Elder Robert D. Hales: Edua na Bula Dokai
“Isa, ke a tu vei au na domo kei na biukila ni dua na agilosi me rawa ni’u kaya ki na kawatamata ni o [Jisu Karisito] sa tucaketale ka sa bula; ka sa Luve ni Kalou, na Luvena Duabauga na Tamada, na Mesaia yalataki, noda Dauveivueti ka iVakabula; ni a lako mai ki vuravura oqo me vakatavulica na kosipeli ena ivakaraitaki. E Nona itavi vakalou me dusimaki iko kei au me lako ki vua ka na tuberi keda okoya ki na bula tawamudu.”1
Waqana: itaba mai vei Stuart Johnson, Deseret News
Ena nona a veiqaravi tiko vaka pailate ni waqavuka ni ivalu o Elder Robert D. Hales ena Mataivalu e Macawa ni Merika ena 1950 vakacaca, era a taurivaka na nona itokani edua na ibole me uqeti ira ena nodra itavi.
“Na neimami ibole—vakaraitaki tu ena baba ni neimami waqavuka—na ‘Lesu ena Dokai,’” e a tukuna o Elder Hales vei ira na matabete ni a se veiqaravi tiko vaka Bisopi Vakatulewa ena 1990. “Na ibole oqo edau ivakananumi tudei vei keimami baleta na neimami inaki dei me lesu ki na neimami keba ena dokai ni vakayagataki oti kece na neimami sasaga me rawati vakavinaka na vei tiki ni neimami itavi.”2
O Elder Hales, ka dau tukuna wasoma na lesu ena dokai, e a vakabauta ni rawa ni vukei o ira kece na luve i Tamada Vakalomalagi ena nodra sala tawamudu ena vakayagataki ni ibole oqo ki na nodra bula. Baleta ni veisiga yadua ni bula e itavi, e a vakatavulica okoya, “E yaga meda nanuma se o cei o keda kei na noda inaki tawamudu me ‘Lesu ena Dokai,’ kei na noda matavuvale, ki na iserau ni Tamada Vakalomalagi.”3
Ena nona itavi vakatama, dauveiliutaki vakabisinisi, ka Vakaitutu Raraba ni Lotu i Jisu Karisito ni Yalododonu Edaidai ka sivia e 40 na yabaki, o Elder Hales e a dau nanuma se o cei okoya ka dau cakacakataka vakakina. Kei ena nona yalodina, talairawarawa, gugumatua, kei na veiqaravi, e a ivakaraitaki ni ibole ni nona itokani vakaivalu ena nona bula taucoko.
E Matavuvale Veivolekati
O Robert Dean Hales e a sucu e New York City, Merika, ena i ka 24 ni Okosita, 1932, e ikatolu ni tolu na gone ka sucu vei J. Rulon Hales kei Vera Marie Holbrook Hales. E a tubu cake o Robert ena vanua voleka o Long Island ena dua na vuvale lotu. Erau a veiqaravi na nona itubutubu ena vuqa na ilesilesi ni Lotu, oka kina vaka daukaulotu ena iteki, ka dau lakova na vuvale e 20 na maile ena vei Siga Tabu ka laki lotu ena Tabanalevu e Queens.
“Keitou a vuvale veivolekati,” a nanuma lesu o Elder Hales. E a vakatoka na nona vale ni itabagone “a vanua totoka ni tubu cake” kei na nona matavuvale “a ivurevure ni kaukauwa.”4
Na ivakaraitaki vinaka ni nona itubutubu e a yaco me ivakanananu ka dusimaka nona bula.5 “Erau a bulataka na kosipeli, vulica na ivolanikalou, ka vakadinadinataka na Kalou na Tamada kei na Luvena o Jisu Karisito,” a kaya o Elder Hales. “Erau a vakadinadinataka talega na Parofita o Josefa Simici.”6
Ni a se gone a vulica okoya ni “na idola ni vaqaqacotaki ni noda matavuvale oya me lako mai na Yalo ni Turaga ki na noda veivale.”7
O tinana, ka a veiqaravi sivia na 30 yabaki ena iSoqosoqo ni Veivukei, e a vakavulica vei Robert na loloma kei na veivukei ena nona dau kauti koya ka qaravi ira na dravudravua kei na vakaloloma.8 O tamana, a daudroini saumi e New York City, ka vakavulica vei Robert na lesoni tawayalani baleta na matabete kei na Veivakalesui. Ena dua na gauna, e a kauti Robert okoya ki na uciwai na Susquehanna, na vanua rau a ciqoma kina na Matabete i Eroni o Josefa Simici kei Oliver Cowdery mai vei Joni na Daupapitaiso. E duatale na gauna, e a kauti Robert okoya ki na Veikau Tabu.
