Ennaan eo an Būreejtōnji eo Kein Kajuon, Jānwōde 2018
Mennin Letok eo an Ukweļo̧k
Jān Būreejtōn Thomas S. Monson
“Eddo eo ad ej n̄an jerkak jān m̧ōjņo n̄an kajoor, jān likjab n̄an tōprak,” Būreejtōn Thomas S. Monson ekar katakin. “Jerbal eo ad ej n̄an erom̧ em̧m̧antata ilo kōj make. “Juon iaan mennin letok ko an Anij reļļaptata n̄an kōj ej ilo m̧ōņōņō in bar kajjieon̄, bwe likjab ejjab uwaak eo.”1
Ekkā ad kōm̧m̧ani jibadbad im kōttōbar ko ilo juon iiō ekāāl. Jej jerbali n̄an em̧m̧anļo̧k, n̄an oktak, im bar kajjieon̄. Bōlen wāween eo eaorōktata ej ilo ad bar kajjieon̄ ej n̄an dāpij ta eo Būreejtōn Monson eaar ņa etan “mennin letok eo an ukweļo̧k.”2
Ilo ennaan kein jān katak ko an jān ke eaar erom̧ Būreejtōn eo an Kabun̄ in, Būreejtōn Monson ekar kōkpilōklōk kōj n̄an “mour kake pinmuur eo an bōtōktōkin Kraist bwe jen maron̄ bōk jeorļo̧k bōd in jerawiwi ko ad, bwe būruwōd ren maron̄ kwojarjar.”3
Kabwilōn̄lōn̄ eo an Jeorļo̧k bōd
“Kōj aolep jej kōm̧m̧ani kālet ko rebōd. Eļan̄n̄e jejjan̄in kar kajim̧we kain kālet kein, ij kōketak kom̧ bwe ewōr juon iaļ n̄an kajim̧we kālet kein. Wāween ro̧o̧ltok in jej ņaetan ukweļo̧k. Ij akweļap ippāmi n̄an kajim̧we bōd ko ami. Ad Rilo̧mo̧o̧r ekar mej n̄an lewaj im letok mennin letok in. Men̄e iaļ in ejjab pidodo, kallim̧ur ko rej m̧ool: ‘Men̄e bōd ko ami rej āinwōt būrōrō, renaaj mouj āinwōt sno’ [Aiseia 1:18]. ‘Im N̄a Irooj, ij jab bar keememej’ [K&K 58:42]. Jab likūt am̧ mour indeeo ilo kauwōtata. Eļan̄n̄e ewōr am̧ kar bōd, iien eo wōt im kōm̧m̧an oktak, iien eo wōt kwonaaj lo aenōm̧m̧an im m̧ōņōņō eo ej itok kōn kabwilōn̄lōn̄ eo an jeorļo̧k bōd.”4
Ro̧o̧ltok n̄an Iaļ eo
“Men̄e ej menin ekairir bwe jen kālet ilo jejjet, ewōr iien ko me jenaaj kālet kālet ko rebwebwe. Mennin letok in ukweļo̧k, kar letok jān Rilo̧mo̧o̧r eo ad, ej kōmaron̄ ad kajim̧we kālet ko ad, bwe jen maron̄ ro̧o̧lļo̧k n̄an iaļ eo enaaj tōl ļo̧k n̄an aiboojoj eo eutiejtata jej pukōte.”5
Iaļ eo n̄an Ro̧o̧ltok
“Eļan̄n̄e elōn̄ iami em̧ōj an kaanjoiktok jerawiwi ilo mour eo an, ij kallim̧uri kom̧ bwe ewōr juon iaļ n̄an ro̧o̧ltok. Wāween ro̧o̧ltok in jej ņaetan ukweļo̧k. Men̄e iaļ in epen, lo̧mo̧o̧r eo ami n̄an indeeo ej pedped wōt ioon. Ta eo emaron̄ in aorōkļo̧k jān ami kijejeto? Ij akweļap ippami bwe kom̧win jeke ippemi ijin im kiiō n̄an ami bōk bun̄tōn ko remenin aikuj n̄an lukkuun ukweļo̧k. An mōkaj ami kōm̧m̧an āindein, enaaj mōkaj ami maron̄ en̄jake aenōm̧m̧an im tōprak in Aiseia ej kōnono kake jān Aiseia [lale Aiseia 1:18].”6
Armej Remaron̄ Oktak
“Jej aikuj likūt ilo kōļmenļo̧kjeņ bwe armej remaron̄ oktak. Remaron̄ likūt itulikier iminene ko renana. Remaron̄ ukweļo̧k jān bōd ko. Remaron̄ kabwijer priesthood eo ilo wānōk. Im remaron̄ niknik jerbal n̄an Irooj.”7
Erom̧ Bar Erreeo
“Eļan̄n̄e ewōr jabdewōt men rebōd ilo mour eo am̧, ewōr juon iaļen diwōj jāni. Kabōjrak jabdewōt jab wānōk. Kōnono ippān bisop eo am̧. Ta jabdewōt jorrāān ko, remaron̄ jerbali jān ukwelo̧k eo ejejjet. Kwomaron̄ erom̧ erreeo bar juon alen.”8
Jerbal eo Eaorōk An Rilo̧mo̧o̧r eo
“Men eo eaorōk ilo karōk in [lo̧mo̧o̧r] eo ej ad Rilo̧mo̧or, Jisōs Kraist. Eļan̄n̄e en kar jab katok in Pinmuur in An, aolep ren kar jako. Ejjab bwe, ijoke, baj tōmak ilo E im mijen eo An. Jej aikuj in jerbal im ekkatak, kappukōt im jar, ukweļo̧k im kōkm̧anm̧anļo̧k kōj. Jej aikuj in jeļā kakien ko an Anij im mour kaki. Jej aikuj bōk kain̄i in lo̧mo̧o̧r ko An. Jān wōt ad kōm̧m̧an wāween in, jenaaj bōk m̧ōņōņō eo em̧ool.”9
© 2018 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo Kajin English: 6/17. Kōmālim an ukook: 6/17. Ukook eo an First Presidency Message, January 2018. Marshallese. 15045 874