Osisecheklel Omesiou, September 2018

Kaingeseu ra Uldasu el kirel a Lousbech

Ng diak a belkul di le kau el tang el meruul er ngii. A kaingeseu ra uldasu a sebechel meskau a ngesou el mousbech el mo olngeseu er a rebebil.

A Dios a mla omekedong er kau el mo mesiou er a chad malechub a telungalek er a ikelesia lokiu a ikel lousbech. Ng mekera obo modengei aikel lousbech? A osisecheklel a kaingeseu ra uldasu, el ngii a di mla loruul er ngii er a Ikelesia, sei a kiis.

Sel bo de merek el mesaod a ikel domes eng kired el kaingeseu ra uldasu el kirel, e bo domes a:

1. Kaingeseu er a uldasu lobengkel a Chedam er a Babeluades.

2. Kaingeseu ra uldasu lobengkel a mlengilt el chad me a telungalek.

3. Kaingeseu ra uldasu lobengkel a kldemed.

4. E kaingeseu ra uldasu lobengterir a re mlengilt el mora osisiu el chad malechub a telungalek

Kaingeseu er a uldasu lobengkel a roungerachel er kid a dirrek el klou a ututelel. A merael mei el babier er a Osisecheklel a Omesiou el ngara Liahonaa mo omes er a klaingeseu ra uldasu lobengkel a roungerachel me a dirrek el sel mo teleletel a doker a ker el ngar a omesiou.

Ngera Kede Kaingeseu ra Uldasu el kirel

Sel dungil medengei a lousbech sei e a klou a ultutelel er a omesiungel a ta ma tang. Eng di ngera el bedengel a ngesou a lousbech, ke le el ngarngii a kmong ngerang el diak el dil ikel lousbech a kired el mo medengei?

A ikel usbechall a sebechel betok el bedengel. Tirkel dosiou er tir a locha chelbangel a ringel er a reng, tekingel a udoud, bedenged, skuul, ma lmuut el bebil. A bebil er a usbechall a orechudel er a kuk bebil. A bebil a sebeched el ngosuterir; e a bebil a locha kired el kuk mo osiik a ngesou er a rebebil. Chelsel a urered el mo olngeseu a ulsbechall er a klechad, e lak mobes el kmo a okedonged elmo mesiou a uldimukl er ngii olngeseu er a rebebil el merael el moungil er tial rael er a telbiil, mengedmokl e melai a chedaol ruoll er a priesthood el kirel a diak a ulebengelel klengar.

A lmuut el dechelel a kaingeseu ra uldasu el kirel a lousbech a chad malechub a telungalek, e ng kired lomes el mo medengei a le mesisiich er ngii. Ngera ikel kuk diak lousbech a ngesou el kirel? Ngera ikel sebecherir me a sengk el lolab el ngii a sebechel lomekngeltengat er a rebebil? Ngera ikel kuk sebecherir el kudmokl el mo meleketek er a rengedel a Dios? A ikel le msisiich er ngii a chad a locha dirrek el klou a ultutelel bo dungil medengei el uaikel le ngesonges er ngii.

Kaingseseu ra Uldasu lobengkel a Chedam er Babeluades

Sel tara kmal techetechel a klaumerang er kid a kmo a Chedam er a Babeluades a mengedecheduch el mora rengelekel (mesa Tebechelel a Klaumerang 1:9). Sel de nguu a beches el ngerachel el mo mesiou er a tara chad, eng kired el kaingeseu er a uldasu lobengkel a Chedam er a Babeluades lokiu a nglunguuch, losiik a dmolech el ues me a klemedengei el kirel a ngelsengesir me a klisichir. A teletael er a klaingeseu ra uldasu lokiu a nglunguuch a kirel melemolem el rokir sel temed el mlengilt el mesiou.

Kaingeseu er a uldasu lobengkel a derta el Chad me a Telungalek

Sel mo teletelel me a temel el bo domes er a chad me a telungalek el bla demokedong el mo mesiou er tir a sebechel kakerous el di mo ultuil er a ngarngii el teletael, eng di sel mo kaingeseu er a uldasu el mora chad malechub a telungalek a klou a ultutelel er a omeleketek el deleuill e mo ungil medengei a lousbech, uldimukl er a teletael el tir a sorir el mo ngmai a ngesou. A bebil er a ker a sebechel mo uriul dil mereko le mukdubech a ungil deleuill . Meng diak el dil chimong a meral omerelel, ka bo momes a ikal beldukl er riou.

• Bo modengei el kmo ngua ngera mo teletelel e oingera sorir el taem el bo momes er tir.

• Bo modengei a sorir me a bla el ruul.

• Bong lolab a uldasu el kmo ke mekera obo molngeseu, e moker a uldesuir.

Sel de teketekii a klaumerang, e bo momdasu a mesaod a lousbech a chad malechub a telungalek. Moker a ker sel mnguu a odbechel Chedaol Reng.¹ El uaitiang:

• Ngera olibesongel el chelbangel?

• Ngera moktek er a tang malechub a telungalek? Tiakid okesiu, te sorir el moungil el meruul er a ongdibel er a telungalek, malechub a mo mesisiich er a siungel a klengar er tir?

• Ng mekera dolngeseu er tir er a moktek er tir me a ikel olibesongel?

• Ngera merael mei el chedaol ruoll er a klengar er tir? Ng mekera de ngosuterir el mengedmokl el kirel?

Lak mobes el mo omesterir a ngesou, el uai a, “Oingera el kebesengei er chelechal sandei eng sebechemam el ngmai a belsiliu el mei? Sel diak lulterekokl el oldars, el uai a, “Di bo mouchais a le ngar ngii a ngera el sebecham el rulii,” a diak el sal lungil.

