Parau tumu nō te aupurura’a, Tītema 2018

Fa’a’ite atu tē vai nei tō tātou māna’ona’ora’a ia rātou

Tē vai nei e rave rahi roa mau rāve’a nō tātou nō te fa’a’ite atu ē, tē vai nei tō tātou māna’ona’ora’a i te ta’ata, i te tau Noela iho ā rā. E nehenehe e parau atu, e hāpono atu, e pāpa’i atu, e hōro’a atu, e ’ōpere atu, e pure atu, e tunu atu, e hīmene atu, e tauahi atu, e ha’uti atu, e tanu atu ’aore rā e tāmā atu. E tāmata noa atu.

Te fa’a’itera’a i te here i te tahi atu ta’ata ’o te pū mau o te aupurura’a. ’Ua parau te peresideni rahi nō te Sōtaiete Tauturu, ’o Jean B. Bingham ē : « E rave-hō’ē-hō’ē-hia te aupurura’a mau, ma te tūra’ihia e te here… Ma te tūra’ihia e te here, e tupu te mau temeio, ’e e ’itehia ia tātou te mau rāve’a nō te fa’aho’i mai i tō tātou mau tuahine e taea’e « māuiui » i roto i te tauahira’a mau o te ’evanelia a Iesu Mesia. »¹

Te fa’a’itera’a i te ta’ata ē, tē vai nei tō tātou māna’ona’ora’a ia rātou, e tuha’a tumu ïa nō te fa’atupura’a i tō tātou aura’a ’e ’o rātou. Terā ta’ata rā tāna huru ’apora’a i te poro’i ’e terā ta’ata tāna. Nō reira, nāhea e ti’a ai ia tātou ’ia fa’atae au atu i tō tātou here i te ta’ata, ’ia au i tāna huru ’apora’a ’e tōna huru aura’a ? Teie te tahi mau rāve’a nō te fa’a’ite atu ē, tē vai nei tō tātou māna’ona’ora’a ia rātou, ’e te tahi mau mana’o nō te ha’amata ’outou iho i te feruri i te reira.

E parau atu

I te tahi taime ’aita e rāve’a mono nō te parau atu i tō ’outou mana’o nō te hō’ē ta’ata. Tē vai nei ïa te paraura’a atu tō ’outou vaha ē ’ua here ’outou ia rātou, tē vai ato’a nei rā tē fa’a’itera’a i te mea tā ’outou e fa’ahiahia nei ia rātou ’aore rā tā ’outou e ha’apōpou mau nei. E tauturu teie huru fa’a’itera’a i te ha’apūai i te mau aura’a. (Hi’o Ephesia 4:29.)

E ’imi i te hō’ē taime au nō te fa’a’itera’a i terā ta’ata i tō ’outou fa’ahiahia i te hō’ē o tōna mau pūai.
E tāpe’a atu i tōna vāhi, e pi’i atu ’aore rā e hāpono atu i te hō’ē rata uira, i te hō’ē poro’i niuniu ’aore rā i te hō’ē tāreta e parau nei ē tē māna’o ra ’outou iāna.

Fārerei

Te fa’ata’ara’a i te taime nō te paraparaura’a ’e nō te fa’aro’ora’a i te hō’ē ta’ata, e rāve’a pūai ïa nō te fa’a’ite ē tē ha’afaufa’a nei ’outou iāna. Tupu noa atu te fārereira’a i te fare, i te purera’a ’aore rā i te tahi atu vāhi, e rave rahi ta’ata ’o te hina’aro e paraparau i te hō’ē ta’ata. (Hi’o Mosia 4:26; PH&PF 20:47).

Mai te au i te mau hina’aro o terā ta’ata, ’a tārena i te hō’ē fārereira’a. ’A rave i te taime nō te fa’aro’o maita’i ’e nō te māramarama maita’i i tōna huru orara’a.
Mai te peu e mea fifi ’ia fārerei i te ta’ata i te fare nō te ātea, nō te tū’ati-’ore-ra’a te reira i te peu tumu ’aore rā nō te tahi atu tumu, e nehenehe e hi’o i te hō’ē taime nō te fārerei i muri mai i te purera’a.

