ຫລັກທຳຂອງການປະຕິບັດສາດສະໜາກິດ, ເດືອນກັນຍາ 2018
ປຶກສາຫາລືກັນກ່ຽວກັບຄວາມຕ້ອງການຂອງເຂົາເຈົ້າ
ທ່ານບໍ່ຕ້ອງເຮັດສິ່ງນີ້ດ້ວຍຕົວຄົນດຽວ. ການປຶກສາຫາລືນຳກັນ ສາມາດຈັດຫາຄວາມຊ່ວຍເຫລືອທີ່ທ່ານຕ້ອງການ ເພື່ອຊ່ວຍເຫລືອຄົນອື່ນ.
ພຣະເຈົ້າໄດ້ເຊື້ອເຊີນທ່ານ ໃຫ້ປະຕິບັດສາດສະໜາກິດຕໍ່ບຸກຄົນ ຫລື ຄອບຄົວໃດໜຶ່ງ ຢູ່ໃນຫວອດ ຫລື ໃນສາຂາຂອງທ່ານ ອີງຕາມຄວາມຕ້ອງການຂອງເຂົາເຈົ້າ. ທ່ານຮູ້ຈັກກ່ຽວກັບສິ່ງທີ່ຕ້ອງການເຫລົ່ານັ້ນແນວໃດ? ຫລັກທຳຂອງການປຶກສາຫາລືນຳກັນ, ຊຶ່ງຖືກເນັ້ນຫລາຍ ຢູ່ໃນສາດສະໜາຈັກ, ເປັນສິ່ງສຳຄັນ.
ຫລັງຈາກໄດ້ສົນທະນາກ່ຽວກັບສິ່ງທີ່ຈະເອົາມາປຶກສາຫາລືກັນແລ້ວ, ເຮົາຈະສະແຫວງຫາ:
-
ການປຶກສາຫາລືກັບພຣະບິດາເທິງສະຫວັນ.
-
ການປຶກສາຫາລືກັບບຸກຄົນ ແລະ ຄອບຄົວທີ່ເຮົາຖືກມອບໝາຍ.
-
ການປຶກສາຫາລືກັບຄູ່ຂອງເຮົາ.
-
ແລະ ການປຶກສາຫາລືກັບຄົນອື່ນໆ ທີ່ໄດ້ຖືກມອບໝາຍໃຫ້ດູແລບຸກຄົນ ຫລື ຄອບຄົວດຽວກັນ.
ການປຶກສາຫາລືກັບຜູ້ນຳ ເປັນສິ່ງສຳຄັນເໝືອນກັນ. ຫລັກທຳຂອງການປະຕິບັດສາດສະໜາກິດໃນອະນາຄົດ ຢູ່ໃນວາລະສານ Liahona ຈະສະແຫວງຫາການປຶກສາຫາລືກັບຜູ້ນຳ ຕະຫລອດທັງບົດບາດຂອງການສຳພາດເລື່ອງການປະຕິບັດສາດສະໜາກິດ ຢູ່ໃນຂັ້ນຕອນດັ່ງກ່າວ.
ສິ່ງທີ່ເຮົາປຶກສາຫາລື
ການເຂົ້າໃຈຄວາມຕ້ອງການ ເປັນສິ່ງສຳຄັນຕໍ່ການປະຕິບັດສາດສະໜາກິດ ຕໍ່ກັນແລະກັນ. ແຕ່ຄວາມຕ້ອງການນັ້ນ ມີລັກສະນະແບບໃດ, ແລະ ມັນມີສິ່ງອື່ນໃດອີກບໍ ທີ່ນອກເໜືອໄປຈາກຄວາມຕ້ອງການ ທີ່ເຮົາຕ້ອງຮູ້ຈັກ?
