Parau poro’i a te Peresidenira’a Mātāmua, Tītema 2017

’Imi i te Mesia i te tau Noela

Nā te peresideni Dieter F. Uchtdorf

Tauturu piti i roto i te Peresidenira’a Mātāmua

I te feiā ato’a e hina’aro e māramarama ’o vai tātou te mau melo nō te ’Ēkālesia a Iesu Mesia i te Feiā Mo’a i te mau Mahana Hope’a Nei, teie te vāhi e ha’amata, e maha ta’o : ’Imi i te Mesia.

Tē ’imi nei tātou ’ia ’apo i tāna ha’api’ira’a. ’Ia pe’e iāna. ’Ia riro rahi atu ā mai iāna te huru.

I te mahana tāta’itahi, i te roara’a o te matahiti, tē ’imi nei tātou iāna. Hau atu rā i teie tau ta’a ’ē o te matahiti—i te Noela, i reira tātou e fa’ahanaha ai i te fānaura’a o tō tātou Fa’aora here—e tītau rahi tō tātou ’ā’au iāna.

I roto i tā tātou fa’aineinera’a nō te fa’ahanahana i te Noela, feruri ana’e na tātou i te huru fa’aineinera’a o te feiā i maeva i te taera’a mai o te Fa’aora ’a piti tauatini matahiti i teienei.

Te mau tīa’i māmoe

’Aita tā tātou e parau rahi nō ni’a i te mau tīa’i māmoe maori rā « tei taua fenua ra e ti’a i roto i te mau ’āua, i te tīa’ira’a i tā rātou mau nana i te mau arara’a i te pō ».¹ E nehenehe roa ïa e parau ē, e ’ere te mau tīa’i māmoe i te ta’ata ta’a ’ē roa, mai te mau ta’ata itoito ho’i e rave i tā rātou ’ohipa nō te ora.

E nehenehe rātou e fa’ahōho’a i te mau ta’ata i ’ore i ’imi itoito i te Mesia nō te hō’ē taime, ’āre’a rā ’ua taui tō rātou ’ā’au i te vēvetera’a te ra’i ia rātou ’e ’ua parauhia mai nō te Mesia.

’O rātou i te fa’aro’ora’a iho ā i te reo o te mau ve’a nā te Atua, ’ua haere i Betelehema nō tō rātou hina’aro ’ia ’ite.²

Te mau Ta’ata pa’ari

E mau hiva tahu’a nā Ta’ata pa’ari tei tuatāpapa i te taera’a mai o te Mesia, te Tamaiti a te Atua. Nā roto i tā rātou tuatāpapara’a, ’ua ta’a ia rātou te mau tāpa’o e fa’a’ite i tōna fānaura’a. I te ’itera’a rātou i te reira, ’ua fa’aru’e rātou i tō rātou nohora’a nō te tere atu i Ierusalema nō te ani, « Tei hea te Ari’i fānau ’āpī o te ’āti Iuda nei ? »³

’Aita tō rātou ’ite nō ni’a i te Mesia i vai noa ’ei ’ite ha’api’ira’a. I te ’itera’a rātou i te mau tāpa’o nō tōna fānaura’a, ’ua haere rātou. ’Ua tere ti’a rātou ’ia ’itehia mai te Mesia.

E nehenehe teie nā Ta’ata pa’ari e fa’ahōho’a i te mau ta’ata e ’imi nei i te Mesia nā roto i te ha’api’ira’a ’e te tuatāpapara’a. ’Ua tauto’o noa rātou i te parau mau ē ’itehia mai nei ia rātou te Mesia ’e ’ua ha’amori rātou iāna ’ei Ari’i o te mau ari’i, ’ei Fa’aora o te ta’ata nei.⁴

Simeona ’e Ana

E nehenehe Simeona ’e Ana e fa’ahōho’a i te mau ta’ata e ’imi nei i te Mesia nā roto i te Vārua. E mea paieti roa rāua, ’e nā roto i te ha’apaera’a mā’a ’e te pure, ’e nā roto i te orara’a paieti ’e te ha’apa’o, ’ua tīa’i ’e ’ua hia’ai rahi rāua ’ia ’ite i te mahana e tae mai ai te Tamaiti a te Atua.

Nā roto i te ha’apa’o maita’i, te ha’eha’a ’e te fa’aro’o, ’ua hi’o noa rāua i te taera’a mai o te Fa’aora.

Ē manuia mai nei tō rāua ha’apa’o maita’i i te hi’ira’a Maria ’e Iosepha i mua ia rāua i teie ’aiū te riro i te rave i ni’a iāna te mau hara a te ta’ata nei.

