Klumech er a First Presidency, Ongeim el buil 2017
A Cherrungel el Beltik el reng a Choroid a Dakt
Mla er a President Dieter F. Uchtdorf
Ongerung el Counselor er a First Presidency
Bo debechei a dekted e dekiei el ngara deureng, ngariou a rengud, urunguled, el medengei el kmo a Rubak a obengked.
Betik er a renguk el rodam me a rodos, me a resechelik, ng techall e deureng el dekaseues el chedal a Ikelesia er a beluulechad el rokir el dmak er a klaumerang me a beltik el reng er a Dios me a Rengelekel.
Ng dmeu a renguk el betik ra rengud el profet, el President Thomas S. Monson a obengked. President, aki kmal ngmai a tekingem locha ra rengmam, el omekrael, e mellach e omekellomes er kemam. Ng betik a rengmam er kau, e President Monson, e blechoel meluluuch el kirem.
Betok el rak ra memong, ra kusiou el merredel er a stake er a Franfurt, Germany, ea dimlak el sal ngara deureng el odos a milsekak ra bol merek a miting er kemam.
“Ng diak el sal mekngit?” ng millekoi. “Ng mlar ngii a locha teuang malechub eng teim el chad el milchiuaiu ra omongedecheduch!”
Ak mle telkib lomdasou e ulenger ngii el kmo, “A kumdasou e sel demechiuaiu er a chelsel a ikelesia a tara kot el ungil er a bedenged el cheliuaiu.”
A bechik, ra Harriet, a rirenges a tekingam ma uriul e ng millekoi el kmo ng tara kmal ungil nger el ngak a dillii.
Sel Klou el Okiis
Bebil dart el rak ra memong ra beluu ra North America, a mlar ngii a lomekedong er ngii el kmo “Klou el Okiis” er tial beluu el rokir. A tara mle moktek er ngii a ulekar ra rechad el uaia blel mechiuaiu ra chedaol tekoi.
A ngeasek el Joseph Smith a mlo klekar ra tekoi el rirenges ra remelkingel a tekoi ra klechelid el mle chedal tial okiis er a tekoi ra klechelid. Tiaikid a tara uchul e ng tilbir el mo blak a rengul losiik ra soal a Rubak lokiu a nglunguchel.
Tirkal melkingel a tekoi ra klechelid a kmal mle meduch, lolisechakl, lolab a osisechakl el mesaod el kirel a beluu ra ngau el mengiil er a remekngit.1 A tekingir a dimlak el relterir a rechad el mo mechiuaiu—ng locha bai rilterir el mo diak bol bad e medakt. A moktek er tir ma teletelir a bai mle omektakt ra rechad el mo ra ikelesia.
Oba Dakt el Mengesuseu
A irechar, e a rechad a ulusbech lomektakt ra rechad el rulterir el mo meruul a kmo ngerang. A roungalek a mla ousbech er ngii ra rengelekir, ma remerredel a ureor ousbech er ngii el mo ra rechad loureor el mor tir, ma rechad ra balatiks ousbech er ngii el mora rechad el sengkyo.
A remeduch ra tekoi ra siobai a medengelii a klsichel e blechoel ousbech er ngii. Seikid a uchul e ng uaia louchais el kmo alsekum e ng diak domechar a cereal lolterau malechub a klekool ra video malechub a cell phone, e ng sebeched el mo kurusii ra klengar kid, e di mo kid el tang a demad e diak bol ungil a rengud.
Ked emo klikmechur ra ikal tekoi e kmo ng kmal diak demecheblad ra tial teletael, e ng di a bebil ra taem e kede mecheblad er ngii. E a kmal mekngit er ngii, a bebil ra taem e kid ousbech osisiu el teletael el rulterir a rechad el mo meruul aikel soad a loruul.
A klemechek ra chelechal sils a ngarngii erul moktek er ngii: A kot a rullid el mo melbedebek e omdasou el kirel a usbechelled ra dakt el kid a mo mengesuseu er a rebebil—luldimukl er kid. A ongerung a mesaod er sel ungil teletelel.
Kngtil a Dakt
A kot, e dosaod ra kngtil a dakt. Ng techa er kid, el rokui a dirkak el morrimel lokiu a dakt el mo ungil lomengur, ousbech ra seat belt, e mou undo, mengereomel a udoud, malechub ouchel a rengud ra kngtid?