ຄວາມຕ້ອງການອາດມີຫລາຍຮູບແບບ. ຜູ້ທີ່ເຮົາຮັບໃຊ້ ອາດປະເຊີນກັບການທ້າທາຍ ທາງຄວາມຮູ້ສຶກ, ທາງການເງິນ, ທາງສຸຂະພາບ, ທາງການສຶກສາ, ແລະ ອື່ນໆ. ຄວາມຕ້ອງການບາງຢ່າງ ອາດສຳຄັນກວ່າຢ່າງອື່ນໆ. ບາງຢ່າງເຮົາອາດສາມາດຊ່ວຍເຫລືອໄດ້, ແຕ່ອີກບາງຢ່າງເຮົາອາດຕ້ອງໄດ້ຂໍຄວາມຊ່ວຍເຫລືອຈາກຄົນອື່ນ. ໃນຄວາມພະຍາຍາມທີ່ຈະສະໜອງຄວາມຕ້ອງການທາງໂລກ, ຢ່າລືມວ່າ ການເອີ້ນຂອງເຮົາໃຫ້ປະຕິບັດສາດສະໜາກິດ ແມ່ນຮ່ວມດ້ວຍການຊ່ວຍເຫລືອຄົນອື່ນ ໃຫ້ກ້າວໜ້າຢູ່ໃນເສັ້ນທາງແຫ່ງພັນທະສັນຍາ, ຕຽມຕົວສຳລັບ ແລະ ຮັບເອົາພິທີການຂອງຖານະປະໂລຫິດ ທີ່ຈຳເປັນສຳລັບຄວາມສູງສົ່ງ.
ນອກເໜືອໄປຈາກການປຶກສາຫາລື ກ່ຽວກັບຄວາມຕ້ອງການຂອງບຸກຄົນ ແລະ ຄອບຄົວໃດໜຶ່ງ, ເຮົາຄວນສະແຫວງຫາທີ່ຈະຮຽນຮູ້ເຖິງຄວາມເຂັ້ມແຂງຂອງເຂົາເຈົ້າ. ມີສິ່ງໃດແດ່ທີ່ເຂົາເຈົ້າບໍ່ຕ້ອງການຄວາມຊ່ວຍເຫລືອ? ມີຄວາມສາມາດ ແລະ ຂອງປະທານໃດແດ່ ທີ່ເຂົາເຈົ້າສາມາດເປັນພອນໃຫ້ແກ່ຄົນອື່ນ? ເຂົາເຈົ້າເໝາະສົມທີ່ຈະຊ່ວຍສ້າງສາອານາຈັກຂອງພຣະເຈົ້າ ໃນທາງໃດແດ່? ຄວາມເຂັ້ມແຂງຂອງບຸກຄົນ ອາດສຳຄັນທີ່ຈະເຂົ້າໃຈ ເທົ່າໆກັບຄວາມຕ້ອງການຂອງເຂົາເຈົ້າ.
ການປຶກສາຫາລືກັບພຣະບິດາເທິງສະຫວັນ
ຫລັກທຳທີ່ສຳຄັນຢ່າງໜຶ່ງຂອງຄວາມເຊື່ອຖືຂອງເຮົາແມ່ນວ່າ ພຣະບິດາເທິງສະຫວັນ ກ່າວກັບລູກໆຂອງພຣະອົງ (ເບິ່ງ ຫລັກແຫ່ງຄວາມເຊື່ອ 1:9). ເມື່ອເຮົາຮັບເອົາການມອບໝາຍໃໝ່ ເພື່ອປະຕິບັດສາດສະໜາກິດຕໍ່ບາງຄົນ, ເຮົາຄວນປຶກສາຫາລືກັບພຣະບິດາເທິງສະຫວັນໃນການອະທິຖານ, ເພື່ອສະແຫວງຫາຄວາມຮູ້ ແລະ ຄວາມເຂົ້າໃຈເຖິງຄວາມຕ້ອງການ ແລະ ຄວາມເຂັ້ມແຂງຂອງເຂົາເຈົ້າ. ຂັ້ນຕອນນັ້ນຂອງການປຶກສາຫາລື ຜ່ານທາງການອະທິຖານ ຄວນຕໍ່ເນື່ອງໄປເລື້ອຍໆ ໃນໄລຍະການມອບໝາຍໃຫ້ປະຕິບັດສາດສະໜາກິດຂອງເຮົາ.
