Pedped ko an Jerbal in Karejar, Juļae 2018

Loļo̧k ilo Tūriam̧o

Ilo am̧ ļoore waanjon̄ak eo an Rilo̧mo̧o̧r eo kōn tūriam̧o, kwonaaj loe bwe komaron̄ kōm̧m̧an oktak ilo mour ko an ro jet.

Tūriam̧o ej n̄e ewōr kile kōn liāājļōļ an ro jet kobaļo̧k ilo am̧ ikdeelel n̄an kōmeramļo̧k ak kadikļo̧k. Juon bujen n̄an ļoore Rilo̧mo̧o̧r eo ej bujen an tūriam̧o n̄an “ineek eddo ko an ro jet” (Mosaia 18:8). Juon jerbal n̄an lale ro jet ej juon iien em̧m̧an n̄an kwaļo̧k āinwōt n̄e Irooj en kar: kōn “tūriam̧o, ilo kōm̧m̧an oktak” (Jud 1:22). Irooj ekar kakien, “Kwaļo̧k jouj im tūriam̧o, jabdewōt n̄an m̧ōttam̧” (Zekaraia 7:9).

Tūriam̧o eo an Rilo̧mo̧o̧r

Tūriam̧o eaar itoklimo eo ekajoor ilo jerbal in karejar eo an Rilo̧mo̧o̧r eo (lale sidebar: “Rilo̧mo̧o̧r eo Etūriamo”). An tūriam̧o n̄an armej ro An eaar kōm̧m̧an bwe En loļo̧k ro Ipeļaakin ilo elōn̄ iien ko. Jelā aikuj ko im ikdeelel ko an armej ro, ekar kōm̧m̧an bwe En maron̄ kōjeraam̧man er im katakin er ilo wāween ko me raorōk tata n̄an er. Ikdeelel eo an Rilo̧mo̧o̧r ej n̄an kotak kōj ilōn̄ in en̄taan eo ad eaar tōlļo̧k n̄an jerbal eo eļaptata an tūriam̧o: Pinmuur eo An n̄an jerawiwi ko im en̄taan an aolep armej.

Maron̄ eo An ej n̄an ņa mejļan aikuj ko an armej ej juon men eo jemarōn kajjieon̄ ilo ad jerbal. Ilo ad mour jim̧we im rōnjake im̧we ko an Jetōb, jenaaj im̧we n̄an loļo̧k ilo waween ko ewōr tokjāer.

Bujen Tūriam̧o eo Ad

Jemedwōj Ilan̄ ekōnaan bwe ajri ro Nejin ren tūriam̧o kake (lale 1 Korint 12:25–27). N̄an erom rikaļoor ro rem̧ool, jej aikuj kōļapļo̧k im kwaļo̧k tūriam̧o n̄an ro jet, elaptata n̄an ro rej aikuj (K&B 52:40).

Bōk iood make etan Jisōs Kraist kōn bujen peptaij eo ad, jej kam̧ool bwe jenaaj kōjerbal tūriam̧o. Būreejtōn Henry B. Erying, Rikakpilōklōk eo Kein Karuo ilo Būreejtōnji eo Kein Kajuon, ekar katakin bwe menin letok eo an Jetōb Kwojarjar ej jiban koj kōm̧m̧an āindein: “Kwoj juon membōr in bujen an Kabun eo an Jisōs Kraist. …

“En̄in ej etke eaar wōr juon ami en̄jake n̄an kōņaan jipan̄ juon armej ej en̄taan n̄an em̧m̧akūt m̧aanļo̧k kōn būrom̧ōj im apan̄. Kom̧ kar kallim̧ur bwe kom̧ naaj jipan̄ Irooj kōmeraikļo̧k eddo ko aer im kaenōm̧m̧an er. Kom̧ kar bōk kajoor eo n̄an jipan̄ Irooj kōmeraikļo̧k eddo ko ke kwaar bōk menin letok eo an Jetōb Kwojarjar.”¹

N̄an waanjon̄ak, juon sister ilo Russia ekar pād ilo juon wāween epen an baam̧le eo ekar bōbrae e jān an etal n̄an jikin jar aitokļok jān juon iiō. Bar juon sister ilo branch eo ekar loļo̧k ilo tūriam̧o aolep Jabōt ilo an kūrļo̧k ilo taļboon n̄an jiron̄ e kōn ekōnono ko, katak ko, kūr ko n̄an mijen, ļoktak ko nin̄nin̄ ko, im ennaan ko jet an branch eo. Ke jekjek eo an sister eo eaar jab em̧akūtkūt jān m̧weo kar ņamejļan, liin eaar en̄jake āinwōt eaar m̧ōttan wōt branch eo kōn wōt kar kūrļo̧k ko ilo taļboon eo an eo m̧ōttan wiik otemjej.

