Mensahe sang Unang Panguluhan, Enero 2018
Ang Dulot sang Paghinulsol
Ni Pangulong Thomas S. Monson
“Ang aton responsibilidad amo ang magbangon gikan sa pagka-ordinaryo pakadto sa ikasarang, gikan sa kapaslawan pakadto sa kadalag-an,” gintudlo ni Pangulong Monson. “Ang aton responsibilidad amo ang mangin pinakamanami naton nga kaugalingon. “Isa sa pinakadako nga dulot sang Dios sa aton amo ang kalipay nga mahimo kita magsugod liwat, kay wala sing kalutusan nga kinahanglan mangin permanente.”1
Masami naton ginaangot ang pag-abot sang bag-ong tuig sa mga pamat-od kag mga lalab-uton. Nagapamat-od kita nga magmangin mas maayo, magbag-o, magtinguha liwat. Ayhan ang pinakaimportante nga paagi nga sarang naton tinguhaan liwat amo ang pagbaton sang ginatawag ni Pangulong Monson nga “ang dulot sang paghinulsol.”2
Sa masunod nga mga piniling dinalan gikan sa iya mga panudlo sumugod sang sia nangin Pangulo sang Simbahan, si Pangulong Monson nagalaygay sa aton nga “gamiton ang nagapasag-uli nga dugo ni Cristo agud nga makabaton kita sang kapatawaran sang aton mga sala, kag ang aton mga tagipusuon mahimo nga mangin matinlo.”3
Ang Milagro sang Kapatawaran
“Tanan kita nakahimo sang sayop nga mga pagpili. Kon wala pa naton matadlong inang mga pagpili, ginapasalig ko kamo nga may paagi agud himuon ini. Ang proseso ginatawag nga paghinulsol. Ginapangabay ko kamo nga tadlungon ang inyo mga sayop. Ang aton Manluluwas napatay agud mahatag sa inyo kag sa akon inang bulahan nga dulot. Bisan pa nga ang dalan indi mahapos, ang promisa matuodtuod: ‘Bisan ang inyo mga sala subong sang escarlata, mangin maputi sila subong sang nieve’ [Isaias 1:18]. ‘Kag ako, nga Ginuo, wala na nagadumdom sang ila mga sala’ [D&C 58:42]. Indi pag-ibutang sa alang-alang ang inyo kabuhi nga wala’y katapusan. Kon kamo nakasala, mas madali ninyo nga masugdan ang tikang pabalik, mas madali man ninyo makita ang paghidaet kag kalipay nga nagaabot upod ang milagro sang pagpatawad.”4
Magbalik sa Banas
“Bisan pa nga importante nga magpili kita sing maayo, may mga tinion nga makahimo kita sang indi husto nga mga pagpili. Ang dulot sang paghinulsol, nga ginpatigayon sang Manluluwas, nagabulig sa aton sa pagtadlong sang aton direksyon sa kabuhi, agud nga mahimo kita makabalik sa banas nga magadala sa aton sa sinang selestiyal nga himaya nga aton ginahandum.”5
Ang Banas Pabalik
“Kon may isa sa inyo nga nadapa sa sining pagpanglakaton, ginapasalig ko kamo nga may yara sang alagyan pabalik. Ang proseso ginatawag nga paghinulsol. Bisan nga ang banas mabudlay, ang inyo kaluwasan sa wala’y katubtuban nasandig diri. Ano pa ang mas takos sa inyo mga pagtinguha? Ginapangabay ko kamo nga magpat-od karon mismo nga himuon ang kinahanglanon nga mga tikang agud maghinulsol sing lubos. Sa mas madali ninyo nga paghimo sini, mas madali man ninyo maaguman ang paghidaet kag kalinong kag pagpasalig nga ginhambal ni Isaias [tan-awa sa Isaias 1:18].”6
Ang mga Tawo Sarang Magbag-o
“Kinahanglan naton pamensaron nga ang tawo sarang magbag-o. Sarang nila bayaan ang ila indi maayo nga mga pagginawi. Sarang sila maghinulsol sang ila mga kalapasan. Sarang sila magkapot sang priesthood sing takos. Kag sarang sila mag-alagad sa Ginuo sing maukod.”7
Mangin Matinlo sa Liwat
“Kon may bisan ano man nga indi husto sa inyo kabuhi, may ara sang nakabukas sa inyo nga alagyan pagwa. Untati ang ano man nga di-matarong. Makighambal sa inyo obispo. Kon ano man ang problema, mahimo ini masolbar paagi sa husto nga paghinulsol. Sarang kamo nga mangin matinlo sa liwat.”8
Ang Importante nga Papel sang Manluluwas
“Importante gid sa plano [sang kaluwasan] amo ang aton Manluluwas, nga si Jesucristo. Kon wala ang Iya nagapasag-uli nga sakripisyo, ang tanan madula. Indi bastante, ugaling, ang magpati lang sa Iya kag Iya misyon. Kinahanglan naton mag-obra kag magtuon, magpangita kag magpangamuyo, maghinulsol kag mangin mas maayo. Kinahanglan naton mahibal-an ang mga layi sang Dios kag ipangabuhi ang mga ini. Kinahanglan naton nga mabaton ang Iya nagaluwas nga mga ordinansa. Sa paghimo lang gid sini nga maangkon naton ang matuodtuod, wala’y katapusan nga kalipayan.”9
© 2018 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/17 Petsa sang pagtugot sa paglubad: 6/17. Paglubad sang First Presidency Message, January 2018. Hiligaynon. 15045 861