ການປຶກສາຫາລືກັບບຸກຄົນ ແລະ ຄອບຄົວ
ວິທີ ແລະ ເວລາທີ່ເຮົາເຂົ້າຫາບຸກຄົນ ແລະ ຄອບຄົວ ທີ່ເຮົາຖືກເອີ້ນໃຫ້ຮັບໃຊ້ ອາດແຕກຕ່າງກັນ ອີງຕາມສະຖານະການ, ແຕ່ການປຶກສາຫາລືໂດຍກົງກັບບຸກຄົນ ຫລື ຄອບຄົວ ແມ່ນສຳຄັນສຳລັບການສ້າງຄວາມສຳພັນ ແລະ ຄວາມເຂົ້າໃຈຕໍ່ຄວາມຕ້ອງການຂອງເຂົາເຈົ້າ, ຮ່ວມທັງວິທີທີ່ເຂົາເຈົ້າຢາກໄດ້ຄວາມຊ່ວຍເຫລືອ. ຄຳຖາມບາງຢ່າງອາດຕ້ອງໂຈະໄວ້ກ່ອນ ຈົນກວ່າໄດ້ພັດທະນາຄວາມສຳພັນທີ່ມີຄວາມໝາຍເປັນຢ່າງດີ. ເຖິງແມ່ນການເຮັດສິ່ງນັ້ນ ບໍ່ມີວິທີໃດເລີຍທີ່ຖືກຕ້ອງ, ແຕ່ໃຫ້ພິຈາລະນາດັ່ງຕໍ່ໄປນີ້:
-
ຊອກຫາວິທີ ແລະ ເວລາ ທີ່ເຂົາເຈົ້າຢາກໃຫ້ຕິດຕໍ່ຫາ.
-
ຮຽນຮູ້ກ່ຽວກັບຄວາມສົນໃຈ ແລະ ພື້ນຖານຂອງເຂົາເຈົ້າ.
-
ມາດ້ວຍຄຳແນະນຳສຳລັບວິທີທີ່ທ່ານສາມາດຊ່ວຍໄດ້, ແລະ ຂໍຄຳແນະນຳຈາກເຂົາເຈົ້າ.
ເມື່ອເຮົາສ້າງຄວາມໄວ້ວາງໃຈ, ໃຫ້ຄິດສົນທະນາກ່ຽວກັບຄວາມຕ້ອງການຂອງບຸກຄົນ ຫລື ຄອບຄົວ. ໃຫ້ຖາມຄຳຖາມ ເມື່ອຖືກກະຕຸ້ນໂດຍພຣະວິນຍານບໍລິສຸດ.1 ຍົກຕົວຢ່າງ:
-
ການທ້າທາຍໃດແດ່ທີ່ເຂົາເຈົ້າປະເຊີນຢູ່?
-
ແມ່ນຫຍັງຄືຈຸດເປົ້າໝາຍຂອງຄອບຄົວຂອງເຂົາເຈົ້າ ຫລື ຂອງບຸກຄົນ? ຍົກຕົວຢ່າງ, ເຂົາເຈົ້າຢາກມີການສັງສັນໃນຄອບຄົວເປັນປະຈຳ ທີ່ດີກວ່າເກົ່າບໍ, ຫລື ຢາກເປັນຄົນກຸ້ມຕົນເອງຫລາຍກວ່າເກົ່າບໍ?
-
ເຮົາຈະຊ່ວຍເຫລືອເຂົາເຈົ້າ ເລື່ອງເປົ້າໝາຍ ແລະ ການທ້າທາຍຂອງເຂົາເຈົ້າໄດ້ແນວໃດ?
-
ມີພິທີການຂອງພຣະກິດຕິຄຸນຢ່າງໃດແດ່ ທີ່ຈະເກີດຂຶ້ນໃນມໍ່ໆນັ້ນ ໃນຊີວິດຂອງເຂົາເຈົ້າ? ເຮົາຈະຊ່ວຍເຫລືອເຂົາເຈົ້າ ເພື່ອຕຽມສຳລັບພິທີການເຫລົ່ານັ້ນໄດ້ແນວໃດ?
ໃຫ້ຈື່ຈຳທີ່ຈະສະເໜີຄວາມຊ່ວຍເຫລືອຢ່າງໃດຢ່າງໜຶ່ງໂດຍສະເພາະ, ດັ່ງເຊັ່ນ, “ມື້ໃດ ທີ່ພວກເຈົ້າຢາກໃຫ້ພວກເຮົາເອົາອາຫານແລງມາໃຫ້ ໃນອາທິດນີ້?” ຄຳສະເໜີທີ່ບໍ່ແຈ່ມແຈ້ງ, ດັ່ງເຊັ່ນ, “ບອກໃຫ້ພວກເຮົາຮູ້ເດີ້ ຖ້າຫາກມີສິ່ງໃດທີ່ພວກເຮົາສາມາດເຮັດໄດ້,” ແມ່ນບໍ່ເປັນປະໂຫຍດ.
