Mensahe sang Unang Panguluhan, Mayo 2017

Ang Himpit nga Gugma Nagatabog sang Kahadlok

Ni Pangulong Dieter F. Uchtdorf

Ika-duhang Manuglaygay sa Unang Panguluhan

Ipaiway naton ang aton mga kahadlok kundi magkabuhi nga may kasadya, pagpaubos, paglaum, kag sang maisog nga kumpiyansa nga ang Ginuo kaupod naton.

Pinalangga kong mga kauturan, mahal nga mga abyan, isa ka pribilihiyo kag kasadya nga magkilit-anay bilang bug-os-kalibutan nga Simbahan nga nagaisa sa aton pagtuo kag pagpalangga sa Dios kag sa Iya mga kabataan.

Labi ako nga nagapasalamat sa presensya sang aton pinalangga nga propeta, nga si Thomas S. Monson. President, amon gid pirme itanom sa tagipusuon ang imo mga pulong sang paggiya, laygay, kag kaalam. Palangga ka namon, Pangulong Monson, kag pirme kami nga magapangamuyo para sa imo.

Pila ka tuig na ang nagligad, sang nagaalagad pa ako bilang stake president sa Frankfurt, Germany, isa ka pinalangga pero wala nasadyahi nga sister ang nagpalapit sa akon sang matapos ang isa sang amon mga miting sa stake.

“Indi man daw kalaw-ay?” siling niya. “Siguro may apat ukon lima ka tawo nga hamuok gid ang tulog samtang nagahambal ka!”

Namensar ako sing makadali kag nagsabat, “Sigurado gid ako nga ang pagtulog sa simbahan isa sang pinakamakapaayo sa tanan nga tulog.”

Ang but-anan ko nga asawa, nga si Harriet, nakabati sining kaswal nga pagsabtanay kag sang ulihi nagmuno nga amo yadto ang pinakamanami nga sabat nga akon ginhatag.

Ang Dako nga Pagkapukaw

Pila ka gatos ka tuig ang nagligad sa Aminhan nga Amerika, isa ka lihok nga ginatawag ang “Dako nga Pagkapukaw” ang naglapnag sa kabanwahanan. Isa sang tig-una nga katuyuan sini amo ang pukawon ang katawhan nga daw nagakatulog sa espirituhanon nga mga bagay.

Ang lamharon nga si Joseph Smith naimpluwensyahan sang mga butang nga iya nabatian sa mga manugwali nga nangin bahin sining relihiyoso nga pagkapukaw. Isa ini sa mga rason nga nagdesisyon sia nga sinsero nga hibaluon ang pagbuot sang Ginuo sa pribado nga pangamuyo.

Ining mga manugwali may madrama, emosyunal nga estilo sang pagpangwali, nga ang mga sermon kilala sa mabug-at nga pagdagmit sang nagadaba-daba nga kalayo sang impiyerno nga nagahulat sa makasasala.¹ Ang ila mga pamulong-pulong indi makapatulog—kundi makatuga pa gani sang indi manami nga mga damgo. Ang ila katuyuan kag metodo daw amo nga pahugon ang mga tawo agud magsimba.

Kahadlok bilang Manipulasyon

Sa kasaysayan, ang kahadlok masami nga ginagamit nga pamaagi agud pagihuon ang mga tawo. Gingamit ini sang mga ginikanan sa ila kabataan, sang mga amo sa ila mga empleyado, kag sang mga pululitiko sa mga bumuluto.

Ang mga batid sa baligyaanay nakaintiende sang gahum sang kahadlok kag masami ini ginagamit. Amo nga ang pila ka pasayod daw nagadala sang pat-od nga mensahe nga kon indi kita magbakal sang cereal para pamahaw ukon indi kita makaangkon sang pinakabag-o nga hampang sa bidyu ukon sang celfon, mahimo nga mangin miserable ang aton kabuhi, mapatay kita nga nagaisahanon kag masinulub-on.

