Ol Givhan Prinsipol, Jun 2018

Faef Samting we Ol Man we Oli Save Lisingud Oli Stap Mekem

Taem yu tru blong stap lisin, bambae i helpem yu blong save olsem wanem blong help blong lukluk long ol nid long saed blong spirit mo long saed blong laef blong ol narawan, semmak olsem we Sevya bae i mekem.

Elda Jeffrey R. Holland blong Kworom blong Olgeta Twelef Aposol i talem se: “Maet, wanem i impoten moa bitim blong toktok, hem i blong lisin. … Sapos yumi lisin wetem lav, bae yumi no nid blong tingting tumas long wanem blong talem. Bambae i kam nomo long yumi—tru long Spirit.”¹

Blong stap lisin, hem i wan skil we yumi save lanem. Blong stap lisin, i soem lav we yumi gat long ol narawan, i help blong bildimap ol strong rilesensip, mo i stap invaetem Spirit blong blesem yumi wetem presen blong luksave samting blong helpem yumi blong andastanem ol nid blong ol narawan.² Hemia faef wei we yumi save kam gud moa long fasin blong stap lisin.

1.Givim Taem long Olgeta

Plante pipol oli nidim taem blong putum ol tingting blong olgeta i go tugeta bifo oli toktok. Givim taem long olgeta, bifo mo afta, we oli talem wan samting (luk long Jemes 1:19). Jes from se oli jes finis toktok, i no minim se oli talem evri samting we oli nidim blong talem. No fraet long ples we i kwaet, i no gat saon (luk long Job 2:11–3:1 mo Alma 18:14–16).

2.Lisingud wetem Tingting blong Yu

Yumi tingting i kwik moa bitim we ol narawan oli toktok. No folem temtesen ia blong mekemap tingting blong yu, o blong tingting i go fastaem long wanem we bae yu talem taem bae oli finis (luk long Ol Proveb 18:13). Be, lisin wetem tingting blong andastanem samting. Wanem bae yu mekem afta, bae i gud moa from se yu kasem moa save from yu andastanem samting i gud moa.

3.Mekem Samting I Klia Moa

No fraet blong askem kwestin blong mekem samting we yu no andastanem gud i kam klia moa (luk long Mak 9:32). Taem yu mekem samting i kam klia moa, i mekem se yu no save mestem tumas samting mo i soem se yu intres long wanem yu stap harem.

4.Tingting

Talem sot wanem yu bin harem mo hao yu andastanem wanem we narawan i filim. Hemia i helpem olgeta blong save se yu haremsave wanem oli talem mo i givim olgeta wan janis blong mekem samting i kam klia.

5. Agri long Samting we I Stap

Maet yu no agri wetem evri samting we hem i talem, be agri long wanem yu save agri long hem, mo talem stret ol filing we oli blong yuwan. Blong save agri i save help blong ronemaot wari mo fasin blong difendem yuwan (luk long Matiu 5:25).

Presiden Russel M. Nelson i bin tijim se yumi mas “lan blong lisin, mo lisin blong lanem samting long wanwan long yumi.”³ Taem yu stap lisin wetem tingting blong lanem samting abaot ol narawan, bambae yu stap long wan moa gud ples blong save andastanem nid blong olgeta, mo blong harem Spirit i toktok long ol wei we yu save kea long olgeta raon long yu olsem we Sevya bae i mekem.

Blong Stap Lisin Hem I blong Lavem Man

Wan stori blong Elda Holland i soemaot paoa ia blong stap lisin:

“Fren blong mi, Troy Russell i rives sloslo long trak blong hem, i kamaot long garaj. … Hem i filim se wil biaen i rol ova long wan samting. … Hem i kamaot mo faenem smol boe blong naen yia, blong hem, Austen, i slip, fes i go long simen blong rod blong trak. Austen i ded.

“Troy i no save slip, i no save faenem pis, man i no save toktok long hem. … Be long nogud taem ia, wan i kam … John Manning. …

“Mi no save hamas taem nao John mo junia kompanion blong hem i stap go visitim hom blong Russell famli. … Wanem we mi save i we, long las springtaem ia, Brata Manning i go luk Troy mo i karemaot hem long nogud aksiden ia blong rod ia, semmak olsem we bae hem mi karemaot Austen. Olsem brata long gospel we hem i mas stap, John i tekem wok ia nomo blong givim prishud kea mo lukaot long Troy Russell. Hem i stat, i talem: ‘Troy, Austen i wantem se yu stanap long leg blong yu bakegen—mo yu go long basketbol tu—mo bae mi stap ia evri moning long kwota pas faef. Yu rere. …’

Troy i bin talem afta: ‘Mi no bin wantem go, from oltaem mi bin stap tekem Austen i kam wetem mi. … Be John i strong, mekem se mi go. Stat long fas dei ia, mitufala i storian—o ating, mi nao mi toktok mo John i stap lisin. … Long fas taem, i bin had, be wetem taem, mi bin luksave se mi faenem paoa blong mi insaed long John Manning, we i bin lavem mi, mo i bin lisin long mi, kasem taem we san i girap bakegen insaed long laef blong mi.”⁴

© 2018 i kam long Intellectual Reserve, Inc. All rights reserved. Oli printim long YSA. Oli letem long Inglis lanwis: 6/17 Oli letem translesen: 6/17 Translesen blong Ministering Principles, June 2018. Bislama. 15055 852

Ol Not

1. Jeffrey R. Holland, “Witnesses unto Me,” Liahona, Julae 2001, 16.

2. Luk long David A. Bednar, insaed long “Panel Discussion” (wol lidasip trening miting, Nov 2010), broadcasts.lds.org.

3. Russell M. Nelson, “Listen to Learn,” Ensign, Mei 1991, 23.

4. Jeffrey R. Holland, “Emissaries to the Church,” Liahona, Nov 2016, 62, 67.

Givhan Olsem we Sevya I Mekem

Taem Jisas i aot long Jeriko, tufala blaen man i kam, i singaot long Hem, i talem: “!Masta! !Plis yu sore long mifala!. …

“Nao Jisas i stanap, i singaot tufala i kam long hem, nao i askem se: ‘?Yutufala i wantem blong mi mekem wanem long yutufala?’

Nao tufala i talem long hem se: ‘Masta, plis yu mekem ae blong mitufala i open.’

“Nao Jisas i sore long tufala, i putum han blong hem long ae blong tufala, nao wantem nomo, ae blong tufala i open, mo tufala i lukluk. Nao tufala i biaen long Jisas” (Matiu 20:30, 32–34).

?Wanem nao yumi save lanem aot long wei we Sevya i bin lisin?

Invitesen blong Tekem Aksen

Tingting long hao nao bae yu yusum olgeta prinsipol ia long wei we yu stap givhan. Askem olgeta we yu stap givhan long wanem nao oli nidim. Lisin long ansa blong olgeta, mo lisin long ol toktok blong Tabu Spirit. Tekem aksen folem wanem yu harem.

Olgeta prinsipol blong givhan oli stap blong helpem yumi blong lan blong kea long wanwan long yumi—i no blong serem olsem wan mesej nomo. Taem yumi kam blong save olsem wanem blong yumi givim seves, Tabu Spirit bae i pusum yumi blong save wanem mesej oli nidim blong harem antap long kea, lav mo sore we yumi givim long olgeta.