Lub Hom Phiaj uas Yuav Hloov Peb txoj Kev Txhawb Pab

Txawm muaj ntau lub hom phiaj ntawm txoj kev txhawb pab los, peb yuav tsum siv zog mus txhawb pab vim peb xav pab lwm tus hloov siab los ntseeg ntxiv thiab hloov los ua neeg zoo li tus Cawm Seej ntxiv.

Thaum peb hlub lwm tus ib yam li tus Cawm Seej hlub, peb xav pab lawv ib yam li Nws tau pab lawv. Vim Nws yog tus Tswv Yug Yaj Zoo, Nws yog tus uas coj yam ntxwv zoo tshaj plaws txog kev txhawb pab tiag tiag.

Thaum peb ua kev txhawb pab li Nws, yeej yog ib qho tseem ceeb kom nco qab hais tias thaum Nws hlub, txhawb nqa, pab, thiab foom koob hmoov rau lwm tus, nws lub hom phiaj yeej tsis yog kom pab lawv tam sim ntawd xwb. Muaj tseeb tiag Nws paub tias niaj hnub lawv xav tau dab tsi thiab nws pab lawv nyuaj siab thaum lawv raug txom nyem. Yog li ntawd Nws tau kho, pub mov, zam txim, thiab qhia lawv. Tiam sis Nws yeej xav ua ntxiv tsis yog pab lawv tsis txhob nqhis dej lawm xwb (saib Yauhas 4:13–14). Nws xav kom cov nyob ib puag ncig Nws coj raws li Nws (saib Lukas 18:22; Yauhas 21:22), paub Nws (saib Yauhas 10:14; Lus Qhuab Qhia thiab Kev Khi Lus 132:22–24), thiab muaj peev xwm li Vajtswv (saib Mathais 5:48). Qhov no kuj muaj tseeb niaj hnub no (saib Lus Qhuab Qhia thiab Kev Khi Lus 67:13).

Muaj ntau txoj kev kom pab lwm tus, tiam sis thaum peb lub hom phiaj tseem ceeb tshaj plaws ntawm peb txoj kev txhawb pab yog kom pab lwm tus paub tus Cawm Seej thiab hloov los ua neeg zoo li Nws, peb yuav ua hauj lwm mus txog thaum peb tsis tas qhia peb tus neeg zej zog kom paub tus Tswv vim peb txhua tus yeej yuav paub Nws lawm (saib Yelemis 31:34).

Tus Cawm Seej Saib Xyuas Ntau Dua Li Ib tug Neeg tej Kev Xav Tau Xwb

Ob peb tug neeg twb ua ntau yam kom coj lawv tus phooj ywg mus cuag Yexus kom kho nws txoj kev mob. Thaum kawg tus Cawm Seej tau kho tus txiv neej ntawd, tiam sis Yexus xav zam txim rau nws tej kev txhaum ua ntej (saib Lukas 5:18–26).
Thaum cov neeg coj tus poj niam uas tau deev luag txiv rau tus Cawm Seej, Yexus tsis tau rau txim rau nws es Yexus thiaj li tau cawm nws txoj sia. Tiam sis Yexus kuj xav cawm tus poj niam txoj sia ntawm sab ntsuj plig, es Nws qhia tus poj niam kom mus thiab “tsis txhob ua txhaum ntxiv” (saib Yauhas 8:2–11).
Maivliag thiab Mathas xa moo mus rau Yexus thov kom Nws tuaj kho Nws tus phooj ywg, Laxalus. Yexus, uas twb tau kho neeg coob ntau zaus, twb tsis tuaj mus txog thaum Laxalus tuag lawm. Yexus paub tias tsev neeg ntawd xav tau dab tsi, tiam sis thaum Nws tsa Laxalus sawv hauv qhov tuag rov qab los, Nws ua rau lawv paub tseeb tias Nws yog ib tug Vajtswv (saib Yauhas 11:21–27).

