ຫລັກທຳຂອງການປະຕິບັດສາດສະໜາກິດ, ເດືອນມິຖຸນາ 2018
ຫ້າຢ່າງທີ່ຜູ້ຮັບຟັງທີ່ດີໄດ້ເຮັດ
ການຮັບຟັງທີ່ແທ້ຈິງ ຈະຊ່ວຍທ່ານໃຫ້ຮູ້ເຖິງວິທີທີ່ຈະຊ່ວຍສະໜອງຄວາມຕ້ອງການທາງວິນຍານ ແລະ ທາງໂລກຂອງຄົນອື່ນ ດັ່ງທີ່ພຣະຜູ້ຊ່ວຍໃຫ້ລອດຈະກະທຳ.
ແອວເດີ ແຈັບຟະຣີ ອາ ຮໍແລນ ແຫ່ງກຸ່ມອັກຄະສາວົກສິບສອງ ໄດ້ກ່າວວ່າ: “ບາງທີ ສິ່ງທີ່ສຳຄັນກວ່າການເວົ້າ ແມ່ນການຮັບຟັງ. … ຖ້າຫາກເຮົາຮັບຟັງດ້ວຍຄວາມຮັກ, ເຮົາບໍ່ຈຳເປັນຕ້ອງຄິດວ່າ ຕ້ອງເວົ້າສິ່ງໃດ. ຖ້ອຍຄຳຈະຖືກມອບໃຫ້ແກ່ເຮົາ—ໂດຍພຣະວິນຍານ.”1
ການຮັບຟັງເປັນຄວາມຊຳນານຢ່າງໜຶ່ງ ທີ່ເຮົາສາມາດຮຽນຮູ້. ການຮັບຟັງສະແດງເຖິງຄວາມຮັກຂອງເຮົາທີ່ມີຕໍ່ຄົນອື່ນ, ຊ່ວຍສ້າງຄວາມສຳພັນທີ່ເຂັ້ມແຂງ, ແລະ ເຊື້ອເຊີນພຣະວິນຍານໃຫ້ມາອວຍພອນເຮົາ ດ້ວຍຂອງປະທານແຫ່ງການສາມາດຫລິງເຫັນ ເພື່ອຊ່ວຍເຮົາໃຫ້ເຂົ້າໃຈຄົນອື່ນ.2 ຕໍ່ໄປນີ້ແມ່ນຫ້າວິທີທີ່ເຮົາສາມາດພັດທະນາວິທີທີ່ຈະຮັບຟັງ.
1.ໃຫ້ເວລາເຂົາເຈົ້າ
ຫລາຍຄົນຕ້ອງການເວລາທີ່ຈະຄິດ ກ່ອນເວົ້າອອກມາ. ໃຫ້ເວລາເຂົາເຈົ້າ ທີ່ຈະຄິດກ່ອນ ແລະ ຫລັງຈາກເຂົາເຈົ້າໄດ້ເວົ້າບາງສິ່ງ (ເບິ່ງ ຢາໂກໂບ 1:19). ບໍ່ແມ່ນວ່າ ເພາະເຂົາເຈົ້າໄດ້ເວົ້າສຸດແລ້ວ ກໍໝາຍຄວາມວ່າ ເຂົາເຈົ້າໄດ້ເວົ້າທຸກສິ່ງ ທີ່ເຂົາເຈົ້າຢາກເວົ້າ. ຢ່າຢ້ານທີ່ຈະມິດງຽບຢູ່ (ເບິ່ງ ໂຢບ 2:11–3:1 ແລະ ແອວມາ 18:14–16).
2. ຕັ້ງໃຈຟັງ
ເຮົາຄິດໄວກວ່າຄົນອື່ນເວົ້າ. ພະຍາຍາມຢ່າເວົ້າສະຫລຸບ ຫລື ຄິດລ່ວງໜ້າ ວ່າທ່ານຈະເວົ້າຫຍັງ ເມື່ອເຂົາເຈົ້າເວົ້າສຸດແລ້ວ (ເບິ່ງ ສຸພາສິດ 18:13). ແຕ່ໃຫ້ຮັບຟັງຢ່າງຕັ້ງໃຈ ເພື່ອຈະໄດ້ເຂົ້າໃຈ. ຄຳຕອບຂອງທ່ານຈະດີກວ່າ ເພາະທ່ານຈະເຂົ້າໃຈຫລາຍກວ່າ.
