Mga Prinsipyo sang Pagtatap, Hunyo 2018

Lima ka mga Butang nga Ginahimo sang mga Maayo Magpamati

Ang pagpamati sing maayo makabulig sa inyo nga mahibaloan kon paano sabton ang espiritwal kag temporal nga mga panginahanglan sang iban pareho sang Manluluwas.

Si Elder Jeffrey R. Holland sang Korum sang Dose ka mga Apostoles nagsiling: “Ayhan labaw kaimportante sangsa paghambal amo ang pagpamati. … Kon magpamati kita nga may gugma, indi na kita kinahanglan magpalibog pa kon ano ang ihambal. Ihatag ini sa aton—paagi sa Espiritu.”¹

Ang pagpamati isa ka abilidad nga sarang naton matun-an. Ang pagpamati nagapakita sang aton gugma sa iban, nagabulig sa pagpatubo sang mabakod nga mga kaangtanan, kag nagaagda sa Espiritu nga bugayan kita sang regalo sang paghangop agud mabuligan kita nga maintiendihan ang mga panginahanglan sang iban.² Ari ang lima ka mga paagi nga mangin mas maayo kita magpamati.

1.Hatagi Sila sang Tiempo

Madamo nga mga tawo ang nagakinahanglan sang tiempo agud matipon ang ila mga panghunahuna antes makahambal. Hatagi sila sang tiempo nga magpanumdum antes kag pagkatapos nila hambal (tan-awa sa Santiago 1:19). Bangod kay tapos na sila hambal wala nagakahulugan nga nahambal na nila ang tanan nga kinahanglan nila ihambal. Indi mahadlok sa kahipos (tan-awa sa Job 2:11–3:1 kag Alma 18:14-16).

2.Magtutok sa pagpamati

Mas madasig kita manumdum sangsa maghambal ang iban. Batui ang huyog nga maghaumhaum ukon magpanumdum na ngadaan sang inyo isabat pagkatapos nila hambal (tan-awa sa Mga Hulubaton 18:13). Sa baylo, magpamati nga may tuyo sa paghangop. Ang inyo sabat mangin mas maayo tungod kay maupdan ini sang mas daku nga paghangop.

3.Magpangayo sang Kasanagan

Indi mahadlok magpamangkot agud maklaro ang isa ka butang nga wala ninyo nahangpan (tan-awa sa Marcos 9:32). Ang pagpangayo sang kasanagan nagabuhin sang di-paghangpanay kag nagapakita sang inyo interes sa kon ano ang ginahambal.

4.Magbinagbinag

Ihambal sa lain nga pulong ang inyo nabatian kag kon ano sa inyo paghangop ang nabatyagan sang isa. Nagabulig ini sa ila nga mahibaloan kon bala nahangpan sila kag nagahatag sa ila sang oportunidad sa pagklaro.

5.Magpangita sang Magkaanggid nga Tinindogan

Mahimo nga indi kamo magkumporme sa tanan nga ginhambal, pero mag-ugyon sa kon ano ang pwede ninyo ugyonan nga wala ginahimutig ang inyo kaugalingon nga mga ginabatyag. Ang pagkamainabyanon makabulig pahaganhagan sang kahangawa kag kadiskompiyado (tan-awa sa Mateo 5:25).

Si Pangulong Russell M. Nelson nagpanudlo nga dapat kita “magtuon sa pagpamati, kag magpamati agud makatuon gikan sa isa kag isa.”³ Sa inyo pagpamati nga may katuyuan sa pagtuon parte sa iban, mangin yara kamo sa mas maayo nga sitwasyon agud mahangpan ang ila mga panginahanglan kag mabatian ang mga pagpabatyag kon paano ninyo tatapon ang mga yara sa inyo palibot pareho sa himuon sang Manluluwas.

Ang Pagpamati Pagpalangga

Ang isa ka istorya halin kay Elder Holland nagapakita sang gahum sang pagpamati:

“Mahinay nga ginpagwa sang abyan ko nga si Troy Russell ang iya pickup halin sa iya garahe. … Nabatyagan niya nga may naligsa ang ruweda niya sa likod. Nanaog siya agud lamang masapwan ang iya siyam katuig nga bata nga lalaki nga si Austen, nga nagahapa sa semento. … Si Austen napatay.

“Indi makatulog, kag wala sang kalinong, si Troy indi maoloolohan. … Apang sa sinang tuman kasakit nga tion nag-abot si … John Manning. …

“Sa prangka lang, wala ako nakahibalo kon kada san-o si John kag ang iya kaupod nagabisita sa puluy-an sang mga Russell. … Ang nahibal-an ko amo nga sang nagligad nga tigpamulak (spring) si Brother Manning nagdab-ot kag nagpabangon kay Troy Russell halin sa trahedya sinang driveway pareho nga sia ang nag-alsa mismo sa bata nga si Austen. Pareho sa … utod sa ebanghelyo nga dapat sia mangin, si John naghatag gid lang sang priesthood nga pag-atipan kag pagbantay kay Troy Russell. Ginsugdan niya sa pagsiling, ‘Troy, luyag ni Austen nga magsugod ka liwat—lakip na sa basketbolan—gani makadto ako diri kada alas 5:15 sang aga. Maghanda ka. …’

“‘Indi ko tani gusto maglakat,’ siling ni Troy sa akon sang ulihi, ‘bangud pirme ko ginaupod sadto si Austen. … Apang nagpamilit si John, gani nag-upod ako. Sumugod sa una nga adlaw, nag-istoryahanay kami—ukon ako ang nag-istorya kag si John nagpamati. … Sang primero mabudlay, pero sa pagligad sang panahon namarasmasan ko nga may kusog na ako liwat paagi kay [John Manning], nga nagpalangga sa akon kag nagpamati sa akon tubtob nga sang ulihi, ang adlaw nagbutlak liwat sa akon kabuhi.’”⁴

© 2018 iya sang Intellectual Reserve, Inc. All rights reserved. Ginbalhag sa Pilipinas. Pagtugot sa Ingles: 6/17 Petsa sang pagtugot sa paglubad: 6/17. Paglubad sang Ministering Principles, June 2018. Hiligaynon. 15055 861