President a Odzi Kan na N’apamfo Amandzɛɛbɔ, Mumu 2017
Yɛrohwehwɛ Christ Borɔnya Ber
President Dieter F. Uchtdorf ne Kasae
Ɔpamfo a Otsĩa Ebien wɔ President a Odzi Kan na n’Apamfo mu
Nkorɔfo dodowara a wɔpɛ dɛ wɔtse mbrɛ hɛn a yɛyɛ Jesus Christ n’Asɔr a ɔwɔ hɔ ma Nda a Odzi Ekyir Ahotseweefo asɔrmba no si tse ase no, mebɛpɛ dɛ wɔhyɛ ase fi nsɛmfua ebien yinom a ɔkyerɛ hɛn su: Yɛhwehwɛ Christ.
Yɛhwehwɛ dɛ yebosũa No ho asɛm. Yɛbɛkã No do. Yɛbɛyɛ tse dɛ mbrɛ Ɔtse ara yie.
Yɛhwehwɛ No dabiara wɔ afe ne nyina mu. Mbom nkankara wɔ dɛm aber yi wɔ afe no mu—Borɔnya ber, ber a yɛhyɛ hɛn Agyenkwa dɔfo N’awoo ho fã no—hɛn akoma kyɛn kɔ No hɔ mbordo.
Hom mma yensusu dɛ yɛdze nkorɔfo a wɔtsenaa ase mfe mpem ebien a abasen kɔ no a wɔyɛɛ krado dɛ wobehyia Agyekwa Ne mbae kwan no ho nsɛm nka hɛn Borɔnya afe ahoboaboa ho.
Nguanhwɛfo no
Yennyim nguanhwɛfo no hɔn ho nsɛm pii, dza yenyim ara dɛ nna “[wɔ]da haban mu roweɔn hɔn nguankuw anago.1 Mbrɛ ɔtse biara no nna nguanhwɛfo no nnyɛ nyimpa soronko biara, wɔtse dɛ akra dodowara a wɔfata nkamfo a wɔkɔ do bɔ hɔnho akɔhoma daa daa.
Wobotum egyina hɔ ama nkorɔfo a, ber bi mu no, nna wɔremmper nnhwehwɛ Christ enyiber do, naaso hɔn akoma sakyeree ber a ɔsorsor buei na wɔbɔɔ Christ ho dawur kyerɛɛ hɔn no.
Woyinom nye hɔn a, wɔtsee ɔsor abɔfo nsɛm no, wɔkɔɔr Bethlehem ntsɛmara a wɔrohwehwe ehu no.2
Enyansafo no
Enyansafo no yɛ nwomasũafo a nna worusũa Messiah no, Nyame Ne Ba no, Ne mbae ho asɛm no. Wɔnam hɔn adzesũa do, hun nsɛnkyerɛdze horow a ɔkyerɛɛ N’awoe. Wohun dɛm no, wofii hɔn efiefi na wotuu kwan kɔr Jerusalem, rebisa dɛ, “Hen na nyia wɔawo no Jewfo Hen no wɔ?”3
Hɔn nyimdzee wɔ Christ ho no annyɛ nwomasũa hun ara. Wonyae hun N’awoe ho nsɛnkyerɛdze no, wotuu ho anamɔn. Wosii mu dɛ wɔrokɔhwehwɛ Christ no.
Enyansafo no botum ayɛ hɔn a wodua adzesũa nye nwoma nsũae do dze hwehwɛ Christ no. Ewiei no, mbrɛ wosi tu hɔnho si hɔ dze hwehwɛ nokwar no gya hɔn ma wokuhu Christ na wɔsom no dɛ Ahemfo hen, adasa Agyenkwa no.4
Simeon na Anna
Simeon na Anna botum egyina hɔ ama hɔn a wɔnam Sunsum mu no hwehwɛ Christ. Nna akra nwanwafo yinom no yɛ nyamesomfo anokwafo, na woduaa akɔnkye na mpaabɔ nye setsie na etuhoakyɛ abrabɔ do, tweɔnee enyigye mu dɛ wobohu Nyame Ne Ba no Ne mbae da no.