3. ເຮັດໃຫ້ແຈ່ມແຈ້ງ
ຢ່າຢ້ານທີ່ຈະຖາມຄຳຖາມ ເພື່ອເຮັດໃຫ້ບາງສິ່ງທີ່ທ່ານບໍ່ເຂົ້າໃຈ ແຈ່ມແຈ້ງຂຶ້ນ (ເບິ່ງ ມາຣະໂກ 9:32). ການເຮັດໃຫ້ແຈ່ມແຈ້ງ ເປັນການລົດຄວາມບໍ່ເຂົ້າໃຈ ແລະ ສະແດງໃຫ້ເຫັນວ່າ ທ່ານສົນໃຈໃນສິ່ງທີ່ເຂົາເຈົ້າໄດ້ກ່າວໄປນັ້ນ.
4. ໄຕ່ຕອງ
ໃຫ້ຖອດຄວາມສິ່ງທີ່ທ່ານໄດ້ຍິນ ແລະ ທ່ານເຂົ້າໃຈຄວາມຮູ້ສຶກຂອງຄົນອື່ນແນວໃດ. ສິ່ງນີ້ຈະຊ່ວຍທ່ານໃຫ້ຮູ້ ຖ້າຫາກວ່າທ່ານໄດ້ເຂົ້າໃຈຫລືບໍ່ ແລະ ໃຫ້ໂອກາດເຂົາເຈົ້າອະທິບາຍໃຫ້ແຈ່ມແຈ້ງ.
5. ຊອກຫາສິ່ງທີ່ມັກຊອບຄືກັນ
ທ່ານອາດບໍ່ເຫັນດ້ວຍກັບທຸກສິ່ງທີ່ທ່ານໄດ້ຍິນ, ແຕ່ທ່ານສາມາດເຫັນດ້ວຍກັບບາງສິ່ງ ໂດຍທີ່ບໍ່ບອກເຖິງຄວາມຮູ້ສຶກຂອງທ່ານ. ການເຫັນດ້ວຍສາມາດຊ່ວຍລົດຄວາມກັງວົນ ແລະ ທ່າທີປ້ອງກັນຕົວ (ເບິ່ງ ມັດທາຍ 5:25).
ປະທານ ຣະໂຊ ເອັມ ແນວສັນ ໄດ້ສອນວ່າ ເຮົາຄວນ “ຮຽນທີ່ຈະຮັບຟັງ, ແລະ ຮັບຟັງເພື່ອຮຽນຮູ້ຈາກກັນແລະກັນ.”3 ເມື່ອທ່ານຮັບຟັງຢ່າງຕັ້ງໃຈ ເພື່ອຮຽນຮູ້ກ່ຽວກັບຄົນອື່ນ, ທ່ານຈະມີຄວາມເຂົ້າໃຈຫລາຍຂຶ້ນ ເຖິງຄວາມຕ້ອງການຂອງເຂົາເຈົ້າ ແລະ ໄດ້ຍິນການກະຕຸ້ນກ່ຽວກັບວິທີທີ່ທ່ານສາມາດເປັນຫ່ວງເປັນໃຍຕໍ່ຄົນອື່ນ ທີ່ຢູ່ອ້ອມຮອບທ່ານ ດັ່ງທີ່ພຣະຜູ້ຊ່ວຍໃຫ້ລອດຈະກະທຳ.
ການຮັບຟັງຄືຄວາມຮັກ
ເລື່ອງເລົ່າຈາກແອວເດີ ຮໍແລນ ສະແດງໃຫ້ເຫັນເຖິງພະລັງແຫ່ງການຮັບຟັງ ດັ່ງນີ້:
“ເພື່ອນຂອງຂ້າພະເຈົ້າຊື່ ທະໂຣຍ ຣະໂຊ ໄດ້ຖອຍລົດກະບະອອກຈາກກະລ້າລົດ ຢ່າງຊ້າໆ. … ລາວຮູ້ສຶກວ່າ ລໍ້ລົດຂ້າງຫລັງ ຢຽບສິ່ງໃດສິ່ງໜຶ່ງ. … ລາວຈຶ່ງໄດ້ອອກໄປເບິ່ງ ແລະ ເຫັນວ່າລາວໄດ້ຢຽບທ້າວ ອໍສະເຕັນ, ລູກຊາຍ ອາຍຸເກົ້າປີ ຂອງລາວເອງ ຊຶ່ງນອນຂວ້ຳໜ້າຢູ່. … ທ້າວອໍສະເຕັນ ໄດ້ຈາກໄປແລ້ວ.