Kaingeseu er a Uldasu lobengkel a Kldemed

Le kau me a kldemem a diak ko blechoel el dmak sel bo momes er a chad malechub eng telungalek, meng kmal lungil bom kaudengei e bom dak el kaingeseu er a uldasu sel mosiik a ulekrael el dmak loureor. A ikakid a bebil er a ker el sebechem el mo omes:

• Ko mo mekerang e oingerang e komo chadecheduch le kemiu el dmak el meruul ra ureor ?

• Ng mekera derta er kemiu a mo mousbech a klisichiu el mo mesiou er a telungalek malechub a lousbech a chad?

• Ngera obla msuub, ngera omngilai, e ngera el odubech obla mngai er a uriul er a omkadecheduch el kirel a chad malechub a telungalek?

Kaingeseu er a uldasu lobengerir a Rebebil er a mla Mengilt

Ng locha ungil sel bebil ra taem e bom kadecheduch lobengterir tirke el dirrek el mla mengilt el mo mesiou er a osisiu el chad malechub a telungalek el kau a mesiou er tir.

Chadecheduch el mo Melubet a Olibesongel

Elder Chi Hong (Sam) Wong er a Rokeuid a ulusbech er a dilubech el tekoi el ngara Markus 2 mo er chelechal taem el mlolecholt er a teletelel a dmak el kaingeseu er a uldasu el ngii a relii meng mlo sebechel a reteua el chad el metik er a rael el moba chad el britel el mera medal a Jesus.

“Ng ual dilubech el ua tiakid a teletelel,” dilung a Elder Wong. “Re teua el chad a milruul er a ngerchelir el bilsterir a bisop el mo oldingel, er a blil, a chad el ngii a smecher el britel. … Sel dirk mla er ngii el miting er a roungerachel er a ikelesia, e sera bol merek el kaingesei er a uldasu er a ikel lousbech a ikelesia, e a bisop e milsterir a urerir el mo ‘olsobel.’ Tirka el teuang a milengilt el mo olngeseu er ngika el chad. …

“[Sera lebong er tia el blai el bla er ngii a Jesus,] eng kmal mle meseked a chelsel a blai. Ng dimlak el sebechir el soiseb loak a chesimer. Ak medengei el kmo te mlo ra ikel rokui el sebechir el mdasu el tekoi, eng di ng meral dimlak el sebechir el soiseb. … Te dilak el kaingeseu er a udasu er a boloruul—el mo obang ngkal chad el mora Jesus Kristo el mo omekungil er ngii. … Te ngiluu a uldasu—el diak el beot el tekoi, eng di te rirelii.

“… ‘Te milkisii a chadou el mla er bebul: me sera le ngebetii, e te mle choimimii a dukellel ngika el smecher el britel a mla er ngii el milchiuaiu’ (Markus 2:4). …

“… ‘A Jesus er a lesa klaumera er tir, eng dilu er ngika el smecher ra britel, Rungalek, a kngtim a mla mesuld’ (Markus 2:5).”²

Ongit el mo Meruul

Elder Dieter F. Uchtdorf er a Chelechad er a Teruich me a Terung el Apostol a ullerrimel, “Bom dak el kaingeseu er a uldasu, mousbech a rokui el ngar ngii er kemiu, molai a ulekrael er a Chedaol Reng, molengit er a Rubak mel beskau a ulterekokl el nger, e okor em iuil a chimal a bilem a bo moureor.

“Ak meskau a yaksok: alsekum me ke oltirakl er tial teletael, e ke mo ngmai a ulterekokl el ulekrael el kirel a techang, ngerang, oingerang, me a ngar ker el meruul loak a rolel a Rubak.”³

© 2018 lokiu a Intellectual Reserve, Inc. Urrekodel a rokui el klisiich.Milluches er a USA.Kengei er a English: 6/17. Kengei er a oidel: 6/18. Oidel a Ministering Principles, September 2018. Palauan. 15052 881

Uleklatk

1. Mesa Preach My Gospel: A Guide to Missionary Service (2004), 183.

2. Chi Hong (Sam) Wong, “Rescue in Unity,” Liahona, Nov. 2014, 14–15.

3. Dieter F. Uchtdorf, “Providing in the Lord’s Way,” Liahona, Nov. 2011, 55.

A moktek er a mla meluches el kirel “Osisecheklel Omesiou” a mo olngeseu er kid el mo meduch el omekerreu er a ta me a tang—e diak el kired louchais er ngii el uai a le klumech sel doldingel. Sel dorael el mo medengelterir tirka el dosiou er tir, ea Chedaol Reng a mo odbechid el mo medengei aikel klumech el lousbech el mo obengkel a ulekkereuid me a klechubechub er kid.

Klisichel a Kaingeseu er a Uldasu

“Alsekum eng soam el meruul er a kmong ngerang el mengai el moungil, eng kirem el mo oltobed a uldasu el kirel,” ng millekoi a President M. Russell Ballard, Acting President er a Chelechad er a Teruich me a Terung el Apostol. “Sel de bo [doruul] el uaisei, e kede nguu a chedaol ngesou el lmuut el mesisiich malechub eng mo klungiaol el ngii a redechel a dmak el meruul malechub eng klaingeseu, el redechel a berikt er a le dil blel imol chad ” (ngara R. Scott Lloyd, “Counseling with Councils Is Lord’s System, Elder Ballard Declares,” Jan. 11, 2017, news.lds.org; “Strength in Counsel,” Ensign, Nov. 1993, 77).

A meleketek a deleuill a dirrek el klou a ultutelel el tebedechel a dmak el kaingeseu er a uldasu. Dirrek el mesa lluches el babier el kirel a Osisecheklel Omesiou “Meleketek a Meklou a Belkul el Deleuill,” el ngara August 2018 el ngara Liahona, ra page 6.