“Keirau masu vata ena veikau ka cavuta neirau gagadre me keirau dei ka yalodina ki na matabete ka tu vei keirau,” a nanuma lesu okoya. “E muri e a qai droinitaka o tamaqu na vanua keirau a masu kina ka solia vei au me ivakananumi ni neirau yalayala ka vakayacori vata ena siga oya. E lili tiko ena noqu valenivolavola nikua ka sa ivakananumi ena veisiga yadua ni noqu bula sotavi kei na yalayala tabu kei na tamaqu vakavuravura vakakina na Tamaqu Vakalomalagi.”9
A dauqito baseball ni se gone, o Robert ea qai qito ena veikoronivuli torocake, ka a viritaka okoya na imatai ni viri dausoqovi ena dua na qito saumi ena 2007.
iTaba mai vei Sonja Eddings Brown
Ni se itabagone, e dau taleitaka o Robert na qito baseball, ka qai yaco emuri me qitotaka na Univesiti e Utah. Ena nona a lako tiko ki vale kei na timi ena basi ni oti na imatai ni qito e taudaku-ni-tauni, e a kidroataka okoya eso na ivukivuki kei na ivosavosa ni nona lewenitimi. Me vakaukauwataki Robert, e a droinitaka vei koya o tamana edua na iyaloyalo ni dua na tamata ni ivalu.
“Ena nona droini ka wiliwili mai na ivolanikalou, au a vulica meu dua na lewe ni matabete yalodina—meu maroroya ka taqomaka na matanitu ni Kalou. Na veivosa nei Paula na iApositolo e a idusidusi vei au” (raica Efeso 6:13–17).
Ena lesoni oqori, emuri e a vakavulica o Elder Hales, “Kevaka eda yalodina ki na matabete, ena soli vei keda na isasabai oqo me isolisoli mai vua na Kalou. Eda gadreva na isasabai oqo!”10
E a vulica o Elder Hales e duatale na itovo mai na ivakaraitaki nei tamana.
“Au a vulica na dokai ni bula vakamarama mai na veikauwaitaki loloma nei tamaqu vei tinaqu, ganequ, kei na ganena,” a kaya okoya. Ena nona sa mai tauvimate bibi na tinai Elder Hales, na nona “veiqaravi loloma vua na nona itokani vakamareqeti” ena i otioti ni rua na yabaki ni nona bula e a yaco me dua na ivakaraitaki ena sega ni guilecava rawa okoya. “E a tukuna vei au okoya ni oya na isau lailai ni nona loloma yalodina nei tinaqu vei koya ena sivia na limasagavulu na yabaki.”11
Nona iYau Cecere
Ena sereki ni vuli ni 1952, e a sotava o Robert edua na goneyalewa ka yacana o Mary Crandall, ka ratou se qai toki walega mai ki New York na nona matavuvale mai California. E mai totolo sara na nodrau veikilai vinaka.
“Ni’u sotavi koya oti, au sega ni qai veibuku kei na duatani tale,” a nanuma lesu o Elder Hales.12
Ni oti na vulaikatakata, erau lesu ruarua ki vuli ki Utah. O Robert ea vuli ena Univesiti e Utah ka lako o Mary ki Brigham Young Univesiti, ia erau sega ni laiva na kena veiyawaki me tawasei rau. Ni oti ga vakalekaleka na yabaki ni vuli, erau a vakamau ena Valetabu e Salt Lake enai ka 10 ni June, 1953. Ena lima na yabaki tarava e a rua kina na luvedrau tagane, o Stephen kei David.
