Mensahe ti Umuna a Panguluen, Abril 2018
Kabayatan ti Panagtultuloytayo a Sangkamaysa
Ni Presidente Russell M. Nelson
Patpatgek a kakabsatko, napakumbabaak a makaduakayo iti daytoy a bigat. Uppat nga aldaw ti napalabas, impumpontayo ti maysa a naindaklan a tao, maysa a propeta ti Dios—ni Presidente Thomas S. Monson. Awan dagiti balikas a mangikalintegan iti kinawada ken kinangayed ti biagna. Agnanayonto nga ipategko ti panaggayyemmi nga addaan iti panagyaman kadagiti insurona kaniak. Ita nasken nga agtultuloytayo iti masanguanan nga addaan iti naan-anay a pammati ken ni Apotayo a Jesucristo, nga akinkukua iti daytoy a Simbaan.
Dua nga aldaw ti napalabas nagmimiting dagiti sibibiag nga Apostol iti akinngato a siled ti Salt Lake Temple. Idiay a napagnunumuanda wenno nagkaykaysa ti pangngeddengda, umuna, a mangulit a mangbukel iti Umuna a Panguluen itan ken, maikadua, a siak ti agserbi a kas Presidente ti Simbaan. Saan nga umdas dagiti balikas tapno ibagak kadakayo no ania ti rikna ti kaadda dagiti Kakabsatko a Lallaki—Kakabsat nga agig-iggem iti amin a tulbek ti priesthood a naisubli babaen ken ni Propeta Joseph Smith iti daytoy a dispensasion—a nangipatay kadagiti imada iti ulok a mangorden ken mang-set apart kaniak kas Presidente ti Simbaan. Maysa daytoy a nasagraduan ken napakumbaba a padas.
Kalpasanna nagbalin daytoy a pagrebbengak tapno maammuak ken maikeddengko a nasayaat no asino dagiti insagana ti Apo nga agbalin a mammagbagak. Kasano a kabaelak a pilien ti dua laeng kadagiti Sangapulo-ket-dua a dadduma pay nga Apostol, nga ay-ayatek unay ti tunggal maysa kadakuada? Agyamanak unay unay iti Apo iti panangsungbatna kadagiti napasnek a kararagko. Agyamanak unay iti kinatallugod da Presidente Dallin Harris Oaks ken Presidente Henry Bennion Eyring a makipagserbi kaniak kas Umuna ken Maikadua a Mammagbaga, iti dayta nga urnos. Nagsubli ni Presidente Dieter F. Uchtdorf iti lugarna iti Korum dagiti Sangapulo-ket-dua nga Apostol. Nakaawaten isuna kadagiti dadakkel a naituding nga aramiden a naidumduma a pakaikarianna.
Agyamanak kenkuana ken ni Presidente Eyring iti nangayed a serbisioda kas mammagbaga ken ni Presidente Monson. Naan-anay ti kabaelan, kinapasnek, ken kinaregtada. Agyamankami unay kadakuada. Natallugod ti tunggal maysa nga agserbi itan a pakasapulan unay kenkuana.
Kas Apostol a maikadua iti senioridad, agbalin met ni Presidente Oaks a Presidente ti Korum dagiti Sangapulo-ket-dua nga Apostol. Nupay kasta, naikkan iti takemna iti Umuna a Panguluen ken saan nga agbalbaliw iti urnos ti Simbaan, ni Presidente M. Russell Ballard, sumaruno iti senioridad, agserbinto kas Agak-akem a Presidente dayta a korum. Sangkamaysa a makipagtrabahonto ti Umuna a Panguluen kadagiti Sangapulo-ket-dua tapno mangammo ken mangikeddeng a nasayaat iti pagayatan ti Apo ken mangpadur-as iti sagrado nga aramidna.
Agyamankami kadagiti kararagyo. Nairuknoy dagitoy iti sangalubongan para kadatayo. Iti kabigatan kalpasan ti ipupusay ni Presidente Monson, nairuknoy ti maysa a kasta a kararag ti uppat ti tawenna nga agnagan iti Benson. Adawek dagiti balikas manipud iti surat ni nanangna iti asawak, a ni Wendy. Inkararag ni Benson, “Nailangitan nga Ama, agyamanak kenka gapu ta makita manen ni President Thomas S. Monson ti asawana. Agyamanak iti baro a propetami. Tulongam isuna nga agbalin a natured ken saan nga agbuteng a kabarbaro isuna. Tulongam isuna a dumakkel nga agbalin a nasalun-at ken napigsa. Tulongam isuna a maaddaan iti pannakabalin gapu ta adda kenkuana ti priesthood. Ken tulongannakami nga agbalin a nasingpet a kanayon.”
Agyamanak iti Dios kadagiti ubbing a kas iti daytoy ken kadagiti nagannak a napasnek maipapan iti panangkumitda iti nalinteg, pinanggep a panagbalin a nagannak—para iti tunggal nagannak, mannursuro, ken miembro a magibakbaklay kadagiti nadadagsen nga awit ngem agserserbida a sitatallugod unay. Iti sabali a balikas, para iti tunggal maysa kadakayo, sipapakumbaba nga agyamanak unay.
Ti Apo ti Mangiturong
Bayat ti panagtultuloytayo a sangkamaysa, awisenkayo a mangpanunot maipapan iti naindaklan a wagas a pangiturayan ti Apo iti Simbaanna. No pumusay ti maysa a Presidente ti Simbaan, awan ti misterio maipapan iti no asino ti sumaruno a maawagan nga agserbi iti dayta a saad. Awan ti panagbutos, awan ti panagkampania, no di laeng dagiti naulimek a panangitrabaho iti nadiosan a plano ti panagsukat [succession], nga inurnos ti Apo Mismo.