“ໂດຍທີ່ບໍ່ສາມາດຫລັບນອນ, ບໍ່ສາມາດສະຫງົບໃຈໄດ້, ທ້າວທະໂຣຍ ຈຶ່ງມີຄວາມໂສກເສົ້າຫລາຍທີ່ສຸດ. … ແຕ່ໃນຂະນະທີ່ກຳລັງຈົມຢູ່ກັບຄວາມໂສກເສົ້າອັນໜັກໜ່ວງນັ້ນ … ຈອນ ແມນນິງ ໄດ້ມາຫາລາວ. …
“ຕາມຄວາມຈິງແລ້ວ ຂ້າພະເຈົ້າບໍ່ຮູ້ວ່າ ຈອນ ກັບຄູ່ສອນໜຸ່ມຂອງລາວໄດ້ໄປຢ້ຽມຢາມຄອບຄົວ ຣະໂຊ ຕອນໃດ. … ຂ້າພະເຈົ້າຮູ້ພຽງແຕ່ ໃນລະດູໃບໄມ້ປົ່ງຜ່ານມານີ້ ບຣາເດີ ແມນນິງ ໄດ້ເອື້ອມລົງໄປດຶງທ້າວທະໂຣຍ ຣະໂຊ ຂຶ້ນມາຈາກ ຫລຸມເລິກແຫ່ງຄວາມໂສກເສົ້າ ເນື່ອງດ້ວຍອຸບັດເຫດເທື່ອນັ້ນ ຄືກັບວ່າ ລາວໄດ້ອູ້ມເອົາທ້າວນ້ອຍ ອໍສະເຕັນ ຂຶ້ນມາດ້ວຍຕົວລາວເອງ. ໃນການເປັນ … ອ້າຍນ້ອງໃນພຣະກິດຕິຄຸນ ດັ່ງທີ່ລາວຄວນເປັນ, ຈອນໄດ້ຮັບເອົາ ການເອົາໃຈໃສ່ດູແລທ້າວທະໂຣຍ ຣະໂຊ ຕາມຖານະປະໂລຫິດຂອງລາວ. ລາວໄດ້ເລີ່ມຕົ້ນໂດຍການເວົ້າວ່າ, ‘ທະໂຣຍ, ທ້າວອໍສະເຕັນ ຢາກໃຫ້ເຈົ້າດຳເນີນໄປໜ້າ—ຮ່ວມທັງການຫລິ້ນບານບ້ວງ—ສະນັ້ນ ຂ້ອຍຊິມາຫາເຈົ້າທຸກເຊົ້າ ປະມານ 5 ໂມງ 15 ນາທີ. ໃຫ້ເຈົ້າຕຽມພ້ອມເດີ. …’
“‘ຂ້ານ້ອຍບໍ່ຢາກໄປ,’ ຕໍ່ມາທ້າວທະໂຣຍ ໄດ້ບອກຂ້າພະເຈົ້າ, ‘ເພາະຂ້ານ້ອຍໄດ້ພາທ້າວອໍສະເຕັນ ໄປກັບຂ້ານ້ອຍເລື້ອຍໆ. … ແຕ່ຈອນ ໄດ້ຊວນແລ້ວຊວນອີກ, ຂ້ານ້ອຍກໍເລີຍໄປ. ນັບແຕ່ເວລານັ້ນມາ, ພວກເຮົາໄດ້ເວົ້າລົມກັນ—ຫລື ມີແຕ່ຂ້ານ້ອຍເວົ້າຄົນດຽວ ແລະ ຈອນ ເປັນຜູ້ຟັງ. … ຕອນທຳອິດກໍຍາກຫລາຍ, ແຕ່ເມື່ອເວລາຜ່ານໄປ ຂ້ານ້ອຍຮັບຮູ້ວ່າ ຂ້ານ້ອຍໄດ້ມີຄວາມເຂັ້ມແຂງຂຶ້ນ ດ້ວຍຄວາມຊ່ວຍເຫລືອຂອງ [ຈອນ ແມນນິງ], ຜູ້ຮັກຂ້ານ້ອຍ ແລະ ຮັບຟັງຂ້ານ້ອຍ ຈົນວ່າຂ້ານ້ອຍຢາກມີຊີວິດຢູ່ຕໍ່ໄປ.’”4
© 2018 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/17. ການແປໄດ້ຮັບອະນຸຍາດ: 6/17. ແປຈາກ Ministering Principles, June 2018. Laotian. 15055 331