Iren Mahsen en Presidensi Keieu, Mei 2017
Limpoak Unsek kin Kasohrehla Masepwehk
Sang President Dieter F. Uchtdorf
Sounsawas Keriau nan Presidensi Keieu
Kitail pwilikihdi atail masepwehk kan oh momourki peren, popohl, koapwoaroapwoar, oh liki ni unsek me Koht kin ketiket rehtail.
Riei ohl oh lihioko, kempoakepahi kan, e wia kapai oh mehkot kaperen pwehki atail kak ehu pene nan ehu Mwomwohdiso rahnet sang ni atail pwoson oh limpoak ong Koht oh Sapwelime seri kan
I inenen kapingki pwehki presedent Thomas S. Monson eh pil iang patehng kitail rahnuet. Presedent, udahn se pahn kin koledi nan aht mohngiong kan spwelimemwi padahk, kawied oh erepit. Se poakohng komwi oh utung komwi, oh ansou koaros se pahn kapakap kin komwi
Sonpar ekei samwalahro, ni ansou me I wia stake presedent men nan Franfurt, Germany, mwurin aht mihting en stake presedensi lih emen me insensuwed ahpw tuwehng ie.
Ke sohte insesuwedki? liho nda. “Mwein mie me pahmen de limen wie memeir nan ansoun ahmw padahk o!”
I medemedewe dahme e indahu oh ngehi sapeng, “I kamehlele me memeir nan ansoun sarawi wia mehkoat mwahu.”
Ahi pwoudo, Harriet, rohngada aht wie koaskoasoio oh mwurih sang ahpwndahng ie me ehu pasapeng kaselel me I wiahu.
Mwekid Lapo
Soupar epwiki kei samwlahro nan Paliepeng en Amerika, Mwekid Lap ehu ahpw tepda wiawia nan wehi kan. Ehu kahrepen kemwekid kapw wet iei en kin panginda irail kan me kin memeir ni pali ngehn.
Joseph Smith pwunodkihda ire tohto me e rongasang rehn irail pwihn en padahk pwukat. Ih ehu kahrepe me e lemehkihda en rahpahki kupwuren Koht sang ni ah kapakap.
Ahn pwihn en padahk wet padahk me kaselel, kempoke oh kin inenen kamasepwehk ni arail kin koasoia kalokolok laud me dipan akan pahn ale nan Ehl.1 Arail padahk kan sohte kin kamairala— aramas ahpw e kin kahrehda ouraman suwed. E mwoamwen me irail kin kamasak aramas pwe ren kohla sarawi.
Masepwehk kin Iding aramas
Sangete kawaho, masepwehk kin kalap elehiong aramas en wia mehkot. Peneinei kan kin wiahng neirail seri kan, kaun akan ohng neirail tohn doadoahk kan, oh meusuhsda kan kin wiahng neirail toun usuhs kan.
Semen kan en netinet kin wehwehki manaman en masepwehk oh re kin kalap doahdoahngki. Ihme kahrehda nan ekei mehn kasalada kan me re kin wia kin kosoia me ma kitail sohte pahn pwain wini en proahs de kang siriel de sohte iang alehacell pwohn, kitail pahn mweidala pein kitail nan kahpwal, mour kelehpw lau mehla oh nsensuwed.
Kitail kin kouruhrki soahng wet oh kitail kin medewe me sohte pak ehu kitail pahn mweidohng irail en piti kitail di, ahpw ekei ansou kitail kin dukieng likamw pwukat. Kahpwal pwe ekei pak kitail kin wia soahng wet ohng mehtei kan pwe re en kak wia dahme kitail mwahuki.
Ahi padahk pahn pid kahrepe riau: Keieu kitail en medewe ia uwen atail kin doadoahngki kamasak en kamwekidih meteikan— oh pil pein kitail. Keriau en kak rapahkihda ehu ahl me mwahu sang met.
Kahpwal me pid Masak
Keieu, kitail rapahki mahs kahpwal kan me pid masak. Ihs rehtail me kin sohte kak powehdi ah masepwehk kahrehda e kin mwonge mwahu, katengehdi ah seat belt, eksersais laud, nekidala mwohni, de pil koluhkihla dipe kan?