Woduaa nokwardzi, ahobrɛadze, na gyedzi do, dze tweɔnee Agyenkwa Ne mbae no abotar mu ara.
Ewiei no, wonyaa hɔn nokwardzi ho akatua ber a Mary na Joseph dze abodomaba no a dabi Ɔbɛfa adasa bɔn ato No do no brɛɛ hɔn no.5
Agyedzifo a wɔwɔ Nephifo na Lamanfo no mu no
Yebohu mbrɛ agyedzifo a wɔwɔ America asaasetɔw do no sii hwɛɛ Agyenkwa N’awoe ho nsɛnkyerɛdze ho kwan a, ɔyɛ asɛm a ɔtɔ akoma do no, wɔ Mormon Nwoma no mu.
Hom kaa dɛ hɔn a nna wɔwɔ gyedzi wɔ Christ mu no wosii hɔn atwetwe na wɔtseetsee hɔn. Hɔn a nna wɔapɔw wɔ wiadze nyansaa mu no kasaa tsĩaa agyedzifo no dɛ wɔrotwer nyamesom bi a ɔyɛ nkwaseasɛm. Nokwar, nna hɔn a wɔnngye nndzi no hɔn atwetwesi ano kasa no “yɛɛ dede kɛsenara” wɔ asaase no do (3 Nephi 1:7). Wɔsereew hɔn a wɔgyee dzii dɛ wɔrobɔwo Agyenkwa no.
Hɔn ebufuw na ebufuhyew dzɛww kɛsenara ma wɔdze sii hɔn enyido kitsii dɛ wɔbɛkã hɔn a wɔgye Agyenkwa no dzi nyina ahyɛ. Mormon Nwoma no kyerɛɛw adwenbɔndze a wɔfaa ho adwen no6.
Agyedzifo a wɔtsenaa ase dɛm aber yi mu no botum egyina hɔ ama hɔn a wɔhwehwɛ Christ kansa sɛ binom serew hɔn, dzi hɔnho fɛw, na wopuu hɔn mpo a. Wɔhwehwɛ Christ ber a binom mpo bɔ mbɔdzen dɛ wɔbɛkyerɛ dɛ wonnyi enyibuiei, ntsetsee, anaa wɔadaadaa hɔn.
Naaso binom hɔn atwetwesi nngura agyedzifo anokwafo abaw dɛ wobɔhwehwɛ Christ.
Yɛhwehwɛ Christ
Afe yi mu nyina, na nkanka Borɔnya ber yi, ɔbɛyɛ mfaso ama hɛn dɛ yebebisa asɛmbisa no bio “Mirisi dɛn rohwehwɛ Christ?”
N’abrabɔ nkõdzen ber bi mu no, Ɔhen David okokroko no kyerɛwee dɛ, “Nyankopɔn, ɔwo nye me Nyame; mobɔhwehwɛ wo ahema: Wo ho nsukɔm dze me kra, mo honam afe wo.”7
Ibia su yi a ɔdze hwehwɛ Nyankopɔn no kã siantsir a Ɔkãa dɛ David yɛ ɔbarimba a Nyankopɔn nankasa N’akoma da no ho.8
Borɔnya ber yi na afehyia no nyina mu no, hom mma yɛmfa hɛn akoma na hɛn akra nhwehwɛ hɛn Agyenkwa dɔfo, Asomdwee Hen, na Israel Krɔnkrɔnyi no. Dɛm pɛ yi, ne kɛsenara nnkyerɛ hɛn su dɛ yɛyɛ Jesus Christ N’asɔr a ɔwɔ hɔ Nda a Odzi Ekyir Ahotseweefo nko, mbom dɛ yɛyɛ Christ esuafo ampara mpo.
© 2017 Intellectual Reserve, Inc. Wɔakora do tumdzi nyina. USA na Wotsintimii. English approval: 6/17. Translation approval: 6/17. First Presidency Message, December 2017 ne nkyerɛasee. Fante. 97932 502