Etop eketode First Presidency, Ofiong Usukkiet ke isua 2017
Mme Prophet man Eda Nnyin Usung
Mme esisit isua emi ekebede, ami nketie ke ubet-ufok Temple eke Salt Lake ke ebiet emi First Presidency ye mbon Eboho mme Apostle Duopeba esisobode ini kiet ke udua kiet. Ami mma mmenede enyin ke enyong nse mbibene eke asakde-iso ese First Prsidency, ndien do ami nse mme ndise eke mme Adaibuot Ufok Abasi nnyin kiet-kiet.
Nte ami nsuk nsede mmo, mme andikibem mi iso—tongo ke Prophet Joseph Smith (1805–44) edisim President Gordon B. Hinckley (1910–2008)—ami ndikere nte, “Ami mmekop inemesit kabanga ndausung mmo kiet-kiet.”
Mmo emi edi nti irenowo emi akananam mikefumke, inyengke, inyung iduehe. Mmo emi edi irenowo eke Abasi. Nte ami nkerede mbanga mme prophet eyo emi eke ami mfiokde nnyung mmade, ami nditi mbanga uwem, edu, ye inem ukpebnkpo mmo.
President Heber J. Grant (1856–1945) ekedi Adaibuot Ufok Abasi ke ini eke ami nkemanake. Nte ami nkerede mbanga uwem ye ukpebnkpo esie, ami nim-ke-akpaniko nte ke edu emi President Grant ekesiwakde ndinyene ekedi edu eke nsinifik—ndisin ifik ke mme nkpo emi edide eti ye eke ofonde.
President George Albert Smith (1870–1951 ekedi Adaibuot Ufok Abasi ke ini eke ami nkenamde utom nte bishop eke ward mi ke Obio Salt Lake. Enye ekekpeb ete ke akamba enwan ke aka-iso ke ufot Abasi ye andidiok. Enye ekekpeb ete, “Edieke mbufo edude ke udim nkang eke Abasi, mbufo eyedu ke idak odudu esie ndien idinyeneke udong ndinam se idiok.” 1
President David O. McKay (1873–1970) okokot mi ete nam utom nte owo kiet ke Eboho mme Apostle Duopeba ke isua 1963. Enye ekpekpeb abanga ndinyene ekikere ima nno mbon efen ke usung emi enye okodude uwem esie. Enye odoho ete ke, “Ata Edu-ukpono Abasi edi ndida ima nsin ke utom.” 2
President Joseph Fielding Smith (1876–1972), kiet kotu mme akpan-ewet nwed ke Ufok Abasi emi, akada ukpebnkpo ke uwem esie abanga nditim ndungore iko Abasi. Enye ekesikot nwed Abasi kpukpru ini onyung ofiok mme ukpebnkpo eke odude ke mme nwed Abasi akan owo ekededi eke ami ndiongoke.
President Harold B. Lee (1899–1973) ekedi president stake mi ke ini eke ami nkedide akparawa. Akpan iko-ibuot esie ekedi “Eda ke ndisana ebiet, ndien ekusihere.” 3 Enye ekekpeb ikot Abasi ete esanga ke item, enyung ekop sung-sung uyo eke Edisana Spirit.
Ami mmenim-ke-akpaniko nte ke ukpebnkpo eke uwem President Spencer W. Kimball (1895–1985) ekpedi abanga nwaidem. Enye ama eneghede awa-idem, ofuri-ofuri ono Jehovah. Enye nko ama awa-idem ke ndinam iko Abasi.
Ini emi President Ezra Taft Benson (1899–1994) edide Adaibuot ke Ufok Abasi, enye ama okot mi ete nam utom nte Udiana Onoitem esie ke First Presidency. Ima ekedi akpan ukpebnkpo esie, emi okongode ke inem iko-ibuot esie, emi Andinyanga eketingde ete: “Nso oruk owo ke mbufo enyene ndidi? Ke akpaniko ke ndoho mbufo, kpa nte ami ndide.” 4
President Howard W. Hunter (1907–95) ekedi owo kiet emi esiwakde ndinwam mbon efen ndinam nti nkpo. Kpukpru ini enye ekesikpekpek owo, kpukpru ini enye ekedi owo nsuhore-idem. Ekedi eti ufang mi ndinam utom nte Udiana Onoitem esie.
President Gordon B. Hinckley ekekpeb ete nnyin inam ofuri ukeme nnyin. Enye ama ono osongo iko ntiense abanga Andinynaga ye utom Esie. Enye ekekpeb nnyin nkpo ye ima. Ndinam utom nte Akpa Onoitem esie ekedi nkpo ukpono ye edidiong ono mi.
Andinyanga esino mme prophet koro Enye amama nnyin. Kini akwa mboho eke Ofiong Duop emi, mme General Authorities eke Ufok Abasi eyefiak enyene nti ufang ndibuana iko Esie. Ana nnyin inam ubiong-utom emi ke akwa utenge ye nsuhore-idem.
Nnyin imefon-iso koro mfiak-nda-ndi Ufok Abasi Jesus Christ mmodo ke isong ndien ke ema esiak Ufok Abasi edori ke itiat eriyarare. Nka-iso eriyarare edi ata nsongo-nda iko Abasi Jesus Christ.
Yak nnyin ibenge-idem man ibo eriyarare eke idem nnyin emi awakde ndidi kini akwa mboho. Yak esit nnyin oyoho ye akwa ubiere ke nte nnyin imenede ubok nnyin man inyime mme odu-uwem prophet ye apostle. Yak nnyin ibo uyama, nworo-nda, ndongesit, ye nsongo-nda ke nte nnyin ikpangde-utong ino etop mmo. Ndien yak nnyin ibenge-idem ndifiak nyak idem nnyin nno Obong Jesus Christ—iko Abasi Esie ye utom Esie—inyung idu uwem ye obufa ubiere ke ndinim mme ewuho Abasi nnyung nam uduak Esie.
© 2017 otode Intellectual Reserve, Inc. Ekpan kpukpru unen ndiming. Ekeming ke USA. Enyime edikabare ke Iko Mbakara: 6/17. Enyimme Ndikabare: 6/17. Ndikabare Etop eke First Presidency Message, September 2017. Efik 97929 553