Koj xav txog tej yam ntxwv twg ntxiv rau tej no?

Peb Ua Tau Li Cas?

Yog peb lub hom phiaj yog kom pab lwm tus hloov los ua neeg zoo dua li tus Cawm Seej, ces peb txoj kev mus txhawb pab yuav hloov. Nram qab no yog tej yam uas pab tau peb siv qhov uas peb to taub no thaum peb mus txhawb pab lwm tus.

Tswv Yim 1: Qhia tias Kev Pab Yog Los ntawm tus Cawm Seej

Txhua yam peb ua zoo yeej tsim nyog, tiam sis peb nrhiav tau tej lub cib fim kom pab tau ntxiv thaum peb qhia tias yog los ntawm tus Cawm Seej. Piv txwv hais tias, yog tsev neeg uas koj mus txhawb pab muaj mob, tej zaum ib pluas mov yuav pab lawv, tiam sis tej zaum qhov koj ua kom hlub lawv yuav muaj nqis dua thaum koj ua tim khawv txog tus Cawm Seej txoj kev hlub lawv. Lawv yuav zoo siab thaum koj pab lawv tu nyom, tiam sis tej zaum yuav muaj nqis dua ntxiv yog koj hais tias koj txaus siab foom koob hmoov pov thawj hwj rau lawv thiab.

Txwj Laug Neil L. Andersen los ntawm Pawg Kaum Ob tug Thwj Tim qhia tias: “Ib tug neeg uas siab zoo yeej pab tau ib tug neeg kho lub log, coj ib tug phooj ywg mus xyuas tus kws kho mob, noj su nrog ib tug uas tu siab, los sis luag hnyav thiab hais nyob zoo kom lwm tus zoo siab.

“Tiam sis tus uas ua raws li lo lus txib thib ib yeej yuav ua tej yam tseem ceeb ntxiv rau tej kev pab zoo li no.”¹

Tswv Yim 2: Tsom Ntsoov rau txoj Kev Khi Lus

Thawj zaug uas nw syog tus Thawj Tswj Hwm ntawm lub Koom Txoos, Thawj Tswj Hwm Russell M. Nelson hais lus rau cov mej zeej hais tias, “Cia li raws nraim txoj kev khi lus.” Qhov uas peb ua raws li peb tej kev khi lus “yuav qhib qhov rooj kom nej txais tau tag nrho cov koob hmoov ntawm sab ntsuj plig uas tib neeg txais tau.”²

Peb Haiv Neeg Ntseeg hauv Hnub Nyoog Kawg ua kev cai raus dej, txais kev pom zoo, thiab txais lub txiaj ntsim Vaj Ntsuj Plig Dawb Huv. Cov txiv neej tsim nyog uas yog mej zeej txais lub pov thawj hwj. Peb mus rau lub tuam tsev kom txais peb qhov vaj txiaj ntsim thiab kom peb txais kev khi ua ke ua ib tsev neeg tas mus li. Peb yuav tsum muaj cov kab ke cawm seej no thiab tej kev khi lus no kom peb yuav hloov los ua neeg zoo li Nws peb thiaj li yuav nrog Nws nyob.

Peb muaj ib lub luag hauj lwm tseem ceeb kom pab lwm tus taug txoj kev no thaum peb pab lawv ua raws li lawv tej kev khi lus thiab npaj ua kev khi lus ntxiv thaum yav tom ntej.³ Koj yuav ua li cas kom pab tib neeg los sis ib tse neeg txais txoj kab ke uas lawv xav tau? Tej zaum koj yuav xav npaj ib leej txiv kom muab nws tus ntxhais ua kev cai raus dej, piav txog cov koob hmoov uas los ntawm kev khi lus, los sis qhia txog tej yam uas muaj nqis dua thaum peb rov qab khi lus thaum txais lub cim nco txog.