Ni oti nona tauritutu o Robert ena koroi ni veitaratara kei na bisinisi ena 1954, e a curu okoya ena mataivalu e macawa, ka veiqaravi vakapailate ni waqavuka ni ivalu. Ni cava na nona veiqaravi ni oti e va na yabaki, ea tokia nona matavuvale mai Florida ki Massachusetts me goleva na koroi ni vuku ni veiliutaki vakabisinisi. Ena levu ni nona osooso e Harvard Business School, e a kacivi okoya me peresitedi ni kuoramu ni italatala qase. Oqo duadua ga na gauna ena nona bula ka veinanuyakataka kina okoya se me ciqoma na veikacivi ni Lotu.
“Ena rawa ni’u na lutu ena noqu vuli kevaka e yaco meu peresitedi ni kuoramu ni italatala qase,” e a tukuna vei Mary.
A sauma o Mary ena veivosa ka na vukei koya ena vo ni nona bula: “Bob, e vinaka cake vei au edua na matabete yalodina mai na dua na tagane ka vakoroinivuku mai Harvard.” Qai mai mokoti koya yani ka kuria, “Daru cakava ruarua oqori.”13
Ka rau cakava sara.
Ena siga tarava e a latia o Mary edua na tiki ni yavu tara vakavo ni nodrau itikotiko me vanua ni vulilesoni nei Robert ka me kua ni vakasosataki.
“Au biuti au ena liga ni Turaga ena noqu cakava na digidigi oya” meu ciqoma na veikacivi, e a kaya o Elder Hales ni oti e 30 na yabaki. “Na digidigi oya ea dredre sara me caka ena gauna oya mai na gauna, ni oti e vica na yabaki, meu biuta na noqu cakacaka vakabisinisi ka ciqoma na kaci ni veiqaravi vakaivukevuke ki na Le Tinikarua.”14
Ni oti e vica na yabaki, ni sa tudei na bula vakailavo ni nona matavuvale, e a nakita o Elder Hales me volia vei Mary edua na kote saulevu. Ni tarogi koya ena nona nanuma baleta na nona inaki, qai taroga o watina, “O volia oqo me baleti au se baleti iko?
Ea vakatoka o Elder Hales na nona taro me “dua na lesoni tawaguilecavi rawa.” A dikeva okoya: “E tautauvata, ni taroga tiko okoya, ‘E inaki li ni isolisoli oqo me vakaraitaka nomu lomani au se me vakaraitaka vei au niko dauniveivakarautaki vinaka se me vakadinadinataka edua na ka ki na vuravura?’ Au vakananuma matua na nona taro ka qai kila ni’u a nanumi au tikoga vakalevu ka lailai baleti koya kei na neirau matavuvale.”15
E a vakadinata o Elder Hales ni o watina e nona iyau cecere duadua.16 E a kaya, “Ke a sega okoya ke sega ni’u rawati au”. “Au lomani koya dina sara. E tu vua na isolisoli ni Yalo Tabu. Keirau vulica vata na ivolanikalou, ka levu na nanuma au vakatavulica e lako mai ena neirau vuli vakaitokani kei na masumasu. Oqori na vuna au rawati au kina.”17
E vakararavitaka o Elder Hales na levu ni ka erau rawata ena bula qo ki na nodrau veiwekani sema vakatimi. “Keirau a dau dua tu ga mai na timi ka na tomani tikoga. Au nanuma ni vakarorogo vua na watiqu, tarava na vakarorogo ki na Yalo Tabu, e sa ivakadei bibi duadua ena noqu bula.”18
“Ena Levu na Nomu iLesilesi”
Ni oti nona tauritutu ni MBA o Robert ena 1960, e levu na ituvatuva vakacakacaka e yaco totolo mai vei koya. Ena loma ni15 na yabaki tarava e a veiqaravi vakaveiliutaki-e-cake ena vica na kabani rogolevu e Amerika. Na nona cakacaka vakabisinisi vakasakiti e a kauti koya kei na nona matavuvale ki na vica na siti e Amerika vakakina ki Igiladi, Jamani, kei Sipeni. Na veitosoyaki oqori e a kauta mai na veikacivi veiliutaki ki na Lotu, ka a ciqoma ena lomasoli o Robert.
