Dagiti Pagbatayan iti Ministering, Hunio 2018
Lima a Banag nga Aramiden dagiti Nasayaat a Dumdumngeg
Pudno a ti panagdengngeg ti mangtulongto kenka a mangammo no kasano a matulongan a maipaay dagiti naespirituan ken temporal a kasapulan dagiti dadduma iti wagas ti Mangisalakan.
Kinuna ni Elder Jeffrey R. Holland ti Korum dagiti Sangapulo-ket-dua nga Apostol: “Nalabit napatpateg pay ti panagdengngeg ngem iti panagsarita. … No dumngegtayo nga addaan iti ayat, saan a nasken a masdaawtayo no ania ti isaotayo. Maitedto daytoy kadatayo—babaen ti Espiritu.”1
Ti panagdengngeg ket maysa a paglaingan a masursurotayo. Ti panagdengngeg ket mangipakita iti ayattayo para kadagiti dadduma, mangtulong iti panangpadur-as kadagiti napigsa a relasion, ken mangawis iti Espiritu a mangbendision kadatayo iti sagut ti panagrikna [discernment] a makatulong kadatayo tapno maawatantayo dagiti kasapulan dagiti dadduma.2 Dagitoy ti lima a wagas a mapasayaattayo no kasano a dumngegtayo.
1.Ikkam Ida iti Oras
Adu a tao ti agkasapulan iti oras a mangurnong kadagiti kapanunotanda sakbay ti panagsaoda. Mangted kadakuada iti oras nga agpanunot sakbay ken kalpasan ti panangisaoda iti maysa a banag (kitaen iti Santiago 1:19). Gapu laeng ta nalpasdan iti panagsarita saan a kayat a sawen a naisaodan ti amin a banag a nasken nga isaritada. Saanka nga agbuteng no naulimekda (kitaen iti Job 2:11–3:1 ken Alma 18:14–16).
2.Mangikasoka.
Al-alistotayo nga agpanunot ngem iti panagsao dagiti dadduma. Pagkedkedam ti sulisog nga agdardaras iti panangileppas wenno agpanunotka a nasapsapa iti no ania ti isaomto no nalpasdan (kitaen iti Dagiti Proverbio 18:13). Ngem ketdi, dumngegka nga addaan iti panggep a makaawat. Nasaysayaatto ti sungbatmo gapu ta maipakaammonto babaen ti dakdakkel a pannakaawat.
3.Mangilawlawag
Saanka nga agamak nga agdamag kadagiti saludsod a mangilawlawag iti maysa a banag a saanmo a naawatan (kitaen iti Marcos 9:32). Ti panangilawlawag ket mangpabassit iti saan a panagkikinnaawatan ken mangipakita iti panagessemmo iti no ania ti maisasao.
4.Mangutob
Adawem no ania dagiti balikas a nangngegam ken no kasano a maawatam ti rikna ti sabali. Daytoy ti mangtulong kadakuada a mangammo no naawatan ida ken ikkam ida iti gundaway a mangilawlawag.
5.Mangsapul iti Gagangay a Gapu
Mabalin a saanka nga umanamong iti amin a banag a naisao, ngem umanamongka iti no ania ti kabaelam a saanmo nga iliblibak ti bukodmo a rikna. Ti pananganamong ket makatulong kenka a mangikkat iti panagdanag ken panagbalin a defensibo (kitaen iti Mateo 5:25).
Insuro ni Presidente Russell M. Nelson a nasken “masursurotayo ti dumngeg, ken dumngeg tapno makasursuro manipud iti tunggal maysa.”3 Bayat ti idedengngegyo nga addaan iti panggep ti panagsursuro maipapan iti dadduma, addakanto iti nasaysayaat a posision a makaawat kadagiti kasapulanda ken dumngeg kadagiti parikna maipapan no kasano maaywanam dagiti iti adda iti aglawlawmo iti wagas ti Mangisalakan.
Ti Panagdengngeg Ket Panagayat
Maysa nga estoria manipud ken ni Elder Holland ti mangilawlawag ti bileg ti panagdengngeg:
“Nainnayad nga inruar ti gayyemko a ni Troy Russell ti pickup a trakna manipud iti garahena. … Nariknana nga adda nalidlidan ti akinlikud a ligayna. … Rimmuar iti lugan tapno laeng makitana ti napateg agtawen iti siam nga anakna, ni Austen, a nakapakleb rabaw iti pavement. … Natay ni Austen.
“Saan a makaturog, saan a makasarak iti talna, saan a maliwliwaan ni Troy. … Ngem kabayatan dayta nga oras ti nakaro a panagsagaba ket immay ni… John Manning. …
“Sipaprangka a diak ammo no ania ti iskediul ti panagbisita ni John ken ti junior kompanionna iti pagtaengan ti pamilia Russel. … Ngem ammok nga iti napalabas a panagsusulbod binangon ni Brother Manning ni Troy Russell manipud iti trahedia iti dayta a garahe a kas iti panangbangonna mismo iti ubing a ni Austen. Kas iti … kabsat a lalaki iti ebanghelio a nasken a pagbalinanna, inako laeng ni John ti panangaywan kas priesthood ken panangasikaso ken ni Troy. Rinugianna babaen ti panagkunana, ‘Troy, kayat ni Austen nga agtultuloyka nga agbiag—agraman ti panagay-ayam iti basketbol—isu nga addaakto ditoy iti tunggal bigat iti 5:15 a.m. Agsaganaka. …’
“‘Diak kinayat ti napan,’ imbaga kaniak ni Troy idi agangay, ‘gapu ta kanayon idi nga ikuyogko ni Austen. … Ngem managpilit ni John, isu a napanak. Manipud iti dayta umuna nga aldaw, nagsaritakami—wenno ketdi nagsaritaak ket dimngeg ni John. … Idi damo narigat daytoy, ngem iti panaglabas ti panawen naamirisko a nasarakak ti pigsak iti kinatao ni [John Manning], a nangipateg kaniak ken dimngeg kaniak agingga a nasarakak manen ti rag-o iti biagko iti kamaudiananna.’”4
© 2018 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/17. Pannakaanamongna a maipatarus: 6/17. Pannakaipatarus ti Ministering Principles, June 2018. Ilokano. 15055 864