Tunggal aldaw a panagserbi ti maysa nga Apostol ket maysa nga aldaw a panagadal ken panagsagana para iti ad-adu pay a pagrebbengan iti masakbayan. Mapalabas ti adu a dekada a panagserbi ti maysa nga Apostol tapno mayakar manipud iti saad ti kina-junior a mapan iti saad ti kina-senior iti sirkulo. Kabayatan dayta a panawen, magun-odna ti umuna a padas iti tunggal paset ti aramid ti Simbaan. Makaam-ammona pay a nasayaat dagiti tattao ti daga, agraman dagiti pakasaritaan, kultura, pagsasaoda no mapan isuna iti naituding a pangibaonan kenkuana iti intero a lubong. Naidumduma daytoy a proseso ti panagsukat [succession] iti panangidaulo ti Simbaan. Awan ti ammok a sabali pay kas iti daytoy. Saan koma a mamagsiddaaw kadatayo dayta, gapu ta daytoy ti Simbaan ti Apo. Saan nga agtrabaho isuna kalpasan ti wagas dagiti tao.
Nakapagserbiak iti Korum dagiti Sangapulo-ket-dua babaen dagiti lima nga imun-una a Presidente ti Simbaan. Naimatangak ti tunggal Presidente nga umawat iti paltiing ken rumesponde iti dayta a paltiing. Kanayon nga addaan ti Apo ken kanayon nga iturong ken paregtaennanto dagiti propetana. Ti Apo ti mangiturong. Datayo a naordenan nga agpaneknek maipapan iti nasantuan a naganna iti intero a lubong ket ituloytayonto ti mangikagumaan a mangammo iti pagayatanna ket mangsurot iti daytoy.
Agtalinaedkayo iti Dalan ti Katulagan
Ita, ibagak iti tunggal miembro ti Simbaan, agtalinaed iti dalan ti katulagan. Ti panagkumityo a mangsurot iti Mangisalakan babaen ti panagaramid kadagiti katulagan Kenkuana ket kalpasanna ti panagtungpal kadagita a katulagan ket manglukatto iti dalan iti naespirituan a bendision ken pribilehio a sidadaan a magun-od dagiti lallaki, babbai, ken ubbing iti amin a lugar.
Kas maysa a baro a Panguluen, tarigagayanmi ti mangrugi nga addaan paggibusan iti panunotmi. Gapu iti daytoy, makisarsaritakami kadakayo ita manipud iti templo. Ti gibus a panangikarigatan ti tunggal maysa kadatayo ket maaddaan iti bileg iti balay ti Apo, mailantip kas pamilia, napudno kadagiti katulagan a naaramid iti templo a mangpaikari kadatayo para iti kaindaklanan a sagut ti Dios—dayta ti agnanayon a biag. Dagiti ordinansa ti templo ken dagiti katulagan nga aramidenyo idiay ket tulbek iti panangpangpigsa iti biagyo, iti panagasawa ken pamiliayo, iti kabaelanyo a mangparmek kadagiti panagdarup ti kabusor. Ti panagdaydayawyo iti templo ken ti panagserbiyo idiay para kadagiti kapuonanyo ket mangparaburto kadakayo iti ad-adu pay a personal a paltiing ken talna ken mangpatibkerto iti panangkumityo nga agtalinaed iti dalan ti katulagan.
Ita, no insardengyon ti nagna iti dalan, awisenkayo iti amin a namnama iti pusok nga agsublikayo koma. Ania man dagiti pakaseknanyo, ania man dagiti pannubokyo, adda lugar para kadakayo ditoy, ti Simbaan ti Apo. Mabendisionankayto ken dagiti di pay nayanak a kaputotanyo babaen kadagiti aramidyo itan nga agsubli iti dalan ti katulagan. Ipatpateg ti Amatayo iti Langit dagiti annakna, ken kayatna nga agawid Kenkuana ti tunggal maysa kadatayo. Daytoy ti dakkel a panggep a tun-oyen ti Ti Simbaan ni Jesucristo dagiti Santo iti Ud-udina nga Aldaw—a mangtulong iti tunggal maysa kadatayo nga agawid iti pagtaengan.
Ipeksak ti nalaus nga ayatko kadakayo—ayat a napatan-ay kadagiti adu a dekada a pannakipagkitak kadakayo, pannakipagdaydayaw kadakayo, ken panagserbi kadakayo. Ti nadiosan a bilin kadatayo ket mapan iti tunggal pagilian, kabagian, pagsasao, ken tattao, a tumultulong a mangisagana iti lubong para iti Maikadua a Yaay ti Apo. Aramidentayo daytoy nga addaan iti pammati ken ni Apo Jesucristo, iti panangammotayo nga isu ti akinbilin. Daytoy ti aramidna ken ti Simbaanna. Datayo dagiti annakna.
Ipakdaarko ti debosionko iti Dios nga Agnanayon nga Amatayo ken iti Anakna, ni Jesucristo. Am-ammok Ida, ay-ayatek Ida, ken ikarik a pagserbian Ida—ken dakayo—iti tunggal nabati pay nga anges ti biagko. Iti sagrado a nagan ni Jesucristo, amen.
© 2018 ti Intellectual Reserve, Inc. All rights reserved. Naimaldit iti EUA. Pannakaanamongna iti Ingles: 6/17. Pannakaanamongna a maipatarus: 6/17. Pannakaipatarus ti First Presidency Message, April 2018. Ilokano. 15048 864