E a veiqaravi okoya ena mataveiliutaki ena veitabana e Sipeni, Jamani, ka vakakina e Georgia kei Massachusetts e Amerika. E a veiqaravi okoya vaka bisopi e Frankfurt, Jamani, kei Massachusetts kei Illinois, Amerika. E a veiqaravi vaka leweni-matabose-e-cake e Lodoni, Igiladi, kei Boston, Massachusetts, ka veiqaravi talega ekeri ena mataveiliutaki-ni-iteki. E Minnesota kei Louisiana, Amerika, e a veiqaravi okoya vaka mata-ni-iwasewase.
Ena 1975, ni a tiko ena dua na matabose vakabisinisi, e a taura o Robert edua na itukutuku ni o Peresitedi Marion G. Romney (1897–1988), ka a iKarua ni Daunivakasala ki na Mataveiliutaki Taumada, sa wawa tiko ena talefoni. Ni sauma na talefoni o Robert, e a kacivi koya o President Romney me veiqaravi vaka peresitedi-ni-tabana-ni-kaulotu. Ea ciqoma na kaci o Robert, ia ni se bera ni tekivuna nona qaravi itavi ena yabaki oya vaka peresitedi ni England London Mission, e a ciqoma tale okoya edua qiri mai Salt Lake City, na gauna qo mai vei Peresitedi Spencer W. Kimball (1895–1985).
“Ko na kauwaitaka beka ke keitou kerei iko mo veiqaravi me sivia e tolu na yabaki?” E taroga o Peresitedi Kimball. Ena nona kaya o Robert ni sega ni kauwaitaka, a kacivi koya sara o Peresitedi Kimball me ivukevuke ki na Kuoramu ni Le Tinikarua na iApositolo.
“E a tukuna vei au o Peresitedi Kimball e kila okoya ni’u sega ni taleitaka baleta ni’u vinakata meu lako vaka peresitedi-ni-tabana-ni-kaulotu,” a kaya o Elder Hales. Ia a vakadeitaka vua o Peresitedi Kimball, “Kua ni lomaleqataka; ena levu nomu ilesilesi.”19
Ena yabaki tarava, e a kacivi o Elder Hales ki na iMatai ni Kuoramu ni Vitusagavulu. Ena itutu oqori ni oti e tolu na yabaki, e a kacivi tale okoya me veiqaravi vaka peresitedi ni England London Mission ka qai supavaisa ni iwasewase e Urope, ka cakacaka kei Elder Thomas S. Monson ena tauyavutaki ni kosipeli ena veimatanitu ka a sa sogo tu kina na Lotu ka goleva na tara ni valetabu ena Tokalau kei Jamani.20
“Edua na reki levu ni noqu veiqaravi ena Lotu e yaco ena loma ni matai ni tolu na yabaki vaka Vakaitutu Raraba ena noqu vukea na tuvani ni ruasagavulu-kavitu na koniferedi vaka iwasewase,” a kaya o Elder Hales. “Au taleitaka na lako kei ira na lewe ni Mataveiliutaki Taumada, na iApositolo, Vakaitutu Raraba, kei ira na iliuliu tale eso ka rawa ni kilai ira kei na watidra. Na saravi ira na parofita, daurairai, kei na dauvakatakila ena wasei ni ivakadinadina ni dina ni kosipeli ki vei ira na Yalododonu ena veimatanitu e ka qoroi.”21
Ena 1985, e a kacivi o Elder Hales me Bisopi Vakatulewa ni Lotu. Na nona kila vakacakacaka, nona veiliutaki dokai kei na iwalewale ni veivakameautaki, kei na nona lomani ira na tamata e veiganiti kei na nona ilesilesi.
