Àwọn Ẹ̀kọ́ Ìpìlẹ̀ Ṣíṣe Iṣẹ́ Ìránṣẹ́, Oṣù Kẹfà 2018

Nawọ́ jáde nínú Àánú

Bí ẹ ṣe ntẹ̀lé àpẹrẹ àánú ti Olùgbàlà, ẹ ó ri pé ẹ lè mu ìyàtọ́ wá nínú ìgbé ayé àwọn ẹlòmíràn.

Àánú ni níní ìfura ìrora àwọn ẹlòmíràn pẹ̀lú ìfẹ́ láti mú u fúyẹ́ tàbí tura. Májẹ̀mú kan láti tẹ̀lé Olùgbàlà ni májẹ̀mú àánú kan láti “bá ara wa gbé àjàgà” (Mosiah 18:8). Ìfúnni-niṣẹ́ṣe kan láti bojútó àwọn ẹlòmíràn jẹ́ ànfàní láti ṣe iṣẹ́ ìránṣẹ́ bí Olúwa yío ti ṣe: pẹ̀lú “àánú, ní mímú iyàtọ́ wá” (Jude 1:22). Olúwa pàṣẹ, “Ẹ ṣe àánú àti ìyọ́nú olúkúlùkù sí arákùnrin rẹ̀” (Zechariah 7:9).

Àánú Olùgbàlà

Àánú ni kókó ìdarí nínú iṣẹ́ ìránṣẹ́ Olùgbàlà (wo ẹ̀gbẹ́-ìlà: “Olùgbàlà Alãnú kan) Aánú Rẹ̀ fún àwọn ènìyàn ẹlẹgbẹ́ Rẹ̀ mu U nawọ́ jáde sí àwọn wọnnì ní àyíká Rẹ̀ ní àìmọye ìgbà. Ní mímòye àwọn àìní àti ìfẹ́ inú àwọn ènìyàn, O le bùkún fún wọn, kí ó sì kọ́ wọn ní àwọn ọ̀nà tí ó kanpá sí wọn jùlọ. Ìfẹ́ inú Olùgbàlà láti gbé wa sókè kọjá ìrora wa darí sí ìṣe ìgbẹ̀hìn ti àánú: Ètùtù Rẹ̀ fún àwọn ẹ̀ṣẹ̀ àti ìjìyà ti gbogbo aráyé.

Agbara Rẹ̀ láti fèsì sí àìní àwọn ènìyàn ni ohun kan tí a lè tiraka fún bí a ṣe nsìn. Bí a ṣe ngbé ìgbé ayé òdodo tí a sì nfi etí sílẹ̀ sí àwọn ìṣílétí ti Ẹ̀mí, a ó gba ìmísí láti nawọ́ jáde ní àwọn ọ̀nà tí ó ní ìtumọ̀.

Májẹ̀mú Àánú Wa

Bàbá Ọ̀run nfẹ́ kí àwọn ọmọ Rẹ̀ jẹ́ alãnú (wo 1 Corinthians 12:25–27). Láti di ọmọẹ̀hìn tòótọ́, a gbọ́dọ̀ gbèrú si kí a sì fi àánú hàn sí àwọn ẹlòmíràn, nípàtàkì sí àwọn wọnnì nínú àìní (D&C 52:40).

Gbígba orúkọ Jésù Krístì lé orí ara wa nípa májẹ̀mú ìrìbọmi wa, a jẹ́ ẹ̀rí pé a ní ìfẹ́ láti ṣe àánú. Ààrẹ Henry B. Eyring, Olùdámọ̀ràn Kejì nínú Àjọ Ààrẹ Ìkínní, kọ́ni pé ẹ̀bùn Ẹ̀mí Mímọ́ nràn wá lọ́wọ́ láti ṣe bẹ́ẹ̀: “Ìwọ ni ọmọ ìjọ májẹ̀mú ti Ìjọ Jésù Krístì. …

“Èyínnì ni ìdí tí ẹ fi nní ìmọ̀lára láti fẹ́ láti ṣe ìranlọ́wọ́ fún ẹnìkan tí ó ntiraka láti sún síwájú ní abẹ́ ẹrù ìbànújẹ́ àti ìṣòrò. Ẹ ṣe ìlérí pé ẹ ó ran Olúwa lọ́wọ́ láti mú àjàgà [àwọn ẹlòmíràn] fúyẹ́ kí wọ́n sí ní ìtùnú. A fún un yín ní agbára láti ṣe ìranlọ́wọ́ mú àwọn ẹrù wọnnì fúyẹ́ nígbàtí ẹ gba ẹ̀bùn Ẹ̀mí Mímọ́.”¹