Nagayuhum kita sa sini kag nagapensar nga indi kita iya madala sa subong sini nga pagmanipula, pero kon kaisa nagakadala kita. Malain pa, kon kaisa nagagamit man kita sang pareho sini nga metodo agud himuon sang iban ang gusto naton.

May duha ka katuyuan ang akon mensahe karon: Ang una amo nga agdahon kita nga pamalandungan kag binagbinagon ang kadakuon nga kita nagagamit sang kahadlok agud paisugon ang iban—lakip na ang aton kaugalingon. Ang ika-duha amo ang magpanugyan sang mas maayo nga paagi.

Ang Problema sa Kahadlok

Una, sabton naton ang problema sang kahadlok. Kon panumdumon, sin-o bala sa aton ang wala ginpadasig sang kahadlok nga magkaon sang mas makapaayo, maggamit sang seat belt, mag-ehersisyo pa, magsupot sang kuwarta, ukon bisan gani maghinulsol sang sala?

Matuod nga ang kahadlok may mabaskog nga impluwensya sa aton mga aksyon kag pagginawi. Pero ang ina nga impluwensya masami umalagi lamang kag manabaw. Ang kahadlok talagsa lang nga may gahum nga bag-uhon ang aton mga tagipusuon, kag indi kita sini bag-uhon sa mga tawo nga nagapalangga sang husto kag gusto magtuman sa Amay nga Langitnon.

Ang mga tawo nga nagakahadlok mahimo nga maghambal kag maghimo sang husto nga mga butang, pero indi nila mabatyagan ang husto nga mga butang. Masami nagabatyag sila nga wala sing may mahimo kag nagahinakit, bisan kaakig. Sa kadugayan ang ini nga balatyagon nagapadulong sa pagkadula sang salig, pagkontra, bisan pagrebelde.

Sa malain nga palad, ang ining nagtalang nga pag-atubang sang kabuhi kag pagkalider indi lamang makita sa sekular nga kalibutan. Nasubuan gid ako nga mabatian nga may mga miyembro sang Simbahan nga nagagamit sang indi matarong nga pagdumala—bisan sa ila mga puluy-an, sa ila mga palangakuan sa Simbahan, sa trabaho, ukon sa ila adlaw-adlaw nga pagpakigbagay sa iban.

Sa masami, ginapakamalain sang mga tawo ang pagpamigos sa iban nga tawo, pero indi nila ini makita sa ila mismo kaugalingon. Nagamando sila nga sundon ang ila indi matarong nga mga patakaran, pero kon indi pagsundon sang iban ang ining pagusto lang nga mga patakaran, ginasilutan nila ini sa hambal, sa emosyunal, kag kon kaisa sa pisikal.

Ang Ginuo nagsiling nga “kon kita … nagagamit sang kontrol ukon pagdominar ukon pagpamilit sa mga kalag sang mga anak sang tawo, sa ano man nga sahi sang pagka di-matarong, … ang mga langit nagaatras [kag] ang Espiritu sang Ginuo nagakasubo.”²

Mahimo nga may mga tion nga nagakatentar kita nga pangatarungan ang aton mga aksyon sa pagpati nga ang resulta magapakamatarong sang pamaagi. Mahimo pa gani nga nagapamensar kita nga ang pagkontrolar, pagmanipular, kag kaparas mangin makapaayo para sa iban. Indi ini husto, kay ang Ginuo nagklaro nga “ang bunga sang Espiritu amo ang gugma, kalipay, paghidaet, pagbatas, pagkalulo, pagkaayo, pagkatutom, pagkamapainubuson, [kag] pagpugong sang kaugalingon.”³