O Bisopi Vakatulewa Hales e a vukea na veivakarautaki me dua na valetabu ena Tokalau kei Jamani. Okoya kei Mary Hales (lomadonu) tomani (imawi ki na imatau) daudroini Emil Fetzer, Elisa Wirthlin, Elder Joseph B. Wirthlin, Frances Monson, kei Elder Thomas S. Monson ena vakatabui ni valetabu 1985.
O Peresitedi Henry B. Eyring, Matai ni Daunivakasala ena Mataveiliutaki Taumada, e a veiqaravi ena Matabisopi Vakatulewa kei Elder Hales. E vakatokai Elder Hales okoya me yalovuku, rakorako, daunibisinisi yalodina ka daukauwaitaki ira na tamata ka kila na iwalewale ni qaravi ni itavi. “E kauta mai okoya na vei ivakarau vata ga oqori ki na veiliutaki ni Matabisopi Vakatulewa,” a kaya o President Eyring.22
“E sega sara vua na ilawaki ca,” kaya na watina, o Mary. “E yalosavasava okoya ka dau via caka dodonu ga.”23
E maliwai ira na ivakavuvuli edau vakabibitaka o Elder Hales vaka Bisopi Vakatulewa oya na ivakavuvuli ni welefea. “Ni laveti au, ka’u na laveti kemuni, ka daru na torocake vata,” edau kaya wasoma okoya, ni cavuta edua nona vosa vakaibalebale taleitaki.24
E masulaka okoya na Yalododonu “me kila ni tu vei keda na kaukauwa kei na itavi me vukei ira na vakaloloma, vaka agilosi veiqaravi ni Turaga o Jisu Karisito, ni da na lomani baleta ni da dauloloma, vakacegui baleta ni da yalololoma, vosoti baleta ni da sa vakaraitaka na levu ni noda dauveivosoti.”25
iVakavuvuli kei na iVakadinadina
Ena nona a tokoni o Elder Hales ki na Kuoramu ni Le Tinikarua na iApositolo ena ciwa na yabaki tarava, ena i ka 2 ni Epereli, 1994, e a bikai koya vakabibi na nona ilesilesi vou.
“Au sa ono-sagavulukadua qo ka’u sa mai itabagone tagane tale,” a kaya ena imatai ni nona ivunau vaka iApositolo ena koniferedi raraba. “Era dabe ena idabedabe e cake na turaga ka ra sa iApositolo ka Mataveiliutaki Taumada me veimama na noqu yabaki ni bula.”
E a kaya ni iApositolo i Jisu Karisito e ivakarau—“a ivakarau ni veivutuni kei na yalomalumalumu, ka rai ki lomada me vaka eda sa vakaroti ka kerea na veivosoti kei na kaukauwa meu yacova na ka e dodonu meu yacova.” E a kerea na veimasulaki ni Yalododonu me rawa vei koya me “bulia na kaukauwa vakayalo e gadrevi me rawa ni curuma na domoqu kei na noqu ivakadinadina ni Turaga o Jisu Karisito na yalodra ko ira era na rogoca.”26
Na nona ivakadinadina vaka apositolo o Elder Hales baleta na iVakabula kei na kosipeli vakalesui mai e curuma na yalodra na Yalododonu-edaidai e vuravura raraba, ka sa sivia e 20 na yabaki. Na nona ivunau e oka kina na iulutaga me vaka na vuvale kei na vakabauta, veivakatovolei kei na ivakadinadina, loloma kei na yalovosota, veiqaravi kei na talairawarawa, yalodina kei na galala ni digidigi.
Ni vakatavulica na vakayagataki vakavuku ni galala ni digidigi, e a wasea o Elder Hales edua na italanoa baleta edua nona itokani ena mataivalu e macawa.