Ng klemerang el dakt a sebechel kmal mo klou a klisichel ra ikel doruul tekoi ma blekerdeled. E ng di tiang a di chelsel a kede el taem. A dakt a diak a kmal klisichel ngodechii a rengud, e diak el sebechel ngodechid el soad a llemalt e soad lolngesenges ra Chedam ra Babeluades.
A rechad el bedelkall a sebechir el dmung e meruul a ungil, e ng di diak lolchesuar a melemalt el tekoi. Te blechoel di olngesonges e bechecherd a rengrir, e dirrek el ngmasech a rengrir. E a cherengel a taem, e a ikal lomelchesiu a sebechel mo uchul e te mo diak loumerang, diak lolngesenges, malechub e ng mo diak lorrenges.
Mekngit el dolekoi, le tial diak lungil teletael ra klengar ma omerredel a diak di desang ra tekingel a beluulechad. Ng mekngit a renguk el remenges el kmo te ngar ngii a rechedal a Ikelesia el meruul a diak el melemalt lomeruul—ra rekeblirir, ngerchelir ra Ikelesia, ureor, malechub a deleuill er tir lobengterir a rebebil er a rechad.
Ng blechoel, el rechad a oltuub er tirkel lomecherabech er a rebebil, eng di tir a diak lesterir el kmo te uaisei. Te sorir a doltirakl a llecherir, e sel sekum a rebebil a diak loltirakl aikal llach, e te oungeroel er tir lolab a meringel el tekoi, melemall a rengrir, e a le bebil e te omekringel a bedengir.
A Rubak a mla melekoi el kmo “sel sekum e kid … olab orrimel malechub a derider el mora rebebil ra rechad, ra ngii dil diak lungil teletael, … e a babeluades a mechesimer e a Reng ra Rubak a [mora] klengit el reng.”2
Ngar ngii a taem e kede mesebechakl a omerelled loumerang el kmo ng melemalt a doruul. Kede dirrek el mo oumerang el kmo a dongedereder, e dongeblad, e oberaod a blekerdeled a ungil el mo ra rebebil. Ng diak el uaisei, le Rubak a mla meketeklii el kmo, “a rdechel a Reng a beltik el reng, deureng, budech, outeknagel, medemdemk, ungil, klaumrang, ngariou el reng, [ma] bekokeuii.”3
Sel Ungil Teletael
Sel kurael mo mui el medengelii a Chedam er a Babeluades, ak mo mui el medengei el kmo ng mekera sel Ngii omekellomes e omekrael er a Rengelekel. Ng diak el kesib a rengul, checherd a rengul, malechub e loluut a mekngit.4 Sel kmal moktek er Ngii—a Urerel me a Klebkellel—el olngeseu er kid, olsobel er kid, e omekrael er kid el mo er sel Ngii a soal.5
A Dios a silodii a Teletelel el mora Moses el kmo “ng chubechub e mui ra krazia, klou a rengul, e mui er a klungiaol me a klemerang.”6
A beltik el reng ra Chedam er a Babeluades el mei er kid a, Rengelekel, a chengelakl er sel klemedengei er kid.7
Tiang locha belkul a kmo a Dios a diak el sal omtab a blekeradel ma omeruul el ngii omtok a Llechul? Ng, kmal diak!
E ng di Ngii a diak el soal di ngmodech a blekerdeled. Ng soal ngodechii a teleteled. Ng soal ngmodech a rengud.
Ngii a soal a bo durrekodel a tekingel, e decheroid a dekted, e bo debekeu el mo dechor e dorael el bedul sel melemalt e chibutek el rael. Ngii a soal tiang a le mei e rekid le Ngii el betik a rengul er kid e tiaikid a rael el mora deureng.
A leuaisei, e ng mekera Dios a lolngesuseu ra rengelekel el mo oltirakl er Ngii er chelechal sils?
Ng uldureklii a Ngelekel Sechal!
A Dios a uldureklii a Di Chimol Ngelekel Sechal, el Jesus Kristo, el mo chotii a melemalt el rael er kid.
A Dios a melisiich er kid lokiu omengesuseu, kllou el reng, blekokeuii, delemdemk, me a meral beltik el reng.8 A Dios obengked. Ng betik a rengul er kid, e sel derebet, e Ngii a soal a debekiis, e deluut el melasm, e dorael mo mesisiich.