Te feiā ti’aturi i roto i te mau ’āti Nephi ’e te mau ’āti Lamana

Tei roto i te Buka a Moromona te ’ā’amu ha’aputapū ’ā’au o te feiā ti’aturi i te Fenua ’āpī tei hi’o noa i te mau tāpa’o nō te fānaura’a o te Fa’aora.

Tē ha’amana’o ra ’outou ē, ’ua fa’ao’ō’hia ’e ’ua hāmani-’ino-hia te mau ta’ata i fa’aro’o i te Mesia. ’Ua fa’ahapa te feiā huru vāna’a o terā tau i te feiā ti’aturi nō te tāpe’a-noa-ra’a i ni’a i teie mau ti’aturira’a ma’ama’a. Tē parauhia nei ē, nō te rahi o te reo fa’ao’ō’o o te feiā ti’aturi ’ore i tupu ai « te ti’arepu rahi » i te fenua (3 Nephi 1:7). ’Ua tāhitohito rātou i te ta’ata tei ti’aturi ē, e fānauhia te Fa’aora.

Nō te tupu-rahi-roa-ra’a tō rātou ’iria ’e te taehae i māna’ona’o noa ai rātou e ha’amāmū roa ’e ’aita fa’ahou e ta’ata e ti’aturi i te Fa’aora. Tē fa’ati’a nei te Buka a Moromona nō ni’a i terā fa’aotira’a ri’ari’a mau.⁶

E nehenehe te feiā ti’aturi i ora i terā tau e fa’ahōho’a i te mau ta’ata e ’imi nei i te Mesia noa atu ē tē ’ata ra vetahi ’ē, tē fa’ao’ō’o ra ’e tē vahavaha ra ia rātou. Tē ’imi nei rātou i te Mesia noa atu ē tē ’imi ra vetahi ’ē ’ia fa’ao’ō’o ia rātou ’ei ta’ata ’ite ’ore i te ’ohipa au ’e te māramarama ’ore ’e te ti’aturi haere noa.

’Aita rā te vahavaha a vetahi ’ē e ha’aparuparu i te mana’o i te feiā ti’aturi mau i te ’imira’a i te Mesia.

Tē ’imi nei tātou i te Mesia

I te roara’a o te matahiti, ’e hau atu paha i teie tau Noela nei, e mea maita’i nō tātou ’ia ui fa’ahou i te uira’a ē, « E aha tō’u huru ’imira’a i te Mesia ? »

I te hō’ē taime fifi o tōna orara’a, ’ua pāpa’i te ari’i rahi ra ’o Davida : « E te Atua, ’o ’oe ho’i ta’u Atua; e ’imi vave au ia ’oe : tē poiha’a nei ta’u vārua ia ’oe, tē fē’a’a nei ta’u tino ia ’oe ».⁷

Penei a’e ’o teie huru ’imira’a tōna i te Atua te hō’ē tumu i parauhia Davida ’ei ta’ata e au i te ’ā’au o te Atua iho.⁸

I teie tau Noela ’e i te roara’a o te matahiti, e mata na tātou i te ’imi ma tō tātou ’ā’au ’e te vārua i tō tātou Fa’aora here, te Ari’i o te hau, tei Mo’a i ’Īserā’ela. Nā teie ho’i hina’aro e fa’ata’a rahi ’o vai tātou ’ei melo nō te ’Ēkālesia a Iesu Mesia i te Feiā Mo’a i te mau Mahana Hope’a Nei, e ’ere noa rā terā, tē fa’ata’a nei te reira ’o vai mau tātou ’ei pipi nā te Mesia.

© 2017 nā Intellectual Reserve, Inc. Fatura’a pāruruhia. Nene’ihia i Marite. Parau fa’ati’a nō te reo peretāne : 6/17. Parau fa’ati’a nō te ’īritira’a : 6/17. ’Īritira’a nō First Presidency Message, December 2017. Tahitian. 97932 895

Ha’api’ira’a nō roto mai i teie parau poro’i

Nāhea tātou e nehenehe e ’imi maita’i a’e i te Mesia mai tā te peresideni Uchtdorf i parau ? E nehenehe ’outou e fa’aitoito i te feiā tā ’outou e ha’api’i ra, ’ia ui ia rātou iho : « E aha tō’u huru ’imira’a i te Mesia ? » ’A ani ia rātou ’ia ha’amata nā ni’a i te fa’a’itera’a nāhea rātou tata’itahi e ’imi nei i te Mesia i roto i tā rātou tuatāpapara’a ’utuāfare tāmahana o te mau pāpa’ira’a mo’a. E nehenehe ato’a ’outou e māta’ita’i ’e te feiā tā ’outou e ha’api’i ra i te hōho’a Noela i ni’a ia Mormon.org ma te ani ia rātou ’ia ’āmui i roto i teie ’ōpuara’a matahiti e ’imi i te Mesia nā roto i te pe’era’a i tāna mau ha’api’ira’a.