ການປຶກສາຫາລືກັບຄູ່ຂອງເຮົາ
ເພາະທ່ານ ແລະ ຄູ່ຂອງທ່ານອາດບໍ່ໄດ້ຢູ່ນຳກັນ ຕອນທ່ານພົບປະສັງສັນກັບບຸກຄົນ ຫລື ຄອບຄົວ, ມັນສຳຄັນທີ່ຈະປະສານງານ ແລະ ປຶກສາຫາລືນຳກັນ ເມື່ອພວກທ່ານສະແຫວງຫາການດົນໃຈ ໃນຖານະທີ່ເປັນຄູ່ກັນ. ຕໍ່ໄປນີ້ແມ່ນຄຳຖາມບາງຢ່າງ ເພື່ອໃຫ້ພິຈາລະນາ:
-
ພວກທ່ານຈະເວົ້າລົມກັນໃນວິທີໃດ ແລະ ເລື້ອຍປານໃດ ໃນຖານະທີ່ເປັນຄູ່ກັນ?
-
ພວກທ່ານແຕ່ລະຄົນຈະໃຊ້ຄວາມເຂັ້ມແຂງສ່ວນຕົວ ເພື່ອປະຕິບັດສາດສະໜາກິດຕໍ່ຄວາມຕ້ອງການຂອງຄອບຄົວ ຫລື ບຸກຄົນໃນວິທີໃດ?
-
ມີສິ່ງໃດແດ່ທີ່ທ່ານໄດ້ຮຽນຮູ້, ມີປະສົບການໃດແດ່ທີ່ທ່ານເຄີຍມີ, ແລະ ມີການກະຕຸ້ນໃດແດ່ທີ່ທ່ານເຄີຍໄດ້ຮັບ ນັບຕັ້ງແຕ່ທ່ານໄດ້ກ່າວກ່ຽວກັບບຸກຄົນ ຫລື ຄອບຄົວ ເທື່ອແລ້ວນີ້?
ການປຶກສາຫາລືກັບຄົນອື່ນທີ່ໄດ້ຖືກມອບໝາຍ
ມັນອາດເປັນສິ່ງດີ ທີ່ຈະເວົ້າລົມກັບຄົນອື່ນຜູ້ໄດ້ຖືກມອບໝາຍ ເພື່ອໃຫ້ປະຕິບັດສາດສະໜາກິດຕໍ່ບຸກຄົນ ຫລື ຄອບຄົວດຽວກັນກັບທ່ານ ເປັນບາງຄັ້ງບາງຄາວ.
ການຕິດຕໍ່ເພື່ອແກ້ໄຂການທ້າທາຍ
ແອວເດີ ຈີ ຫົງ (ແຊມ) ວອງ ແຫ່ງສາວົກເຈັດສິບ ນຳໃຊ້ເລື່ອງລາວໜຶ່ງ ຈາກ ມາຣະໂກ 2 ຕໍ່ວັນເວລາຂອງເຮົາ ເພື່ອສະແດງໃຫ້ເຫັນເຖິງການປຶກສາຫາລືນຳກັນ ໄດ້ເຮັດໃຫ້ເປັນໄປໄດ້ ສຳລັບສີ່ຄົນ ເພື່ອຫາວິທີທີ່ຈະໃຫ້ຜູ້ຊາຍງ່ອຍຄົນໜຶ່ງໄປຢູ່ຕໍ່ພຣະພັກຂອງພຣະເຢຊູໄດ້.