“Ena vuli ni pailate vakaivalu, … au vakatovotovotaka na digidigi ni lade tani mai na waqavuka ena gauna ni kama ka tekivu meu cawiri vakailowa,” e a vakananuma okoya. “Au nanuma edua na itokani lomani ka sega ni cakava na vakavakarau oqori. Edau levea okoya na vuli ni simulator ka dau lako i qito golf se qalo. E sega ni vulica okoya na nona ituvatuva ni leqa tubukoso! Oti e vica na vula, e a kama nona waqavuka, ka cawiri sobu ki delaniqele ena yameyame. Ena nona raica na cina ni ivakaro, o nona itokani gone, ena nona kila na veika me caka, e kila na gauna me lade kina mai na waqavuka ka mani drobula ena parachute. Ia o noqu itau ka a sega ni vakarautaki koya me cakava na digidigi oya a tikoga ena waqavuka ka mate ena kena voca.”
Na kilai ni ka me caka kei na gauna me caka kina ni basika edua na digidigi bibi e rawa ni yaco na kena revurevu tawamudu, a kuria o Elder Hales.27
“Vaka gone tagane e New York, au a tubu cake me dua mai na rua se tolu walega na lewe ni Lotu ena dua na koronivuli torocake ni vica na udolu. Ena dua na yabaki-50 soqoni vakavulioti, o ira na noqu itokani vakakalasi era vakananuma na noqu dau bulataka na noqu yavunilewa kei na vakabauta. Au sa qai kila e kea ni voroki ni Vosa ni Vuku se ivalavalaca ni tiko savasava sa na kena ibalebale meu na sega ni rawa ni kaya, ‘Oqo na ka au vakabauta’ ka qai dinati mai vei ira na noqu itokani.
“Ena rawa walega ni da wasea na kosipeli ena itagede eda bulataka kina.”28
Ena veiyabaki ni mai cava na minisitiri nei Elder Hales, e a uqeti ira na Yalododonu mera bula kilikili ena “isolisoli uasivi ni Yalo Tabu.”29 E uqeti ira talega na lewe ni Lotu mera toroya cake nodra bula vakatisaipeli ena nodra tamata vakabauta torocake, yalodei Vakarisito, ka tudei ena veivanua tabu.
“Oqo na veikacivi i Karisito vei ira kece na Lotu Vakarisito nikua: ‘Vakani ira na noqu lami. … Vakani ira na noqu sipi’—wasea noqu kosipeli vei ira na gone kei na qase, laveti, vakalougatataki, vakacegui, uqeti, ka tutaki ira, vakabibi o ira era vakabauta duidui mai vei keda,” e vakatavulica okoya.30
iTaba mai vei Jeffrey D. Allred, Deseret News
Me baleti ira era “gadreva meda lako sobu mai na qele cere ka tomani ira ena sikaramu ni vulika-vakalotu ena soso,” e vakasalataki ira na Yalododonu-Edaidai o Elder Hales mera sauma ena nodra ivakadinadina ka tuvata kei na iVakabula.
“Eda vakaraitaka yani Nona loloma, ka sa vu ni kaukauwa duadua ga ka rawa ni valuta na meca ka saumi ira na noda dauveibeitaki ka sega ni beitaki ira lesu. Oqori e sega ni malumalumu. Qori na yalodei Vakarisito.”31
Me vaka na iVakabula e a “beci ka cati mai vei ira na tamata” (Aisea 53:3; Mosaia 14:3), na Yalododonu-Edaidai e rawa talega ni sotava na nanuma cala, veivakacacani, kei na veibeitaki vakailasu. “Sa noda dodonu tabu meda tuvata kei Koya!” e tukuna o Elder Hales.32
Wawa Vua na Turaga
Ni vosa o Elder Hales baleta na wawa vua na Turaga, e kila vinaka okoya na ulutaga. Na leqa ni uto, veisele lelevu, kei na bolebole ni vakavoui ni bula ka tarovi koya me vosa ena koniferedi raraba ni Epereli 2011 e a veibikai vakayago ia a kauta mai vei koya na raititobu vakayalo.