Ang Mas Maayo nga Paagi

Sa pagkilala ko pa gid sa akon Amay nga Langitnon, mas nakita ko kon paano Niya ginapadasig kag ginapanguluhan ang Iya mga anak. Indi Sia akig, madumot, ukon nagapangita sing patas.⁴ Ang Iya mayor nga katuyuan—ang Iya buluhaton kag ang Iya himaya—amo nga tudluan kita, ipahitaas kita, kag tuytuyan kita padulong sa Iya kabug-usan.⁵

Ang Dios naglaragway sang Iya Mismo Kaugalingon kay Moises bilang ang “maluluy-on kag maalwan, mainantuson, kag puno sing kaayo kag kamatuoran.”⁶

Ang pagpalangga sang aton Amay sa Langit, nga Iya mga anak, labaw pa sangsa aton masarangan nga hangpon.⁷

Buot silingon bala sini nga ginakunsinte ukon wala ginatamdi sang Dios ang mga pangginawi nga nagalubag sa Iya mga kasuguan? Indi, pat-od gid nga wala!

Pero luyag Niya nga bag-uhon ang mas labaw pa sangsa aton mga pangginawi. Luyag Niya nga bag-uhon ang aton mismo mga kinaugali. Luyag Niya nga bag-uhon ang aton mga tagipusuon.

Luyag Niya nga dab-uton naton kag kaptan sing hugot ang barandilya nga salsalon, atubangon ang aton mga kahadlok, kag maisog nga magtikang pasulong kag paibabaw sa makitid kag masipot nga banas. Luyag Niya ini para sa aton bangod palangga Niya kita kag bangod amo ini ang dalan padulong sa kalipayan.

Te, paano bala ginapaisog sang Dios ang Iya mga anak nga sundon Sia sa aton panahon?

Ginpadala Niya ang Iya Anak!

Ginpadala sang Dios ang Iya Bugtong nga Inanak, nga si Jesucristo, agud ipakita sa aton ang husto nga paagi.

Ang Dios nagapaisog paagi sa pag-engganyo, pagbatas, pagkalulo, pagkamapainubuson, kag gugma nga wala sing pagkakuno-kuno.⁸ Kadampig naton ang Dios. Palangga Niya kita, kag kon masandad kita, luyag Niya nga magbangon kita, magtinguha liwat, kag mangin mas mabakod.

Sia ang aton manunudlo.

Sia amo ang aton dako kag ginahandum nga paglaum.

Nagahandum Sia nga paisugon kita sa pagtuo.

Nagasalig Sia nga manuto kita sa aton mga kasaypanan kag maghimo sang husto nga mga pagpili.

Amo ini ang mas maayo nga paagi!⁹

Paano ang mga Kalautan sang Kalibutan?

Isa sang mga pamaagi nga luyag ni Satanas nga manipulahon naton ang iban amo ang pag-ukot ukon bisan pa gani sang pagpadako sang kalautan sa kalibutan.

Matuod nga ang aton kalibutan nangin, kag padayon nga mangin, indi perpekto. Madamo kaayo nga mga inosente nga tawo ang nagaantos tungod sang mga sirkumstansya sa kinaugali subong man sa indi pagkatawhanon sang tawo. Ang korapsyon kag kalautan sa aton panahon karon pinasahi kag makaalarma.

Pero wala sapayan sini tanan, indi ko pag-ibaylo ang pagkabuhi sa sini nga tion sangsa iban pa nga tion sa kasaysayan sang kalibutan. Ginbugayan kita sing wala’y tupong agud magkabuhi sa panahon sang indi matupungan nga pagtin-ad, kinaalam, kag bentaha. Labi sa tanan, ginbugayan kita nga maangkon ang kabug-usan sang ebanghelyo ni Jesucristo, nga nagahatag sa aton sang pinasahi nga panglantaw sa mga peligro sang kalibutan kag nagapakita sa aton kon paano likawan ukon atubangon ang ining mga peligro.

Kon panumdumon ko ang ining mga bugay, gusto ko nga magluhod kag magdayaw sa aton Amay nga Langitnon para sa Iya wala’y untat nga gugma para sa tanan Niya nga kabataan.

