ຂ່າວສານການຢ້ຽມສອນ, ເດືອນພຶດສະພາ 2017
ພະລັງຂອງພຣະຄຳພີມໍມອນ
ຂ້າພະເຈົ້າຂໍຮ້ອງທ່ານແຕ່ລະຄົນໃຫ້ສຶກສາ ແລະ ໄຕ່ຕອງພຣະຄຳພີມໍມອນດ້ວຍການອະທິຖານ ທຸກວັນ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າຂໍທັກທາຍທ່ານ ດ້ວຍຄວາມອົບອຸ່ນ ເມື່ອເຮົາມາພົບກັນອີກ ໃນກອງປະຊຸມໃຫຍ່ສາມັນທີ່ໃຫຍ່ໂຕ ຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ກ່ອນຂ້າພະເຈົ້າຈະເລີ່ມຕົ້ນການປາໄສໃນມື້ນີ້, ຂ້າພະເຈົ້າຂໍປະກາດກ່ຽວກັບພຣະວິຫານໃໝ່ຫ້າແຫ່ງ ຊຶ່ງຈະຖືກສ້າງຂຶ້ນທີ່: ບຣາຊີເລຍ, ບຣາຊິນ; ເຂດເມືອງມະນີລາ, ຟີລິບປິນ, ໄນໂຣບີ, ເຄັນຢາ; ໂພກາເທໂລ, ໄອດາໂຮ, ສະຫະລັດອາເມຣິກາ; ແລະ ຊາຣາໂທກາ ສະປຣິງສ໌, ຢູທາ, ສະຫະລັດອາເມຣິກາ.
ເຊົ້າມື້ນີ້ ຂ້າພະເຈົ້າຂໍກ່າວກ່ຽວກັບພຣະຄຳພີມໍມອນ ແລະ ໃນຖານະເປັນສະມາຊິກຂອງສາດສະໜາຈັກ ເຮົາຈຳເປັນຕ້ອງສຶກສາ, ໄຕ່ຕອງ, ແລະ ນຳໃຊ້ຄຳສອນຂອງມັນ ໃນຊີວິດຂອງເຮົາ. ຄວາມສຳຄັນຂອງການມີປະຈັກພະຍານທີ່ໜັກແໜ້ນ ແລະ ໝັ້ນຄົງ ຕໍ່ພຣະຄຳພີມໍມອນ ແມ່ນຈຳເປັນຫລາຍ.
ເຮົາມີຊີວິດຢູ່ໃນສະໄໝທີ່ມີບັນຫາ ແລະ ຄວາມຊົ່ວຮ້າຍຢ່າງຫລວງຫລາຍ. ແມ່ນຫຍັງຈະປົກປ້ອງເຮົາຈາກບາບ ແລະ ຄວາມຊົ່ວຮ້າຍ ທີ່ແຜ່ລາມໄປທົ່ວໂລກ ໃນທຸກວັນນີ້ໄດ້? ຂ້າພະເຈົ້າຂໍປະກາດວ່າ ການມີປະຈັກພະຍານທີ່ເຂັ້ມແຂງ ເຖິງພຣະຜູ້ຊ່ວຍໃຫ້ລອດ, ພຣະເຢຊູຄຣິດ, ແລະ ເຖິງພຣະກິດຕິຄຸນຂອງພຣະອົງ ຈະຊ່ວຍເຮົາໃຫ້ຜ່ານຜ່າໄປໄດ້ຢ່າງປອດໄພ. ຖ້າຫາກທ່ານບໍ່ອ່ານພຣະຄຳພີມໍມອນແຕ່ລະມື້, ກໍຂໍໃຫ້ເລີ່ມຕົ້ນອ່ານ. ຖ້າຫາກທ່ານຈະອ່ານມັນດ້ວຍການອະທິຖານ ແລະ ດ້ວຍຄວາມປາດຖະໜາອັນແຮງກ້າ ເພື່ອຈະໄດ້ຮູ້ຄວາມຈິງ, ແລ້ວພຣະວິນຍານບໍລິສຸດ ຈະສະແດງຄວາມຈິງໃຫ້ປະຈັກແກ່ທ່ານ. ຖ້າຫາກມັນເປັນຄວາມຈິງ—ແລະ ຂ້າພະເຈົ້າຂໍເປັນພະຍານຢ່າງໜັກແໜ້ນວ່າ ມັນ ເປັນຄວາມຈິງ—ແລ້ວ ໂຈເຊັບ ສະມິດ ກໍເປັນສາດສະດາ ຜູ້ໄດ້ເຫັນພຣະບິດາອົງເປັນພຣະເຈົ້າ ແລະ ພຣະບຸດຂອງພຣະອົງ, ພຣະເຢຊູຄຣິດ.