Ena nona bulacake mai na tolu na sele lelevu ena 2000, e a kaya vei ira na Yalododonu-Edaidai: “Ena rua na yabaki sa oti, au a wawa vua na Turaga meu tuberi ena lesoni vakayago ena dela ni mosi vakayago, yaluma ni vakasama, kei na vakanananu titobu. Au vulica ni mosi kaukauwa ka tudei e ivakasavasavataki levu ka vakayalomaluataki keda ka toroi keda voleka ki na Yalo ni Kalou.”33
E sega ni yaga meda sotava duadua na bolebole baleta ni da rawa ni vakatakekere ki “na dauveiqaravi cecere,” e a vakavulica o Elder Hales.34 “Ena so na gauna, ni gadreva na Turaga me vakakina, au na yalovakacegu ena so na veisiko vakalomalagi ka kauta mai na vakacegu kei na veivakadeitaki tawamudu ena gauna au gadreva kina.”35
Eda sega beka ni kila na gauna se na saumi vakacava na noda masu, e vakadinata o Elder Hales, ena yaco mai na kena isau ena sala ga ni Turaga kei na Nona gauna. “E so na kena isau eda na waraka beka na bula ka tarava. … Meda kakua ni soro ena vuku ni Turaga. E tawamudu na Nona veivakalougatataki, sega ni vagauna ga.”36
“Au sa kalougata ni’u cakacaka maliwai ira na Veitacini vakasakiti duadua ena vuravura oqo.” Na veivosa e a cavuti ena nona a vakacegui mai vaka Bisopi Vakatulewa a vakatalega kina vaka iApositolo.
iTaba lolomataki mai na Deseret News Akaivi
iTaba mai vei Stuart Johnson, Deseret News
Dua na Tisaipeli Yalodina
Vaka Bisopi Vakatulewa, e a wasea o Elder Hales na ivakadinadina veilauti kei Alama na Gone. E a vakaraitaka okoya: “Isa, ke a tu vei au na domo kei na biukila ni dua na agilosi meu rawa ni kaya ki na kawatamata ni o [Jisu Karisito] sa tucaketale ka sa bula okoya; ka sa Luve ni Kalou, na Luvena Duabauga na Tamada, na Mesaia yalataki, noda Dauveivueti ka iVakabula; ni a lako mai ki vuravura qo me vakatavulica na kosipeli ena ivakaraitaki. Nona itavi vakalou e dusimaka vei iko kei au me lakomai ki vua ka na tuberi keda okoya ki na bula tawamudu.”37
Ena imatai ni nona vosa ena koniferedi raraba ni kacivi oti ki na Kuoramu ni Le Tinikarua na iApositolo, e a cavuvosataki Momani okoya, ka cavuta na ivakadinadina ni parofita qori me vaka ga e nona: “Raica, koi au edua na tisaipeli i Jisu Karisito, na Luve ni Kalou. Sa kacivi au ko koya meu vunautaka nona vosa ena kedra maliwa na nona tamata, me ra rawata kina na bula tawavakaiyalayala” (3 Nephi 5:13).38
Ena vasagavulu na yabaki vaka Vakaitutu Raraba, o Elder Robert D. Hales e a vakaraitaka vakadoudou ka kaukauwa na vosa ni iVakabula ena nona ivunau kei na bula ivakaraitaki. Ka a nanuma okoya na nona ivakasala ena nona bula vakaitaukei, vakabisinisi, ka vakalotu: “Ena talairawarawa yalodina kei na vosota ki na ivakataotioti, dua na siga eda na lesu ena dokai ki na iserau ni Tamada Vakalomalagi kei na luvena o Jisu Karisito.”39
Kivei ira na Yalododonu-Edaidai ka ra waseavata na nona vakabauta na iVakabula, o Elder Hales e sega ni yali. Ia, sa lesu ki vale okoya—ka vakayacora qori okoya ena dokai.