Ngii okesiu el mei er kid.
Ngii a kot el ngarbab el urunguled.
Ngii a soal lolkar kid loba klaumerang.
E Ngii oumerang el kmo kede subii a klubeled er a telitur kid e mo sebeched el melilt er a ungil.
Tiaikid a ungil rolel!9
E kuk Mekerang a Ikel Mekngit er a Beluulechad?
A tara teletael el Diablong a soal a doba el mengesuseu er a rebebil a sel dultuil malechub e kede dirrek el melechel a mekngit er a beluulechad.
Ng klemerang el tial beluulechad, el de ngar ngii a di mla diak el cherrungel, e melemolem el uaisei. Ng kmal betok el klikiid el chad a ngara ringel el teletael er a klengar tir a uchul me a dirrek el mekngit el blekerdelir a rechad. A mekngit me a chelitechut er chelechal sils a kmal ngodech e mechas a rengud er ngii.
Me ng uaisei aikel rokui, e ng di ngak a kmal diak bol soak a ngii di el taem er a chelsel a reksi er a beluulechad el uai tial taem er chelchang. Kede kmal ngeltengat el kiei er a taem el obdois a klungiaol, llomes, me a techall er a betok el tekoi. E sel kmal ngaruchei, e kede ngeltengat loba olutel ebangkelio er a Jesus Kristo, el ngodechii osenged el kirel a kengaol el ngara beluulechad e ochotii er kid el kmo kede mekerang e mocheroid er a ikal kengaol malechub e ng mekera dosmechokl.
Sel kumtab aikal klengeltengat, e ng di soak el mo outubaruach e oldanges er a Demad er a Babeluades el kirel sel diak lengemed el beltik el reng er Ngii el mora rokui el Ngelekel.
Ng diak kumerang el kmo a Dios a soal a Rengelekel a bol medakt malechub el lomdasou el kirel a mekngit el ngar ngii er a beluuelchad. Le Dios a dimlak el beskid a reng er a dakt, ng bai milskid a klisiich, me a beltik el reng, me a ulserechakl el uldasou.”10
Ng mla meskid a kmal betok el uchul e ng kired el mo ngara deureng. Ng di kired el mo osiik me kede mo metik. A Rubak a blechoel lomeklatk er kid el kmo “lak ko medakt,” e bo “mui er a deureng,”11 e lak de ngara “chelsel a dakt.”12
A Rubak a Mo Obengked er a Mekemedid
Rodam ma rodos, kid a “cheremel” a Rubak. Kid a Resanto er a uriul klebesei. Kede oba blak el reng lolsingch el kirel a luut er a Osobel e kudmeklid me a beluulechad el Kirel sel lemei. A leuaisei, e bo dosiou er a Dios me a rebebil er a rechad. Bo doruul el uaisei el ansing er kid, e doba ngariou el reng, e diak doltuub a bebil er a klechelid malechub e ng chelechad er a rechad. Rodam me a rodos, ng kired el mo mesuub a tekingel a Dios e orrenges er a ngerel Chedaol Reng, me bo dodengei aikel “olengchelel sel taem, me a olengchelel sel lemei a Ngelekel a Chad.”13
A leuaisei, e kid a diak, lak dodengei aikel ringel el ngara beluulechad, malechub e lak dodengei ongarm er chelechal taem. E ng di tia diak el belkul a kmo kede omekberaod er kid a lechub a rebebil er a dakt. Ng bai diak desal lomtab a berredel a ringel el ngara kid, e bai ungil a domes aikel betok el klungiaol, me a ungil, mesisiich el klisichel a Dios er kid, e oumera er Ngii, e oba deureng e mengedmokl er kid el kirel a luut er a Jesus Kristo?
Kid el ulsiseb er a telbiil el Chedal, a diak el kirel mo mechitechut a rengud er a dakt el kmo a mekngit a sebechel dubech el mei er kid. Ng bai, kired lomakes el bedul uchei loba klaumerang, diak de medakt, blak el reng, e oumera er a Dios sel bo dechebangel a ringel me a techall er medad.14
Kid a diak di el kid el tang el ngara tial rael er a roltirakl. A Rubak el Dios er kau … a mo obengkem; ng diak bol chitau, me a diak bol ikrau.”15
“A Rubak a mo sobecheklau, me ng mo kellechakl a regnum.”16
Sel bo dechebangel a dakt, e bo le meduch a rengud, el smisichii a klaumera er kid, e bo dultuil er a yaksok el kmo “ng diak a ngii di el klekedall el mo oldechelakl er kau el mo meissiich.”17
Kede kiei er a taem er a ongarm me a ringel? Ng uaisei.