Tswv Yim 3: Caw thiab Yaum

Thaum tsim nyog ua, sib tham nrog cov uas koj saib xyuas txog lawv txoj kev hloov siab los ntseeg thiab txoj kev hloov los ua neeg zoo li Khetos. Qhia lawv paub tias koj saib lawv tej kev muaj zog thiab koj qhuas lawv. Kawm tias lawv xav li cas txog tej yam lawv ua tau kom ua zoo dua ntxiv thiab sib tham seb koj yuav pab li cas. (Kom paub ntxiv txog kev sib tham ua ke nrog cov uas koj mus txhawb pab, saib “Sib Sab Laj txog tej uas Lawv Xav Tau,” Liahona, Cuaj Hlis Ntuj 2018, 6–9.)

Tsis txhob ntshai caw lawv coj raws li tus Cawm Seej thiab cia Nws pab lawv muaj peev xwm li Vajtswv. Qhov uas koj caw lawv yeej hloov tau lawv lub neej, yog koj qhia lawv tias koj paub lawv ua tau thiab koj ntseeg tus Cawm Seej.

Rau txoj Kev rau Peb Pab Lwm Tus Mus Cuag Khetos

Tej yam nram qab no yuav txhawb nqa lwm tus kom hloov lawv lub neej thiab taug txoj kev ntawm kev khi lus. (Saib Qhia Kuv txoj Moo Zoo, tshooj 11, kom muaj tswv yim ntxiv.)

Qhia. Cia li ua siab loj thiab hais tiag tiag thaum koj qhia tias tus Cawm Seej tau pab koj li cas thaum koj sim los nyob ze dua Nws los ntawm kev ua raws li txoj moo zoo tej ntsiab cai tsis hais thaum raug xwm txheej los yog.
Cog lus tias yuav txais koob hmoov. Tib neeg xav tau ib yam kom lawv xav hloov uas muaj hwj huam ntau dua li tej yam uas ua rau lawv tsis xav hloov. Qhov uas yus piav txog cov koob hmoov uas los ntawm ib yam yus tau ua yeej pab tau lawv xav hloov ntxiv (saib Lus Qhuab Qhia thiab Kev Khi Lus 130:20–21).
Caw. Kev ua raws li ib lub ntsiab cai ntawm txoj moo zoo ua rau yus paub tias lub ntsiab cai ntawd muaj tseeb (saib Yauhas 7:17) thiab ua rau yus hloov siab los ntseeg ntxiv.⁴ Yuav luag txhua zaus koj nrog lawv sib tham tej zaum koj yuav xav caw lawv ua ib yam yooj yim uas pab tau lawv vam meej.
Npaj ua ke. Yuav tsum ua li cas kom pab lawv ua raws li lawv tau cog lus kom hloov siab? Koj yuav pab li cas? Puas tas seem sij hawm kom ua li ntawd?
Txhawb nqa. Thaum twg yuav pab, cia li hais kom ib pawg neeg sib koom tes txhawb nqa tus neeg kom nws xav vam meej. Peb txhua tus xav tau ib tug uas txhawb nqa peb.
Rov qab xyuas. Ib sij qhia tias lawv vam meej li cas. Tsom ntsoov rau koj txoj hau kev tiam sis muab kho thaum twg yuav tsum ua li ntawd. Ua siab ntev, ua tib zoo, thiab txhawb lawv tiag. Yeej yuav tsum siv sij hawm kom hloov tau.

Kev Caw Ua tej Yam

Cia li xav seb tej yam koj ua thaum koj mus txhawb pab lwm tus—tsis hais tej yam loj los yog tej yam me los yog—yuav pab lawv hloov siab los ntseeg thiab hloov los ua neeg zoo li tus Cawm Seej.

© 2019 los ntawm Intellectual Reserve, Inc. All rights reserved. Luam tawm hauv Teb Chaws Amelikas. Pub luam tawm ua lus Akiv: 6/18. Pub txhais ua lus Hmoob: 6/18. Kev txhais Ministering Principles, January 2019. Hmong 15762 295