Nongonongen Iamwiri, August 2018
Foratan Chiechi mi Auchea
Ach tufichin anisi aramas mi watteno nupwen ach chiechi ngeniir mi auchea ngeni kich.
Ewe tingor pwe sipwe iamwiri aramas ina ach tufichin forata ach chiechi ngeniir non umoumoch—ewe sokkun chiechi minne repwe mefi kinamwe pwe repwe tingoreikich ren are etiwa ach aninnis. Nupwen sia achocho ne forata ena sokkun chiechi, Kot mi tufichin ekkesiwini manau me won ir me ru eppekin ewe chiechi.
“Ua wesen nuku pwe ese wor ekkesiwin mi auchea ikka ese pwan wor chiechi mi auchea,” Sharon Eubank a apasa, ewe Aewin Chon Aninnisin ewe Presetensin ekkewe Fin Anisi Unus. Me pwe ach kewe aninnis epwe tongeni ekkesiwini manauan ekkoch, a apasa, mi namwot pwe repwe “anononong non ewe ennetin mochen echikar me ausening, me aninnis fengen me sufon.”1
Chiechi mi auchea rese minen kokkotun akuf. Ra foruta won umoumoch, ennetin achocho, me tong mi ennet (D&C 121:41).2
Sokkun Tufichin Forata me Apochokuna Chiechi
“Sia forata [cheichi] emon me emon aramas ekkis me ekkis,” Elter Dieter F. Uchtdorf seni ewe Mwichen Engon me Ruemon Aposel a apasa.3 Ren ach achocho ne forata chiechi mi auchea ngeni ekkewe minne sia iamwiri, ewe Ngun mi Fel mi tongeni emwenikich. Ekkei kapasen aurour ra anongonong won ew fofor Elter Uchtdorf mi apworausa.4
-
Kaeo usur.
Preseten Ezra Taft Benson (1899–1994) a aitikich, “Ouse tongeni anisiochu ekkewe ouse pwan sineiochu.” A erenikich pwe sipwe sinei itan meinisin chon ewe famini me sinei fansoun mi auchea usun uputiw, efeioch, paptais, me apupunu. Ei mi etufichikich ach sipwe tongeni mak taropwe are kokorir ne apasa kapasen apwapwa ngeni emon chon ewe famini non fansoun ra winnini mettoch are sochingio.5
-
Nonnom fengen.
Aucheani om fansoun kukunou fengen. Kuta tufichin kopwe sopweno ne churir. Pekkin kaeo mi afata pwe om kopwe afata ngeni aramas ifan aukukun om mochen tumunur mi aucheanap ngeni pekkin chiechi mi pochokun.6 Churi fan chommong ekkewe minne ka angei om sekining kopwe anisi. Fos ngeniir non fan. Aea menni chok sokkun kapas mi fich—usun chok email, Facebook, Instagram, Twitter, Skype, kokorir won fon, are tinano taropwe. Elter Richard G. Scott (1928–2015) seni ewe Mwichen Engon me Ruemon Aposel a kapas usun ewe manamanen pwari tong me aninnis non napanap mi mecheres me tipachem: “Fan chommong uua suki nei pukfel, … me ua kuna echo taropwen tong me aninnis [punuwei we] Jeanene mi wanong non ekkewe peich. … Ekkei taropwe mi achengecheng … mi sopweno tori iei ir mi pisek mi auchea minen aurour me asaramen ekkiek.”7
Pwan, kopwe chechemeni pwe mi namwot pwe epwe wor ruemon non ewe chiechi. Oua tongeni fang ngeniir tong me chiechi, nge ena chiechi ese tongeni marita ika rese etiwa me enniweni minnne om ka fang ngeniir. Ika usun pwe ewe pwan emon ese etiwa, ousap echimwa om chiechi ngeniir. Mut ngeni fansoun pwe epwe kuna om aninnis mi wenechar, me ika mi namwot, kopwe kuta kapasen aninnis seni noum chon emwen usun ika pwe ew chiechi mi auchea epwe chok tufich.
-
Kapas ren kirekiroch.
