Jodikdik ro

Jerbale n̄an Oktak

Būreejtōn Monson eaar kwaļo̧k, “Eddo eo ad ej n̄an jerkak jān m̧ōjņo n̄an kajoor, jān likjab n̄an tōprak. Jerbal eo ad ej n̄an erom̧ em̧m̧antata ilo kōj make.” Elōn̄ armej rej likūt Jānwōde n̄an kōm̧m̧ani kōttōbar im jibadbad ko n̄an em̧m̧anļo̧k: en ļapļo̧k ettōn̄dikdik, m̧ōn̄ā m̧ōn̄ā ko rōōne, ak jeļā juon men ekāāl. Ilo an kōttōbar kein maron̄ jipan̄ eok n̄an em̧m̧anļo̧k, wāween eo em̧m̧antata n̄an oktak ej ilo ukweļo̧k.

Men̄e ukweļo̧k emaron̄ pen, ej juon mennin letok! Ilo ad pedped pedped wōt ioon Jisōs Kraist im ukweļo̧k jān jerawiwi ko ad, jej maron̄ eddōkļo̧k im wōnm̧aanļo̧k. Būreejtōn Monson eaar ba, “Men eo eaorōk n̄an karōk in [lo̧mo̧o̧r] eo ej ad Rilo̧mo̧or, Jisōs Kraist. Eļan̄n̄e en kar jab katok in Pinmuur in An, aolep ren kar jako.” Kōn ukweļo̧k, kwomaron̄ in bar erreeo jān jerawiwi ko am̧ im jino erom̧ āinwōt E.

Ļōmņak kōn juon men me emaron̄ in dāpij eok jān am̧ erom̧ ainwōt Rilo̧mo̧o̧r. Naan ko am̧ ke? Am̧ kōm̧m̧an n̄an ro m̧ōttam̧ ak baam̧le? Ālkin kōļmenļo̧kjeņ kōn ta eo kwomaron̄ em̧m̧anļo̧k ie, jar n̄an Jemedwōj Ilan̄ im kwaļo̧k am̧ kōņaan oktak. Keememej bwe kōn kajoor in Pinmuur eo An, Jisōs Kraist emaron̄ jipan̄ eok anjo̧ ioon m̧ōjņo ko am̧. Āinwōt an Būreejtōn Monson kwaļo̧k, “Mennin letok eo an ukweļo̧k, kar letok jān ad Rilo̧mo̧o̧r, ej kōmaron̄ kōj n̄an kajim̧we iaļ ko ad.”