Poraus seni ewe Aewin Presetensi, September 2017

Soufos ar repwe Emweni Kich

Seni Preseten Thomas S. Monson

Ekkoch ier ra no, ua mommot non ewe rumwen ewe Tempel Salt Lake ikewe ewe Aewin Presetensi me ewe Mwichen Engon me Ruemon Aposel ra kan mwich fengen fan ew non ew wik. Ua nenenta ngeni ewe etip ewe a sapengeni ekkewe Aewin Presetensi, me ikana ua katon sasingin emon me emon ekkewe Presetenin ewe Mwichefen.

Nupwen ua nenengenir, atetenatiw—seni ewe Soufos Joseph Smith (1805–44) tori Preseten Gordon B. Hinckley (1910–2008)—ua kan ekieki, “Uwa men kinisou ren ewe emwen seni emon me emon neir.”

Ekkei murinnon mwan rese tongeni repwe apwangapwangeno, rese tongeni tipemwaramwar, me rese tongeni achanu. Ir noun Kot chon angang. Nupwen ua ekieki ussun ekkewe soufos ikenai, ua fen siner me tonger, ua chemeni manauer, me ar kewe angang mi murinno, me ar kewe afanafan mi amokutu netip.

Pereseten Heber J. Grant (1856–1945) i ewe Presetenin ewe Mwichefen non ewe fansoun ua uputiw. Nupwen ua ekieki ussun manauan me an kewe afanafan, ua nuku pwe Preseten Grant i emon Preseten mi pwarano nikitutam—nikitutam non ekkana mettoch mi murino me echipwer.

Preseten George Albert Smith (1870–1951) i ewe Presetenin ewe Mwichefen non ena fansoun ua emon pisop ren ai we wart non Salt Lake City. A nenengeni pwe a wor ew watten maun a fis nefinen ewe Samon me ewe chon u ngeni. “Ika oupwe chieneni ewe Samon,” a afanafana, “oupwe nom fan emwenian me ousap mochen oupwe fori met mi mwan.”¹

Ua koko ngeni ai upwe emon chon angangen ewe Mwichen Engon me Ruemon non 1963 seni Preseten David O. McKay (1873–1970). A afanafana pwe ach eteneki ekkoch ren sokkun nonnomun manauer. “Ennetin Souneng,” a apasa, “ina ena tong mi fiti fofforun.”²

Preseten Joseph Fielding Smith (1876–1972), emon me nein ekkewe chon mak mi angangoch noun Mwichefen, a awora non manauan pwe ew nongonongun emwen non manauan ewe kapas allim. A chok sopweno ne anneani ekkewe pukefel me sinei ekkewe afanafan me nongonong a kuna me non ekkewe peich ussun pwan ion ua fen sinei.

Preseten Harold B. Lee (1899–1973) a emon nei steik preseten nupwen ua emon at. Ua fokkun sani ew an porous “Kopwe uta non neni mi pin, me kosap mokutukut.”³ A pesei ekkewe Souneng ar repwe rongorong, me ponueni ewe mongunungun an ewe Ngun mi Fel.

Ua nuku pwe ew nongonongun emwenin non manauen Preseten Spencer W. Kimball (1895–1985) epwe nukuchar non an angang. I a unusen nukuchar non an angang ngeni ewe Samol. I a pwan nukuchar ngeni an epwe manaueni ewe kapas annim.

Nupwen Preseten Ezra Taft Benson (1899–1994) a winiti Presetenin ewe Mwichifen, a finieita pwe upwe wiseni ewe wis Oruemonun Chon Aninis non ewe Aewin Presetensi. Tong ina an ewe nongonongun emwen, ewe a amanaua ewe porous a sani, seni ewe Chon Amanau: “Met sokkun aramas oupwe usun? Ennet ua apasa ngenikemi, usun chok ngang.”⁴

Preseten Howard W. Hunter (1907–95) i ewe emon a chok kukkuta murinnon ekkoch. A fokkun osufonoch; a pwan fokkun tekisoson. Iei ai pwapwa ai upwe wiseni emon Aruemonun Chon Aninis ngeni.

Preseten Gordon B. Hinckley a aitikich ach sipwe achocho ngeni met mi murinno. A apasa pochokunen kapasen pwarata fan iten ewe Chon Amanau me An ewe misin. A aitikich fiti tong. Angang ussun emon Aemonun Chon Aninis a ew ai kinisou me ew ai feioch.

Ewe Chon Amanau A tinato soufos pokiten A tongekich. Atun mwichenapen mwichefen non ei October, ekkewe Meinap Unus ren ewe Mwichefen epwe pwan wor rer ewe tufich ar repwe afanafana An kapas. Sia fein ngeni ei wis fiti wachimuken ach sipwe ekieki me fiti tekisoson.

Ifa me feiochuch ren ewe Mwichefenin Jises Kraist a niwinsefanito won ei fonufan me ewe Mwichefen a foruta won ewe foun pwarata. Pwarata mi soposopo ina wesewesen ewe urenapen ewe kapas allimen Jises Kraist.

Amo sipwe monota ach sipwe angei ewe pwarata pusin ach ewe a feitto non fansoun ewe mwichenapen mwichefen. Amo netipach epwe urono fiti anononun auchean popun nupwen sia eitieta pouch ach sipwe tipeew ngeni ekkewe soufos me chon kaeo. Amo sipwe amenamena ach ekiek, fefeita, kinamwe, me pochokunono nupwen sipwe rongorong ngeni ar kewe afanafan. Me amo sipwe moneta ach sipwe mutata sefan inisich ngeni ewe Samon Jises Kraist—An ewe kapas allim me An ewe angang—me nom non ach eminefosefan non ach aponueta An kewe annuk me fori met An mochen.

Afanafan seni Ei Poraus

Preseten Monson a aporousa nesen mi auchea a kaeo seni soufos ra akkom mwan. A pwan achema ngenikich pwe “ewe Chon Amanau a tinato soufos pokiten I A tongei kich.” Non om anisi ekkewe ka osukuner, meni kopwe porous ngenir ifa ussun An soufos me chon kuno ra esisinen An Kot tong ngenikich. Ekieki om kopwe aporousa aurour seni ew me nein an Preseten Monson kewe porous non ewe mwichenapen mwichefen a no. Tingor ngeni ekkewe ka aitir repwe mon eta ngeni mwichenapen mwichefen ren ar repwe nenengen sefani ekkewe afanafan ra amwasanga netiper me anisir ar repwe mefi an ewe Chon Amanau ewe tong.

© 2017 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/17. Kapungunon awewen: 6/17. Awewen First Presidency Message, September 2017. Chuukese (Trukese). 97929 901

Esinesin

1. Teachings of Presidents of the Church: George Albert Smith(2011), 191.

2. Teachings of Presidents of the Church: David O. McKay (2003), 181.

3. Doctrine and Covenants 87:8.

4. 3 Nifai 27:27.

• Sia Kinisou, O Kot, Ren Noum Soufos

  Samantha Linton

• Soufos ra Emweni Kich ngeni Kraist