“ມັນອາດເກີດຂຶ້ນຈັ່ງຊີ້,” ແອວເດີ ວອງ ໄດ້ກ່າວ. “ມີສີ່ຄົນໄດ້ມາເຮັດໜ້າທີ່ມອບໝາຍຈາກອະທິການຂອງເຂົາເຈົ້າ ເພື່ອຢ້ຽມຢາມ, ຢູ່ທີ່ບ້ານຂອງຊາຍຜູ້ເປັນງ່ອຍ. … ຢູ່ໃນການປະຊຸມສະພາຫວອດເທື່ອຜ່ານມາ ຫລັງຈາກໄດ້ປຶກສາຫາລືກັນເລື່ອງຄວາມຕ້ອງການຂອງຄົນໃນຫວອດ, ອະທິການໄດ້ມອບໝາຍໃຫ້ ເອື້ອມອອກໄປ ‘ຊ່ວຍກູ້’. ສີ່ຄົນດັ່ງກ່າວໄດ້ຮັບໜ້າທີ່ໃຫ້ໄປຊ່ວຍຊາຍຄົນນີ້. …
“[ເມື່ອເຂົາເຈົ້າໄດ້ມາເຖິງ ເຮືອນທີ່ພຣະອົງສັ່ງສອນຢູ່,] ຫ້ອງນັ້ນໜາແໜ້ນຫລາຍ. ເຂົາເຈົ້າເຂົ້າທາງປະຕູບໍ່ໄດ້. ຂ້າພະເຈົ້າແນ່ໃຈວ່າ ເຂົາເຈົ້າໄດ້ພະຍາຍາມທຸກສິ່ງທີ່ເຂົາເຈົ້າສາມາດຄິດຂຶ້ນມາໄດ້, ແຕ່ເຂົ້າໄປບໍ່ໄດ້. … ເຂົາເຈົ້າໄດ້ປຶກສາຫາລືກັນວ່າຊິເຮັດຈັ່ງໃດຕໍ່—ຊິພາຄົນໄປຫາພຣະເຢຊູຈັ່ງໃດ ເພື່ອລາວຊິໄດ້ຮັບການປິ່ນປົວ. … ເຂົາເຈົ້າໄດ້ຄິດຫາວິທີ—ບໍ່ແມ່ນເລື່ອງງ່າຍທີ່ຈະເຮັດ, ແຕ່ເຂົາເຈົ້າໄດ້ເຮັດຕາມໂລດ.
“… ‘ພວກເຂົາຈຶ່ງໄດ້ຮື້ຫລັງຄາຊື່ບ່ອນທີ່ພຣະອົງພວມສັ່ງສອນຢູ່ນັ້ນ: ຄັນຮື້ເປັນປ່ອງແລ້ວ ພວກເຂົາກໍຢ່ອນຄົນງ່ອຍທີ່ຢູ່ເທິງທີ່ນອນຂອງລາວລົງມາ’ (ມາຣະໂກ 2:4). …
“… ‘ເມື່ອພຣະເຢຊູໄດ້ເຫັນຄວາມເຊື່ອຂອງຄົນເຫລົ່ານີ້ ພຣະອົງກໍກ່າວແກ່ຄົນງ່ອຍວ່າ ລູກເອີຍການບາບຂອງເຈົ້າໄດ້ຮັບອະໄພແລ້ວ’ (ມາຣະໂກ 2:5).”2
ການເຊື້ອເຊີນໃຫ້ກະທຳ
ແອວເດີ ດີເດີ ແອັຟ ອຸກດອບ ແຫ່ງກຸ່ມອັກຄະສາວົກສິບສອງ ໄດ້ຊຸກຍູ້ວ່າ,“ໃຫ້ປຶກສາຫາລືນຳກັນ, ໃຊ້ແຫລ່ງທັງໝົດທີ່ມີໃຫ້, ສະແຫວງຫາການດົນໃຈຈາກພຣະວິນຍານບໍລິສຸດ, ທູນຂໍການຢືນຢັນຈາກພຣະຜູ້ເປັນເຈົ້າ, ແລະ ແລ້ວໃຫ້ເລີ່ມຕົ້ນລົງມືເຮັດວຽກງານ.
“ຂ້າພະເຈົ້າສັນຍາກັບທ່ານວ່າ: ຖ້າຫາກທ່ານຈະເຮັດຕາມແບບແຜນນີ້, ທ່ານຈະໄດ້ຮັບການນຳພາພິເສດໂດຍສະເພາະ ທີ່ຈະຮູ້ຈັກວ່າ ຄົນໃດ, ສິ່ງໃດ, ເມື່ອໃດ, ແລະ ບ່ອນໃດ ທີ່ທ່ານສາມາດຮັບໃຊ້ ໃນວິທີທາງຂອງພຣະຜູ້ເປັນເຈົ້າໄດ້.”3
© 2018 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/17. ການແປໄດ້ຮັບອະນຸຍາດ: 6/17. ແປຈາກ Ministering Principles, September 2018. Laotian. 15052 331