Tāvini ma te hō’ē ōpuara’a

E vai ara i te mau hina’aro o te ta’ata ’aore rā te ’utuāfare. Nā te tāvinira’a i te vāhi hina’arohia e fa’a’ite ē, tē vai nei tō tātou māna’ona’ora’a ia rātou. E ’āmui te reira i nā hōro’a faufa’a rahi nō te taime ’e te tauto’ora’a ferurihia. « Nā te mau tāvinira’a ha’iha’i e fa’atupu i te mau hope’ara’a pūai i ni’a ia vetahi ’ē », tē nā reira ra te tuahine Bingham.²

Pūpū i te tauturura’a nō te ha’apūai atu i te ta’ata ’aore rā te ’utuāfare, mai te ha’apa’ora’a i te tamari’i ’ia haere nā metua i te hiero.
’Imi i te mau rāve’a nō te ha’amāmā atu i te hōpoi’a ’ia teimaha roa rātou i te mau tītaura’a o te orara’a, mai te tāmāra’a i te mau ha’amāramarama fare, te fa’ahaerera’a i te ’ūrī nā rāpae ’aore rā te tauturura’a i te ’atu’atu i te ’āua.

Rave ’āmui i te mau ’ohipa

Tē vai nei te ta’ata e’ita e fa’ahoa mai nā roto i te mau ’āparaura’a rahi. Nō vetahi, e tupu te fa’ahoara’a nā roto i te ’itera’a mai i te mau ’ohipa auhia e ’ōrua to’opiti, ’e nā roto i te haere-’āmui-ra’a e rave i te reira mau ’ohipa. ’Ua a’o mai te Fatu « ’ia vai noa i pīha’i iho… ’e ’ia fa’aitoito [ho’i] » (PH&PF 20:53) i tō tātou mau taea’e ’e mau tuahine.

E haere ’āmui e ori haere, e fa’anaho i te hō’ē ha’uti ’aore rā e fa’ata’a i te hō’ē taime nō te fa’a’eta’eta i te tino.
E tāvini ’āmui i roto i te tahi ’ohipa tōtauturu o te ’oire ’aore rā a te ’Ēkālesia.

Pūpū i te hō’ē tao’a hōro’a

I te tahi taime, ’aita i rahi roa te taime ’aore rā te mau rāve’a nō te rave ’āmui i te hō’ē ’ohipa. E rave rahi ta’ere, e tāpa’o nō te māna’ona’ora’a ’e te aroha te pūpūra’a i te tao’a hōro’a. E nehenehe te tahi noa tao’a hōro’a iti i te hō’ē taime e fa’a’ite i tō ’outou hia’a’i ’ia fa’atupu i te aura’a maita’i a’e. (Hi’o Maseli 21:14.)

Rave mai i tā rātou monamona au roa a’e.
Fa’a’ite i te hō’ē fa’ahitira’a parau, hō’ē ’īrava ’aore rā te tahi poro’i tā ’outou e mana’o ra e riro ’ei maita’i nō rātou.

Hō’ē’ohipa nō te here

’A mātau noa ai ’outou i te mau ta’ata tā ’outou e aupuru nei ’e ’o tā ’outou e ’imi nei i te fa’aurura’a, e ’apo ta’a ’ē mai ’outou i te rāve’a nō te fa’a’ite i tō ’outou here ’e i tō ’outou māna’ona’ora’a ia rātou tāta’itahi.

Tē fa’ati’a ra ’o Kimberly Seyboldt nō Oregon (Marite) i te ’ā’amu nō te ’imira’a i te fa’aurura’a ’e te pūpūra’a i te tahi mau tao’a hōro’a nō te fa’a’ite i te here :

« I te taime e hi’o vau ē tē huti ra te orara’a iā’u i raro, e ti’a vau i ni’a nō te hāmani i te faraoa tūtini, e va’u a’e faraoa. Te mea ta’a ’ē tā’u e ’āno’i i roto, ’o te pure marū ïa tā’u e pūpū i te taime tunura’a, nō te ’ite ē, ’o vai mā tei hina’aro i teie faraoa. Mea nā reira vau i te mātau-maita’i-ra’a i te mau ta’ata i tō mātou vāhi, nā te faraoa tūtini i fa’atomo iā’u i roto i tō rātou fare ’e tō rātou orara’a.