© 2018 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo Kajin English: 6/17. Kōmālim an ukook: 6/17. Ukook eo an Ministering Principles, July 2018. Marshallese. 15050 874

Kakeememej ko

1. Henry B. Eyring, “Rikaenōm̧m̧an eo,” Liaona, Māe 2015, 18.

Emān Elmakto ko n̄an Kōļapļo̧k Tūriam̧o

Ilo an tūriam̧o emakijkij an ļapļo̧k ālkin ad en̄jake mālijjon̄ ko ad make, ewōr jet men ko jemaron̄ kōm̧m̧ani rainin n̄an kōļapļo̧k tūriam̧o. Ļōmņak kōn wāween ko komaron̄ kōjerbal pedped kein emān.

• Jar kake. Ilo am kwaļo̧k n̄an Jemedwōj Ilan̄, Enaaj kōpeļļo̧k būruwōm̧, im “kwonaaj itok n̄an en̄jake n̄ūrbōktak eo em̧ool kōn jeraam̧m̧an indeeo eo im m̧ōņōņō eo an armej ro jet” (Preach My Gospel: A Guide to Missionary Service [2004], 118; lale barinwōt Moronai 7:48).

• Kōjerbale. Komaron̄ bar kwaļo̧k tiriam̧o̧ ilo am̧ rōnjake im meļeļe. Likūt eok make ilo jekjek eo aer im ļōmņak ekōjkan aer maron̄ en̄jake. N̄e ekkar n̄an jekjek eo im iien eo, komaron̄ leļo̧k n̄an jipan̄ kadikļo̧k metak; en̄taan, ak inepatat.

• Ļoor im̧we ko. Irooj emaron̄ kwaļo̧k n̄an kōj wāween ko n̄an kwaļo̧k tūriam̧o eo me jemaron̄ jab kile kōn kōj make. N̄e kwoj en̄jake juon kareel jān Jetōb eo n̄an jipan̄ ro jet, jab aipedped n̄an jerbale.

• Kwon juon m̧ōttā n̄an kwe make. Kwaļo̧k tūriam̧o emaron̄ in pidodo in wōt kwaļo̧k itoklimo eo elukkuun ilo mour ko an armej. Katak n̄an lukkuun rōnjake (lale Pedped ko an Jerbal in Karejar: “Ļalem Un ko n̄an ro rej Rōnjake,” Liaona, Juun 2018, 6–9). Iakwe eo am̧ n̄an er enaaj ļapļo̧k, im enaaj pidodo n̄an kile wāween ko n̄an kwaļo̧k iakwe jab in.

Riļo̧mo̧o̧r Eo Etūriam̧o

Ļōmņak in ekkatak jān jeje kein rekwojarjar n̄an lale elmen an tūriam̧o eo an Jisōs Kraist kamakut E n̄an kamour, kōjeraam̧m̧an, im katakin ro ipeļaakin ilo tōre in jerbal in karejar eo An: Matu 9:35–38; 14:14; 18:27, 33; 20:30–34; Mark 1:40–42; 5:19; 6:30–42; 9:22; Luk 7:13; 10:33; 15:20.

Pedped ko an Jerbal in Karejar rejkōm̧m̧an n̄an jipan̄ kōj katak n̄āņ kea kake doon—ejjab n̄an kwaļo̧ke āinwōt juon ennaan. Ilo ad itok n̄an jelā ro jej jipan̄ er, Jetob Kwojarjar enaaj im̧we koj n̄an jeļā ta ennaan eo remaron̄ aikuji dam̧oļo̧k n̄an kea eo im tūriam̧o eo ad.