Ach sipwe forata chiechi mi auchea mi namwot pwe sipwe nuseni met mi namwotungau. Kapasen namwotungau mi ur ren akasos usun kokotun ran, pworausen fan nang, me ekkoch pekin nusman, nge ese fiti kapasen memmef, nuku, kokkot, me ekkiek mi namwot ngeni ewe apochokunan chiechi mi auchea. Samach won Nang mi forochu ei sokkun kapas mi auchea ren an apworausa mefian me an kokkot ngeni Noun We (nengeni John 5:20) me pwan rech me ren Noun soufos (nengeni Amos 3:7). Ren ach kapasfengen usun pworausen iteitan ran me osukosukan manau fiti emwenien ewe Ngun mi Fel, sia anapano ach pwapwaitifengenikich ren ach kuna met sia chu non ach mochen me weri.
Om kopwe ausening mi eu kinikin mi auchea non om afata pwe ka tongeiir.8 Nupwen ka auseningoch, om tufichin anisi aramas pwe repwe feito ren Kriast mi napeno ren om anapano om weweiti me miriti met mi namwot ngeniir me pwe repwe mefi pwe ka tongeiir, weweitiir, me tumunur.
-
Afanni met mi sokkofesen me met mi nenne fengen non manauemi.
“Ekkoch … ra nuku pwe ewe Mwichefen a mochen pwe iteitan chon ewe Mwichefen repwe afor non ew chok napanap—pwe emon me emon repwe nenne chok non nikinikin, mefi, ekkieki, me fofor,” Elter Uchtdorf mi apasa. “Ei epwe amawa ewe tipachemen Kot, ewe mi fori iteitan mwan epwe sokkono seni pwin. …
“Ewe Mwichefen mi seresoch nupwen sia aucheani ei sokkofesin me aninnis fengen ne pwisin kaeoochu ach kewe nipwakoch ne ekkieta me apochokunata chienach kewe chon kuno.”9
Ach sipwe tongfengen non ewe napanap Kot mi tongekich mi namwot pwe sipwe kuna aramas non ewe napanap Kot mi kuna ir. Preseten Thomas S. Monson (1927–2018) a aitikich, “Mi namwot sipwe anapano ewe tufichin ach sisap chok kuna aramas non ar napanap iei nge non ewe napanap minne ir mi tongeni winiti.”10 Sia tongeni iotek ren aninnis pwe sipwe tongeni kuna aramas non ewe napanap minne Kot mi kuna ir. Ren ach sipwe aucheani aramas anononong won ar kofichin marita, mi kan tufich repwe kitiri ar kofich.11
-
Anisiir.
Kopwe tipereni met mi namwot ngeni ekkewe ka iamwiri me kopwe tipe ngeni om kopwe fangeno om fansoun me nipwakoch, non fansoun osukosuk pwan seni chok om umoumoch. Ka tongeni nom rer ne awora aurour, tumun, me aninnis ngeniir nupwen a wor fitikoko, semwen, are osukosuk. Nge non tepetep chiechi kich sia chok mangeti mettoch mi fen fis. Kot a ngenikich ach pungun finata pwe sipwe tongeni mwokutukut nge mettoch resap angang woch (nengeni 2 Nifai 2:14). Usun chok met ewe Aposel John a aitikich pwe sia tongei Kot pun I a tongei kich akkomw (nengeni 1 John 4:19), nupwen aramas mi mefi ach ennetin tong ngeniir ren ach foforun aninnis, mi tongeni auroura netip me anapano tong me nuku.12 Ei mi esinepato fefeitan foforun umoumoch mi tongeni apochokuna ach chiechifengen.
Iamwiri usun ewe Chon Amanau A Fori
Jises Kraist mi forata chiechi mi auchea ngeni Noun chon kuno (nengeni John 11:5). A sinei ir (nengeni John 1:47–48). A aucheani an fansoun rer (nengeni Luke 24:13–31). An kapas ngeniir mi nuseni met mi namwotungau (nengeni John 15:15). A afanni met mi sokkofesen rer (nengeni Matthew 9:10) me a kuna ar tufich (nengeni John 17:23). A anisi aramas meinsin, ikamwo I Samonen meinisin, A apasa pwe I ese feito pwe aramas repwe iamwiri nge I epwe iamwirir (nengeni Mark 10:42–45).
Met kopwe fori ne apochokuna om chiechi ngeni ekkewe oua angei om sekening kopwe anisi?
© 2018 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/17. Kapungunon awewen: 6/17. Chiaku seni Ministering Principles, August 2018. Chuukese. 15051 901