ເພາະພຣະຄຳພີມໍມອນເປັນຄວາມຈິງ, ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ຈຶ່ງມີຢູ່ເທິງແຜ່ນດິນໂລກ, ແລະ ຖານະປະໂລຫິດທີ່ສັກສິດຂອງພຣະເຈົ້າ ຈຶ່ງໄດ້ຖືກຟື້ນຟູຄືນມາໃໝ່ ເພື່ອຜົນປະໂຫຍດ ແລະ ເປັນພອນໃຫ້ແກ່ລູກໆຂອງພຣະອົງ.
ຖ້າຫາກທ່ານບໍ່ມີປະຈັກພະຍານທີ່ໜັກແໜ້ນເຖິງສິ່ງເຫລົ່ານີ້, ຈົ່ງເຮັດສິ່ງທີ່ຈຳເປັນ ເພື່ອຈະມີມັນ. ມັນຈຳເປັນສຳລັບທ່ານທີ່ຈະມີປະຈັກພະຍານຂອງຕົວເອງ ໃນວັນເວລາທີ່ຫຍຸ້ງຍາກນີ້, ເພາະວ່າທ່ານສາມາດເພິ່ງອາໄສປະຈັກພະຍານຂອງຄົນອື່ນໄດ້ພຽງຊົ່ວຄູ້ຊົ່ວຄາວເທົ່ານັ້ນ. ເຖິງຢ່າງໃດກໍຕາມ, ເມື່ອມີມັນແລ້ວ, ປະຈັກພະຍານຕ້ອງຖືກຮັກສາໄວ້ຢ່າງມີຊີວິດຊີວາ ຜ່ານການເຊື່ອຟັງຕໍ່ພຣະບັນຍັດຂອງພຣະເຈົ້າຕໍ່ໄປ ແລະ ຜ່ານການອະທິຖານ ແລະ ການອ່ານພຣະຄຳພີທຸກວັນ.
ເພື່ອນຮ່ວມງານທີ່ຮັກແພງຂອງຂ້າພະເຈົ້າ ໃນວຽກງານຂອງພຣະຜູ້ເປັນເຈົ້າ, ຂ້າພະເຈົ້າຂໍຮ້ອງທ່ານແຕ່ລະຄົນໃຫ້ສຶກສາ ແລະ ໄຕ່ຕອງພຣະຄຳພີມໍມອນດ້ວຍການອະທິຖານ ທຸກວັນ. ເມື່ອເຮົາເຮັດເຊັ່ນນັ້ນ, ເຮົາຈະສາມາດໄດ້ຍິນສຸລະສຽງຂອງພຣະວິນຍານ, ເພື່ອຕ້ານທານກັບການລໍ້ລວງ, ເພື່ອເອົາຊະນະຄວາມສົງໄສ ແລະ ຄວາມຢ້ານກົວ, ແລະ ເພື່ອຮັບເອົາຄວາມຊ່ວຍເຫລືອຈາກສະຫວັນ ໃນຊີວິດຂອງເຮົາ. ຂ້າພະເຈົ້າຂໍເປັນພະຍານດ້ວຍສຸດໃຈຂອງຂ້າພະເຈົ້າ, ໃນພຣະນາມຂອງພຣະເຢຊູຄຣິດ, ອາແມນ.
© 2017 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/16. ການແປໄດ້ຮັບອະນຸຍາດ: 6/16. ແປຈາກ Visiting Teaching Message, May 2017. Laotian. 97925 331