Na iVakavuvuli ni Veiqaravi, Janueri 2019

Na iNaki me na Veisautaka na Noda Veiqaravi

Ni levu tu na inaki ni veiqaravi, na noda sasaga ni veiqaravi e dodonu me kena iusutu na vakatitobutaki ni nodra saumaki na tamata yadua ka yaco me vaka na iVakabula vakalevu cake.

Ni da lomani ira tale eso me vakataka na iVakabula, eda na via vukei ira, me vakataki Koya. Me vaka ni ivakatawa vinaka, sai Koya na ivakaraitaki cecere ni veiqaravi vakaibalebale.

Ena noda vakatotomuria Nona ivakarau ni veiqaravi, sa bibi me nanumi tiko ni Nona sasaga ni loloma, veilaveti, veiqaravi, ka veivakalougatataki e cecere cake na kena inaki mai na kena sotavi walega na leqa. Ka dina sara e kila o Koya na nodra gagadre ni veisiga, ka lomana nodra vakararawataki tu ena gauna oqo. O koya a veivakabulai, veivakani, veivosoti, ka veivakavulici kina. Ia e vinakata o Koya me levu cake na ka e cakava mai na nona vakaceguya walega na karamaca nikua (raica na Joni 4:13–14). E vinakati ira na tu wavoliti Koya me ra muri Koya (raica na Luke 18:22; Joni 21:22), kilai Koya (raica na Joni 10:14; Vunau kei na Veiyalayalati 132:22–24), ka yacova na kedra ituvaki vakalou (raica Maciu 5:48). Sa vakatalega kina nikua (raica na Vunau kei na Veiyalayalati 67:13).

E vuqa sara na sala eda rawa ni vakalougatataki ira kina na tani, ia ni sa inaki ni noda veiqaravi me ra vukei na tani me ra kila na iVakabula ka yaco me vakataki Koya vakalevu cake, eda sa vakanamata tiko ki na siga eda sa na sega kina ni vakavulici ira na wekada me ra kila na Turaga baleta ni da sa kilai Koya kece (raica na Jeremaia 31:34).

Nona Vakanamata na iVakabula e Uabaleta na Gagadre Tubukoso

Eso na tamata era a vakayacora e levu na ka me kauta mai na nodra itokani vei Jisu me vakabulai ena paralasi. E muri a qai vakabula na tamata oqori na iVakabula, ia a kauwai vakalevu cake me vosota nona ivalavala ca (raica na Luke 5:18–26).
Ni ra kauta mai na tamata vua na iVakabula e dua na yalewa dautagane, a vakabulai koya vakayago ena Nona vunauca na veivakacacani. Ia e a gadreva me vakabula koya talega vakayalo, ena Nona kaya vua me “lako, ka kakua tale ni ivalavala ca” (raica na Joni 8:2–11).
Erau a tukutuku vei Jisu o Meri kei Marica ka kaya me lako mai ka vakabula na Nona itokani, o Lasarusa. O Jisu, o koya ka sa vakabulai ira na tamata ena vuqa na gauna, vakadaroya nona yaco yani me yacova ni sa mate o Lasarusa. E kila tu o Jisu na cava e vinakata na matavuvale, ia ena Nona vakabulai Lasarusa mai na mate, sa na vaqaqacotaka na nodra ivakadinadina me baleta na Nona vakalou (raica na Joni 11:21–27).

Na ivakaraitaki cava tale e rawa ni o vakuria ki na lisi oqo?

Na Cava E Rawa Ni Da Cakava?

Ke noda inaki me ra vukei eso me ra yaco me vakataka cake na iVakabula, ena veisau na ivakarau ni noda veiqaravi. Oqo eso na sala e rawa ni tuberi kina noda sasaga ni veiqaravi mai na kilaka oqo.

Vakasama 1: Semata na Veiqaravi vua na iVakabula

Na noda sasaga kece sara ni caka vinaka e yaga, ia e rawa ni da vaqara na madigi me vakavinakataki cake kina noda veiqaravi ena noda semata vua na iVakabula. Me kena ivakaraitaki, kevaka sa tauvimate na matavuvale o veiqaravi tiko kina, e rawa ni veivuke nomu caka kakana yani, ia na nomu ivakaraitaki rawarawa ni loloma e rawa ni vakalevutaki vakavica vata ena nomu ivakadinadina baleta nona loloma na iVakabula ena vukudra. Nomu veivuke ena cakacaka e tautuba ena taleitaki, ia e rawa ni vakaibalebale vakalevu cake kevaka e dua na veivakalougatataki ni matabete.

A vakavulica o Elder Neil L. Andersen ena Kuoramu ni iApositolo Le Tinikarua: “e dua na tamata yalo vinaka e rawa ni vukea e dua me vakavinakataka e dua na taya, kauta e dua na itokani rumu vata vei vuniwai, vakasigalevu vata kei na dua e yalorarawa, se mata mamarau ka vakabula me vakararamataka e dua na siga.