Fún àpẹrẹ, arábìnrin kan ní Russia ní ìṣòrò ipò ẹbí tí ó dènà rẹ̀ láti lọ sí ilé ìjọsìn fún ọdún kan ó lé. Arábìnrin míràn ní ẹ̀ka náà nawọ́ jáde nínú àánú lọ́jọọjọ́ Ìsinmi nípa pípè é láti sọ fún un nípa àwọn ọ̀rọ̀, àwọn ẹ̀kọ́, àwọn ìpè iṣẹ́ ìránṣẹ́, àwọn ọmọ tí a bí, àti àwọn ìròhìn míràn ní ẹ̀ká. Nígbàtí ipò ẹbí arábìnrin tí ó ti wà nínú ilé náà yanjú tán, ó ní ìmọ̀lára bíìpé òun ṣì jẹ́ apákan ẹ̀ká náà nítorí ìpè ọ̀sọ̀ọ̀sẹ̀ ọ̀rẹ́ rẹ̀.

Àwọn àbá mẹ́rin fún mímú Àánú Gbèrú.

Nígbàtí àánú máa nfi ìgbakugbà lékún síi lẹ́hìn tí a bá ti ní ìrírí àwọn àdánwò ti ara wa, àwọn ohun kan wà tí a lè ṣe ní òní láti mú àánú gbèrú. Gbèrò àwọn ọ̀nà tí ẹ fi lè lo àwọn ẹ̀kọ́ ìpìlẹ̀ mẹ́rin wọ̀nyí:

Gbàdúrà fún un. Bí ẹ ṣe nbẹ Bàbá Ọ̀run, Òun yíò ṣí ọkàn yín, àti pé “ẹ̀yin yíò wá ní ìmọ̀lára àníyàn tòótọ́ fún wíwà-lálàáfíà àti ìdùnnú ayérayé ti àwọn ènìyàn míràn” (Wàásù Ìhìnrere Mi: Atọ́nà kan sí Iṣẹ́ Ìránṣẹ́ Ìhìnrere [2004], 118; bákanáà wo Moroni 7:48).
Ẹ ṣe é. Ẹ lè fi àánú hàn nípa fífi etí sílẹ̀ àti níní òye. Ẹ fi ara yín sí ipò wọn kí ẹ sì gbèrò irú bí wọ́n ṣe ní ìmọ́lára sí. Tí ó bá bá ipò àti àkókò mu, ẹ lè gbà láti ràn wọ́n lọ́wọ́ láti dín ìrora, ìjìyà, tàbí ìrẹ̀wẹ̀sì wọn kù.
Tẹ̀lé àwọn ìṣílétí Olúwa lè fi àwọn ọ̀nà tí a fi lè ṣe àánú hàn sí wa tí a lè má tilẹ̀ ṣe àkíyèsí fúnra wa. Nígbàtí ẹ bá ní ìmọ̀lára ìtọ́ni-jẹ́jẹ́ láti ọ̀dọ̀ Ẹ̀mí náà láti ran àwọn ẹlòmíràn lọ́wọ́, ẹ máṣe lọ́ra láti ṣiṣẹ́ lórí rẹ̀.
Ẹ jẹ́ ọrẹ́ araẹni. Fífi àánú hàn lè jẹ́ ìrọ̀rùn bí fífi ìfẹ́ òtítọ́ hàn nínú ìgbé ayé àwọn ènìyàn. Kọ́ láti fi etí sílẹ̀ dáradára (wo “Àwọn Ẹ̀kọ́ Ìpìlẹ̀ Iṣẹ́ Ìránṣẹ́: Àwọn Ohun Marun tí àwọn Olùfetísílẹ̀ Rere Nṣe Liahona, June 2018, 6–9). Ìfẹ́ yín fún wọn yíò pọ̀si, àti pé yíò rọrùn si láti ṣe ìdámọ̀ àwọn ọ̀nà láti fi ìfẹ́ náà hàn.