Ekkewe Nongonongen Lamwiri, July 2018

Anisi Ekkoch non Umoumoch

Nupwen ouwa aponueta an ewe Chon Amanau pisekin appiru ren umoumoch, oupwe kuna pwe ouwa tongeni fori ew ekesiwin non manauen ekkoch.

Umoumoch a wor an kuna osukosuken ekkoch pwan fiti ewe mochen ne appanano ika angasano. Ew pwon ne tapweno mwirin ewe Chon Amanau ina ew pwonen tong ne “mwarei fengeni an emon me emon chou” (Mosaia 18:8). Ew akkuno pwe sipwe tumunu ekkoch ina ew tufich ach sipwe anisi ekkoch ussun met ewe Samon epwe for: ren “umoumoch ngeni ir ekkewe ra tipemwaramwar” (Jude 1:22). Ewe Samon a annuku pwe, “Oupwe umoumoch me kirokiroch fengen nefinemi” (Zechariah 7:9).

Ewe Umoumoch an ewe Chon Amanau

Umoumoch ina ew popunapen mettoch non ewe angang an ewe Chon Amanau (nengeni: “Emon Chon Amanau mi uren Umoumoch”). An umoumoch ngeni noun aramas a efisata an epwe anisi ekkewe ra nom arun fan chommong. Nenengenochu mochenin me osupwangen aramas, I epwe tongeni efeiochur me aitir non ekkewe an ra kon auchea ngenir. An ewe Chon Amanau mochen pwe epwe uweikicheta seni ach riaffou a emwen ngeni ewe amuchunon foforun umoumoch: An ewe Angangen Achesefan fan iten ekkewe tipis me riaffou an aramas.

Kaukun an epwe ponueni ekkewe mochen an kewe aramas ina ew mettoch sia tongeni achocho ngeni nupwen sia fori angangen aninis. Nupwen sia manaueni manauen pung me rongorong ngeni mongungun ewe Ngun mi Fel, sipwe mwasangasangen ach sipwe anisi ekkoch non napanap mi weweoch.

Ach Pwonen Umoumoch

Samach won Nang a mochen Noun kewe repwe aninisoch fengen (nengeni 1 Corinth 12:25–27). Ren ach sipwe winiti ennetin chon tapweno mwirin, sipwe forata me pwarano tong ngeni ekkoch, akaewin ngeni ekkana mi osupwang (D&C 52:40).

Wata woch iten Jises Kraist non ach pwonen papatais, sia pwarata pwe sia mochen sipwe amokutu angangen umoumoch. Preseten Henry B. Eyring, Oruan Chon Aninis non ewe Aewin Presetensi, a aitikich pwe ewe niffangen Ngun mi Fel a anisikich ach sipwe fori: “En emon mi pwon chon ewe Mwichefenin Jises Kraist. …

“Ina pwata a wor om memefin mochen om kopwe anisi emon aramas mi aani riaffoun an epwe feinno mwan fan ew chourekin netipechou me osukosuk. Ka pwon pwe kopwe anisi ewe Samon ne fori oser repwe paneno me ekinamweir. Ka fen angei ewe manaman om kopwe aninis ne apanano ekkana chourek nupwen ka angei ewe niffangen ewe Ngun mi Fen.”¹

Awewe ren, emon sister non Russia a wor ew an osukosuken famini mi aweires a epeti seni an epwe fiti fan nap seni ew ier. Pwan emon sister non ewe pranch a awora an aninis non tong ne kori neminewe an epwe ureni ussun ekkewe afanafan, nesen, kokkon angangen misineri, semirit mi karan uputiw, me ekkoch porousen ewe pranch. Nupwen osukosuken an neminewe ewe famini a taweno, a mefi pwe ussun mi chok fifiti ewe pranch pokiten an chiechian we soun chok kokori iteiten wik.

© 2018 seni Intellectual Reserve, Inc. All rights reserved. A för non Merika. Kapungunon non fosun Merika: 6/17. Kapungunon chiakun: 6/17. Chiakun Ministering Principles, July 2018. Chuukese. 15050 901

Esinesin

1. Henry B. Eyring, “Ewe Chon Oururu Netip,” Liahona, May 2015, 18.

Ruanu Ekiek ren sokkun Anapano Umoumoch

Napengeni umoumoch a napeno mwirin ach sia sinei pusin sosotuch, mei wor ekkoch mettoch sia tongeni fori ikenai ach sipwe anapano umoumoch. Ekieki ekkewe an kopwe tongeni aea ekkei ruanu nongonong:

• Iotek fan itan.Nupwen ka tingor ngeni Samach Kot won Nang, I epwe suki netipom, me “kopwene mefi ew ennetin aurek fan iten ewe tumun me pwapwa ese much ren ekkoch aramas” (Preach My Gospel: A Guide to Missionary Service[2004], 118; pwan nengeni Moronai 7:48).

• Kaeo ngeni. Ka tongeni pwarano umoumoch ren om rongorong me weweiti. Uweanong inisum non nonnomur me ekieki epwe if ussun ar repwe mefi. Ika mi fich ngeni nonnomun me fansoun, ka tongeni awora om kopwe aninis ne ekinamweieno ar metek, riaffou, ika netipengaw.

• Aponueta ekkewe pesepes. Ewe Samon a tongeni pwar ngenikich anen ach sipwe pwarano umoumoch meni sisap kuna won pusin winikapach. Nupwen ka mefi ew memef seni ewe Ngun om kopwe anisi ekkoch, kosap tipemwaramwar ne mokutukut won.

• Kopwe pusin emon chiechiom.Pwarano umoumoch a tongeni ussun chok mecheresin pwarano ennetin eteneki non manauen aramas. Kaeo me rongorongoch (nengeni “Ekkewe Nongonongen Lamwiri: Nimu Mettoch Ekkewe mi Auseningoch Ra Fori,” Liahona, June 2018, 6–9). Om tong fan iter epwene napeno, me epwe mecheres ne esinna anen om kopwe pwarano ena tong.

Emon Chon Amanau mi Uren Umoumoch

Ekieki kopwe kaeo ekkoch me nein ekkei pukefen om kopwe kuna ifa ussun an Jises Kraist umoumoch a amokutu I ne echikara, efeiochu, me aiti ekkewe ra nom arun non fansoun an ewe angangen afanafan: Matthew 9:35–38; 14:14; 18:27, 33; 20:30–34; Mark 1:40–42; 5:19; 6:30–42; 9:22; Luke 7:13; 10:33; 15:20.

Ekkewe nongonongen Iamwiri ir popun ar repwe anisikich ne kaeo ach sipwe etenekifengenikich—nge esap ren ach sipwe aporousa ussun ew porous. Nupwen sia feino ngeni ach sipwe sinei ekkana sia anisir, ewe Ngun mi Fel epwe pesekich ach sipwe sinei met porous repwe mochen sinei kapach ngeni ach etenekir me umoumoch.