Yalen e Machib, June 2018

Laal e Pin’en Nima Rrin’ e Pi’in nima Motoyil nib Fal’ Rogon

Motoyil nib fal’ rogon e ra ayuwegnem ni ngam nang rogon ni ngam ayuweg e gidii’ ni rogon ni ra rrin’ fare Tathapeg.

Elder Jeffrey R. Holland ko fare Ulung ko fare Ragag nge L’agruwi Apostle e ga’ar: “Sana n’en nib ga’fan ko non e motoyil. … Fa’anra gadaed ra motoyil u fithik e tu’ufeg, ma dani tu’uf ni ngad leam niged ko mang e ngad yoeged. Ra pi’ fare Kan ni Thothup—ngodaed.”¹

Motoyil e ban’en e rayag ni ngad filed. Motoyil e ma dag e tu’ufeg rodaed ngak e gidii’, me gel nag e tha’, me pining fare Kan ni Thothup ni nge yibliy daed ko fare tawa’ath ni ngad nanged fan e tin nib tu’uf ko gidii’.² Ba’aray laal i kanawo’en ni rayag ni nge mangil nag rogon ni gadaed be motoyil.

1. Mpag Raed ngar Noned

Oren e gidii’ e ba tu’uf ni ngar leam niged ko mang e ngar yoeged u m’on ni ngar noned. Mpag raed ngar leam gaed u m’on nge tomuren ni kar mu’ gaed i yoeg ban’en (muguy ko James 1:19). Yad ra mu’ ko non ma dawori mu’ gaed ko yoeg gubin e n’en nib tu’uf ni ngar yoeged. Dam rus ni dariy bee’ nibe non (muguy ko Job 2:11–3:1 nge Alma 18:14–16).

2. Tiyan’um Ngay

Gadaed ma leam nib paey ko gidii’ nibe non. Gel nigem ni dam tha’eb e thin fa mu leam nga m’on ko mang e ngam mog napan ni kar mu’ gaed (muguy ko Proverbs 18:13). Machane, mu motoyil ni ri ga ba adag ni ngam nang fan. Thin rom e ra mangil ni bachane ri gara nang fan nib fal’ rogon.

3. Tamilang nag

Dam rus ni ngam fith e duwer ni ngam nang fan ban’en ni damur nang fan (muguy ko Mark 9:32). Duwer e ran nang fan ban’en me dag ni ga ba adag e n’en ni yibe weliy.

4. Tafney nag

Moeg e n’en ni kam rung’ag nge rogon ni gabe nang fan ko rogon nibe thamiy facha’. Biney e ra ayuweg raed ni ngar nanged fa’anra kan nang fan raed me pi’ e wo’en raed ni ngar tamilang niged.

5. Gay e n’en nib Mangil Riy

Rayag ni dabum gubin e n’en ni yibe yoeg, machane mu adag e n’en ni rayag rom ni dam kireb nag rogon e mithmith rom. Ram adag ma rayag ni nge ayuw ni dabin togpluw ma dabin chachalbey (muguy ko Matthew 5:25).

President Russell M. Nelson e fil ni thingar da “filed ni ngad motoyil gaed, man motoyil ni ngan fil ban’en rok bee’.”³ Nap’an ni gara motoyil ni gaba adag ni ngam fil mornga’agen boech e gidii’, ma gara nang fan e n’en nib tu’uf roraed mag rung’ag e n’en ni mornga’agen rogon ni rayag ni ngam tu’ufeg e pi’in nib liyeg nem ni rogon ni ra rrin’ fare Tathapeg.

Motoyil E Tu’ufeg

Mornga’agen Elder Holland nibe weliy gelngin e motoyil:

“Troy Russell ni fagar rog e yib u lane pik’ap rok nib sag’al nge chuw u lane garaz rok. … Ke thamiy e bin tomur e taya rok ni yan nga dakean e bump. … I og nga but me guy Austen, ni faak nib mereb e duw rok, nibay nib palpal u dakean e kanawo’. … Ke yim’ Austen.

“Dakir yag ni nge mol, daryag ni nge pir’eg e gapas, ma kari kirbaen’ Troy. … Machane fithik e ngiyal’ nem nib momaw’ me yib … John Manning. …

“Danug nang e ngiyal’ nike yib John nge cha’an ni yow nga tabinaew rok Russell. … N’en ni gu manang e bin tomur e spring me yib Brother Manning nge fek Troy Russell nge chuw ko ginem nib momaw’ ni boed nibe feek Austen riy. Boed … fare pumo’on u lane gospel, John e murwel ko fare priesthood me ayuweg Troy Russell. Tabab i ga’ar, “Troy, ba adag Austen ni ngam sak’iy nib mu’un e gin ni yima baat riy ere bay gub ngaray ni gubin e kadbul ko 5:15. Gara fal’eg rogom. …’

“‘Dabug ni nggu un,’ i yog Troy ngog ko ta’aboch riy, ‘ya gubin ngiyal’ ma guma feek Austen nge un ngog. … Machane be towasar John, ere mug un. Yan somm’on ni ku sul, mu gomow non fa gag e gu non me John e be motoyil. … Yan somm’on e ba momaw’, machane boech nga m’on mug nang ni kug pir’eg gelngig rok [John Manning], ni tu’ufeg nem me motoyil ngog nge taw ko ngiyal’ nike yib biyay e yal’ nga lane yafos rog.’”⁴

© 2018 rok Intellectual Reserve, Inc. Gubin mabay matwon. Kan yoloey u Mariken. Kan micheg nag ko thin nu Ngalis: 6/17. Micheg nag i pilyeg: 6/17. Pilyeg e thin ko Ministering Principles, June 2018. Yapese. 15055 905