“Ia o koya e dau muria na imatai ni ivakaro ena vakaikuritaka na ivalavala bibi ni veiqaravi oqo.”¹

Vakasama 2: Vakanamata ena Salatu ni Veiyalayalati

Ena nona vosa vei ira na lewenilotu ena imatai ni gauna ni sa Peresitedi ni Lotu, e kaya kina o Peresitedi Russell M. Nelson, “Tikoga ena salatu ni veiyalayalati.” Cakava ka maroroya na veiyalayalati “ena dolava na katuba vakayadua ki na veivakalougatataki vakayalo kei na galala e tu.”²

Ni da Yalododonu Edaidai, eda sa papitaiso, vakadeitaki, ka ciqoma na isolisoli ni Yalo Tabu. Na tagane lewenilotu bula kilikili ena ciqoma na matabete. Eda lako ki na valetabu me baleta noda edaumeni ka vauci vata vakamatavuvale me tawamudu. Na cakacaka vakalotu ni veivakabulai oqo kei na kena veiyalayalati e salavata kaya sa yaga sara vei keda me da yaco kina me vakataki Koya ka me rawa kina ni da tiko vata Kaya.

E rawa ni tiko e dua na itavi bibi me da qarava ena nodra vukei na tani ena salatu oya ni da vukei ira ena nodra rokova nodra veiyalayalati ka vakarau me ra cakava na veiyalayalati ena veisiga ni mataka.³ E rawa vakacava mo vukea na tamata se matavuvale o qarava me ciqoma na veitaravi ni cakacaka vakalotu e gadreva? E rawa ni kena ibalebale oqo noda veivuke ena nona vakarautaki e dua na tama me papitaisotaka na luvena yalewa, me vakamacalataki na veivakalougatataki ni veiyalayalati e tarava, se wasea na sala me vakaibalebale vakalevu cake na vakavoui ni veiyalayalati ni da vakaivotavota ena sakaramede.

Vakasama 3: Veisureti ka Veivakayaloqaqataki

Ena gauna e veiganiti, veivosakitaka vata kei ira ko ni qarava me baleta na nodra saumaki mai kei na nodra sasaga me ra Vakarisito vakalevu cake. Me ra kila na kaukauwa ko raica ka qoroya vei ira. Vakasaqara na vanua era nanuma ni rawa ni ra vakavinakataka ka veivosakitaka na iwalewale e rawa ni o veivuke kina. (Me baleta na ikuri ni noda dau veivakasalataki vata kei ira o na qarava, raica “iVakasala me baleta na Nodra Leqa,” Liaona, Sepi. 2018, 6–9.)

Kakua ni rere mo sureti ira me ra muria na iVakabula ka vakatara Vua me vukea me ra yacova na kedra ituvaki vakalou. Oqo na veisureti ena dau veisautaka na bula, ni sala vata kei na dua na ivakaraitaki ni nomu yalodei vei ira kei na nomu vakabauti Koya.

Ono na Sala E Rawa ni da Vukei Ira kina Eso me ra Toro Yani vei Karisito

Oqo eso na vakatutu baleta nodra tokoni eso me vakavinakataki nodra bula ka toso ena salatu ni veiyalayalati. (Raica na Vunautaka na Noqu Kosipeli, wase 11, me baleta na vakasama tale eso.)

Wasea Na qaqarauni kei na doudou me wasei na ivakarau sa vukei iko kina na iVakabula ni o tovolea mo toro voleka Vua ena kena bulataki na ivakavuvuli ni kosipeli dina ga ni tu na dredre.
Yalataka na kalougata. E gadreva na tamata na vuna veirawai cake me ia kina na veisau mai na vuna me kua kina. Ni vakamacalataki na veivakalougatataki e sala vata kei na dua na cakacaka e rawa ni veirawai vakalevu (raica ni Vunau kei na Veiyalayalati 130: 20–21).
Veisureti. Ni bulataki e dua na ivakavuvuli ni kosipeli ena kauta mai na kena ivakadinadina (raica Joni 7:17) ka veimuataki ki na veisau titobu.⁴ Na veika kece e rawa ni oka kina e dua na veisureti rawarawa me ra cakava e dua na ka ena vukei ira mera torocake.
Tuvanaka vata. Na cava e gadrevi me yaco vei ira me ra rawa ni maroroya na nodra yalayala me ra veisau? Ko na veivuke vakacava? E tiko beka e dua na ituvatuva ni kena gauna?
Veitokoni. Kevaka ena veivuke, tara cake e dua na isema ni veitokoni vakatamata e rawa ni vukea na tamata oqori me dei tiko ka qaqa. Eda gadreva kece e dua e dau veitokoni.
Vakamuria. Wasea vakawasoma na toso. Dau vakanamata tiko ena yavu ia vakavinakataka cake kevaka e gadrevi vakakina. Mo ni dauvosota, cikecike, ka veivakayaloqaqataki. Na veisau e rawa ni taura na gauna.

Veisureti meda Cakava

Vakasamataka na sala eso ena nomu sasaga ni veiqaravi—lelevu kei na lalai—e rawa ni vakatitobutaka nodra saumaki mai eso ka yaco me vakataka cake na iVakabula.

© 2019 mai na Intellectual Reserve, Inc. All rights reserved. Tabaki e Amerika. Vakadonui me vaka-Valagi: 6/18. Vakadonui me vakadewataki: 6/18. Vakadewa ni Ministering Principles, January 2019. Fijian. 15762 858