Etop eke First Presidency, Ofiong Duop ke isua 2017
Ndikabare-ndi Nti Mbet
Otode President Henry B. Eyring
Akpa Ono-item ke First Presidency
Ke ofuri sacrament meeting, nnyin imenyene ifet ndibiere nno Ete ke Enyong ite ke nnyin iyeti inyung inim mme ewuho Esie man nnyin ikpenyene Spirit Esie ndidu ye nnyin (se ke Moroni 4:3; 5:2; D&C 20:77, 79). Nditi Enye eyedu ke esit nnyin kpukpru ini ke nte nnyin idade enying Esie idori ke idem nnyin. Nnyin inam oro ke ediwak usung edi akpan-akpan ke ini emi nnyin inwamde mbon efen ke enying Esie, ikoot edisana iko Esie, inyung ibong-akam man idiongo se Enye oyomde ete nnyin inam.
Oro eketibe ono mi ke ini eke ami nkenimde akparawa kiet baptism. Ami mma mfiok nte ke mme isungutom emi Andinyanga ekemekde ema ekot mi nte okworo-iko ndikpeb iko Abasi Esie nnyung nno iko ntiense mbanga Enye ye Ufok Abasi Esie. Ami ye owo-nsanga ukworo-iko mi ima inwongo ino akparawa oro ete ke enye eyesana oto ke odudu Erisio-isop Jesus Christ ke nte enye atuade-mkpofiok ye mbuotidem ke Andinyanga ndien ana baptism oto kiet kotu mme enyene-unen isungutom Esie.
Kini ami nkemenede akparawa oro nsio ke mmong eke itie-baptism, enye ama odong-odu ke utong mi ete, “Ami mmasana, ami mmasana.” Ke ndo-ndo oro, ami nditi baptism eke Andinyanga emi John the Baptist okonimde ke Inyang Jordan. Ke ndidian do, ami nditi ete ke ami nkanam utom erinyanga eke odu-uwem Andinyanga emi ama ekeset-ke-mkpa—nte Edisana Spirit edide ntiense, ukem nte John ekedide.
Eke mi ye eke owo nnyin kiet-kiet, nditi Andinyanga ekeme ndifon nkan ndiberi-edem ke ifiok ye mme ukpeb emi nnyin itide kabanga Enye. Kpukpru usen nnyin imekeme ndinam mbumek emi edidade nnyin ikpere Enye idahaemi.
Ata mbumek emi ememde akan ekeme ndidi ndikot nwed Abasi. Ke ndinam oro, nnyin iyenyene ekikere ete ke imedu ikpere Enye. Eke mi, ndidu-mkpere Enye esiwak ndidi ke ini eke ami nkotde Nwed Mormon. Ke akpa mint eke ami nkekotde ke Udiana Akpa Nwed Nephi ibuot Iba, ami nkop uyio Nephi ye Lehi ke ekikere mi nte emende Andinyanga owut ebiet-nte ke mmo ema efiok Enye ke ata idem-mmo. Ekikere edidu-mkpere ama oduk edi.
Eke mbufo, mme ebiet efen ke Nwed Abasi ekeme nditim nda mbufo mkpere Enye. Edi ebiet-ekededi ye ini-ekededi emi mbufo ekotde iko Abasi, ke nsuhoreidem ye esit akpaniko man eti Andinyanga, udong mbufo ke ndida enying Esie ndori ke idem mbufo eyekori ke uwem mbufo k’usen-k’usen.
Udong oro eyekpuho ke usung nte mbufo enamde-utom ke Ufok Abasi. Mbufo eyebong-akam eno Ete ke Enyong eyom unwam ke ndinam ubiong-utom mbufo kpa ke ikoot emi etiede mbufo nte oro ekpekpri . Unwam eke mbufo eyomde edi ukeme ndiyak idem mbufo nnyung ntim-nse nkpo emi Andinyanga oyomde ono mbon emi ekotde mbufo ete enwam.
Ami mmokut ubok Esie ye ukpeme Esie ke ubiong-utom mi ye ndito nnyin ke ini eke ami nkebongde-akam man ndiongo danga mkpenwam mmo ndikut emem emi iko Abasi adade edi kpot. Ke mme ini oro, ami nkekereke mme ekut mi nte ete ndito eke anamde-ofon, edi nketim nkere mbanga akanga ye ufon ndito mi.
Udong ndino mbon-owo eke nnyin inwamde se Andinyanga okponode mmo ada ekesim akam emi edide mkpe-ubok ke akpaniko ono Ete ke Enyong, ke enying Jesus Christ. Nte nnyin ibongde-akam ke usung oro—ke enying Andinyanga, inyene mbuotidem ke Enye—Ete eyeboro. Enye eyeno Edisana Spirit man ada-usung, odong-esit, onyung osongo-nnyin idem. Sia Spirit etiede ntiense abanga Andinyanga ke kpukpru ini (se ke see 3 Nephi 11:32, 36; 28:11; Ether 12:41), ukeme nnyin ndima Abasi ke ofuri esit, ekikere, ye odudu nnyin eyekori (se ke Mark 12:30; Luke 10:27; D&C 59:5).
Edidiong eke nditi k’usen-k’usen ye idahaemi eyedi sung-sung ke nte nnyin inwamde Enye, itabi iko Esie, inyung ibong-akam mbuotidem ke enying Esie. Ndien editi emi eyenam nnyin ikabare idi nti mbet eke Obong Jesus Christ ke obio-ubong Esie ke isong emi—ndien ke edikem-ini, ye Ete Esie ke ererimbot oyoho-ubong emi edidide.
© 2017 eketode Intellectual Reserve, Inc. Ekpan kpukpru unen ndiming. Ekeming ke USA. Enyime edikabare ke Iko Mbakara: 6/17. Enyimme Ndikabare: 6/17 Ndikabare Etop eke First Presidency Message, October 2017. Efik 97925 553