhaae. Bhaaiyon aur bahanon, hamein zimmedaari di gayi hai Parmeshwar ke vachan ka adhyan ka aur Aatma ki aawaaz ko sunne ka, taaki hum “us samay ke chinh ko jaane, aur Manushye ke Putra ke aane ke chinh ko jaane.”13
Isliye, hum duniya ke chunaotiyon se aparichit nahin hai, na to hum hamare samay ke kashton se bekhabar hai. Par iska matlab yeh nahin ki hamein khud ko ya auron ko nirantar dar ke bojh se laadna hai. Hamare chunaotiyon ke taaydaad par dhyaan dene ke bajae, kya achcha nahin hoga ki hum hamare Parmeshwar ke anant mahaanta, achchaai, aur param shakti par dhyaan dein, Unpar bharosa karke aur Ishu jo Masih hai ke aane ki tayyaari khushi se karte huwe?
Unke vachan badh log hone ke naate, hamein dar se shaktiheen nahin ho jaana chahiye ki aage chal ke bure cheez honge. Parantu, hum vishwaas, saahas, pakka iraada, aur Parmeshwar mein bharosa ke saath aage badhein apne chunaotiyon aur maokon ki or.14
Hum chelapan ke maarg par akele nahin hai. “Prabhu tera Parmeshwar … tere saath jaaega; woh tujh ko dhoka na dega, na chodega.”15
“Prabhu khud tumhare liye ladega, isliye tum chup chaap raho.”16
Dar ke aage, aao hum apna saahas baandhe, apne vishwaas mein nipunn howe, is vaade mein saahas paaye ki “jitne hatiyaar tere haani ke liye banae jaaye, un mein se ki safal na hoga.”17
Kya hum jokhim aur khalbali ke samay mein jeete hai? Haan bilkul.
Khud Parmeshwar ne kaha, “Sansaar mein tumhein takleefe milti hai: parantu dheeraj baandho; maine sansaar ko jeet liya hai.”18
Kya hum isi tarah vishwaas rakhenge aur kaaryon ko karenge? Kya hum apne zimmedaari aur pavitra vachanon ka paalan karenge? Kya hum chunaotipurn stithiyon mein bhi Parmeshwar ke aagyaaon ka paalan karenge? Haan hum bilkul karenge!
Hum aysa karenge kyunki Parmeshwar ne vaada kiya hai, “Sab kuch tumhari achchaai ke liye hoga, agar [tum] sachchaai mein chaloge.”19 Isliye, aao hum hamare dar ko door kare aur anand, vinamrata, aasha, aur ek nidar saahas ke jiye yeh jaante huwe ki Prabhu hamare saath hai.
Sampurn Prem Dar ko Door Karta Hai
Mere priye doston, Masih mein mere priye bhaaiyon aur bahanon, agar hum kabhi khud ko dar ya chinta mein paaye, ya agar hum kabhi na dekhe ki hamare shabdon, rawaiya, ya chaal chalan se kisi mein dar utpann karta hai, mai prarthna karta hoon apne pure hriday se ki hum is dar se chutkaara paaye in divye sujhaao se: Mash ka shudh prem, kyunki “sampurn prem dar ko door karta hai.”20
Masih ka sampurn prem chot pahunchane, jabardasti karne, satane, ya julm karne ke behkaawon se mukti dilata hai.
Masih ka sampurn prem hamein vinamrata, gaurav, aur ek nidar saahas se hamein chalne ka mauka deta hai hamare priye Uddhaarkarta ke chele ke rup mein. Masih ka sampurn prem hamein saahas deta hai apne dar se guzarne mein aur apna pura bharosa hamare Swarg ke Pita aur Unke Putra, Ishu Masih ke shakti aur achchaai par rakhne ka.
Hamare gharon, vyapaar ke jaghon, Girjaghar ke niyuktiyon, dilon mein, hum dar ki jagah par Maseeh ka sampurn prem rakhein. Maseeh ka prem dar ki jagah par vishwaas laaega!
Unka prem hamein Swarg ke Pita ke achchaai, Unke divye yojna, Unke susamachaar, aur Unke aagyaaon ko pehchaanne, par bharosa, aur vishwaas karne ke kaabil banata hai.21 Parmeshwar aur hamare bhaaibandhuwon se prem rakhne se Parmeshwar ke aagyaaon ke prati aagyakaari hone se hum bojh ki jagah ashirvaad paaenge. Masih ka prem hamein thoda aur dayalu, zyaada maafi dene yogye, zyaada parwaah karne laayak, aur zyaada samarpit banaega Unke kaarye ki or.
Jab hum apne hriday mein Masih ka prem bharenge, hamein ek naya dhaarmik taazgi milega aur hum khushi, saahas, chaukas, aur zinda dili se chalenge hamare priye Uddhaarkarta, Ishu Masih ke jyoti aur mahima mein.
Mai, Devdut John, ke saath gawahi deta hoon, “[Masih ke] prem mein dar nahin hota.”22 Bhaaiyon aur bahanon, priye doston, Parmeshwar tumhein achchi tarah jaanta hai. Woh tumse sachcha prem karta hai. Woh jaanta hai tumhara bhavishye kya hai. Woh chahata hai ki tum “daro mat, sirf vishwaas karo”23 aur “unke [sampurn] prem mein bane raho.”24 Yeh hai mera prarthna aur ashirvaad Ishu Masih ke naam se, amen.
© 2017 Intellectual Reserve, Inc.dwara Pure adhikaar surakshit. USA mein chaapa gaya. Angrezi swikriti: 6/16. Anuwaad swikriti: 6/16. First Presidency Message, May 2017 ka anuwaad.Hindi, Fiji 97925 298