A Dios a Ngii a mla dmu el kmo, “Ko mo chelbangel a ringel er a beluulechad: e ng di bom ngar deureng; le ak mla mo mesisiich er a beluulechad.”18
Ng sebeched el mo ultuil er a klaumerang el mo oumerang e mo meruul el uaisei? Ng sebeched el mo meduch a rengud loltirakl a chedaol telbiil? Ng sebeched loltirakl a llechul a Dios luldimukl er a chelsel aikel meringel el teletael? Ng kmal sebeched!
Le Dios a mla yaksok el kmo, “A rokui el tekoi a dmak el oureor el kirel a klungiolem, a [lsekum] e ke melemalt omerollem.”19 A leuaisei, e bo debechei a dekted e de kiei el ngara deureng, ngariou el reng, me a urunguled, e dodengei el kmo a Rubak a obengked.
A Cherrungel el Beltik el Reng a Choridii a Dakt
Betik er a renguk el sechelik, rodam me a rodos er ngak er a Kirsto, sel bo debetik er kid el ngara chelsel a dakt ma sebek reng, malechub a tekinged, blekerdeled, omerelled a uchul a dakt el mora rebebil, e nglunguchek el ngara chelsel a renguk el kmo bo dolatk er tiakid el chedaol tekoi el kirel a dakt: a klikiid el beltik el reng er a Kristo, a “cherrungel el beltik el reng a choroid a dakt.”20
A cherrrungel el beltik el reng er a Kristo a mesisiich er a ongetikaik el melemall, orrimel, omecheracheb, malechub e ng omekringel er kid el tekoi.
A cherrrungel el beltik el reng er a Kristo a ngosukid el mo oba ngariou el reng, chetengakl, e ansing er kid el chedal a betik er a rengud el Osobel. A cherrungel el beltik el reng er a Kristo a rullid el mo ansing e odngakl a dekted e nguu a mui el klaumera er kid lotilii er a klisichel me a klungiolel a Demad er a Babeluades me a Ngelekel Sechal, er a Jesus Kristo.
Chelsel a rekeblid, basio ra sobai er kid, ngercheled ra Ikelesia, chelsel a rengud, e dutechei a dakt loba cherrungel el beltik el reng ra Kristo. A beltik el reng ra Kristo a mtechir a dakt loba klaumerang!
A beltik el reng er Ngii a rullid el mo mtebengar, ouemrang, e ultuil a klaumerang er kid ra klungiolel a Demad er a Babeluades, me a chedaol Uldesuel, ebangkelio er Ngii, me a Llechul.21 Sel doubeltik el reng el mora Dios me a rebebil a meltii a blekongesenges er kid el mora llechul a Dios el mo klengeltengat e diak el berraod. A beltik el reng ra Kristo a ngosukid el kmal mo lmuut el bekokeuii, ousubes, me kerekikl, e mo blak a rengud er a Urerel.
Sel dokekii a rengud ra beltik el reng ra Kristo, e kede mo klekar e mesisich ra chedaol tekoi e kid a mo ngara deureng, e ansing er kid, e mui ra llomes ma klebkellel a betik ra rengud el Osobel, el Jesus Kristo.
Ak sioning, lobengkel a Apostol Paulus, “Ng diak a dakt alsekum e kede oba beltik el reng er a [Kristo].”22 Rodam me a rodos, resechelei, a Dios a kmal mui el medengelkemiu. Ng mui el betik a rengul er kemiu. Ng medengelii a ngara medemiu el taem. Ngii a soal a “lak ko medakt, e di moumerang”23 a bo “multuil er a [cherrungel] el beltik el reng er ngii.”24 Tiaikid a nglunguchek e klengeltengat er ngak el ngara ngklel a Jesus Kristo, amen.
© 2017 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/16. Kengei ra oidel: 6/16. Oidel a First Presidency Message, May 2017. Palauan. 97925 881