E pwung me masak kin kak wekidala atail mwekid oh wiewia kan Ahpw e kin wekid te lepin ansou. Masepwehk kin sohte kalapw wekidala mwohngiongin aramas, oh e sohte douluhl kak wekidala kitail ohng aramas pwuhng oh peikiohng Samatail Nanlehng.
Aramas me kin masak kak inda de wia me pwung, ahpw re sohte kak kehnda mepwung kan. Irail kin kalap pehm me sohte sawas perail, oh kin lingeringer. Pak tohto soangen pepehm pwukat kin elehda peikasal, sapeik oh kahngohdi.
Ahpw, soangen wiepe pirek pwukat ong momour oh sounkaweid sohte kin wiawiehng te mour en sampah. Udahn I nsensuwedkihla ahi kin rong me mie towekan en Mwomwodiso kin wia sohngen wiepe sapwung pwukat nan imwarail, nan arail pwukoahn Mwmwodiso,wasahn doadoahk, de pil nan arail momour rahn koaros.
Ele aramas kin kalap suwediki en ekei kin pereniki kapailoke metei kan, ahpw re sohte kin kak pein kasawi irail da. Re kin mwahukihte soahng koaros en pwieda nin duwen nsenarail kan, ahpw ma mehtei kan pahn sohte idawehn re pahn kawiairail seli ni pali ngen oh pali war.
Kauno mahsaniher me “ni atail kin … soangen kaunda de powehdi de idingehng pohn mour en aramas akan, sohte lipilipil mehkoat me sapwung, … nanleng kan kin sohrala [oh]Ngehn en Kauno kin pahtoula.”2
Mwein mie ekei pak me kitail kin men tehno itarkihla dahme atail wiewia kan pwehki e pahn elehiohng kitail en wia mehkot pwung Kitail pil kin medemedewe me sang ni atail kin ang kehlailiohng, iding oh mwohmw suwed ong eh mwahu pwe e pahn kamwahuiala metei kan. Aphw soh, pwe Koht ketin mahsanih, iet akan “wahn ngehno, iei limpoak, popohl, mehlel, kanengamah, mwahu, pwoson, karakarahk [oh] kadek.”3
Ahl me Mwahusang
Uwen ahi wewehkihla Semei Nanleng, kin kareiohng ie ien ese me E kin ketin kamaraini oh kahluwa Sapwellime kan. E sohte kin ketin engieng, weid, de sempoak.4 E ketin kupwurki—Sapwellime doadoahk oh Sapwellime klori—iei en kaweid kitail, oh kahluwa kitail lahng Sapwellime kapai kan.5
Koht ketin kawehwe ong Moses me E wia “Koht emen me diren kalahngan oh kadek, me sohte kin mwadang lingeringerda, oh me diren limpoak lapalap oh loalopwoat mehlel.”6
Samatail Nanleng poakohng kitail, Sapwellime seri kan, laudsang wen me kitail kak wehwehki.7
Met wehwehki me Koht kin ketin itarkihla mehkot me sapwung pahn Kupwure? Soh, uhdahn soh!
Ahpw E kupwurki weliakapwi kaidehn atail wiewia te. E ketin kupwurki kitail en wekid kitailla pwohn. E kupwurki wekidala atail mohnigong kan koaros.
E ketin kupwurki kitail en engla oh koledi teng sal mete, sohpai atail masepwehk, oh eimah sokewei mwowe oh kohdahla pohn ahl inen oh tehtiko. E ketin kupwurki met pwehki E ketin poakohng kitail oh pwehki met iei elen kolahng popohl.
Eri, ia mwomwen en Koht ketin kasalehiong Sapwelime seri kan en idawehn ih?
E ketin poaronehdo Sapwellime Ieroso!
Koht ketkihdo Sapwellime Ieroso, Sises Krais, pwehn kaslehieng kitail ahl me pwungo.
Koht kin kamwkid kitail sang ni kamantik, kanengamah, meleilei, oh limpoak unsek.8 Koht kin ketin ieiang kitail. E ketin paokohng kitail, oh ni ansou me kitail kin pwopwidi, E ketin kupwurki kitail en kesihnenda oh pwurehng song oh kehlail la.
