Mga Prinsipyo sa Ministering, Septyembre 2018

Makigsugilanon parte sa Ila mga Kinahanglanon

Indi ninyo ini kinahanglan himuon nga nagaisahanon. Ang pagpakigsugilanon sarang makahatag sang bulig nga inyo ginakinahanglan sa pagbulig sa iban.

Ang Dios nag-agda sa inyo sa pagtatap sa isa ka indibidwal ukon pamilya sa inyo ward ukon branch suno sa ila mga kinahanglanon. Paano ninyo mahibaloan kon ano inang mga kinahanglanon? Ang prinsipyo sang pagpakigsugilanon, nga amo ang ginatutukan sang Simbahan, amo ang yabi.

Pagkatapos nga mahambalan ang ano man man nga ginakabig naton nga dapat hambalan, kita magbinag-binag sa:

1. Pagpakigsugilanon sa Amay nga Langitnon.

2. Pagpakigsugilanon sa natoka nga indibidwal ukon pamilya.

3. Pagpakigsugilanon sa aton kaupod.

4. Kag sa pagpakigsugilanon sa iban pa nga nakatoka sa amo man nga indibidwal ukon pamilya.

Ang pagpakigsugilanon sa aton mga lider importante man. Ang palaabuton nga artikulo sang mga Prinsipyo sang Ministering sa Liahona magabinag-binag sang pagpakigsugilanon sa mga lider kag subong man sang papel sang mga interbyu sa ministering sa sina nga proseso.

Ang Aton Ginasugilanonan

Ang pag-intiende sang mga kinahanglanon importante sa pag-alagad sa isa kag isa. Apang ano nga mga porma sinang mga kinahanglanon, kag may yara bala sing masobra pa sangsa mga kinahanglanon nga aton dapat masayran?

Ang mga kinahanglanon sarang makit-an sa madamo nga dagway. Sila nga aton ginaalagaran mahimo nagaatubang sang mga pagpanghangkat nga emosyunal, pinansyal, pisikal, pang-edukasyon, kag iban pa. Ang iban nga mga kinahanglanon mas ginapagpasulabi sangsa iban. Ang iban masarangan naton nga buligan; ang iban mahimo nga dapat magpabulig kita. Sa aton pagtinguha sa pagbulig nga malab-ot ang temporal nga mga kinahanglanon, indi malipat nga ang aton tawag sa pagtatap naglakip sang pagbulig sa iban nga mag-uswag padulong sa dalan sang kasugtanan, paghanda para sa kag pagbaton sang ordinansa sang priesthood nga kinahanglanon para sa pangkahitaasan.

Dugang pa sa pagpakigsugilanon parte sa mga kinahanglanon sang indibidwal ukon pamilya, dapat naton masayran ang ila mga ikasarang. Sa ano nga mga butang sila indi kinahanglan buligan? Ano nga mga abilidad kag mga talento ang yara sa ila nga sarang magpakamaayo sa iban? Sa ano nga bagay sila nagakabagay sa pagbulig pasad sang ginharian sang Dios? Ang kusog sang isa ka indibidwal mahimo nga pareho kaimportante sa pag-intiende sang iya mga kinahanglanon.

Magpangamuyo sa Amay nga Langitnon

Ang isa sa mga pinakaimportante nga doktrina sang aton pagtuo amo nga ang Amay nga Langitnon nagapakighambal sa Iya mga kabataan (tan-awa sa Mga Artikulo sang Pagtuo 1:9). Kon makabaton kita sang bag-o nga toka nga magtatap sa isa ka tawo, dapat kita magpakigsugilanonsa Amay nga Langitnon paagi sa pangamuyo, nga nagapangayo sing kaalam kag paghangop sa ila mga kinahanglanon kag mga kusog. Ina nga proseso sang pagpakigsugilanon paagi sa pangamuyo dapat magpadayon sa bug-os naton nga toka sa pagtatap.