Wala ako nagapati nga gusto sang Dios nga ang Iya kabataan mangin mahinadlukon ukon mag-ukot sa kalautan sang kalibutan. “Kay ang Dios wala maghatag sa aton sang espiritu sang katalaw; kundi sang gahum, kag gugma, kag kabut-anan.”¹⁰

Ginhatagan Niya kita sang madamo nga rason para magkalipay. Kinahanglan lamang naton ini pangitaon kag kilalahon. Masami kita ginapadumdom sang Ginuo nga “dili magkahadlok,” nga “magpakalig-on,”¹¹ kag “dili mahadlok, diutay nga panong.”¹²

Ang Ginuo ang Magaaway sang Aton Giyera

Mga kauturan, kita ang “diutay nga panong” sang Ginuo. Kita ang mga Santos sa ulihing mga adlaw. Duna sa aton ngalan amo ang pangako nga magpaabot sang pagbalik sang Manluluwas kag maghanda sang aton mga kaugalingon kag sang kalibutan agud batunon Sia. Gani, alagaran naton ang Dios kag palanggaon ang aton isigkatawo. Himuon naton ini nga may natural nga kompiyansa, nga may pagpaubos, nga wala nagapakanubo sang bisan ano nga relihiyon ukon group sang mga tawo. Mga kauturan, ginsugo kita sa pagtuon sang pulong sang Dios kag pagpamati sang tingug sang Espiritu, agud mahimo naton “mahibaluan ang mga palatandaan sang panahon, kag ang mga palatandaan sang pagkari sang Anak sang Tawo.”¹³

Gani kita, indi ignorante sa mga hangkat sa kalibutan, ukon wala nakahibalo sang mga kabudlayan sang aton panahon. Pero wala ini nagakahulugan nga dapat naton pabudlayan ang aton kaugalingon ukon ang iban sang nagapadayon nga kahadlok. Imbes nga mag-ukot sa kadalagko sang aton mga hangkat sa kabuhi, indi bala mas maayo nga magtutok sa wala’y katapusan nga kahalangdon, kaayo, kag wala’y katapusan nga gahum sang aton Dios, nga nagasalig sa Iya kag nagapanghanda upod ang masinadyahon nga tagipusuon para sa pagbalik sang Jesus nga si Cristo?

Bilang Iya katawhan nga may kasugtanan, indi kita kinahanglan maparalisar sang kahadlok tungod lang basi may malain nga mga matabo. Sa baylo, sarang kita maglakat pasulong nga may pagtuo, kaisog, determinasyon, kag pagsalig sa Dios samtang ginaatubang naton ang mga hangkat kag mga oportunidad nga nagaabot.¹⁴

Wala kita nagaisahanon sa banas sang pagkasumulunod. “Ang Ginuo nga imo Dios … nagaupod sa imo; indi sia magpabaya sa imo, ukon magbiya sa imo.”¹⁵

“Ang Ginuo magapakig-away tungod sa inyo, kag kamo magpahimunong lamang.”¹⁶

Sa atubang sang kahadlok, magkaisog kita, pukawon naton ang aton pagtuo, kag mag-angkon sing pagsalig sa pangako nga “wala sing hinganiban nga ginhimo batok sa imo nga magauswag.”¹⁷

Nagapuyo bala kita sa panahon sang peligro kag kagamo? Matuod ini.

Ang Dios Mismo ang nagsiling, “Sa kalibutan may kangitngitan kamo: apang magpakalig-on kamo; nadaug ko ang kalibutan.”¹⁸

Sarang bala kita maggamit sang pagtuo kag maggiho sing nagakaangay? Sarang bala naton tungdan ang aton mga pangako kag sagrado nga mga kasugtanan? Sarang bala naton tumanon ang mga kasuguan sang Dios bisan sa mapanghangkat nga sirkumstansya? Siyempre masarangan naton!