Ih me atail sounkaweid
Ih me atail koapworopwor.
E kupwurki kamwakid kitail en kin pwoson.
E ketin kamehlele me kitail pahn kin sukuhlsang atail sapwung kan oh pilada me pwung kan.
Pwe ih ahl mwahu en met!9
Ia duwen me Suwed kan en Sampah?
Ehu ahl me satan kin kasohng kin kitail iei doadoahngki kitail en iding ong meteikan en wia me sakanakan oh tengediheng me suwed en sampah wet.
Mehlel sampah wet udahn sohte unsek, oh erein e sohte pahn unsekla. Diren aramas me sohte diperail pil lokolongkier soang kan me kin pein wiawi ni sampah oh kehnaudek en sampah kan. Mwekid sapwung oh suwed nan atail ahnsou me ehusoahng oh kamasepwehk
Ahpw mendahte soahng pwukat koaros, I itareki ahi iang momour nan mwehi wet sang nan mwein mahsko en sampa wet. E wia kapai laud ong kitail pwe kitail en nan mwehiet me diren nsenamwahu, kamarain oh pai. Me keieu kapai laud nan mwehi et iei en ese me mie rohngamwahu en Sises Krais me unsek, me kiehng kitail kehl en sohpai kapwal kan en sampa oh kasalehiong kitail mwoamwen atail kak ruksang de powehdi kahpwal pwukat.
Ni ahi kin medmedewe kapai pwukat, I men tehn oh kelepwikdi nan pwehl oh wia ahi kaping ong Samatail Nanleng pwehki Sapwellime limpoak poatoapaot ong Sapwellime seri kan.
I sohte kamehlele me Koht kupwurki Sapwellime seri kan en masak de nohn medemedewe suweden sampah wet. “Pwe Koht sohte ketkiheng kitail ngehnen masak; ahpw en manaman, oh limpoak, oh lelepek.”10
E ketkiheng kitail diren kahrepen atail peren, Ih te kitail anahne rapahkihda oh kasawiada kahrepe pwukat. Kauno kin ketin kataman kin kitail en “dehr masak” oh kumwail “en ahneki popohl.”11 oh “kede maspwehk nei pelin sihpw”12
Kauno Pahn Ketin Pei Kin Kitail
Riei ohl oh lihakan, kitail wia sapwelimen Kauno “pelin sihpw” Kitail wia Souleng en imwin rahn kan. Sang ni ahd wet kitail kak wehweki me kitail kaskasik Soukomouro ah pahn sapahldo oh kaukaunop kitail oh sampah wet pwehn alehda Ih. Ihme karehda kitail en papah Koht oh poakohng sapwelime aramasakan. Kitail wia sohng wet ni atail udahn inengieng , ni wahu, sohte kilkilengdi pah de kileng lahng mwomwodiso teikan de arams teikan. Riei ohl oh lihoko, e koieng kitailehr en kin wadek mahsen en Koht oh kin rong mahsen en Ngehn Sarawi, pwe kitail “en kak wehwehki kilel en ansou kan, oh kilel en ketido keriau en Soukomouro.”13
Ihme kahrehda kitail sohte kin pohnsehse kasongosong kan en sampah wet, de pil kin pohnsese kahpwal en atail ansou. Ahpw met sohte wewehki me kitail pahn katoutouih kin kitail de mehtei kan soahng kamasepwehk kan en sampah. Ahpw kitail en dehr pwunopwunodiki uwen laud en atail kahpwal kan, ahpw de kitail en kin dokdokehte Sapwellimen Koht marain poatoapoat, kupwur mwahu oh sapwellime manaman unsek, liki Ih oh kaukaunop ni popohl ong ni sapahldo en Sises Krais?
Pweki atail wia aramas en inou kei, kitail sohte anahne masak dahme pahn wiawiheng kitail. Ahpw, kitail anahne wenlahte mwowe ni pwoson, koapworopwor, nan kapehd kehlail oh likih me Koht pahn sewese kitail ni atail pahn lel kasongosong oh soahng kan me kohdong kitail.14
Kitail sohte alialu nan ahl wet kelepw “Kauno amwail Koht … pahn ketin ieiang kumwail, e sohte pahn ketin keseikumwailla de likidmelieikumwailla.”15
“Koht pahn pei kin komwi, oh ke anahne kanengamah.”16
Ni ansou kamasepwehk kan, kitail anahne komwad, kahkehlailiala atail pwoson, oh ahneki kapworopwor me en inou kan me “ me sohte mehn pei pahn kak powehdi kumwail.”17
Kitail wie moumour nan ansou apwal oh liseliping? Ehi maing.