« I te hō’ē mahana nō te tau ve’ave’a, ’ua tāpe’a vau i te hō’ē vāhi tē ho’o ra te hō’ē ’utuāfare i te tahi mau mora (mûre) i te pae purūmu. ’Aita vau i hina’aro i te mora, ’ua ’ana’anatae roa rā terā tamāroa pārarai i te vāhi ho’ora’a i te ’itera’a mai iā’u, ma te mana’o ē ’o vau te tahi hōani. ’Ua ho’o mai au i te tahi mora, e tao’a hōro’a ato’a rā tā’u nāna. E piti faraoa tā’u i hōro’a nāna. ’Ua fāriu ’oia i ni’a i tōna metua tāne nō te hi’o ē, e fāri’i ānei, i muri iho ’ua nā ’ō atu ’oia : ‘’A hi’o na e pāpā, i teienei e mā’a tā tātou nō teie mahana’ ’Ua ’ī roa a’era vau i te māuruuru nō teie taime i te fa’a’itera’a i tō’u here nā roto i te rāve’a ’ōhie. »

ʼUa tāparu Elder Jeffrey R. Holland nō te pupu nō te Tino ’Ahuru Ma Piti ’āpōsetolo : « ’Ia haere atu te mau tāne ’e te mau vahine—’e te feiā ’āpī tamāroa ʼe tamāhine pa’ari ri’i—ma te fafaura’a hōhonu atu ā i roto i tō rātou ’ā’au nō te aupuru te tahi i te tahi, ma te tūra’ihia e te here mau o te Mesia nō te rave i te reira… ’Ia ha’a na tātou i pīha’i iho i te Fatu o te ’ō vine, ma te hōro’a i tō tātou ato’a rima tauturu i te Atua ’e Metua, i roto i teie ’ohipa māere rahi tāna i te pāhonora’a i te mau pure, te fa’ataera’a i te tāmāhanahanara’a, te tāmarōra’a i te roimata ’e te ha’apūaira’a i te turi ’āvae paruparu ra. »³

Tē vai nei tō Iesu Mesia māna’ona’ora’a ia rātou

I muri a’e i tō Iesu Mesia fa’ati’ara’a mai ia Lazaro mai te pohe mai, « ’oto ihora Iesu.

« ’Ua parau ihora te ’āti Iuda, ’a hi’o na i tōna aroha iāna ! » (Ioane 11:35–36).

« E aroha ho’i tō’u ia ’outou na », te parau ïa a te Mesia i te mau ’āti Nephi. ’Ei reira, ’ua pi’i ’oia i tō rātou feiā ma’i ’e tei ’ati, tō rātou feiā piri’o’i ’e te matapō, ’e « ’ua fa’aora ’oia ia rātou » (hi’o 3 Nephi 17:7–9).

’Ua fa’a’ite mai te Fa’aora i te hi’ora’a nō tātou i te māna’ona’ora’a ’oia ia vetahi ’ē. ’Ua ha’api’i mai ’oia ia tātou :

« Hina’aro ’oe i tō Atua ia Iehova ma tō ’ā’au ato’a, ’e ma tō vārua ato’a, ’e ma tō mana’o ato’a.

« ’O te ture mātāmua teie ’e te hau i te rahi.

« ’E mai te reira ato’a te piti, e aroha atu ’oe i tō ta’ata tupu, mai tō aroha ia ’oe iho » (Mataio 22:37–39).

’O vai tei hina’aro i tā ’outou aupurura’a ? Nāhea ’outou i te fa’a’itera’a ia rātou ē, tē vai nei tō ’outou māna’ona’ora’a ia rātou ?

© 2018 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/17. Parau fa’ati’a nō te ’īritira’a : 6/17. ’Īritira’a nō Ministering Principles, December 2018. Tahitian. 15056 895