Magpakigsugilanon sa mga Indibidwal kag mga Pamilya

Kon paano kag san-o kita magpalapit sa mga indibidwal kag mga pamilya nga nakatoka sa aton pag-alagad nagadepende sa sirkumstansya, apang ang pagpakigsugilanon direkta sa indibidwal ukon pamilya importante para sa pagpasad sang mga kaangtanan kag pag-intiende sang ila mga kinhanglanon, lakip na kon paano nila gusto nga buligan. Ang pila sa mga pamangkot ayhan kinahanglan maghulat tubtob nga nagtubo na ang isa ka makahuluganon nga kaangtanan. Tungod nga wala sing isa ka husto nga pamaagi sa paghimo sina, binagbinaga ang mga masunod:

• Hibaloa kon paano kag san-o nila mas gusto nga pakig-angutan.

• Hisayre ang parte sa ila mga interes kag mga inagihan.

• Magkadto nga may mga suhestiyon kon paano kamo makabulig, kag pangayoa ang ila mga suhestiyon.

Sa aton pagpasad sang pagsalig, binagbinagon ang paghambalanay parte sa mga kinahanglanon sang mga indibidwal ukon mga pamilya. Magpamangkot suno sa pagpabatyag sang Balaan nga Espiritu.¹ Halimbawa:

• Ano nga mga kabudlayan ang ila ginaatubang?

• Ano ang ila pang-pamilya ukon indibidwal nga mga lalab-uton? Halimbawa, gusto bala nila nga mas magmaayo ang ila paghiwat sang family home evening, ukon mas nagasalig-sa-kaugalingon?

• Paano kita makabulig sa ila sa ila mga lalab-uton kag mga kabudlayan?

• Ano nga mga ordinansa sang ebanghelyo ang manug-abot sa ila pangabuhi? Paano naton sila mabuligan sa paghanda?

Dumduma ang magtanyag sang bulig, subong abi sang, “San-o nga gab-i kami pwede magdala sa inyo sing pagkaon sini nga semana?” Ang wala-piho nga tanyag, pareho sang, “Pahibal-a lang kami kon may mabulig kami,” indi gawa makabulig.

Pagpakigsugilanon sa Aton Kaupod

Tungod kamo kag ang inyo kaupod ayhan indi masami magkaupod kon magbisita sa indibidwal ukon pamilya, importante nga magpakig-angot kag makigsugilanon samtang nagapangayo kamo sing inspirasyon bilang magkaupod. Yari ang pila ka mga pamangkot nga dapat binag-binagon:

• Paano kag ano kasunson kamo dapat maghambalanay bilang magkaupod?

• Paano ninyo magamit ang tagsa ninyo nga mga kusog sa pagtatap sa mga kinahanglanon sang pamilya ukon indibidwal?

• Ano nga mga butang ang inyo natun-an, ano nga mga eksperiyensya ang inyo naagyan, kag ano nga mga pagpabatyag ang inyo nabaton sumugod sang ulihi ninyo nga pagpakighambal parte sa indibidwal ukon pamilya?

Pagpakigsugilanon sa Iban pa nga Nakatoka

Mahimo nga manami ang makighambal sing panalagsa sa iban pa nga nakatoka sa pagtatap sa pareho nga indibidwal ukon pamilya nga nakatoka man sa inyo.

Makighambal sa Pagsolbar sang mga Hangkat

Si Elder Chi Hong (Sam) Wong sang Seventy nagdapat sang sinulat gikan sa Marcos 2 sa aton panahon agud ipakita kon paano ang pagsugilanonay naghimo nga posible para sa apat ka tawo nga mahunahunaan kon paano ang tawo nga paralisado madala sa atubang ni Jesus.