Masarangan naton tungod ang Dios nagpangako, “Ang tanan nga butang magatingob para sa inyo kaayuhan, kon [kamo] magalakat sing tadlong.”¹⁹ Gani, ipaiway naton ang aton mga kahadlok kag magkabuhi nga may kasadya, pagpaubos, paglaum, kag sang maisog nga kompiyansa nga ang Ginuo kaupod naton.

Ang Himpit nga Gugma Nagatabog sang Kahadlok

Mga pinalangga kong kaabyanan, mga mahal kong kauturan kay Cristo, sa tion nga masalapuan naton ang aton kaugalingon nga nagapangabuhi sa kahadlok ukon kabalaka, ukon masalapuan naton nga ang aton mismo mga pulong, pamatasan, ukon aksyon nagatuga sang kahadlok sa iban, nagapangamuyo ako upod ang bug-os nga kusog sang akon kalag nga mahilway kita sa sining kahadlok paagi sa diosnon nga pangontra sa kahadlok: ang putli nga gugma ni Cristo, tungod kay “ang himpit nga gugma naga[tabog] sang kahadlok.”²⁰

Ang himpit nga gugma ni Cristo nagadaug sang tentasyon sa paghalit, pagpilit, pagpanakit, ukon pagpamigos.

Ang himpit nga gugma ni Cristo nagatugot sa aton nga maglakat nga mapainubuson, may dungog, kag maisog nga kompiyansa bilang mga sumulunod sang aton pinalangga nga Manluluwas. Ang himpit nga gugma ni Cristo nagahatag sa aton sing kaisog nga magpadayon sa tunga sang aton mga kahadlok kag ihamtang ang aton lubos nga pagsalig sa gahum kag kaayo sang aton Amay nga Langitnon kag sa Iya Anak, nga si Jesucristo.

Sa aton mga panimalay, sa mga lugar naton sang negosyo, sa aton mga palangakuan sa Simbahan, sa aton mga tagipusuon, buslan naton ang kahadlok sang himpit nga gugma ni Cristo. Ang gugma ni Cristo magatal-os sang pagtuo sa kahadlok!

Ang Iya gugma magatugot sa aton nga kilalahon, saligan, kag mag-angkon sang pagtuo sa kaayo sang aton Amay nga Langitnon, sa Iya diosnon nga plano, sa Iya ebanghelyo, kag sa Iya mga kasuguan.²¹ Ang pagpalangga sa Dios kag sa aton mga isigkatawo nagabaylo sang aton pagtuman sa mga kasuguan sang Dios sa isa ka bugay imbes nga sablag. Ang gugma ni Cristo magabulig sa aton nga mas mangin maayo, mas mapinatawaron, mas maatipanon, kag mas matutom sa Iya buluhaton.

Kon pun-on naton ang aton mga tagipusuon sang gugma ni Cristo, magabugtaw kita nga may mas ginpabaskog nga espirituhanon nga kapreska kag magalakat kita nga malipayon, may salig, nagamata, kag buhi sa kasanag kag himaya sang aton pinalangga nga Manluluwas, nga si Jesucristo.

Nagasaksi ako, kaupod ni Apostoles Juan, “Sa gugma [ni Cristo] wala’y kahadlok.”²² Mga kauturan, mahal nga kaabyanan, ang Dios nakakilala sa inyo sing lubos. Palangga Niya kamo sing lubos. Nakahibalo Sia sang inyo palaabuton. Luyag Niya nga “Dili [kamo] magkahadlok, magtuo lamang”²³ kag “magapabilin sa iya [himpit] nga gugma.”²⁴ Amo ini ang akon pangamuyo kag bendisyon sa ngalan ni Jesucristo, amen.

© 2017 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16 Petsa sang pagtugot sa paglubad: 6/16. Paglubad sang First Presidency Message, May 2017. Hiligaynon. 97925 861