Pein Koht ketin mahsanih, “Sampah pahn kalokei kumwail ahpw kumwail koapwoaroapwoar, pwe I kalowedier Sampah.”18
Kitail kak kasalehda atail pwoson en kamehlele oh doadoahk ni pwung? Kitail kak kapwaiada atail inou kan oh kosoned sarawi kan? Kitail kak kapwaiahda kosoned en Koht kan ni ansou apwal akan? Ehi maing kitail kak.
Kitail kak pwehki Koht ketin inoukidahr, “soahng koaros en doadoahkpene ni kamwahu pe mwail, ma [kumwail] pahn alu ni pwung”19 Ihme karehda,kitail anahne powehdi atail masepwehk oh momourki peren, insenamwhau kapworopwor, oh liki kehlail me Koht pahn ieiang kitail.
Limpoak Unsek Kin Kasorehla Masepwehk.
Kempoakepahi ko, riei ohl oh lihoko, kitail kasawi ma nan mohngiongitail kan, ma kitail kin masak, de kitail pahn diarada me atail kosoi kan, padahk kan oh wiewia kan kin kahrehda metei kan ahr kin masak, ma iei ah I peki kumwail en kak ale mehn kamwahula me keieu mwahu en kamwahwiala iei limpoak unsek en Krais, pwe “limpoak me unsek kin kausasang masak koaros.”20
Limpoak unsek en Krais kin katikala ineng en wiahiong aramas mehkot suwed, kapailoke de kehnaudok.
Limpoak unsek en Krais kin sewese kitail en aktikitik, ahneki wahu oh uhkida me pwung pwehki atail wia tohnpadahk en atail Sounkomouro. Limpoak unsek en Krais ketkiheng kitail kehl en powehdi masepwehk oh momourki manaman oh kehl en Samatail Nanleng, oh Sapwellime Ieros Sises Krais.
Nan imwatail kan ,wasahn doadoahk kan, nan atail pwukoahn Mwomwodiso, nan atail mohngiong kan, kitail anahne weliankida masepwehk sapwelimen Krais limpoak unseko. Sapwelimen Kraise limpoak kin wekidala masepwehk ong pwoson.
Sapwellime limpoak pahn sewese kitail en kasawiada, liki oh pwoson kamwahu kan en Samatail Nanleng, Sapwellime koasondi sarawio, Sapwellime rongamwahuo oh Sapwellime kosonned akan.21 PoakohngKoht oh sapwelime aramas akan pahn wekidala atail peik ong sapwelimen Koht kosoned akan ong kapai kaidehn katoutou. Sapwelimen Krais limpoak pahn sewese kitail en kin kadek, kalaudehla atail mahk, inseno, oh pwerisek nan Sapwelime doadoahk.
Ni atail pahn audekihda atail mohngiong limpoak en Krais, kitail pahn weliakapw lahng ehu mour me kapw oh kitail pahn weweid nan peren, koapworopwor, oh momourki mour marain en atail Sounkomour, Sises Krais.
Ahi kadehde duwete ahn Wahnparon Sohn, “Sohte me kak masepwehk nan [sapwelimen Krais] limpoak.”22 Riei ohl oh lihoko, Koht ketin mwahngi kumwail. E ketin poakoahng kumwail. E ketin mwahngi dahme pahn wiawi ieng kumwail. E ketin kupwurki “komwi en dehr masepwehk, ihte kamehlele”23 oh “moumour ki sapwelime limpoak.”24 Met iei ahi kapakap oh kapai ni mwaren Sises Krais, amen.
© 2017 by Intellectual Reserve, Inc. All rights reserved. Ntingdahr nan USA. Mweimwei en lokaiahn wai: 6/16. Mweimwei en kawewehdi:6/16. Kawehwehpen First Presidency Message, May 2017. Pohnpeian. 97925 885