Parau Poro‘i nā te mau tuahine hāhaere, ’ātete 2017
Ora i te hō’ē orara’a ha’amo’a
’A tuatāpapa nā roto i te pure i teie mātēria ma te ’imi ’ia ’ite e aha te fa’a’ite atu. Nāhea te ta’a-maita’i-ra’a i te fā o te Sōtaiete Tauturu e fa’aineine i te mau tamari’i tamāhine a te Atua nō te mau ha’amaita’ira’a o te ora mure ’ore ?
Fa’aro’o ’Utuāfare Tōtauturu
« Te ha’amo’ara’a o te fa’ata’ara’a ïa i te hiti ’aore rā te pūpūra’a ïa i te tahi mea ’ei mea mo’a, tei fa’ata’ahia nō te mau ’ōpuara’a mo’a », ’ua parau Elder D. Todd Christofferson nō te pupu nō te Tino ’Ahuru Ma Piti ’āpōsetolo. « Te manuïara’a i roto i teie orara’a nō roto mai ïa i te ha’amo’ara’a i tō tātou orara’a, ’oia ho’i, tō tātou taime ’e tā tātou mau mā’itira’a, nō te mau ’ōpuara’a a te Atua ».1
’Ua parau ’o Elder Neal A. Maxwell (1926–2004) nō te pupu nō te Tino ’Ahuru Ma Piti ’āpōsetolo : « Tē huru mana’o nei tātou i te ha’amo’ara’a, mai te tu’ura’a i tā tātou mau faufa’a mātēria ’ia fa’auehia mai e te Atua ». Tē ha’amo’ara’a hope rā, ’o te tu’ura’a ïa ia tātou iho i te Atua ».2
’A ha’amo’a ai tātou ia tātou iho nō te mau fā a te Atua, e rahi mai tō tātou fa’aro’o ia Iesu Mesia ’e i tāna tāra’ehara. ’A ora ai tātou i te hō’ē orara’a ha’amo’ahia, e nehenehe tātou e mo’ahia nā roto i teie mau ’ohipa.
’Ua parau Carole M. Stephens, tauturu hō’ē i roto i te peresidenira’a o te Sōtaiete Tauturu ē : « ’Ua ha’api’i mai Elder Robert D. Hales, ‘’ia rave ana’e tātou i te fafaura’a ’e ’ia ha’apa’o i te reira, tē fa’aru’e ra ïa tātou i te ao i muri ia tātou, ’a tomo atu ai i roto i te bāsileia o te Atua’.
« E fa’ahuru-’ē-hia tātou. E mea ta’a ’ē tō tātou huru ’e e mea ta’a ’ē tā tātou ’ohipa. E mea ta’a ’ē te mau mea tā tātou e fa’aro’o, tā tātou e tai’o ’e tā tātou e parau, ’e e mea ta’a ’ē ato’a te huru ’ahu tā tātou e ’ō’omo nō te mea tē riro nei tātou ’ei mau tamāhine nā te Atua, tā’atihia i ni’a iāna nā roto i te fafaura’a ».3
Te ha’amo’ara’a, ’o te fafaura’a ïa te Atua e rave « ’e te ’utuāfare o ’Īserā’ela ; tē nā ’ō mai ra ’o Iehova, ’ia oti a’e te reira ’anotau e tu’u vau i tā’u ture i roto ia rātou, e pāpa’i au i te reira i roto i tō rātou ’ā’au ; ’e e riro vau ’ei Atua nō rātou, ’e e ta’ata ho’i rātou nō’u » (Ieremia 31:33). Te orara’a i te hō’ē orara’a ha’amo’a, ’ua au ïa i te ’ōpuara’a a te Atua nō tātou.
Te tahi atu mau pāpa’ira’a mo’a
1 Tesalonia 1:3; Te Parau Ha’api’ira’a ’e te mau Parau Fafau 105:5
© 2017 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/17. Parau fa’ati’a nō te ’īritira’a : 6/17. ’Īritira’a nō Visiting Teaching Message, August 2017. Tahitian. 97928 895