“Mahimo ini matabo pareho sini,” siling ni Elder Wong. “Apat ka tawo nagatuman sang isa ka toka halin sa ila bishop nga magbisita, sa isa ka tawo nga paralisado sa iya puluy-an. … Sa pinakaulihi nga konseho sang ward, matapos makipagsugilanunay parte sa mga kinahanglanon sang ward, ang bishop naghatag sang ‘pagtabang’ nga mga toka. Ining apat ang ginhatagan sang responsibilidad nga magbulig sa sining tawo. …

“[Sang pag-abot nila sa bilding kon sa diin si Jesus,] nagaginutok ang mga tawo sa hulot. Indi sila makasulod sa puwertahan. Sigurado ako nga gintinguhaan na nila ang tanan mga mapensaran nila, apang indi gid sila makalusot. … Nagsugilanonay sila kon ano ang ila masunod nga himuon—kon paano nila dalhon ang tawo kay Jesucristo para mabulong. … Naghimo sila sing isa ka plano—indi mahapos, pero ginhimo nila ini.

“… ‘Ila gin-guhaban ang atop sa ibabaw sang ginatindugan ni Jesus: sang ila ini maguhab, gintunton nila ang hiligdaan nga ginahigdaan sang paralitiko’ (Marcos 2:4). …

“…‘Sang nakita ni Jesus ang ila pagtuo sa iya, sia nagsiling sa paralitiko, Anak, ang imo mga sala ginpatawad na’ (Marcos 2:5).”²

Pangagda sa Pag-akto

Si Elder Dieter F. Uchtdorf sang Dose ka Apostoles nagpangabay, “Makigsugilanon, gamita ang tanan nga kasangkapan nga sarang magamit, pangayoa ang pagpabatyag sang Balaan nga Espiritu, pangayoa sa Ginuo ang Iya kompirmasyon, kag dayon kalukosa ang inyo pako sang bayo kag magtrabaho.

“Ginapromisa ko sa inyo: kon inyo sundon ini nga sulundan, magabaton kamo sang segurado nga giya sa kon si sin-o, ano, san-o, kag diin sa pagbulig sa pamaagi sang Ginuo.”³

© 2018 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Pagtugot sa Ingles: 6/17 Petsa sang pagtugot sa paglubad: 6/17. Paglubad sang Ministering Principles, September 2018. Hiligaynon. 15052 861

Mga Tanda

1. Tan-awa sa Preach My Gospel: A Guide to Missionary Service (2004), 183.

2. Chi Hong (Sam) Wong, “Rescue in Unity,” Liahona,Liahona, Nob. 2014, 14-15.

3. Dieter F. Uchtdorf, “Providing the Lord’s Way,” Liahona, Nob. 2011, 55.

Ang sa mga Prinsipyo sa Ministering amo ang mabuligan kita nga magtuon sa pag-atipan sa isa kag isa—indi agud ipaambit bilang mensahe sa tion sang aton mga pagbisita. Sa aton pagkilala sa aton mga ginaalagaran, ang Balaan nga Espiritu magapabatyag sa aton agud mahibaloan kon ano nga mensahe ang ila kinahanglan dugang pa sa aton kabalaka kag kaluoy.

Ang Gahum sang Pagsugilanonay

“Kon luyag ninyo nga pauswagon ang isa ka bagay, kinahanglan nga sugilanonan ninyo ang parte sina,” siling ni Elder M. Russell Ballard, Akting nga Pangulo sang Korum sang Dose ka mga Apostoles. “Kon [himuon] naton ini, nagatuga kita sang espirituhanon nga pagbinuligay nga amo ang dugang nga pagka-epektibo ukon hinimoan bilang resulta sang gintingob nga aksyon ukon kooperasyon, ang resulta mas daku sangsa kabilugan sang tinag-isa-isa ka bahin” (sa R. Scott Lloyd, “Counseling with Councils Is Lord’s System, Elder Ballard Declares,” Ene. 11, 2017, news.lds.org; “Strength in Counsel,” Ensign,Nob. 1993, 77).

Ang pagpasad sang mga kaangtanan isa man kaimportante nga bahin sang pagsugilanonay. Tan-awa man sa artikulo sang Mga Prinsipyo sa Ministering “Building Meaningful Relationships,” sa Agosto 2018 nga isyu sang Liahona, sa pahina 6.